Lukas 18
18
Zəzəə fə fənkəfən kùm wey kpusə ghi wù saʼ u təsaʼ ghə
1Ambə n tsu fə loʼ fə, Yeso n dza tsu zəzəə fə fənkəfən fən tə dzûmə tə wi tə ni dii tə ghə nə ghə khə ni gɔŋŋə nəŋə tədzəm, buu doʼlə way. 2Tə n dza, “Wù saʼa u təsaʼ u loʼ wə â loʼ tsənu n naʼ i loʼ zə, tə a tsəŋə way Zə̀ kə, khə soʼo way nəŋə i wù zə. 3Wey kpusə u loʼ wə, n loʼ soʼo fu inaʼ, tə n ndòw kuulə tsə n səə wi, dza nə̀, ‘N buʼ kəwɔɔ, laalə nyi tsu n saʼ zuŋ zən, wə bəghəshi mə n wɔɔ kə wù təngəmə wùŋ.’ 4Wù saʼa u təsaʼ wey n taw tuutsə. Ambə n tsuʼ fə loʼ fə, tə n dza tsu n wû u wi wə nə̀, ‘Bə n tsəŋə kə way Zə̀ kə, khə soʼo way nəŋə i wù zə. 5Nya wən weyzən wən bəghə fəmə kuulə kənə mə, mə i laalənu saʼ a wi n jii i dzuŋu zə, n təŋkey, bə n ka gaamə wi, tə i bəghə kuulə kənu ni bə kaa maʼa mə.’” 6Mûkəbii n dza tə ghə nə̀, “Ghaa zow kənu ghəə ghey wù saʼa u təsaʼ wən tə ghəŋŋə ghəə ghən a way tsətsəghə n sə K-a-zə̀ loʼ ni dza a? 7Abə wù tə a loʼ tə wən loʼ ni ghəŋə ighəə tə a loʼ i zey, ghaa moʼlə nə̀ Zə̀ kə i saʼ fuu way tə ghə̂ a wi ghey ghə dey zeelinə n səə wi tsuʼu ntsuʼu ə? 8N kûm dza bənu tə ghaa nə̀, tə i mbadla saʼa funu tə̀ ghə. Ghaa moʼlə nə̀ abə Waa wù sɔŋtsuʼ i bənə tə i koʼo kənu bəghəm i fə̀ŋ zə n kow ghə̂ ghə fa mbi?”
Zəzəə fə fənkəfən bòʼ wù Falasi nsə wù kwɔɔ u màʼlə kə tsow kə
9Yeso n kəm dza ndow zəzəə fə fənkəfən fən tə ghə̂ a loʼ ghə, ghə â tɔʼ khənə nə̀ ghə ngii loʼ tsətsəghə kee koʼo kii ghə̂ a loʼ ghə nə̀, 10“Ghə̂ a loʼ ghə â loʼ tsə kənu, tow u ghə ubəghə, umɔʼ n loʼ nə a loʼ wù Falasi, u loʼ wey n loʼ wù kwɔɔ u kəmàʼlə wə, ghə n nuu kɔʼ ndòw n Ndaw Kəzə̀ i nii zə n Yerosalem ni ndòw gɔŋŋə. 11Wù Falasi wey n sey təmi ndòw n nəŋə wi, zey ndòw ni gɔŋŋə dza, ‘N fuu bə kəzɔŋŋə tə̀ wɔ a Zə̀ kə, nghee tə n mə̂ə way wù n fə kə, n tsi way wù, n badla way ghəə ghə, n taa zaʼa way wey wuŋ tə ghə̂ a loʼ a ghəŋŋənə. N fuu kəzɔŋŋə tə wɔ nə n way dzə tə̀ a loʼ wù kwɔɔ u kəmàʼlə wey tə teynə fey. 12N bam idzuu ntsuʼu nbəghə nə iwən, mə n fu soʼo tsow zuŋ n taŋa fə wən udzəm n khənə.’ 13Wù kwɔɔ u kəmàʼlə wey, n fəd tey n ghab kə, buʼu tsəŋə daŋŋə ni laalə kɔʼ idəŋ nə tə n kwu keeli fə̀ŋ ə wi dza, ‘Zə̀ kə, kwɔɔlə sî zə n kow mə, n loʼ wù bəbə wə.’” 14Yeso n dza tə ghə nə̀, “Â way dzə wù Falasi, â fəd loʼ wù kwɔɔ u kəmàʼlə wən tə â loʼ tsətsəghə n sə kə Kəzə̀. Kuum nə̀, abə wù ney kɔʼlə naŋŋə kɔʼnə wû u wi wə, tə i keeli way ngɔɔmə zə, abə wù fəd zûŋ tsunə wû u wi wə, tə n fəd bə keeli ingɔɔmə, ghə n ney kɔʼlə naŋa kɔʼ wi.”
