Mata 13

Fare sḭḭ ge ndu ge dol swa ne

Mrk 4.1-20; Luk 8.4-15

1Dwam mbe go, Zeso waɗ ge zok diŋ ya zum, mbo ge mangaɗam ga̰a̰l ge Galile ne wa yà. 2Nda kwate ya ɓase nɔnɔg ge ne ta ge go ne sḛ ndee mbo kaɗ ge faa ga̰a̰l pul-la. Ɓase mbe ma gaa mḛḛya ge mam wa go. 3Hate num fare ma gḛḛ ge fare sḭḭ, jan num go: Ḛ za̰a̰ gale, ge dwam a̰me go ɗu, ba ge gaa kaŋ a̰me zuɗ mbo dol swa ge na gaaso zì. 4Sok ge ka cigi swa go, swa ndwa a̰me ma deɗ ge vin̰a kin̰a ma go, njoole ma mbo ya coɗ num gezi. 5Gegene ma deɗ ge sok her ma go, sok ge suwa no go gḛḛ to. Àa tyal digi vun cab, ge dape, àa be seɗ suwa ge maa tòo ma wa mbo se ya ɗugul to. 6Ɗaŋɗe, sok ge gyala dee ge num pagal, àa looɗe, àa fin̰a gezi, ge dape, num tòo ma kaa digi dɔfwal. 7Gegene ma deɗ ge kore ma buwal zì, kore ma don digi, àa kage num se me. 8A̰me ma deɗ ge suwa ge kwaɗa go, àa kan pagal: Swa pagal ɗu tol ndwa kis, gegene warmenengal, gegene tapool ɗu me. 9Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa.

Zeso hate nda fare ge fare sḭḭ ma ta

10Guwa̰, Zeso nda ge ame hateya ma gwan ta ya ge ne ta zì, àa ele ne go: Ge dape, mo wa ka kee fare sḭḭ ma ndwa hate ɓase ma fare de? 11Gwan ge num janna go: Dok hage ḛ ndwa ma ya gezi ge kuwa fare ɗimil ge na muluk ne, ɗaŋɗe, be hage nda gegene ma ndwa to. 12Ago, ndu ge no go ge a̰me, àa mbo gwan hon ne ge kon pagal iya, ndwa go ne zuli se ceɗeɗ, ɗaŋɗe, ndu ge no be a̰me, koo ne ne ge fyalag ge no ne tok go puy, àa mbo ame ne ne gezi. 13A ge pe, mbi kee fare sḭḭ ma hate num no, ge dape, àa ndil sok go ɓame, ɗaŋɗe, àa kuwa sok to, àa za̰a̰ fare go ɓame, ɗaŋɗe, àa wan fare a̰me pe ɗu to me. 14Go mbe no, kaŋ mbe ma deɗ ja keeya tetem ndwa ngayya go, fare ge Dok dee jin̰a num ge Ezay, ndu ge zwagre na wa, wa zì ma, num fare ge fareba ma ne go:

«Ḛ mbo ka za̰a̰ fare ɓa, ḛ wan fare pe to,

Ḛ mbo ka ndil sok ɓa, ḛ kuwa sok sḛ to.

15A fareba go, ɓase mbe ma haɗɗa nda ge pagal ndaa ma,

Àa daa ɓyare za̰a̰ fare to,

Àa ke ta ya nda ge ɓaal ma,

Àa daa ɓyare kuwa sok to,

Àa ame fare daa maa dul wa ma zì to,

Ge go num wa seŋe ta ya se ɗoo, mbi wa zon num to me.»#Eza 6.9-10.

16Guwa̰, Zeso jan na nda ge ame hateya ma go: Laa saal ge ḛ pe, ge dape, ḛ ndwa ma gaa ya kuwa sok, ḛ tɔgwa ma za̰a̰ fare me. 17Fareba mbi jan ḛ ne no, nda ge zwagre Dok wa mage nda ge kee laa ɓyareya ge Dok ne ma gḛḛ, kee ene gḛḛ ndwa kuwa kaŋ ge ḛ kuwa num no ma, za̰a̰ fare ge ḛ za̰a̰ num no ma me, ɗaŋɗe, àa be seɗ vin̰a ge kuwa num koo za̰a̰ num to me.

