LUKAX 7
7
Yesux Pai Siliex Cao Kaing Naing
(Mat 8:5-13)
1Khaix hoik sidiex gau Nawh Cao, kieh pui khankix mhong lox ceu pa krai Nawh, Nawh laig ka daux veng Kapeniom heue. 2Siliex cao giex kaing naing tix kaux, pa kied moh nawh, saux dex sang yum. 3Yam mhong nawh grawh grawng Yesux, nawh ploi kuad song pui Yudax khankix hu rawg mhaing ka Nawh Cao, nhie Nawh hoek ti taoh siliex nawh heue. 4Yam hoek kix ka Yesux, kix khyox khaw Nawh Cao mhawm mhawm ah nin, “Nawh keung ti pon, pa yuh Maix ceu in son nawh heue. 5Kheu moh nawh ceu ex, nawh hoik yuh nyiex sidiex son ex heue.” 6Yesux hu tau mai kix, yam hoek Nawh Cao dee ang awt singai khaing nyiex nawh, cao giex kaing naing an ploi paox grawm nawh hu ti ah nin ka Nawh Cao, “Simiang eue, paw vi baox nyhap rhawm Maix, kheu ang aux keung ti kieh Maix hoek kreed greem braux nyiex aux. 7Mawh kheu nan aux keud tokaux tix ang keung ti hoek ka Maix, viang mawh nan pie tawx Maix lox khaing mai siliex aux tak moi heue. 8Kheu aux mawh pui ot greem simiang kawx, aux koe pui naing greem aux heue. Phan aux nhie tix kaux hu, nawh hu mai phan aux nhie tang kaux hoek, nawh hoek heue. Phan aux nhie siliex aux yuh ceu in, nawh yuh heue.” 9Yam mhong Yesux ceu an khankix, Nawh daox deng ka nawh mai veeh ti jhak cub pui hun pa hawt khaix Nawh Cao ah nin, “Aux krai ka pex, ang Aux sax yaox pui pa yum rhawm nie ding nie dod ka daux pui Isarelax heue.” 10Yam pui pa ploi cao giex kaing naing khankix deeh hoek ka nyiex, kix yaox moi siliex an heue.
Kieh Kawn Miexmai Kaoh Im
11Khaix ngaix an pasax, Nawh Cao hu ka veng tix veng pa kok mawh Na-i-nax mai kawncau Nawh khankix mai cub pui hun hu tau mai Nawh Cao heue. 12Yam hoek Nawh Cao ka dex siviex veng, jhak heue, kix klawm pui yum lih tix kaux, pa mawh kawn simex miexmai pa koe tix kaux khaing, mai pui veng an tom nie ot tau mai kiex heue. 13Yam yaox Simiang ka bun an Nawh Cao caux rhawm ka kiex mai ah nin ka kiex, “Paw vi yiiem heue.” 14Nawh Cao hoek mai teeh ka lawng an mai kix pa klawm khankix cung kaog heue. Nawh Cao ah nin, “Kawn nyawm simex eue, Aux krai ka maix, kaoh heue.” 15Kaw pa hoik yum an kaoh ngawm mai jah ti sikah heue. Nawh Cao teei nawh tawx ka miex nawh heue. 16Pui khawmuik lhat graung kah mai kix yaogyaw Siyiex ah nin, “Cao jhai pa ting hoik lih sinax ex tix kaux mai Siyiex hoik hoek ti jhak pui cie Nawh heue.” 17Lox grawh grawng pa yuh Nawh Cao ceu in, tah hu daux meung Yudax khawmuik mai sivie tan kudah kudee heue.
