G%E9nesis 37
37
1I mam Jacob xjeqi chila chwach ulew Canaán ipa jeqinaq wi uqajaw chi pacha jun aj naj.
A José xaq i ratz ucha'
2Iri are ki'anoj mam Jacob ru' i ralk'uwal: I a José are o wuqlajuj junab' che, k-e chkiyu'uxik i chij ku' i ratz, chi rak'al ati Bilha xaq i rak'al ati Zilpa, chi je qas ti mer rixoqil uqajaw. I a José le kukoj kimak i ratz che uqajaw, chi xaqmanal kki'ano.
3I mam Israel lik k'ax kuna a José chkiwach i jub'an chik rak'al, man lik rij chik are xuk'uwalij uk'ojol le; rumali xutaq u'anik jun u'u' naj raqan xaq lik k'i utzunb'al. 4Are xkinab'ej i ratz chi kiqajaw lik k'ax kuna a José chkiwach ike, are uri xkijeqo chi to' tzel chik kkilo xaq utz ti chik u'ijlaxik kki'ano.
5O juyak i a José xu'an jun achik', are xulap chke i ratz ike le lik xpe titat kipam che, 6man xub'ij chke:
—Chita pe', kwaj kinlap chiwe wach xwachik'aj cha'ab': 7Xwachik'aj chi qonojel yoj oj o pa tikon kojtijin chuyut'ik uxe' k'iyal taq yotaj trigo, xaqte'et inyotaj yin xtak'i anoq te'uri iyotaj yix xkisutij rij inyotaj yin xaq xki'aj kib' chwach —xcha.
8Are uri xkila' uwach che:
—Ke'eli ile chi ka'at ni tzij xaq kat-ajawin ni pqawi? —Xecha.
Are uri ike mas xpe titat kipam che rumal i rachik' chi xulap chke.
9Te'uri a José xu'an chik jun achik', xaq xulap chik chke i ratz:
—Yin xin-an chik jun achik', xwachik'aj chi i ij, i ik' xaq i julajuj ch'umil kki'aj kib' chinwach —xcha.
10Are xulap che uqajaw xaq chke i ratz; are uri i uqajaw xa xuyaj ru' i rachik', xub'ij che:
—¿Wach kawaj ub'ixkil chqe ru' i achik' chi xa'ano le? ¿Xatab'a achuch, awatz xaq i yin kqa'aj ni qib' chawach? —Xcha.
11I ratz ktitat kipam che, xwiri i uqajaw kch'ob'on chrij i achik' le.
Uk'ayixik a José kumal i ratz
12I ratz a José je enaq chkiyu'uxik i chij re i kiqajaw chila pa Siquem. 13I mam Israel xub'ij che a José:
—I awatz je o chila pa Siquem chkiyu'uxik i chij, rumali kwaj yin keawila wach ki'anom —xcha.
—Utzi' —xub'ij a José che.
14Te'uri mam Israel xub'ij che a José:
—Jat, jeawila i awatz wach ki'anom xaq wach taq ki'anom i chij, te'uri kattzalij chali chub'ixkil chwe —xcha.
I mam Israel le jeqel chila chwa ta'aj Hebrón are xutaq b'i a José; i a José le xupon chila pa Siquem, 15xwiri a José le are sachnaq pa taq es; xuk'ulaj jun achi are uri xtz'onox che rumal i achi le:
—¿Wach katzukuj?
16Ire xub'ij:
—Kintijin chkitzukuxik i watz ¿Aweta'am nawi yet ipa ketijin wi chkiyu'uxik i chij? —Xcha.
17I achi xub'ij che:
—Je nti chik chi; xinta kkib'ij chi ke'e chila pa Dotán.
Are uri a José x-e chkitzukuxik i ratz chila ipa xb'ix wi che, lik chila pa Dotán le xeuriqa wi.
