Matío 24
24
Yɛɛ́so a á ega mbwhʉ́ɛ ŋ́gɛ, mɛ́ e fú eták á Mía Ŋgyā Ndém
(Mlk 13.1-4; Lúk 21.5-7)
1Yɛɛ́so á ghʉ nnɔ̄ŋ efhɔ́ɔ á Mía Ŋgyā Ndém ntúɔ́, ńnɔŋ ŋgʉ̄ɔ, nnɔ yí é tshóte nnɛ̄t mé lezēŋ tsí, ńdé á mbū yí ŋ́gɛ, a ejʉ́ɔ ntií zīi, mɛ́ le lɔ̄k ŋkwɛ́t á Mía Ŋgyā Ndém. 2Yɛɛ́so á lé mé pɔ́p ŋ́gɛ: «Pɛ é pú njʉ́ɔ á Mía Ŋgyā wuɔ mɛ́t ntsem m? Meŋ shúŋɔ á wɛ́ á kwaʼ anuúnē ŋ́gɛ, mɛ́ e pú eshʉʼ eták epwɛt á esī, tɛ tɔ́ a á le zɛ́t ánɛ mmɔʼ nzápne ɛ́. »
Ŋgʉɔ̄ʼ zīi mɛ́ e láʼ eté njhʉ̄ ejʉ́ɔ, tɛ́ Méŋ‑Ŋiŋnɔŋ a eshʉ̄ʼ
(Mlk 13.3-13; Lúk 21.7-19)
3Yɛɛ́so á gʉɔ tɛ nnáŋ á ndo lekwɛ̄t Methʉ́ Olive, nnɔ yí é tshóte nnɛ̄t mé lezēŋ tsí, pɔ́ a pɔ́p é gɔ́ éwú pɔ́plépɔ̄p. Pɔ́ zɛ́tte á yí ŋ́gɛ: «Lɛ eshúŋ á wék afʉʼ zīi, anu zīi o ó lé lā, a láʼa ŋgɔ̄ á ntɔ́kɔ. Akɔ̄ ayiŋne a láʼ etswi á légɛ, o gɔ á mbiíŋ nzem m̄? Akɔ̄ ayiŋne a láʼ etswi á légɛ, ŋgɔŋ e gɔ á emi í?» 4Yɛɛ́so á pwɛt á mbū pɔ́p ŋ́gɛ: «Pɛ epá. Ndɛ́ʼ pɛ ecʉ́ʼ ŋiŋ á ghʉ, pɛ efāa nzhɛ. 5Epuɔ tɛ nzáne é shʉʼ elɔk lezēŋ tsá, éshʉʼ á mvhɔ pɛ, awíɛ awíɛ a enɔŋ ndʉ́ɛ́ ŋ́gɛ, yí mé Nzaʼ‑Ŋkhʉ. Élé épúp, élɔk eghʉ, atʉtʉ epuɔ a efhó ánɛ mɛnzhɛ mbɔŋ ntó. 6Pɛ shʉʼɛ nnáŋ tɛ njúʼ mɛ́ nɔ̄ŋ ŋghítɛ ncu á ntē alāʼ, ńjúʼ mɛ́ nɔ̄ŋ ŋghítɛ ncu yīi é si eshʉ̄ʼɛ, ndɛ́ʼ pɛ epɔ́k. Ecʉɔ etsō mɛ́t é pɔŋteé á lezi mvhɔ ntɔ́k, tɛ́ ŋké le ndɔ̄kɔ ŋ́gɛ, ŋgɔŋ e gɔ ezho emi í. 7Epuɔ taʼ alāʼ é shʉʼ enáŋ tɛ epʉ́ʼɛ nnɛ̄t, égʉɔ elʉɔ́ʼ amɔ̄ʼ. Mmɔʼ efɔ a elū á esī, ńdʉɔ́ʼ mmɔʼ. Afʉɔne a shʉʼ ewhʉ é ejʉʼ ejʉʼ, atsáʼ a epú nzéŋ ncʉ̄ʼne é ejʉʼ ejʉʼ. 8Emuɔ menu mɛ́t tsem, e láʼ egɔ́ páʼ, menzwí yīi, mɔ́ a á si nzīi á lezāŋ á yí lā.