Yeso buulə aghinətəghə
(Mat 19.13-15; Mak 10.13-16)
15Ghə̂ a loʼ ghə n ney bə waa a ghə n səə Yeso, nə tə fu ghə n buulə zə, nghee tə dzûmə tə Klisto tə koʼ tsu nə sey, ghə n kii naŋa ndòw ghə. 16Yeso n fəd tɔŋɔ bə ghə n səə wi dza, “Zəghə na ghə nə ghə bə n səə mə, kə ghaa nə buu naŋŋə ghə, n təŋkey fɔɔ u Kəzə̀ u loʼ tə ndzoʼo ghə̂ ghən. 17Keeli tsu na nə̀, wù wey tə ney way ghəə a fɔɔ u Kəzə̀ wə tə a loʼ wiinətəghə, tə nə nyi koʼ way fu.”
Yeso shi kpiilə ghi wù kûm u loʼ wə
(Mat 19.16-30; Mak 10.17-31)
18Ngəd ə ghə̂ a Təjuu u loʼ wə n bəb ndòw tə Yeso nə̀, “Wù dii u dzuŋu wə, a loʼ ghə i ghaa zə n khə ni teeli ghəŋŋə ni keeli muu zə itsali ə?” 19Yeso n bəb ndòw tə wi nə̀, “A loʼ kee wə tɔŋɔnə mə nə a loʼ wù dzuŋu wə? A loʼ kə Kəzə̀, tə loʼ nə wù u dzuŋu wə, wù loʼ kəm way.” 20Wə̀ mgbaŋ khənu ghəə ghey laŋ u Kəzə̀ u dzanə nə̀, “Kə wə nə taa zaʼanə wey wə n kee num wə, kə wə nə wey wù, kə wə nə tsɔŋɔnə, kə wə nə badlanə ghəə ghə n tow kə wù, i ngɔɔmə bày wə ghi nay wə.” 21Wù wey n beeli ndow wi nə̀, “Mə n naŋa may laŋ wey udzəm ni ney nuu bə nə n nam təbənu.” 22Nghee tə Yeso zow tsu nə sey, tə n beeli ndòw wi nə̀, “Ghə i loʼ i nam doʼo səənu wə khənə ni ghəŋə, fii may tsu fə wey wə khənə, wə fu ndòw khəə u tii wə tə ghə̂ a laa ghə. Abə wə ghəŋə tsu nə sey, wə i keeli ikum idəŋ. Sey, wə i loʼ ni daŋŋə dzûmə bə mə.” 23Nghee tə wù wən zow tsunə sey, tə n kaʼ ni mow, n təŋkey, tə a ngii kûmnu. 24Nghee tə Yeso koʼ tsunə nə̀ tə mownu, tə n dza nə̀, “I tawnu tə wù kuum wə ni nyi n fɔɔ u Kəzə̀, 25N kùm dza bə tə ghaa nə̀, i buulənu tə̀ nyam i nii i loʼ zə ghə tɔŋŋə nə̀ à loʼ kamel ni nyi tɔɔlə n sə̂ i fəsaʼ, tsəghəshi tə̀ wù kuum wə ni nyi n fɔɔ u Kəzə̀.” 26Ghə̂ ghey ghə â zownə nghee tə Yeso ghɔɔmə nə̀, n bəb ndòw tə̀ wi nə̀, “A baa loʼ ndee nya ni keeli ibəghəshi ə?” 27Yeso n beeli ndòw ghə nə̀, “Ghəə zey i taw tsəghənə wù sɔŋtsuʼ ni ghəŋə loʼ nyaŋi fə ighəə tə̀ Zə̀ kə.” 28Sey, Pita n dza tə wi nə̀, “Koʼo, ghey n ndaw tə ghey tə zəghə, ni dzûmə wɔ.” 29Yeso n dza tə̀ wi nə̀, “I loʼnu isəŋə nə wù wey tə zəghə tsunə ndaw wi, wey wi, waazə a wi ghi bày wi ghi này wi nsə waa a wi ghə bòʼ ghə i fɔɔ u Kəzə̀, 30tə i keeli dzəŋŋənu fə u tii wə n num tə tən, tə buʼ keeli tsəghəshi, tə i keeli soʼo muu zə itsali abə nəŋə i tii i nə bənə.”