Yohan Ploi Kawncau Hu Ka Yesux
(Mat 1:12-19)
18Kawncau Yohan khankix krai grawh grawng ceu in khawmuik heue. 19Yohan kok kawncau tix ra kaux, ploi kiex hu ka Yesux, kieh chawk ah nin, “Maix mawh kaw pa tak sang hoek an lie, phan ang mawh nan ex tak sang krox ti yaox son tang kaux lie?” 20Yam hoek pui an kiex ka Nawh Cao, kiex ah nin, Yohan cao cubcom ploi yiex hoek ka Maix, sonsang chawk ah nin, Maix mawh kaw pa tak sang hoek an lie? phan ang mawh nan ex tak sang krox ti yaox son tang kaux lie?” 21Ka daux bawg yam nari an, Nawh Cao cox jhawm saux tom nie ceu mai jhawm saux preng khankix mai pa laig phicaox phicaig khankix mai Nawh Cao cox pui dug ngai haoh hun, kieh deeh chix yaox heue. 22Yesux pawk lox ah nin ka kiex, “Pax hu mai krai ka Yohan grawh grawng ceu pa mhong pa yaox pax, pui dug ngai pon ti deeh yaox, pui laux caong pon ti deeh hu, pui sipawg deeh kieh singax, pui lheet yhaok deeh chix mhong mai pui pa hoik yum deeh kieh kaoh im mai sidiex gau ka pui hot pui sibhawm kieh mhong lox bwan gaux rhawm heue. 23Pui mawx ang ah, kaw pa ang yaox dee sideeing dee laux rhawm ka daux Aux, koe bwanson heue.” 24Khaix hoik ing kawncau Yohan an kiex, Nawh Cao jah ti sidiex gau grawh grawng Yohan, ka cub pui hun khankix, “Pex lih hu daux tiagtu sang jhak patix? Pex hu jhak gawng priem pa phlu bhaung mai vuhvied lie? 25Phan ang mawh nan pex lih hu sonsang yaox patix? Hu sonsang yaox pui pa ceep kraung pa awn lie? Jhak heue, kix pa ceep kraung pa jiet mhawm mai pa ih priex preem pa nyawm, ot ka daux nyiex simiang ting khankix heue. 26Phan ang mawh nan pex lih hu sonsang yaox patix? Lih hu sonsang yaox cao jhai lie? Mawh heue, Aux krai ka pex, mawh pa lheu khaing cao jhai heue. 27In mawh kaw pa hoik tiiem grawh grawng nawh ah nin, jhak heue, Aux ploi kawncau Aux hu sivoe pakngai maix, pa tak cox krax maix sivoe maix heue. 28Aux krai ka pex, ka daux pui pa keh khaing bun khawmuik, pa lheu ting khaing Yohan cao cubcom ang koe tix kaux kawx, viang mawh nan kaw pa nie iak khaing paox tix ka daux Meung Siyiex lheu ting khaing nawh heue. 29Pui khawmuik, khawm pui koh mau khankix, yam mhong kix pa yaogyaw pa rahsee Siyiex mai cubcom ka daux been krax cubcom Yohan heue. 30Viang mawh nan Pharishie khankix mai cao tawng cao prawng lai been khankix tik pa keud Siyiex son kix mai ang cubcom daux tawm taix nawh heue. 31Ceu pui ju in, Aux sang tiag awm patix? mai kix sang awm pa yuh ka mawx? 32Kix awm kawn nyawm khankix pa ngawm daux lah mai kok paox tix ah nin, Ex hoik phlu pi son pex mai pex ang graoh ang thiao, ex hoik yiiem riag, viang mawh nan, pex ang yiiem ang riag heue. 33Kheu Yohan cao cubcom ang ih blah mai ang nyaux rawm plix siiet mai hoek kawx, pex ah, kaw in koe phicaox heue. 34Kawn kawn pui ih nyaux mai hoek kawx, pex ah, jhak heue, Kaw in cha nie luan ih mai cha nie luan nyaux rawm plix siiet mai yuh paox pie ka pui pa koh mau mai pui ting map khankix heue. 35Viang mawh nan pingnya cuyi hoik rahsee ka daux kawn praix tix khawmuik heue.