Zeso wan zum fare sḭḭ ge ndu ge dol swa ne pe

18Guwa̰, Zeso jan na nda ge ame hateya ma go: Ḛ za̰a̰ fare sḭḭ ge ndu ge dol swa ne mbe pe wanna no. 19Kaŋ rusu ge dee ge vin̰a kin̰a go ma, ngay diir ge nda ge za̰a̰ fare ge muluk ge Dok ne ma way, àa wan ne pe to. Ba ge zwam kṵwa̰ɗe ya, hee fare ge num ame maa dul wa zì mbe gezi. 20A̰me ge dee her pagal ma, àa num ge za̰a̰ fare ge Dok ne ma, àa ame ne ge laa saal gaw, 21ɗaŋɗe, àa n̰a ne vin̰a ge kee tèmel maa zì to. Sok ge iigiya koo njon̰n̰a ma deɗ-ɗa num pagal ge fare ge Dok ne mbe pe, àa tigri ge guwa̰. 22Kaŋ rusu ge dee ge kore buwal zì ma, àa nda ge za̰a̰ fare ge Dok ne ma, guwa̰ go, iigiya mage yan kaŋ seɗɗa ge dunin̰a ne pe ma mbo ya kale ge num pagal go, àa dàa mbo mboya ge jwab to. 23Kaŋ rusu ge dee suwa ge kwaɗa go ma, àa nda ge za̰a̰ fare ge Dok ne ma, àa koy ne kwaɗa, àa ka mbo mboya ge jwab: A̰me ma tol ndwa kis, gegene ma warmenengal, ge ɗogle ma tapool ɗu me.

Fare sḭḭ ge yumur ne

24Guwa̰, Zeso kee ɓase ma fare sḭḭ ge ɗogle, ndwa hate num fare ge muluk ge Dok ne pagal, jan num go: Kaŋ ge kee no muluk ge Dok ne zì, a ge mojo̰o̰ ndu dol geme na gaaso zì go. 25Ɗaŋɗe, sok ge nda gale no dwam se, ne ndu ge ho̰o̰l mbô ya dol yumur ge ne geme ma buwal zì no, doo tene mboya no. 26Sok ge geme tiya digi, haɗ ga̰a̰l, mbô ya kan na pagal, yumur mbô ya kan mbe go waɗme. 27Nda ge tèmel ma mbô ya ele maa ndu ge zok fare go: Mo daa doo geme ge mo gaaso zì me, yumur daa gwan mbo ge dii ya de? 28Gwan ge num janna go, a ndu ge ho̰o̰l a̰me kê kaŋ mbe ne. Ne nda ge tèmel ma gwan ge ne fare eleya go: Mo ɓyare go i mbo ndage num gezi de? 29Gwan ge num janna go: To, mà kaɗɗa ḛ ndage yumur gezi, ḛ ge pool ɓan num ndageya ge geme ma dagre. 30Ḛ n̰a num donna dagre ɗiŋ mbo ge sok siyal yà. Sok kan siyal go, mbi mbo jan nda ge syaɗ geme ma go: Ḛ gale saa gezi yumur ɓiya, ḛ vwal num digi ndwa tilla gezi, guwa̰, ḛ wa gaa syaɗ geme kan mbi hal se go.

Fare sḭḭ ge sugu ndwa ge àa tol ne mutard ne

Mrk 4.30-32; Luk 13.18-21

31Zeso gwan kee num fare sḭḭ a̰me ge ɗogle, jan num go: Muluk ge Dok ne fare dḭḭ ge sugu ge nda tol ne mutard ndwa go, ge ndu ge gaa kaŋ hê ne, doo ne ge na gaaso zì no go. 32A fareba go, sugu mutard ndwa hoɗege jiyale ne, ge kaŋ rusu gegene ma pe go peɗ. Ɗaŋɗe, sok ge don digi, waɗe sugu gegene ge àa dol num no ge gaaso zì ge zamma pe ma waɗe, seŋe ga̰a̰l ge ɔwara go, ge go njoole ge pḭḭ digi ma gaa mbo ya ee maa vum ma ge ne tok ma digi.

Fare sḭḭ ge jìn̰al hore ne

33Zeso gwan kee num fare sḭḭ ge ɗogle mbe no go: Muluk ge Dok ne fare dḭḭ ge jìn̰al hore ge ndu gwale hee ne, kan ne ge swam peɗem koro taa ndwa zì go, ɗiŋ mbo ɗege ne digi ge ɓul mɔɗwag. 34Zeso ka kee fare sḭḭ sok hate ɓase ma fare mbe ma no go, be hate num fare a̰me guwa̰ zum ge fare sḭḭ ma ta to, 35ndwa huy fare ge ndu ge zwagre Dok wa dee wuwage ne go:

«Mbi mbo hage mbi wa jan fare ge fare sḭḭ ma ta,

Mbi mbo ben kaŋ ge dee way se sok ge dunin̰a pe doo ya go day ma zum.»#Mkm 78.2.