Yeso kəm dza zey və i wi
(Mat 20.17-19; Mak 10.32-34)
31Yeso n səŋ təmi ndow ghi tsətəndəghə tə wi tey ighəm nsə ghə̂ ghə abəghə, dza ndow tə ghə nə̀, “A sa ndòw n Yerosalem, ghəə ghey tûm tə Kəzə̀ tə â tɔ̀ɔ naŋanə bòʼ Waa wù sɔŋtsuʼ, khə ni ney kəbənə fu. 32Ghə i ney fu ndòw wi tə ghə̂ ghən ghə way ghə̂ a Təjuu ghə, ghə tsayyə wi, ghə kpaalə wi, ghə i tsə ntəghə n kow wi, 33ghə bwɔd wi, ghə wey tsu wi, n bam zə ntsuʼu ntəghə, tə i zhəm dzəŋŋə bə.” 34Tsətəndəghə tə wi tə n ka zowkeeli ghəə zey tə dzanə. Ghə i tii zə â loʼ ghə i kənyi, sey, ghə n kam way ni zowkeeli ghə i tii zə.
Yeso baŋŋə wù fəbə
(Mat 20.29-34; Mak 10.46-52)
35Nghee Yeso kuʼlə ndownə n Jeriko, wù fəbə u loʼ wə n doʼ fu n ji tə nɔɔnə. 36Ambə tə zow tsu nə̀ nɔɔ kə tsəghənu, tə n bəb nə̀, “A shiə kee?” 37Ghə n dza ndòw tə̀ wi nə̀, “A loʼ Yeso, wù Nazaled tə tsəghənə.” 38Tə n buʼ shi kɔʼ kɔbɔŋ dza, “Yeso waa sali ndaw i Devid, kwɔɔlə sî zə n kow mə.” 39Ghə̂ ghey ghə â ndownə isə n kii ndòw wi dza tə wi nə̀, “doʼo mɔŋ”, tə n fəd baa buʼ shi kɔʼ kəbɔŋ dza, “Waa sali ndaw i Devid, kwɔɔlə sî zə nkow mə.” 40Ambə Yeso zow tsu nə̀, tə n təmmi tsu, dza nə̀ ghə ney bə wi n səə wi. Ambə tə bə nə̀, Yeso n bəb ndòw tə wi nə̀, 41“Wə ləghə nə̀ n ji ngee tə wɔ?” Tə n beeli ndòw wi nə̀, “Mûkəbii, N ləghə ni kəm koʼ təluʼu.” 42Yeso n dza tə wi nə̀, “I koʼo luʼu tə! Bəghəm i fə̀ŋ zə̂zə n wɔ baŋŋə.” 43Sə̂ a wi ghə n daŋŋə chi i kɔʼ, tə n kaʼ ndòw təluʼu ni koʼ, zey ndòw ni dzûmə Yeso, fuu ukali tə Zə̀ kə. Ambə nɔɔ kə aghə̂ key koʼ tsu nə sey, ghə n zey ndòw soʼo ni fu kali u Kəzə̀.