9A shʉʼ egɔ́ épúp, mɛ́ egɔ̄te á wɛ́, ŋ́gyá ŋ́gɛ, mɛ́ enéŋ ŋgʉɔ̄ʼ á athū pɛ, ńzwhíte á wɛ́. Elāʼ elāʼ e shʉʼ epú epa á wɛ́ melaʼ mīi, pɛ é epuɔ pá. 10A láʼ egɔ́ egɔ́, tɛ epuɔ tɛ nzá e ewhʉ̄ á ntē mefa. Emɔ̄ʼ e egɔ̄te emɔ̄ʼ, ŋ́gyá ŋ́gɛ mɛ́ enéŋ ŋgʉɔ̄ʼ á athū pɔ́p. Emɔ̄ʼ e epā emɔ̄ʼ. 11Wɔ táŋ‑mela ŋ́gɛ, pɔ́ é metswi‑ŋke Ndém, e shʉʼ etó tɛ ezáne, éghʉ, atʉtʉ epuɔ a efā nzhɛ. 12Anu tepɔŋ a shʉʼ epú ezá záa, tɛ lelʉɛ epuɔ é le zéŋ ŋgwɛ̄ ŋkɔŋne á mbū emɔ̄ʼ epuɔ ɔ́. 13Táʼ, ŋiŋ yīi a á ŋíŋ ánɛ meŋ, tɛ ndáʼ nzōko, Ndém a eghʉ̄ a etswɛ́t. 14Mɛ́ e láʼ etswi ŋke mbɔŋ wuɔ yīi é cʉteē Lefɔ Ndém, á ntē ŋgɔŋ ntsem. Melāʼ melāʼ e ejúʼ épúp, ńzhɛ́ á légɛ Ndém a á éwú, ŋgɔŋ e elɛ mmī. »
Yɛɛ́so a á ega ntʉ́ɛ́ njhʉ̄ eshúŋɔ ŋgʉɔ̄ʼ zīi e shʉʼ eshʉʼe
(Mlk 13.14-23; Lúk 21.20-24)
15Ntɔŋɔ ajʉʼ aŋwaʼne jʉɔ, a echʉ́ nnɛ̄t njúʼ. Yɛɛ́so á zéŋ ndé ŋ́gɛ: «Pɛ shʉʼɛ njʉ́ɔ mbɔ mɛ́ ŋghʉ̄ anu avhō, á ntē Mía Ŋgyā Ndém, tɛ á nɔ̄ŋ efāŋnɛ ejʉʼ páʼ, ntswi‑ŋke Ndém Ndanía a lɛɛ́ ndʉ́ɛ́ lā, 16epuɔ pīi pɔ́ ŋgɔ́ á Yudéa, pɔ́ elɛ ŋkʉ̄ mbē mé mekwɛ̄t. 17Ŋiŋ yīi a á ŋgɔ́ á athʉ́ ŋgyā#24.17 Epuɔ Islaɛl é lɛɛ́ ŋkwɛ́tɛ meŋgyā mɔ́p, ŋ́ghʉ̄ɛ, athū á nɔŋɔ ndeŋ ndeŋ, mɛ́ piŋɛ ndɔ̄kɔ mesitɔ́ɔp tɛ́ ŋkɔ́ʼɔ nnáŋa éwú. yí, ndɛ́ʼ á sóʼo tɛ ŋ́gɛ, yí e kó á ŋgyā, épɛ́ azō elɔk ekʉʉ. 18Ndɛ́ʼ ŋiŋ yīi a á ŋgɔ́ á ŋkāʼ, á piŋ nzem á mba tɛ ŋ́gɛ, yí gɔ á mbɛ́ nzhó efwɔ̄k zi. 19Yɛɛ́ ŋgʉɔ̄ʼ zīi wɔnzwí pīi pɔ́ é ŋgɔ Ndém, pɔ́ a wɔ mévho e láʼa ŋgɔ̄ á njʉ́ɔ ánɛ meleʼé mɛ́t lée. 20Pɛ eswíŋte á Ndém ŋ́gɛ, ndɛ́ʼ pɛ eláʼ ŋgē ekʉ épúp, á gɔ́ efʉʼ mbeŋ, ká aleʼé aswite. 