Mark'os Dooshishiyo 16

Iyesus k'irotse b́ tuutsok'o

(Mat. 28:1-8; Luk'. 24:1-12; Yoh. 20:1-10)

1Sanbati aawo b́beshi hakon Megdelawi kititstsu Mariyam, Yak'ob ind Mariyamnat Selomen wotat́, Iyesus duunats fuutosh shitúwo keew bo dek'i. 2Ik gawyotsi shints aaw wotts sanbat eenots guur t'úwon, aawu keshfere bwoor, doowo maants bo ami. 3Bo «Shútso doowi nonatse konek'uwa noosh kukulshiti?» etfetst keewefere bo amir. 4Manowere bo etir doowo bín ipets shútso ayidek't een b́ teshtsosha, kááwdek't bo s'iilnmó shútso ik maants kukulwtsat́ b́befere bo bek'i. 5Doowotso bo kindor shemi nas' tahirwo jawetso k'anomaantse b́ befere bobek'tsotse tek'bowtsi.

6Bímó boosh hank'owa bí et «Tek'k'ayere! it it geyirwo jitt teshetso Nazrettso Iyesusi b́ wottsok'o danfee, bí k'az tuure, hanoke aaliye, b́duukeyokonúwere hambe s'iilere. 7#Mat. 26:32; Mar. 14:28 Andoor ameree, b́ danifwotsnat P'et'rosnsh, ‹Haniyere shin Iyesus itsh b́ keewutsok'on bí Gelil maants itiyre shinar ametuwe, manokno bín bek'etute,› err boosh keewwere.»

8Máátswotswere shatoon k'ewefetst doowi ganoke kesht k'azbo'ami, ayidek't́ shatt boteshtsotse ik keewo konshor keewratsnó.

Iyesus megdela kititsttsu Mariyamsh b́ be'etsok'o

(Mat. 28:9-10; Yoh. 20:11-18)

[ 9Ik gawiyotse shints aawots Sanbata gudots Iyesus guuron k'irotse b́ tuwi hakon, shin shino shawat fo'erawo biyatse b́kishtsu Megdela eteef kititstsu Mariyamsh b́be'eyi. 10Biwere amaat, shiyanon eepoke fa'ua b́shuuts sha'efwotssh keew bk'ri. 11Biwere «Iyesus k'irotse tuut, kashon fa'ee, taawor ti ááwon bek're,» etaat boosh b keewi, ernmó boowor bin amaneratsno.

Iyesus b́ danif gituwotssh b́ be'ewo

(Luk'. 24:13-35)

12Maniyere hakon gat'ariyomants amfetst teshts b́ danif gitwotssh Iyesus k'osh aron b́ be'e. 13Bowere aanat b́danif oortswotssh keewbokri, ernmó manotsnor amaneratsno.

Iyesus wosheets tatse ikuwotssh b́be'ewo

(Mat. 28:16-20; Luk'. 24:36-49; Yoh. 20:19-23; Wosh. 1:6-8)

14Maniyere hakon tatse ikwots mishimarats t'int́ bomaafere Iyesus bo ats be'eeb́wtsi, «Iyesus k'irotse tuut kashon fa'ee no ááwono bek'rone,» ett boosh keewtswotsi aman bo k'aztsona et bo nib kup'osh boon b́k'efi. 15#Wosh. 1:8 Hank'owa boosh bíet, «Dats jik' jamats ameree, ash jamoosho doo shishiyo daniwere. 16Amantsonat guupetson kashitwe, amanerawonmó bí ats angshetwe. 17Taan amanitu jamwots adits keewanotsi finituno, t shúútson fo'erawo kishituuno, handr noon keew keewonowere keewituuno, 18Dawunzwotsi bodetsalo, wee úd'it merziyo dab́ bo úshal eegor boon k'alratse, bo kishono shodtswotsats bo gedor shodtswotś kashitune.»

Iyesus daro maants b́dek'etsok'o

(Luk'. 24:50-53; Wosh. 1:9-11)

19 # Wosh. 1:9-11 Doonzo Iyesus jaman boosh b́keewiyhakon daromaand k'az bíami. Ik'o k'ani aaromants be b́wtsi. 20B́ danifwotswere dats jamatse sha'at́ bo daniyi, doonzonúwere bonton b́ finefoni. Adits finono bo k'alitwok'o alo boosh ímt bo daniyru man ar b́wottsok'o b́ kup'shfoni.]

Currently Selected:

Mark'os Dooshishiyo 16: BrnNTLtn

Highlight

Copy