Currently Selected:
Lukas 18: WEH
Highlight
Share
Copy
Want to have your highlights saved across all your devices? Sign up or sign in
© 2022 CABTAL
Lukas 18
18
Zəzəə fə fənkəfən kùm wey kpusə ghi wù saʼ u təsaʼ ghə
1Ambə n tsu fə loʼ fə, Yeso n dza tsu zəzəə fə fənkəfən fən tə dzûmə tə wi tə ni dii tə ghə nə ghə khə ni gɔŋŋə nəŋə tədzəm, buu doʼlə way. 2Tə n dza, “Wù saʼa u təsaʼ u loʼ wə â loʼ tsənu n naʼ i loʼ zə, tə a tsəŋə way Zə̀ kə, khə soʼo way nəŋə i wù zə. 3Wey kpusə u loʼ wə, n loʼ soʼo fu inaʼ, tə n ndòw kuulə tsə n səə wi, dza nə̀, ‘N buʼ kəwɔɔ, laalə nyi tsu n saʼ zuŋ zən, wə bəghəshi mə n wɔɔ kə wù təngəmə wùŋ.’ 4Wù saʼa u təsaʼ wey n taw tuutsə. Ambə n tsuʼ fə loʼ fə, tə n dza tsu n wû u wi wə nə̀, ‘Bə n tsəŋə kə way Zə̀ kə, khə soʼo way nəŋə i wù zə. 5Nya wən weyzən wən bəghə fəmə kuulə kənə mə, mə i laalənu saʼ a wi n jii i dzuŋu zə, n təŋkey, bə n ka gaamə wi, tə i bəghə kuulə kənu ni bə kaa maʼa mə.’” 6Mûkəbii n dza tə ghə nə̀, “Ghaa zow kənu ghəə ghey wù saʼa u təsaʼ wən tə ghəŋŋə ghəə ghən a way tsətsəghə n sə K-a-zə̀ loʼ ni dza a? 7Abə wù tə a loʼ tə wən loʼ ni ghəŋə ighəə tə a loʼ i zey, ghaa moʼlə nə̀ Zə̀ kə i saʼ fuu way tə ghə̂ a wi ghey ghə dey zeelinə n səə wi tsuʼu ntsuʼu ə? 8N kûm dza bənu tə ghaa nə̀, tə i mbadla saʼa funu tə̀ ghə. Ghaa moʼlə nə̀ abə Waa wù sɔŋtsuʼ i bənə tə i koʼo kənu bəghəm i fə̀ŋ zə n kow ghə̂ ghə fa mbi?”
Zəzəə fə fənkəfən bòʼ wù Falasi nsə wù kwɔɔ u màʼlə kə tsow kə
9Yeso n kəm dza ndow zəzəə fə fənkəfən fən tə ghə̂ a loʼ ghə, ghə â tɔʼ khənə nə̀ ghə ngii loʼ tsətsəghə kee koʼo kii ghə̂ a loʼ ghə nə̀, 10“Ghə̂ a loʼ ghə â loʼ tsə kənu, tow u ghə ubəghə, umɔʼ n loʼ nə a loʼ wù Falasi, u loʼ wey n loʼ wù kwɔɔ u kəmàʼlə wə, ghə n nuu kɔʼ ndòw n Ndaw Kəzə̀ i nii zə n Yerosalem ni ndòw gɔŋŋə. 11Wù Falasi wey n sey təmi ndòw n nəŋə wi, zey ndòw ni gɔŋŋə dza, ‘N fuu bə kəzɔŋŋə tə̀ wɔ a Zə̀ kə, nghee tə n mə̂ə way wù n fə kə, n tsi way wù, n badla way ghəə ghə, n taa zaʼa way wey wuŋ tə ghə̂ a loʼ a ghəŋŋənə. N fuu kəzɔŋŋə tə wɔ nə n way dzə tə̀ a loʼ wù kwɔɔ u kəmàʼlə wey tə teynə fey. 12N bam idzuu ntsuʼu nbəghə nə iwən, mə n fu soʼo tsow zuŋ n taŋa fə wən udzəm n khənə.’ 13Wù kwɔɔ u kəmàʼlə wey, n fəd tey n ghab kə, buʼu tsəŋə daŋŋə ni laalə kɔʼ idəŋ nə tə n kwu keeli fə̀ŋ ə wi dza, ‘Zə̀ kə, kwɔɔlə sî zə n kow mə, n loʼ wù bəbə wə.’” 14Yeso n dza tə ghə nə̀, “Â way dzə wù Falasi, â fəd loʼ wù kwɔɔ u kəmàʼlə wən tə â loʼ tsətsəghə n sə kə Kəzə̀. Kuum nə̀, abə wù ney kɔʼlə naŋŋə kɔʼnə wû u wi wə, tə i keeli way ngɔɔmə zə, abə wù fəd zûŋ tsunə wû u wi wə, tə n fəd bə keeli ingɔɔmə, ghə n ney kɔʼlə naŋa kɔʼ wi.”