21Epuɔ menɔŋ e láʼ epú ejʉ́ɔ á mía ŋgʉɔ̄ʼ, tɛ mbɔ pɔ́ la mmɔʼ épúp jʉ́ɔ ɔ́, tɛ efhó páʼ Ndém a le nɔ̄ŋ ŋgɔŋ, éshʉʼ ntshí tsetsɔŋɔ, épīŋ le láʼ nzéŋ mmɔʼ épúp njʉ́ɔ ɔ́. 22Ŋ́gɔ́ éyi Ndém a kɛ te wíʼe mvéŋ ŋ́gɛ, yí e shʉʼ etswɛ́tte nzwiŋ eleʼé alāʼ mɛ́t ɛ́, mbɔ tsɔ taʼ ŋiŋ a te shʉʼ evuʼu ú. Táʼ, a le ké ntswɛ́tte, melaʼ epuɔ pí pīi, a le tsɔ́ʼē. 23Afʉʼ mɛ́t a shʉʼɛ ŋkūʼ, ŋiŋ á lé á mbū pɛ ŋ́gɛ: “A awuɔ yīi Nzaʼ‑Ŋkhʉ a á ega lāa”, kɛ́ ŋ́gɛ: “A ayi a á ege lée”, ndɛ́ʼ pɛ evéŋ ajū mīi, ŋgaŋ a lʉ́ɛ́. 24Emɔ̄ʼ epuɔ e shʉʼ elu á esī, étáŋ mela gɛ, pɔ́ é wɔ Nzaʼ‑Ŋkhʉ, emɔ̄ʼ e etáŋ mela ŋ́gɛ, pɔ́ é metswi‑ŋke Ndém, énɔŋ eghʉɛ etsiá meyiŋne anu, pɔ́ ndajʉ́ɔ menu. Éghʉɛ, élɔkɔ epɔptɛ epuɔ, tɛ ŋgɔ́ yīi pɔ́ gɔ ezéŋ mbɔ̄pte epuɔ pīi, Ndém a le tsɔ́ʼ á wɔ́p ŋ́gɛ pɔ́ egɔ́ epuɔ pí. 25Á épúp, meŋ á ké nté njhʉ̄ eshúŋ á wɛ́.
Anu zīi Yɛɛ́so a zíʼnɛ epuɔ ánɛ lepiŋ nzem yi.
(Mlk 13.24-31; Lúk 17.23-24; 21.25-31)
26«Mɛ́ ké eshʉ̄ʼ ndé á mbū pɛ ŋ́gɛ: “Nzaʼ‑Ŋkhʉ a wuɔ á késáatswɛt”, ndɛ́ʼ pɛ egʉɔ éwú á efaāʼ yí. Ŋ́gɛ: “Yí wuɔ yīi a lʉɔneé ega lāa”, ndɛ́ʼ pɛ evéŋ. 27Ndeŋ ndeŋ páʼ ŋŋí mbeŋ, e ŋwaŋa, éfhɔ́ɔ á mbuʼ esaáʼ‑nu, ŋ́gʉɔ tɛ ŋkúɔ́ á mbuʼ mbií‑nu lā, Méŋ‑Ŋiŋnɔŋ a a láʼ eshʉʼ épúp. 28Apfhō azō á gɔ́ á ajʉʼ, mbɔ meŋiŋīá e pote éwú.
