Ruuka 2

Okwibhurwa kwa Yeesu

(Mataayo 1:18-25)

1Kuginsiku giyo, Kaisari#2:1 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. Agosto, yaaragirirya ega, abhantu bhonsego bhanú bharingi mubhyaro bhya kubhutungi bhwaye, bhagye okungʼoorwa. 2Okungʼoorwa kuyo kwaringa kwa okwamba, kwaakoreka eribhaga rinú Kurenio yaaringa omutungi wa ekyaro kya Siria. 3Ego, abhantu bhonsego bhakagya, kira omuntu mumugi gwa oruganda rwabho.

4Yusufu wonse, akarwa mumugi gwa Najareeti, mukyaro kya Gariraaya. Akariina okugya mumugi gwa Bhetereheemu, mukyaro kya Yudea. Bhetereheemu ngo gwaringa omugi gwa omukama Daudi, na Yusufu yaaringa wa oruganda rwa Daudi. 5Yusufu akagya okwingʼoora hamwi na Mariamu, unú yaaringa arombeeri obhuko. Eribhaga riyo, Mariamu yaaringa na enda. 6Hanú bhaahika eyo, okwibhura kwaye kukahika. 7Akeebhura omwana wa ekisaaja omutangi, muriigo rya egintugo. Akamukundikirya emyenda gya ekyana, akamuraarya mwitubha rya okuriisya-mo egintugo. Yeebhurira muyo, kwa okubha bhataanyoora omweya gwa okuraara, muginyumba gya abhageni.

Abhariisya bhareebhukirwa na bhamaraika

8Bhaaringa-ho abhariisya bharaangararira egintugo gyabho kukibhara obhutiku. 9Rumwigo, bhakeebhukirwa na maraika wa Omukuru Waryubha, na endingaasi ya Omukuru Waryubha ekabhamirikira mbaara gyonsego, bhakabha na enkubhi enene bhukongʼu. 10Maraika uyo akabhakeerya ega, “Mutige okoobhoha, mbareeteeri eringʼana erijomu rinú rirajomera abhantu bhonsego. 11Reero inu, mumugi gwa Daudi, yeebhwirwe Omutuurya weenyu. Omutuurya uyo ngʼo Omukuru, kweki ngʼo Kiristu#2:11 Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu. omwene. 12Ekimanyiiriryo kya okoorokya gayo niiga, mwakanyoore omwana ekijaare araariibhwe mwitubha rya okuriisirya egintugo, akundikiriibhwe emyenda gya ekyana.”

13Rumwigo, bhakaaja ebhiku na ebhiku bhya bhamaraika okurwa murwire, bhakabha bharamugungya Waryubha ega,

14“Waryubha wa murwire agungibhwe!

Na mukyaro, omurembe gubhe kubhantu bhanú arajomererwa nabho.”

15Bhamaraika bhayo hanú bhaamara, bhakahinda murwire. Mbe, abhariisya bhakagambana ega, “Tugende mumugi gwa Bhetereheemu, turore ganú geebhukiri eyo, kya ego Omukuru Waryubha atukeererye.” 16Bhakagya bhwangubhwangu. Hanú bhaahika, bhakanyoora Mariamu na Yusufu, na omwana ekijaare areeri mwitubha. 17Hanú bhaamara okumurora omwana uyo, bhakaraarika kubhantu amangʼana gonsego ganú maraika abhakeererye eguru yaaye. 18Bhonsego bhanú bheegwa amangʼana ganú bhaakeeribhwa na abhariisya, bhakaruguura bhukongʼu. 19Mariamu akabhiikanga gayo gonsego mumutima gwaye, akabha arageeganirirya.

20Abhariisya bhayo bhakahunjuka, enu bharamugungya Waryubha, kugonsego ganú bheegwa na okugarora. Kya ego bhaakeeribhwa na maraika, niigo gonsego gaakoreka.