Fare sḭḭ ge yumur ne pe wanna zum

36Guwa̰, Zeso mage na nda ge ame hateya ma n̰a ɓase ma yà, àa gwan-na diŋ. Ne nda ge ame hateya ma gwan ta ya ne ta, àa ele ne go, ne wa̰a̰ maa fare sḭḭ ge yumur ne ge do̰o̰ gaaso zì pe nde. 37Ɗege wan num fare pe go: Ndu ge zare geme ge mojo̰o̰ Van ge Ndu ne go, 38gaaso ge mojo̰o̰ dunin̰a go, geme ndwa ge àa zare num ma ge mojo̰o̰ nda ge no ge muluk ge Dok ne pe ma go, yumur Ba ge zwam ndu ne. 39Ndu ge ho̰o̰l ge zare yumur mbe a Ba ge ho̰o̰l, siyal syaɗɗa a dunin̰a pe aaya, nda ge syaɗ geme ma malayka ge Dok ne ma. 40Go mbe no, àa mbo ɔwabe nda ge ba ge zwam ne ma, àa kan num ge ol zì ge dunin̰a pe aaya go. 41Van ge Ndu ne, mbo teme na malayka ma ya, àa mbo ɔwabe num ge no kaŋ chal ko ge maa ka̰a̰m pe ma, ge nda ge kee n̰aal ma, ge ne muluk zì ya gezi. 42Àa mbo kan num ge ol ge hihiɗig zì. Ge sok mbe zì, nda mbe ma mbo ka fyalla, àa ka sul maa kin̰a ma me. 43Ɗaŋɗe, nda ge kee laa ɓyareya ge Dok ne ma mbo ka zenna ge gyala go ge muluk ge maa Ba Dok ne zì. Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa.

Fare sḭḭ ge kaŋ gan ge àa way ne mage njal sergeleŋ ne

44 Muluk ge pḭḭ zì yà ge ma fare gwan ge mojo̰o̰ kaŋ gan ge njonjon̰ ge àa way ne ge gaaso zì go. Ndu ge deɗ ne pagal gwan dwage ne wayya. Ndu mbe seŋe gwan diŋ ge laa saal gḛḛ, mbo yaɗ na kaŋ ma gezi peɗ, gwan-na yaɗ gaaso mbe me.

45Muluk ge Dok ne fare gwan ge mojo̰o̰ ndu ge seŋe na tok ge ɓyare yìn̰a ge kê ge njal sergeleŋ ge yee gḛḛ ma yaɗɗa go. 46Sok ge seɗ a̰me ge yee gḛḛ mbe go, gwan diŋ mbo yaɗ na kaŋ ma gezi peɗ, gwan-na yaɗ ne.

Fare sḭḭ ge kuwal ne

47 Muluk ge Dok ne fare gwan ge mojo̰o̰ kuwal ge àa doo ne mangaɗam ga̰a̰l se go, wan sini ma ya pe hini-hini. 48Sok ge kuwal kageya se rigib ge sini, nda ge swaɗ soso ma zwal ne ya wa kal digi, àa kaɗ se twaɗ sini ma. Ge kwaɗa ma, àa kan num ge kɔkɔlay zì, ge sone ma, àa kan num gezi. 49Mbo kaɗ mbe go ca ge dunin̰a pe aaya go. Malayka ma mbo caɗe nda ge laa pisil mage nda ge kee laa ɓyareya ge Dok ne ma buwal. 50Àa mbo kan nda ge laa pisil ma ge ol ge hihiɗig zì. Ge sok mbe zì, àa mbo ka fyalla, àa ka sul maa kin̰a ma me.

Hateya ge wal mage hateya ge jin̰al

51Guwa̰, Zeso ele na nda ge ame hateya ma go: Ḛ wan fare sḭḭ ge mbi hate ḛ num fare ma pe ya go peɗ de? Àa vin ne. 52Sok mbe go, jan num go: A ge pe, ndu ge hate eeya ge Moyiz ne ge diige ge seŋe ya, ndu ge ame hateya ge muluk ge Dok ne pe, a ge mojo̰o̰ ndu ge zok ge ɔwabe kaŋ ge jin̰al mage kaŋ ge wal ma, ge na sok way kaŋ gan ma zì ya go.

Zeso ge suwal Nazareɗ go

Mrk 6.1-6; Luk 4.16-30

53Guwa̰ ge Zeso hate nda fare ge fare sḭḭ ma ta go, ɗege ge sok mbe go mbo. 54Sok ge guwa̰ ya ge na suwal diŋ, ɗege hate fare ge zok kee kaɗeya ge Yahuɗ ma way zì. Nda ka kee ajab ge ne hateya mbe ma pe, àa ka ele ta go: See na andaŋ mbe ge dii ya de? See pool ge kee kaŋ ajab mbe ma ge dii ya me de? 55Daa be ndu ge pel zok pagal van ne no to de? Ne na̰ daa be Mari to de? Jak, Jozef, Simo̰ mage Jude ma daa be ne na̰ van ge soɗob ma ne no me to de? 56Ne na̰ van ge gwale ma daa ne ge nè buwal zì no peɗ ɓade? Daa gwan seɗ andaŋ mage pool ge go mbe ge dii ya de? 57Go mbe no puy, àa vin ne fare ge maa sḛ zì to. Ge sok mbe go, Zeso jan num go: Ndu ge zwagre Dok wa seɗ hormo seɗ ge sok ma go peɗ. Seɗ hormo to ge nda ge na suwal diŋ-ge mage na zok diŋ-ge ma ta ɗeŋew. 58Ge suwal Nazareɗ diŋ, Zeso be gwan kee kaŋ ajab ma gḛḛ to, ge dape, àa be hoɗ fareba ge ne ta to.

Currently Selected:

Mata 13: kiaGRB

Highlight

Copy