Bun Groi Sidah bhawng
36Pharishie tix kaux nhie Nawh Cao hoek ti sawm tau mai tix mai Nawh Cao laig ka daux nyiex Pharishie an, ngawm neung dee sawm heue. 37Jhak heue, bun tix kaux ot ka daux veng an, pa mawh pui ting map mai yam mhong nawh grawh grawng Nawh Cao ngawm neung ka daux nyiex Pharishie an, nawh viex sidah bhawng ka daux kawng simaox paing, 38nawh cung plak khaix, dex caong Nawh Cao mai yiiem mai kieh rawm ngai tix cod piang caong Nawh mai teei hauk kaing tix awt kah mai ngheut caong Nawh Cao mai teei sidah bhawng an groi kah heue. 39Pharishie pa hoik kok Nawh Cao yaox grawng an, nawh keud ah nin ka daux tokaux tix, “Phan Pui in mawh Cao jhai, Nawh tee hoik tawng grawng bun pa teeh Nawh in, mawh pui pa yuh ka mawx, grawh grawng nawh mawh bun ting map heue.” 40Yesux ah nin ka nawh, “Simon eue, Aux koe ceu krai ka maix ceeix,” Kaw an ah nin, “Sara Cao Gau eue, krai ha” 41Nawh Cao baox krai, “Cao tawx yaog yaing mau tix kaux, koe pui ceuk ka nawh ra kaux, tix kaux ceuk ka nawh denari phwan yieh plah mai tang kaux ceuk ka nawh tixphwan plah heue. 42Mawh kheu ang kiex koe ti tawx ceuk an, nawh pluat ploi ceuk kiex khawm ra kaux heue. Ka daux kiex ra kaux, mawh kaw pa yuh ka mawx, pa nie lheu moh ka kaw an?” 43Simon baox pawk lox ah nin, “Aux ce kaw pa pluat nawh ceuk pa nie ting an, mawh pa nie lheu moh nawh heue.” Nawh Cao baox ah nin ka nawh, “Pa keud pa prawng maix hoik caw heue.” 44Nawh Cao deeh veeh ka bun an, ah nin ka Simon, “Yaox maix bun in lie? Yam laig Aux ka daux nyiex maix, maix ang tawx rawm khoek son caong Aux, viang mawh nan bun in hoik kieh rawm ngai nawh cod piang caong Aux mai awt ka hauk kaing tix heue. 45Maix ang ngheut ka Aux, viang mawh nan, jah yam laig Aux tin, tom yam in, bun in ngheut caong Aux ang jud ang jai heue. 46Maix ang groi rawm bee ka kaing Aux, viang mawh nan, bun in, hoik groi sidah bhawng ka caong Aux heue. 47Mawh kheu nan Aux krai ka maix, phimap nawh pa haoh pa hun, hoik pluat ploi. Mawh kheu nawh hoik moh tom nie. Viang mawh nan, pui pa pluat ploi ceeix ngie, moh ceeix ngie heue.” 48Nawh Cao ah nin ka bun an, “Hoik pluat hoik ploi phimap maix heue.” 49Kix pa ngawm neung ti sawm tau mai Nawh Cao, keud ti ah nin ka daux tokaux tix, “Kaw in mawh mawx? Viang mawh phimap kawx, Nawh khex ploi heue.” 50Nawh Cao baox ah nin ka bun an, “Krax yum rhawm maix hoik taoh maix, hu mhawm mhawm heue.”
Currently Selected:
LUKAX 7: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
LUKAX 7
7
Yesux Pai Siliex Cao Kaing Naing
(Mat 8:5-13)
1Khaix hoik sidiex gau Nawh Cao, kieh pui khankix mhong lox ceu pa krai Nawh, Nawh laig ka daux veng Kapeniom heue. 2Siliex cao giex kaing naing tix kaux, pa kied moh nawh, saux dex sang yum. 3Yam mhong nawh grawh grawng Yesux, nawh ploi kuad song pui Yudax khankix hu rawg mhaing ka Nawh Cao, nhie Nawh hoek ti taoh siliex nawh heue. 4Yam hoek kix ka Yesux, kix khyox khaw Nawh Cao mhawm mhawm ah nin, “Nawh keung ti pon, pa yuh Maix ceu in son nawh heue. 5Kheu moh nawh ceu ex, nawh hoik yuh nyiex sidiex son ex heue.” 6Yesux hu tau mai kix, yam hoek Nawh Cao dee ang awt singai khaing nyiex nawh, cao giex kaing naing an ploi paox grawm nawh hu ti ah nin ka Nawh Cao, “Simiang eue, paw vi baox nyhap rhawm Maix, kheu ang aux keung ti kieh Maix hoek kreed greem braux nyiex aux. 7Mawh kheu nan aux keud tokaux tix ang keung ti hoek ka Maix, viang mawh nan pie tawx Maix lox khaing mai siliex aux tak moi heue. 8Kheu aux mawh pui ot greem simiang kawx, aux koe pui naing greem aux heue. Phan aux nhie tix kaux hu, nawh hu mai phan aux nhie tang kaux hoek, nawh hoek heue. Phan aux nhie siliex aux yuh ceu in, nawh yuh heue.” 9Yam mhong Yesux ceu an khankix, Nawh daox deng ka nawh mai veeh ti jhak cub pui hun pa hawt khaix Nawh Cao ah nin, “Aux krai ka pex, ang Aux sax yaox pui pa yum rhawm nie ding nie dod ka daux pui Isarelax heue.” 10Yam pui pa ploi cao giex kaing naing khankix deeh hoek ka nyiex, kix yaox moi siliex an heue.