21Omwana uyo, hanú yaahikya orusiku rwa munaane, bhakamusaara, bhakamutoga Yeesu. Riyo ndyo eriina rinú maraika yaaringa amariri okumuhaana, eribhaga ngʼina waabho yaaringa akyari okugega enda.

Yeesu aratuurwa embere ya Waryubha

22Yusufu na Mariamu bhakamara eginsiku gya okuraamwa kwabho, kya ego yeenderwanga mumaragiriryo ga Musa.#2:22a Mumaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. Kweki maaha mukitabho kya Abharaawi 12:2-8 amaragiriryo ga okuraamwa eguru ya okwibhura. Nho, bhakahira Yeesu mumugi gwa Yerusaremu,#2:22b Yerusaremu. Maaha eringʼana rinu mu Moonjooro eguru ya Amangʼana Amakongʼu. naho bhamutuure embere ya Omukuru Waryubha. 23Bhaakora ego, kya ego yaangʼoorwa mumaragiriryo ga Omukuru Waryubha ega, “Omwana omutangi wa ekisaaja, yaahurwe okubha embere ya Omukuru Waryubha.”#2:23 Maaha mukitabho kya Okuhuruka 13:2, 13:12, 13:15. 24Hamwi na gayo, bheendanga bhamuruusirye ekimwenso,#2:24a Ekimwenso. Maaha eringʼana rinu mu Moonjooro eguru ya Amangʼana Amakongʼu. kya ego yaangʼoorwa mumaragiriryo ga Omukuru Waryubha ega, “Yeenderwanga bharuusye eginguuti ebhiri kasi amaana gabhiri ga enguuti.”#2:24b Maaha mukitabho kya Abharaawi 12:6-8.

25Yaaringa-ho omuntu umwi Yerusaremu hayo, eriina ryaye Simeoni. Yaaringa omuntu wa obhuheene, omwigwa ku Waryubha. Yaaganyiriranga okurora okutuuribhwa kwa Isiraeri, kweki Omutima Omurabhu yaaringa hamwi nawe. 26Omutima Omurabhu yaaringa amukeererye ega, atarikwa akyari okurora Kiristu Omutuurya okurwa ku Mukuru Waryubha. 27Abheebhuri bha Yeesu hanú bhaamuhira mwisyengerero erikuru rya Waryubha, bhakakora kya ego bhaaragiriribhwa na amaragiriryo ga Waryubha. Simeoni wonse, Omutima Omurabhu akamoorokererya ega, asohe muyo. 28Akamutuura Mariamu omwana enu aramugungya Waryubha ega,

29“Omukuru, ndasabha unyikiririrye nkwe na omurembe,

kwa okubha nduuji endago yaaho,

kya ego waandaga oni omugaya waaho.

30Kweki, niroreeri obhutuurya bhunú oreeteri,

31bhunú waaseemerye, naho bhutuuke kubhantu bhonsego.

32Obhutuurya bhuyo ni-ndingaasi ya okoorokya enjira yaaho,

kubhantu bhanú bhataringi Abhayahudi.

Kora abhantu bhaaho bha Isiraeri bhonsego bharitogoonibhwa.”

33Amangʼana ganú Simeoni yaagamba eguru ya omwana uyo, gaabharuguuryanga abheebhuri bhaaye. 34Hayo, Simeoni akabhanonka, akamukeerya Mariamu, ngʼina waabho omwana uyo ega, “Omwana unu, asorerwe na Waryubha okusikya Abhaisiraeri abhaaru na okutuurya abhandi abhaaru. Aribha ekimanyiiriryo kya Waryubha, kinú kiryangwa na abhantu. 35Abhantu bhayo, amangʼana ganú geebhisanga muginkoro gyabho, garitubhuka kubhurabhu. Uuwe wonse oriigwa obhururu bhukongʼu, oribha kya unú obhitirwe na omuhyu omoogi.”

