Yoana 21
21
Yeesu arabheebhukira abheehigira bhaaye Gariraaya
1Hanú gayo gaahwa, Yeesu akabheebhukira kweki abheehigira bhaaye embarika wa enyanja ya Tibheria. Weeki yaabheebhukira kwa enjira inu. 2Bhaaringa-ho Simoni Petero, Tomaso unú eriina erindi arabhirikirwa Ekisare, Natanaeri unú yaarwa Kana ya Gariraaya, abhaana bhabhiri bha Jebhedayo,#21:2 Abhaana bhabhiri bha Jebhedayo. Amariina gaabho bhaaringa Yakobho na Yoana. Maaha mukitabho kya Mataayo 10:2. na abheehigira abhandi bhabhiri. 3Simoni Petero akabhakeerya abharikyaye ega, “Mbere ngende okutega eginswi.” Bhonse bhakamukyukya ega, “Na bheetu tiga tugende hamwi na uuwe.” Mbe bhakagya, bhakariina mubhwato, bhakatega obhutiku kyo, nawe, bhataagwatya kora enswi yoyonse.
4Nyenkyo juri, Yeesu akeemirira embarika wa enyanja, nawe, abheehigira bhaaye bhataamanya ega, n-Yeesu. 5Mbe, Yeesu akabhabhirikira ega, “Bheenyu abhasaani bhaani, bhoono, mugwatirye enswi yoyonse?” Bheeki bhakamukyukya ega, “Tiigo-ha.” 6Yeesu akabhakeerya ega, “Mwese emitego orubhaara rwa obhuryo rwa obhwato, muraagwatye eginswi.”
Mbe, bhakeesa emitego, nawe, bhakatamwa okuguruta kwa okubha bhaagwatya eginswi eginjaru bhukongʼu. 7Omwihigira unú Yeesu yaamuhanja bhukongʼu, akamukeerya Petero ega, “M-Mukuru!” Hanú Simoni Petero yeegwa ega, m-Mukuru, akeebhoha omwenda gwaye gunú yaaruusya hanú yaamba okutega, akeeyesa munyanja. 8Abheehigira abhandi bhakagya embarika wa enyanja na obhwato, enu bhararuta omutego gunú gwaringa gwijwiri eginswi. Bhataaringa ahare, nawe, bhaaringa muna amatambuka egana rimwi ego.
9Hanú bhaahika kumurambo, bhakanyoora omururo. Omururo guyo, gwaringa gukoreri amakara, na eguru ya amakara gayo, gyaringa-ko eginswi na omukaate. 10Yeesu akabhakeerya abheehigira bhaaye ega, “Mureete hanu eginswi nkego kuginú mugwatirye.”
11Mbe, Simoni Petero akasoha mubhwato, akaruta embarika omutego gunú gwaringa gwijwiri eginswi. Omutego guyo gyaringa-mo eginswi eginene egana rimwi mirongo etaanu na esatu (153). Onyoora gyaringa-mo eginswi eginjaru bhukongʼu, omutego gutaataamuka.
12Yeesu akabhakeerya abheehigira bhaaye ega, “Muuje murye ebhyakurya.” Ataabha-ho omwihigira kora oumwi unú yaasakya okumubhuurya ega, “Uuwe niwi?” kwa okubha bhaamanya ega, m-Mukuru. 13Mbe, Yeesu akaaja, akagega omukaate, akabhahaana abheehigira bhaaye. Kweki, akagega na enswi yonse, akakora egoego. 14Ruyo rwaringa orwa kasatu Yeesu okubheebhukira abheehigira bhaaye, hanú yaamara okuhyuka okurwa mubhaku.