Kieh Kawn Miexmai Kaoh Im
11Khaix ngaix an pasax, Nawh Cao hu ka veng tix veng pa kok mawh Na-i-nax mai kawncau Nawh khankix mai cub pui hun hu tau mai Nawh Cao heue. 12Yam hoek Nawh Cao ka dex siviex veng, jhak heue, kix klawm pui yum lih tix kaux, pa mawh kawn simex miexmai pa koe tix kaux khaing, mai pui veng an tom nie ot tau mai kiex heue. 13Yam yaox Simiang ka bun an Nawh Cao caux rhawm ka kiex mai ah nin ka kiex, “Paw vi yiiem heue.” 14Nawh Cao hoek mai teeh ka lawng an mai kix pa klawm khankix cung kaog heue. Nawh Cao ah nin, “Kawn nyawm simex eue, Aux krai ka maix, kaoh heue.” 15Kaw pa hoik yum an kaoh ngawm mai jah ti sikah heue. Nawh Cao teei nawh tawx ka miex nawh heue. 16Pui khawmuik lhat graung kah mai kix yaogyaw Siyiex ah nin, “Cao jhai pa ting hoik lih sinax ex tix kaux mai Siyiex hoik hoek ti jhak pui cie Nawh heue.” 17Lox grawh grawng pa yuh Nawh Cao ceu in, tah hu daux meung Yudax khawmuik mai sivie tan kudah kudee heue.
Yohan Ploi Kawncau Hu Ka Yesux
(Mat 1:12-19)
18Kawncau Yohan khankix krai grawh grawng ceu in khawmuik heue. 19Yohan kok kawncau tix ra kaux, ploi kiex hu ka Yesux, kieh chawk ah nin, “Maix mawh kaw pa tak sang hoek an lie, phan ang mawh nan ex tak sang krox ti yaox son tang kaux lie?” 20Yam hoek pui an kiex ka Nawh Cao, kiex ah nin, Yohan cao cubcom ploi yiex hoek ka Maix, sonsang chawk ah nin, Maix mawh kaw pa tak sang hoek an lie? phan ang mawh nan ex tak sang krox ti yaox son tang kaux lie?” 21Ka daux bawg yam nari an, Nawh Cao cox jhawm saux tom nie ceu mai jhawm saux preng khankix mai pa laig phicaox phicaig khankix mai Nawh Cao cox pui dug ngai haoh hun, kieh deeh chix yaox heue. 22Yesux pawk lox ah nin ka kiex, “Pax hu mai krai ka Yohan grawh grawng ceu pa mhong pa yaox pax, pui dug ngai pon ti deeh yaox, pui laux caong pon ti deeh hu, pui sipawg deeh kieh singax, pui lheet yhaok deeh chix mhong mai pui pa hoik yum deeh kieh kaoh im mai sidiex gau ka pui hot pui sibhawm kieh mhong lox bwan gaux rhawm heue. 23Pui mawx ang ah, kaw pa ang yaox dee sideeing dee laux rhawm ka daux Aux, koe bwanson heue.” 24Khaix hoik ing kawncau Yohan an kiex, Nawh Cao jah ti sidiex gau grawh grawng Yohan, ka cub pui hun khankix, “Pex lih hu daux tiagtu sang jhak patix? Pex hu jhak gawng priem pa phlu bhaung mai vuhvied lie? 25Phan ang mawh nan pex lih hu sonsang yaox patix? Hu sonsang yaox pui pa ceep kraung pa awn lie? Jhak heue, kix pa ceep kraung pa jiet mhawm mai pa ih priex preem pa nyawm, ot ka daux nyiex simiang ting khankix heue. 26Phan ang mawh nan pex lih hu sonsang yaox patix? Lih hu sonsang yaox cao jhai lie? Mawh heue, Aux krai ka pex, mawh pa lheu khaing cao jhai heue. 27In mawh kaw pa hoik tiiem grawh grawng nawh ah nin, jhak heue, Aux ploi kawncau Aux hu sivoe pakngai maix, pa tak cox krax maix sivoe maix heue. 28Aux krai ka pex, ka daux pui pa keh khaing bun khawmuik, pa lheu ting khaing Yohan cao cubcom ang koe tix kaux kawx, viang mawh nan kaw pa nie iak khaing paox tix ka daux Meung Siyiex lheu ting khaing nawh heue. 29Pui khawmuik, khawm pui koh mau khankix, yam mhong kix pa yaogyaw pa rahsee Siyiex mai cubcom ka daux been krax cubcom Yohan heue. 30Viang mawh nan Pharishie khankix mai cao tawng cao prawng lai been khankix tik pa keud Siyiex son kix mai ang cubcom daux tawm taix nawh heue. 31Ceu pui ju in, Aux sang tiag awm patix? mai kix sang awm pa yuh ka mawx? 32Kix awm kawn nyawm khankix pa ngawm daux lah mai kok paox tix ah nin, Ex hoik phlu pi son pex mai pex ang graoh ang thiao, ex hoik yiiem riag, viang mawh nan, pex ang yiiem ang riag heue. 33Kheu Yohan cao cubcom ang ih blah mai ang nyaux rawm plix siiet mai hoek kawx, pex ah, kaw in koe phicaox heue. 34Kawn kawn pui ih nyaux mai hoek kawx, pex ah, jhak heue, Kaw in cha nie luan ih mai cha nie luan nyaux rawm plix siiet mai yuh paox pie ka pui pa koh mau mai pui ting map khankix heue. 35Viang mawh nan pingnya cuyi hoik rahsee ka daux kawn praix tix khawmuik heue.