Yeso buulə aghinətəghə
(Mat 19.13-15; Mak 10.13-16)
15Ghə̂ a loʼ ghə n ney bə waa a ghə n səə Yeso, nə tə fu ghə n buulə zə, nghee tə dzûmə tə Klisto tə koʼ tsu nə sey, ghə n kii naŋa ndòw ghə. 16Yeso n fəd tɔŋɔ bə ghə n səə wi dza, “Zəghə na ghə nə ghə bə n səə mə, kə ghaa nə buu naŋŋə ghə, n təŋkey fɔɔ u Kəzə̀ u loʼ tə ndzoʼo ghə̂ ghən. 17Keeli tsu na nə̀, wù wey tə ney way ghəə a fɔɔ u Kəzə̀ wə tə a loʼ wiinətəghə, tə nə nyi koʼ way fu.”
Yeso shi kpiilə ghi wù kûm u loʼ wə
(Mat 19.16-30; Mak 10.17-31)
18Ngəd ə ghə̂ a Təjuu u loʼ wə n bəb ndòw tə Yeso nə̀, “Wù dii u dzuŋu wə, a loʼ ghə i ghaa zə n khə ni teeli ghəŋŋə ni keeli muu zə itsali ə?” 19Yeso n bəb ndòw tə wi nə̀, “A loʼ kee wə tɔŋɔnə mə nə a loʼ wù dzuŋu wə? A loʼ kə Kəzə̀, tə loʼ nə wù u dzuŋu wə, wù loʼ kəm way.” 20Wə̀ mgbaŋ khənu ghəə ghey laŋ u Kəzə̀ u dzanə nə̀, “Kə wə nə taa zaʼanə wey wə n kee num wə, kə wə nə wey wù, kə wə nə tsɔŋɔnə, kə wə nə badlanə ghəə ghə n tow kə wù, i ngɔɔmə bày wə ghi nay wə.” 21Wù wey n beeli ndow wi nə̀, “Mə n naŋa may laŋ wey udzəm ni ney nuu bə nə n nam təbənu.” 22Nghee tə Yeso zow tsu nə sey, tə n beeli ndòw wi nə̀, “Ghə i loʼ i nam doʼo səənu wə khənə ni ghəŋə, fii may tsu fə wey wə khənə, wə fu ndòw khəə u tii wə tə ghə̂ a laa ghə. Abə wə ghəŋə tsu nə sey, wə i keeli ikum idəŋ. Sey, wə i loʼ ni daŋŋə dzûmə bə mə.” 23Nghee tə wù wən zow tsunə sey, tə n kaʼ ni mow, n təŋkey, tə a ngii kûmnu. 24Nghee tə Yeso koʼ tsunə nə̀ tə mownu, tə n dza nə̀, “I tawnu tə wù kuum wə ni nyi n fɔɔ u Kəzə̀, 25N kùm dza bə tə ghaa nə̀, i buulənu tə̀ nyam i nii i loʼ zə ghə tɔŋŋə nə̀ à loʼ kamel ni nyi tɔɔlə n sə̂ i fəsaʼ, tsəghəshi tə̀ wù kuum wə ni nyi n fɔɔ u Kəzə̀.” 26Ghə̂ ghey ghə â zownə nghee tə Yeso ghɔɔmə nə̀, n bəb ndòw tə̀ wi nə̀, “A baa loʼ ndee nya ni keeli ibəghəshi ə?” 27Yeso n beeli ndòw ghə nə̀, “Ghəə zey i taw tsəghənə wù sɔŋtsuʼ ni ghəŋə loʼ nyaŋi fə ighəə tə̀ Zə̀ kə.” 28Sey, Pita n dza tə wi nə̀, “Koʼo, ghey n ndaw tə ghey tə zəghə, ni dzûmə wɔ.” 29Yeso n dza tə̀ wi nə̀, “I loʼnu isəŋə nə wù wey tə zəghə tsunə ndaw wi, wey wi, waazə a wi ghi bày wi ghi này wi nsə waa a wi ghə bòʼ ghə i fɔɔ u Kəzə̀, 30tə i keeli dzəŋŋənu fə u tii wə n num tə tən, tə buʼ keeli tsəghəshi, tə i keeli soʼo muu zə itsali abə nəŋə i tii i nə bənə.”