Yeesu arahaira na Petero
15Hanú bhaamara okurya, Yeesu akamubhuurya Petero ega, “Simoni, omwana wa Yoana, bhoono, unhanjiri bhukongʼu okukira kya ego bhanhanjiri abharikyaho?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya ebhimaanwa bhya amangʼondi bhyani.” 16Yeesu akamubhuurya Petero orwa kabhiri ega, “Simoni, omwana wa Yoana, bhoono unhanjiri?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya amangʼondi gaani.” 17Akamubhuurya orwa kasatu ega, “Simoni, omwana wa Yoana, bhoono unhanjiri?” Mbe, Petero akasurumbara kwa okubha yaamubhuurya orwa kasatu ega, “Bhoono, unhanjiri?” Akamukyukya ega, “Ee Omukuru, omanyiri gonsego. Omanyiri ega, nkuhanjiri.” Yeesu akamukeerya ega, “Riisya amangʼondi gaani. 18Ndakukeerya obhuheene ega, hanú waaringa omumura, weebhohanga emyenda gyaho omwene, na okugya hohonse enú weendanga okugya. Nawe, hanú origota, oriinura amabhoko gaaho na omuntu oundi arikwibhohya emyenda gyaho, na okukuhira enú otakwenda okugya.” 19Yeesu yaagamba ego, okoorokya enjira inú Petero arikwa na okumugungya Waryubha. Mbe, Yeesu akamukeerya Petero ega, “Nsoorana.”
20Mbe, Petero akeekyukya, akamurora omwihigira unú Yeesu yaamuhanja, yaaringa arabhasoorana. Omwihigira uyo ngʼ-unú yeekara haangʼi na Yeesu hanú bhaaryanga ebhyakurya, na okumubhuurya ega, “Ee Omukuru, niwi arikuriira eniku?” 21Mbe, hanú Petero yaamurora omwihigira urya, akamubhuurya Yeesu ega, “Ee Omukuru, bhoono, n-kintu-ki kirimaahikana kumwihigira uyo?” 22Yeesu akamukyukya ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya? Uuwe unsoorane.” 23Mbe, amangʼana gayo gakanyaragana gati ya abharikyaye ega, omwihigira uyo atarikwa. Nawe, Yeesu ataamukeerya omwihigira uyo ega, atarikwa, nawe, yaagamba ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya?” 24Omwihigira uyo ngʼo areemiririra ganu na okugangʼoora. Bheetu tumanyiri ega, ganú aragamba n-ga heene.
Yeesu yaakora amangʼana agandi amaaru
25Gariho amangʼana agandi amaaru ganú Yeesu yaaringa arakora. Nyoore gonsego gayo gakaangʼoorerwe, ekyaro kyonsego kitakeesiri okutuura-mo ebhitabho bhinú bhikaangʼoorerwe.
Currently Selected:
Yoana 21: Kabwa
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
Yoana 21
21
Yeesu arabheebhukira abheehigira bhaaye Gariraaya
1Hanú gayo gaahwa, Yeesu akabheebhukira kweki abheehigira bhaaye embarika wa enyanja ya Tibheria. Weeki yaabheebhukira kwa enjira inu. 2Bhaaringa-ho Simoni Petero, Tomaso unú eriina erindi arabhirikirwa Ekisare, Natanaeri unú yaarwa Kana ya Gariraaya, abhaana bhabhiri bha Jebhedayo,#21:2 Abhaana bhabhiri bha Jebhedayo. Amariina gaabho bhaaringa Yakobho na Yoana. Maaha mukitabho kya Mataayo 10:2. na abheehigira abhandi bhabhiri. 3Simoni Petero akabhakeerya abharikyaye ega, “Mbere ngende okutega eginswi.” Bhonse bhakamukyukya ega, “Na bheetu tiga tugende hamwi na uuwe.” Mbe bhakagya, bhakariina mubhwato, bhakatega obhutiku kyo, nawe, bhataagwatya kora enswi yoyonse.
4Nyenkyo juri, Yeesu akeemirira embarika wa enyanja, nawe, abheehigira bhaaye bhataamanya ega, n-Yeesu. 5Mbe, Yeesu akabhabhirikira ega, “Bheenyu abhasaani bhaani, bhoono, mugwatirye enswi yoyonse?” Bheeki bhakamukyukya ega, “Tiigo-ha.” 6Yeesu akabhakeerya ega, “Mwese emitego orubhaara rwa obhuryo rwa obhwato, muraagwatye eginswi.”
Mbe, bhakeesa emitego, nawe, bhakatamwa okuguruta kwa okubha bhaagwatya eginswi eginjaru bhukongʼu. 7Omwihigira unú Yeesu yaamuhanja bhukongʼu, akamukeerya Petero ega, “M-Mukuru!” Hanú Simoni Petero yeegwa ega, m-Mukuru, akeebhoha omwenda gwaye gunú yaaruusya hanú yaamba okutega, akeeyesa munyanja. 8Abheehigira abhandi bhakagya embarika wa enyanja na obhwato, enu bhararuta omutego gunú gwaringa gwijwiri eginswi. Bhataaringa ahare, nawe, bhaaringa muna amatambuka egana rimwi ego.