Bun Groi Sidah bhawng
36Pharishie tix kaux nhie Nawh Cao hoek ti sawm tau mai tix mai Nawh Cao laig ka daux nyiex Pharishie an, ngawm neung dee sawm heue. 37Jhak heue, bun tix kaux ot ka daux veng an, pa mawh pui ting map mai yam mhong nawh grawh grawng Nawh Cao ngawm neung ka daux nyiex Pharishie an, nawh viex sidah bhawng ka daux kawng simaox paing, 38nawh cung plak khaix, dex caong Nawh Cao mai yiiem mai kieh rawm ngai tix cod piang caong Nawh mai teei hauk kaing tix awt kah mai ngheut caong Nawh Cao mai teei sidah bhawng an groi kah heue. 39Pharishie pa hoik kok Nawh Cao yaox grawng an, nawh keud ah nin ka daux tokaux tix, “Phan Pui in mawh Cao jhai, Nawh tee hoik tawng grawng bun pa teeh Nawh in, mawh pui pa yuh ka mawx, grawh grawng nawh mawh bun ting map heue.” 40Yesux ah nin ka nawh, “Simon eue, Aux koe ceu krai ka maix ceeix,” Kaw an ah nin, “Sara Cao Gau eue, krai ha” 41Nawh Cao baox krai, “Cao tawx yaog yaing mau tix kaux, koe pui ceuk ka nawh ra kaux, tix kaux ceuk ka nawh denari phwan yieh plah mai tang kaux ceuk ka nawh tixphwan plah heue. 42Mawh kheu ang kiex koe ti tawx ceuk an, nawh pluat ploi ceuk kiex khawm ra kaux heue. Ka daux kiex ra kaux, mawh kaw pa yuh ka mawx, pa nie lheu moh ka kaw an?” 43Simon baox pawk lox ah nin, “Aux ce kaw pa pluat nawh ceuk pa nie ting an, mawh pa nie lheu moh nawh heue.” Nawh Cao baox ah nin ka nawh, “Pa keud pa prawng maix hoik caw heue.” 44Nawh Cao deeh veeh ka bun an, ah nin ka Simon, “Yaox maix bun in lie? Yam laig Aux ka daux nyiex maix, maix ang tawx rawm khoek son caong Aux, viang mawh nan bun in hoik kieh rawm ngai nawh cod piang caong Aux mai awt ka hauk kaing tix heue. 45Maix ang ngheut ka Aux, viang mawh nan, jah yam laig Aux tin, tom yam in, bun in ngheut caong Aux ang jud ang jai heue. 46Maix ang groi rawm bee ka kaing Aux, viang mawh nan, bun in, hoik groi sidah bhawng ka caong Aux heue. 47Mawh kheu nan Aux krai ka maix, phimap nawh pa haoh pa hun, hoik pluat ploi. Mawh kheu nawh hoik moh tom nie. Viang mawh nan, pui pa pluat ploi ceeix ngie, moh ceeix ngie heue.” 48Nawh Cao ah nin ka bun an, “Hoik pluat hoik ploi phimap maix heue.” 49Kix pa ngawm neung ti sawm tau mai Nawh Cao, keud ti ah nin ka daux tokaux tix, “Kaw in mawh mawx? Viang mawh phimap kawx, Nawh khex ploi heue.” 50Nawh Cao baox ah nin ka bun an, “Krax yum rhawm maix hoik taoh maix, hu mhawm mhawm heue.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012