18Xwiri x-iltaj kumal i ratz are k'amaja kupon ku', are uri ike xkiyijb'a chkiwach wach ukamsaxik kki'ano. 19Keje iri xkib'ij chkiwach:
—Chiwila pe', xk'un i ma aj-anol achik' le. 20Wo'or xuriq i ij chi kqakamsaj, te'uri kqak'aq b'i chupam jun chke i k'otom le; are kamnaq chik kqab'ij chi jun itzel chikop xutij b'ik. Keje ile kqil uri wach ke'el wi rachik' le —xecha chkiwach.
21I a Rubén are xuta ile, xuch'ob' relsaxik ucha' pki'ab' i ratz rumali xub'ij chke:
—Mqakamsaj. 22Mi'an taq jun kamsanik, chik'aqa b'i chupam jun k'otom chi o waral pa tz'inilik jyub' chaqij, xwiri lik mikamsaj —xcha.
I a Rubén xub'ij ile elsab'al re a José pki'ab' i ratz, xaq kraj ire chi ktzalij chub'i ucha' ru' uqajaw. 23Are xupon a José chila ku' i ratz xkiqolij u'u' chrij chi naj raqan chi xaq k'i utzunb'alil. 24Xkichapo te'uri xkik'aq b'i chupam i k'otom chi nti ya chupam.
25Are x-antaj ile xekub'i chwa'im, xaqte'et xkil pan chinaj chi ktijin kik'unik jub'an winaq aj Ismael, je petnaq k'a Galaad lik keb'alk'at kikamey chuxe' i kunb'al muy, bálsamo xaq i mirra kkik'am b'i pa Egipto. 26Are uri a Judá xub'ij chke i ratz ucha':
—¿Wach taq wa kqach'ak che we kqakamsaj qacha' te'uri kquwaj tan chik uwach ukamik? 27Are utz chqak'ayij b'i chke aj Ismael le chwach kqakamsaj, man ire le lik qacha' —xcha.
I ratz ucha' xkiya kiwach ru'. 28Are xeik'aw i ajyakol k'ayij chi je aj Madián are uri xkesaj li a José chupam i k'otom xkik'ayij b'i chke, juwinaq saqpwaq xkiya wi b'ik. Keje uk'amik b'i a José ile chila pa Egipto.
Ma Jacob xo' che a José
29Are xupon chik a Rubén chila ipa o wi i k'otom are uri xrilo chi nti chik a José chila chupam i k'otom le, rumali xuraqch'ij u'u' rumal ub'is. 30Are uri x-e ku' i ratz ucha' xukoj uch'ojil chke, xub'ij:
—¡I ala nti chik chila, wach kin-an wo'or! —Xcha.
31Are uri i ratz a José xkiwor puqul jun chke i ral taq chab'at xkiloj kik' che u'u' a José chi naj raqan, 32Te'uri xkitaq b'i uya'ik che kiqajaw ru' i tziji: “Xqariq i k'uli, chawila we are u'u' ak'ojol o are taj”; xecha.
33I mam Jacob are xril ub'e chi lik are u'u' uk'ojol xsik'in chub'ixkil i tziji: “¡Lik are u'u' ink'ojol iri; ile lik jun itzel chikop x-anaw ch'aqa taq che xaq xutij b'ik!” Xcha. 34Are uri mam Jacob xuraqch'ij u'u', xaq xukoj jun chik u'u' re b'is xaq k'iyal ij xo' che uk'ojol. 35Konojel uk'ojol xaq konojel umi'al kkiyu'uj uxikin xwiri ire xraj taj chi kyu'ux uxikin man xub'ij: “Yin lik kinb'ison ni che ink'ojol, k'ate kinmayij la we xinkamik.” Xcha. Rumali mam Jacob xumayij ti o'ej che uk'ojol.
36I je aj Madián xkik'ayij a José chila pa Egipto che jun achi ma Potifar ub'i, i achi le o upatan chrij ma faraón, xaq kaj-atzil i chajal.
Currently Selected:
G%E9nesis 37: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