9Hanú bhaahika kumurambo, bhakanyoora omururo. Omururo guyo, gwaringa gukoreri amakara, na eguru ya amakara gayo, gyaringa-ko eginswi na omukaate. 10Yeesu akabhakeerya abheehigira bhaaye ega, “Mureete hanu eginswi nkego kuginú mugwatirye.”
11Mbe, Simoni Petero akasoha mubhwato, akaruta embarika omutego gunú gwaringa gwijwiri eginswi. Omutego guyo gyaringa-mo eginswi eginene egana rimwi mirongo etaanu na esatu (153). Onyoora gyaringa-mo eginswi eginjaru bhukongʼu, omutego gutaataamuka.
12Yeesu akabhakeerya abheehigira bhaaye ega, “Muuje murye ebhyakurya.” Ataabha-ho omwihigira kora oumwi unú yaasakya okumubhuurya ega, “Uuwe niwi?” kwa okubha bhaamanya ega, m-Mukuru. 13Mbe, Yeesu akaaja, akagega omukaate, akabhahaana abheehigira bhaaye. Kweki, akagega na enswi yonse, akakora egoego. 14Ruyo rwaringa orwa kasatu Yeesu okubheebhukira abheehigira bhaaye, hanú yaamara okuhyuka okurwa mubhaku.
Yeesu arahaira na Petero
15Hanú bhaamara okurya, Yeesu akamubhuurya Petero ega, “Simoni, omwana wa Yoana, bhoono, unhanjiri bhukongʼu okukira kya ego bhanhanjiri abharikyaho?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya ebhimaanwa bhya amangʼondi bhyani.” 16Yeesu akamubhuurya Petero orwa kabhiri ega, “Simoni, omwana wa Yoana, bhoono unhanjiri?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya amangʼondi gaani.” 17Akamubhuurya orwa kasatu ega, “Simoni, omwana wa Yoana, bhoono unhanjiri?” Mbe, Petero akasurumbara kwa okubha yaamubhuurya orwa kasatu ega, “Bhoono, unhanjiri?” Akamukyukya ega, “Ee Omukuru, omanyiri gonsego. Omanyiri ega, nkuhanjiri.” Yeesu akamukeerya ega, “Riisya amangʼondi gaani. 18Ndakukeerya obhuheene ega, hanú waaringa omumura, weebhohanga emyenda gyaho omwene, na okugya hohonse enú weendanga okugya. Nawe, hanú origota, oriinura amabhoko gaaho na omuntu oundi arikwibhohya emyenda gyaho, na okukuhira enú otakwenda okugya.” 19Yeesu yaagamba ego, okoorokya enjira inú Petero arikwa na okumugungya Waryubha. Mbe, Yeesu akamukeerya Petero ega, “Nsoorana.”
20Mbe, Petero akeekyukya, akamurora omwihigira unú Yeesu yaamuhanja, yaaringa arabhasoorana. Omwihigira uyo ngʼ-unú yeekara haangʼi na Yeesu hanú bhaaryanga ebhyakurya, na okumubhuurya ega, “Ee Omukuru, niwi arikuriira eniku?” 21Mbe, hanú Petero yaamurora omwihigira urya, akamubhuurya Yeesu ega, “Ee Omukuru, bhoono, n-kintu-ki kirimaahikana kumwihigira uyo?” 22Yeesu akamukyukya ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya? Uuwe unsoorane.” 23Mbe, amangʼana gayo gakanyaragana gati ya abharikyaye ega, omwihigira uyo atarikwa. Nawe, Yeesu ataamukeerya omwihigira uyo ega, atarikwa, nawe, yaagamba ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya?” 24Omwihigira uyo ngʼo areemiririra ganu na okugangʼoora. Bheetu tumanyiri ega, ganú aragamba n-ga heene.
Yeesu yaakora amangʼana agandi amaaru
25Gariho amangʼana agandi amaaru ganú Yeesu yaaringa arakora. Nyoore gonsego gayo gakaangʼoorerwe, ekyaro kyonsego kitakeesiri okutuura-mo ebhitabho bhinú bhikaangʼoorerwe.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.