29Meleʼé ŋgʉɔ̄ʼ mɛ́t e láʼ elɛ ege etɔ́ke, lezēk nu e epí, lezēk saŋ é le zéŋ ejʉʼ ŋkɛ̄ʼɛ ɛ́, mecɔʼ saŋ e efhó á lephū esóʼo mbwɛ̄t á esī, ajūɔ tsem zīi á pɔɔ́ŋ mbʉʼ á lephū, a ecʉ́ʼɛ ncʉ̄ʼne cʉʼne. 30Ayiŋne Méŋ‑Ŋiŋnɔŋ a elɛ̄ ŋŋwāk á lephū, púp melāʼ ntsem á ndo esī atsetsáʼ, e echʉ̄ ŋguŋ lewhʉ̄. Ńjʉ́ɔ, Méŋ‑Ŋiŋnɔŋ a epú ndɔ̄k á mía mía mete pɔ́ shʉ́shɔ́k, éshʉ̄ʼ á ntē alɔ. 31Ńtó mecɔʼ Ndém á ntē ŋgɔŋ meshhʉ̄ lekua, tɛ efhó mmɔʼ eshhʉ̄ esī atsetsáʼ, ŋ́gʉɔ ŋkó mmɔʼ. Pɔ́ egʉ̄ɔ, ńziŋɛ ntɔ́ŋɔ á mía mía ntaŋ, ńdɔk ncúʼte epuɔ pīi, Ndém a le tsɔ́ʼ á wɔ́p, ńdɔk eshʉ̄ʼ mé lezēŋ tsí.
Anu ánɛ athʉ́ zīi mefho mí é gɛ ŋkwhūnɛ
(Mlk 13.28-31; Lúk 21.29-33)
32«Pɛ epɛ́ efʉʼ ánɛ athʉ́ zīi, mefho mí é gɛ ŋkwhūnɛ. Mefho mí é kwhuneē tɛ á piŋ ŋghʉ̄ nzī á letɔ̄p, pɛ zhɛ́ ŋ́gɛ, mbeŋ e é si ŋgɔ̄ á mbiŋɛ́. 33Ndeŋ ndeŋ épúp, pɛ shʉʼɛ njʉ́ɔ emuɔ menu mɛ́t ntsem, é nɔ̄ŋ ntɔ́kɔ, pɛ zhɛ́ ŋ́gɛ, Méŋ‑Ŋiŋnɔŋ a á si eshʉ̄ʼɛ. Ŋ́gɛ a á shʉʼ tɛ ŋgɔ́ á nchu ŋgyā. 34Meŋ a shúŋ á wɛ́ á kwaʼ anuúnē: epuɔ ŋguʼ puɔ, é té shʉʼ ekwhʉ́te metsem, té gɔ́ yīi, emuɔ menu mɛ́t ntsem é shʉʼ ɛ́. 35Lephū pɔ́ esī atsetsáʼ e fú epú emii, táʼ, ashuŋne zá a epú nzɛ́t áa épúp.
Ŋiŋ a te si nzhɛ́ɛ aleʼé zīi, Méŋ‑Ŋiŋnɔŋ a láʼa mbīŋɛ nzem ɛ́
(Mlk 13.32-37; Lúk 17.26-30, 34-36; 12.39-40)
36«Ŋiŋ a ké ŋgɔ́ a á le zhɛ́ aleʼé zīi, menu muɔ mɛ́t é gʉɔ mé ntɔ́kɔ ɔ́, ḿbīŋ le njhʉ̄ zhɛ́. Mecɔʼ Ndém á athʉ́ lephū é té si nzhɛ́ɛ azɔ́p ɔ́, tɛ mbɔɔ Méŋ Ndém. Ŋiŋ a puú te si nzhɛ́ɛ ɛ́, ndaʼ Ndém Mɔʼɔ́ yíléyī. 37Méŋ‑Ŋiŋnɔŋ a a láʼ ege eshʉʼe, menu e ezéŋ ntɔ́k, páʼ é le tɔ́k épúp, ŋguʼ Noe. 38Ndeŋ ndeŋ páʼ pík‑ŋgɔŋ mbeŋ a le gē eshʉʼe, mɛ́ nɔŋ mpfɛ́tɛ, ńnúu, ńdáa ŋgyā, ńtsóʼo ewɔŋkhʉ̄, tɛ ndáʼ ŋkó aleʼé zīi, Noe a le zíʼ ŋkó á ntē mía mɛtúa ntshi. 