Yeso kəm dza zey və i wi
(Mat 20.17-19; Mak 10.32-34)
31Yeso n səŋ təmi ndow ghi tsətəndəghə tə wi tey ighəm nsə ghə̂ ghə abəghə, dza ndow tə ghə nə̀, “A sa ndòw n Yerosalem, ghəə ghey tûm tə Kəzə̀ tə â tɔ̀ɔ naŋanə bòʼ Waa wù sɔŋtsuʼ, khə ni ney kəbənə fu. 32Ghə i ney fu ndòw wi tə ghə̂ ghən ghə way ghə̂ a Təjuu ghə, ghə tsayyə wi, ghə kpaalə wi, ghə i tsə ntəghə n kow wi, 33ghə bwɔd wi, ghə wey tsu wi, n bam zə ntsuʼu ntəghə, tə i zhəm dzəŋŋə bə.” 34Tsətəndəghə tə wi tə n ka zowkeeli ghəə zey tə dzanə. Ghə i tii zə â loʼ ghə i kənyi, sey, ghə n kam way ni zowkeeli ghə i tii zə.
Yeso baŋŋə wù fəbə
(Mat 20.29-34; Mak 10.46-52)
35Nghee Yeso kuʼlə ndownə n Jeriko, wù fəbə u loʼ wə n doʼ fu n ji tə nɔɔnə. 36Ambə tə zow tsu nə̀ nɔɔ kə tsəghənu, tə n bəb nə̀, “A shiə kee?” 37Ghə n dza ndòw tə̀ wi nə̀, “A loʼ Yeso, wù Nazaled tə tsəghənə.” 38Tə n buʼ shi kɔʼ kɔbɔŋ dza, “Yeso waa sali ndaw i Devid, kwɔɔlə sî zə n kow mə.” 39Ghə̂ ghey ghə â ndownə isə n kii ndòw wi dza tə wi nə̀, “doʼo mɔŋ”, tə n fəd baa buʼ shi kɔʼ kəbɔŋ dza, “Waa sali ndaw i Devid, kwɔɔlə sî zə nkow mə.” 40Ambə Yeso zow tsu nə̀, tə n təmmi tsu, dza nə̀ ghə ney bə wi n səə wi. Ambə tə bə nə̀, Yeso n bəb ndòw tə wi nə̀, 41“Wə ləghə nə̀ n ji ngee tə wɔ?” Tə n beeli ndòw wi nə̀, “Mûkəbii, N ləghə ni kəm koʼ təluʼu.” 42Yeso n dza tə wi nə̀, “I koʼo luʼu tə! Bəghəm i fə̀ŋ zə̂zə n wɔ baŋŋə.” 43Sə̂ a wi ghə n daŋŋə chi i kɔʼ, tə n kaʼ ndòw təluʼu ni koʼ, zey ndòw ni dzûmə Yeso, fuu ukali tə Zə̀ kə. Ambə nɔɔ kə aghə̂ key koʼ tsu nə sey, ghə n zey ndòw soʼo ni fu kali u Kəzə̀.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 CABTAL