36Yaaringa-ho omurooti umwi omukungu bhukongʼu, eriina ryaye yaabhirikirwanga Ana, omuhara wa Fanueri, wa erikabhira rya Asheri. Yeekara emyaka muhungati egyenego na omusaaja waaye, okurwa hanú yaatetwa, omusaaja waaye akakwa. 37Akatigara omusino, akabha arasabha mwisyengerero erikuru rya Waryubha, omubhasu na obhutiku. Kwibhaga rya okusabha yeeyimanga ebhyakurya. Hanú Yeesu yaareetwa mwisyengerero erikuru rya Waryubha, Ana uyo yaaringa ahikirye emyaka mirongo munaane na ena (84). 38Eribhaga riyoriyo, Ana akeeyorokya, akaamba okumugungya Waryubha, akaraarika amangʼana ga omwana uyo, kubhantu bhonsego bhanú bhaaganyiriranga Waryubha atuurye omugi gwa Yerusaremu.

39Yusufu na Mariamu, hanú bhaamara okukora gonsego ganú amaragiriryo ga Omukuru Waryubha geendanga, bhakahunjuka owaabho mumugi gwa Najareeti, mukyaro kya Gariraaya. 40Omwana akakiina, akabha na eginguru, akeejuribhwa egintungwa, na yaaringa aranonkwa na Waryubha.

Omwana Yeesu mwisyengerero erikuru rya Waryubha

41Abheebhuri bhaaye, bhaariinanga okugya mumugi gwa Yerusaremu kira omwaka, munyangi ya Epasaka.#2:41 Munyangi ya Epasaka. Ni-nyangi ya Abhaisiraeri eya okuhiituka kya ego Waryubha yaatungurya bhajaaji waabho okurwa mubhugaya, mukyaro kya Misiri. Obhutungurya bhuyo, bhwakoreka kwibhaga rya Musa. Maaha mukitabho kya Okuhuruka 12. Kweki maaha Epasaka mu Moonjooro eguru ya Amangʼana Amakongʼu. 42Hanú Yeesu yaahikya emyaka ekumi na ebhiri, bhakagya nawe munyangi, okuringʼaana na egimiira gyabho. 43Eginsiku gya enyangi hanú gyahwa, abheebhuri bhaaye bhakahunjuka iika. Nawe, weeki akatama Yerusaremu. Abheebhuri bhaaye bhataamanya ego, 44kwa okubha bhaamanyanga ega, aringi hamwi na abharikyabho bhanú bhaahindanga iika hamwi. Hanú orusiku rumwi rwahwa bira okumurora, abheebhuri bhaaye bhakaamba okumutuna kubhahiiri bhaabho na abhasaani bhaabho. 45Hanú yaabhabhura, bhakahunjuka Yerusaremu, naho bhamutune eyo.

46Orusiku rwa kasatu, bhakamunyoora murubhanja rwa erisyengerero erikuru rya Waryubha, yeekeeri gati ya abheehigirya, arabheetegeerera na arabhabhuurya amangʼana. 47Abhantu bhonsego bhanú bheegwa kya ego yaaringa aragamba, bhakaruguura bhukongʼu eguru ya obhumanyi bhwaye, na kya ego yaaringa arakyukya.

48Abheebhuri bhaaye, hanú bhaamurora, bhakaruguura bhukongʼu, haa! Ngʼina waabho akamubhuurya ega, “Uuwe omwana waani, kwaki otukoreeri ego? Oni na eseweenyu twaringa na obhoobha, twakutuniri bhukongʼu!” 49Akakyukya ega, “Kwaki mwaringa murantuna? Maheene mutamanyiri ega, ndeenderwa nikare munyumba ya Taata?” 50Nawe erikyukya riyo, abheebhuri bhaaye bhataarimanya.

51Amahairo gayo gaaja okuhwa, bhakahiringita nawe okugya iika owaabho mumugi gwa Najareeti, akabha arabheegwa. Gayo gonsego gaakoreka ngʼina waabho, akagabhiika mumutima gwaye. 52Yeesu akagendererya okukiina, akabha na egintungwa, akabha angʼariiri Waryubha na abhantu.

Currently Selected:

Ruuka 2: Kabwa

Highlight

Copy