39Mɛ́ nɔŋ te mbɔ́kɔ amɔ̄ʼ azō ɔ́, tɛ pík‑ŋgɔŋ mbeŋ á shʉʼ, ḿbú mbík epuɔ metsem lā. A láʼ ezéŋ egɔ́ áa épúp, á aleʼé zīi, Méŋ‑Ŋiŋnɔŋ a piŋɛ nzem. 40Epuɔ mémpīa e láʼ egɔ́ á ŋkāʼ eghʉɛ afaʼ, mɛ́ elɔ̄k á taʼ ŋiŋ ŋgʉ̄ɔ, ńtshī mmɔʼ nnéŋ. 41Wɔnzwí mémpīa e enɔŋ nzéŋnɛ ŋgɔ̄ʼɔ ŋgesáŋ á aluŋne, mɛ́ elɔ̄k mmɔʼ ŋgʉ̄ɔ, ńtshī mmɔʼ nnéŋ. 42Púp, ndɛ́ʼ ŋiŋ á lí, melaʼ mīi pɛ ka zhɛ́ njhʉ̄ zīi, Atsyapuɔ wɛ a gɔ á eshʉʼɛ ɛ́. 43Pɛ ecuŋte njúʼ á mbɔŋɔ́, ŋgaŋ mba a zhɛ́ɛ njhʉ̄ zīi, ntsɔ́ŋ a a kó eshʉ̄ʼ etsōʼ, mbɔ a a pípe, mbɔ a te ecʉ́ʼ metsɔ́ŋ e eshʉʼ nzōʼ ŋgyā zi í. 44Melaʼ épúp tɛ́, pɛ azɛ́, pɛ egē enáŋ, ńnɔŋ mbípɛ, melaʼ mīi Méŋ‑Ŋiŋnɔŋ wuɔ a a fú etɔ́kne á wɛ́ ánɛ njhʉ̄ zīi, pɛ kaá nnɔŋ nzwíʼtɛ ɛ́.
Anu ánɛ mbɔŋ ŋgaŋ afaʼ pɔ́ tepɔŋ ŋgaŋ afaʼ
(Lúk 12.41-48)
45«Púp, nzhɛ‑anu ŋgaŋ afaʼ yīi, mɛ́ gɔ etém nzem ŋgyá á mbū yí, a á awɔ́? A á eyi mɔʼɔ́ afaʼ yi a gē egʉɔ, ńtsékne epuɔ mba pí á mbū yí, ŋ́gɛ afʉʼ a ecʉ́ʼ ŋkūʼ, a egāp etsō á mbū emɔ̄ʼ megaŋ afaʼ. 46Nzhɛ‑anu ŋgaŋ afaʼ, a nɔŋ ŋghʉ̄ɛ afaʼ ndeŋ ndeŋ páʼ mɔʼɔ́ yí a á ntsékne épúp, tɛ á láʼ ŋkɔ́ʼ, mbɔ a á eshhʉ̄ mbɔŋ. 47Meŋ shúŋɔ á wɛ́ á kwaʼ anuúnē ŋ́gɛ, ŋgaŋ mba wuɔ mɛ́t, a a shʉʼ epú etsékne menu mí ntsem, á mbū ŋgaŋ afaʼ wuɔ mɛ́t. 48A piŋɛ ŋgɔ́ á tepɔŋ ŋgaŋ afaʼ, mbɔ a a lé á ntē yí gɛ: “Mɔʼɔ́ afaʼ ga, a te egákne eshʉʼ ɛ́.” 49Ékwaŋte épúp, élɛ ezi á letswā emɔ̄ʼ megaŋ afaʼ, épfɛ́te, énú pɔ́ a epiá‑meluʼ. 50Mɔʼɔ́ afaʼ yi a piŋɛ ntɔ́kne á yí ánɛ aleʼé zīi, a kaá nnɔŋ nzwíʼtɛ ɛ́, ánɛ njhʉ̄ zīi, a kaá nnɔŋ nzhɛ́ ɛ́. 51Mbɔ a lɛ egɔ á yí eyá mɛ́ ezwhí, páʼ mɛ́ e fú eghʉ épúp, ánɛ megaŋ ŋkɔŋ menēk. A egʉ̄ɔ mé ajʉʼ zīi, mɛ́ é éwú ndaa mpfɛ́tɛ mesɔŋ. »
Currently Selected:
Matío 24: ybb
Highlight
Share
Copy
Want to have your highlights saved across all your devices? Sign up or sign in
© CABTAL
