Matiwos Dooshishiyo 6

Tewd dowi jango

1 # Mat. 23:5 Dabt Iyesus hank'owa bíet, «Ashuwots taan be'enee err sheeng fino ash shinatse finoniyere it tooko korde'ere, maniyalbakó daritsitso it nihoke eegor k'awntso daatsratste. 2Eshe t'owwotssh n'ímoor, ash shinatse shunewna etiru git alberetswots Ik' k'oni moonat werind weerindatse bo k'alirwok'o be'ewosh k'alk'ayere, arikon itsh keewirwe, booye shin shino bo k'awntso daatsdek'rnee. 3Neemó tewdi doon ni ímoor n k'ani kisho b́ k'alirwo n giri kisho b́danawok'owa. 4Eshe n tewdi doo áátson wotowe, ááshon finetso bek'irwo nnih n sheeng fini k'awntso neesh dashetwe.

Ik' k'oni jango

(Luk'. 11:2-4)

5 # Luk'. 18:10-14 «Ik'o it k'onor git alberetswotsk'o wot k'ayere! bo asho boosh b́bek'etwok'owa erŕ Ik' k'oni moonat werind weerindatse need'de Ik' k'ona boshunfoni. Ariko itsh keewirwe, bohe bok'awntso shin shino daatsdek'rnee. 6Nee Ik'o nk'onormó, n moots kindde nfengesho ic'de'er ááshon beyirwo nnihi k'onwe, ááshon n k'ontso bek'irwo nnihi k'awntso neesh dashetwe.

7 # 1 Naash. 18:25-29 «It Ik'o it k'onor Ik' ash woterawwotskok'o ay ooshiwon keewk'ayere, bo ananshdek' ayoto bo keewtsosh Ik'o bok'ono b́ k'ebetwok'oweya boosh bíariri? 8Itmó it nih itsh geyit keewo bín it k'onfetsere shino b́ dantsotse bokok'o wotk'ayeree. 9Eshe it Ik'o it k'onor hank'o err k'onwere,

‹Darotse beyirwo nonihono!

N shúútso mangwee,

10N mengstu wowiyee,

N shuno darotse b́ wottsok'o,

Mank'o datsatsno wotowe.

11Noosh geyit misho hambets noosh ime.

12Noowere noon dádtswotssh oorowe noettsok'o

Nofints morro noosh orowa eree,

13Gondatse noon kore bako,

Fadeyots noon kindshk'aye,

[mengsto, angonat mangon

Dúre dúron nike,

Amen.]#6:13 Mengsto, ango, manga etirwo kishon guut'ets shints mas'afwotsitse hanotsi deshakno. ›

14«Ashuwots morro boosh orowa it etal, itshowere daritstso it nih itsh orowa etetuwe. 15#Mat. 11:25-26 Ashuwots morro oorowe eto it k'azaalmó it morronowere daritstso it nih itsh orowe eraatse.»

S'oomi jango

16 # Isa. 58:5 Manats dabt Iyesus hank'owa bíet, «It s'oomor, bo s'oomo ashuwots boosh bodanetwok'o, boshiitso wonawoniru git alberetswotsk'o, it shiitso sholik'ayere, arikon itsh keewirwe, booye bok'awntso dek'wtserne. 17Neemó n s'oomor n shiitso mashde'e, n tokatsowere fuurde'ee, 18Mank'oon, eshe n s'oomo ááshon beyirwo nnihiyere okoon k'osho konwor danatse. Ááshon finetso bek'irwo nnihwere n k'awntso neesh dashetwe.»

Datsatse gaalo ko'iyo bgeyirawok'o b́danitsok'o

(Luk'. 12:33-34)

19 # Yak'. 5:2-3 Ando aani dabt Iyesus hank'owa bíet, «Barariyonat hajoon bot'afitwoke, úmp'etswotswere tishde bo úmpitwoke, datsanatse it tookosh gaalo ko'ik'ayeree. 20Maniyere barariyonat hajif keewwots t'afiyo bofalrawoke, ump'etswotswere tishr boúmp'erawok darots it gaalo ko'iwere. 21N gaalo b́beeyirwoke n nibonúwere manoknee b́ daatseti.

Ash atsatsi c'eesho

(Luk'. 11:34-36)

22«Ááwo atsi c'eeshee, manshe niááwo jeena wotiyal, niats jámó sháán wotitwe, 23Ni ááwo jeen wotob́k'azalmó, niats jamo t'alwe b́wotiti. Eshe niatse fa'a shááno t'alu b́wotiyal, t'alwo aawk'owe iki b́ gonditik'uuna!

Beyosh shiyano b́ geyirawok'o

(Luk'. 16:13; 12:22-31)

24«Ash iko doonz gitosh guuts woto falratse, wee ikoniye b́shit'eti, k'oshonowere b́shuneti, wee ikosh amanek wotitwe, k'oshonowere gac'itwee, mank'o ash iko iknon Ik'onat gizonsh guuts woto falratse. 25Mansh eshe hank'o itsh etirwe, ‹Eege no meeti? Eege no úsheti? Egek'una no tahiti?› Eton it beyi jangosh shiyank'ayere, mishoniyere kasho, tahoniyere atso bowatsáá? 26Aab darotse bidiru kafwotsi s'iilere, bo shohatsnee, k'ec'atsnee, t'iwots gáác'atsnee, ernmó daritstso it nihye boon manziri. Eshe it kafwotsiyere ayidek'at bogftoshnáá? 27#Dub. 39:5-7 Ititse kic'ar b́beeyi dúrats ik aaw#6:27 B́beeyi dúrats ik aaw: Ik ik bitswotsitsere «b́ need'ats ik indú» etirwo daatsetwe. dabdek'o falitwo kone bíí? 28Ando mank'o tahi jangosh eegoshe it kic'iri, shiratsi fundwotsi aawk'o bo eenirwk'o s'iilere, booye finon ayidek't maawratsnee, jokeratsnee, 29#1 Naash. 10:4-7; 2 Zen. 9:3-6 B́mang jamonton Solomonwoŕ dab́ boyitsi ikuk'o taheratse, etirwe itsha. 30Eshe hambets be'eyar yats tawots jwetwo shiratsi tootso, Ik'o hank'o b́ takitkawotiyal, it shapts imnetiyetswotso! itnere bogshde'er aawk'oneya tako b́k'azeti? 31Mansh eshe it ‹Eege nomeeti? Wee, eege noúsheti? Egeek'uwa notahiti?› Erfetsr shiyanon kic'k'ayere. 32Man daatsosho Ik' ash woterawotswor geyirunee, itsh jaman b́geyitwok'o daritstso it nih danfee. 33Itmó, shin shino Ik'i mengstonat kááwo gewoore. Oorts keew jamo itsh dabeetwe. 34Yaatso b́tookish kic'itwee, yaatsish kic'k'ayere, aawosh b́gondoo bodfe.»

Currently Selected:

Matiwos Dooshishiyo 6: BrnNTLtn

Highlight

Copy