Ruuka 21

Egisadaaka gya abhaniibhi na omusino omutobhu

(Mariko 12:41-44)

1Yeesu hanú yaaringa akyari murubhanja rwa erisyengerero erikuru rya Waryubha, akarora abhaniibhi bharatuura emituho gyabho mwisandiko rya okuruusirya-mo egisadaaka. 2Akarora na omusino umwi omutobhu, aratuura-mo egimbirya ebhiri egyenego.#21:2 Egimbirya ebhiri egyenego. Ekiyunani kiragamba ega, eminyaraga ebhiri. Egimbirya giyo, gyaringa na obhwera obhukego.

3Mbe, Yeesu akagamba ega, “Ndabhakeerya obhuheene ega, omusino omutobhu unu, ngʼo ateeri egimbirya eginjaru mwisandiko, okukira abhandi bhayo bhonsego. 4Ndagamba ego, kwa okubha abhandi bhayo bhonsego, bharuusirye amasaagyo okurwa kubhintu ebhyaru bhinú bhaanabhyo. Nawe, omusino omutobhu unu, aruusirye ebhintu bhyaye bhyonsego!”

Yeesu arahairira eguru ya enyanko enduru inú eraaja

(Mataayo 24:1-14; Mariko 13:1-13)

5Abheehigira abhandi bha Yeesu, bhaaringa bharahairira erisyengerero erikuru rya Waryubha,#21:5 Erisyengerero erikuru rya Waryubha. Maaha eringʼana rinu mu Moonjooro eguru ya Amangʼana Amakongʼu. kya ego ryaringa rikonerwe kwa amagina amajomu, hamwi na emituho ginú abhantu bhaaruusiryanga Waryubha. Kimwi, Yeesu akagamba ega, 6“Eribhaga ririija, rinú amangʼana gonsego ganú murarora bhoonwego, garihaanyurirwa hansi, kora erigina rimwi ritaritama eguru ya erindi!”

7Mbe, abheehigira bhayo, bhakamubhuurya ega, “Omwihigirya, amangʼana gayo gariibhuka ruuha? Na n-kimanyiiriryo-ki, kinú kiryorokya ega, garingi haangʼi okwibhuka?”

8Yeesu akabhakyukya ega, “Mwiyangararire, mutariija okungʼeenereribhwa. Abhantu abhaaru bhariija kwa eriina ryani, bharigamba ega, ‘Oni nooni Kiristu!’ Kweki, bharigamba ega, ‘Obhuteero bhwa ekyaro bhuringi haangʼi!’ Abhantu bhayo, mutabhasoorana. 9Kweki, hanú muriigwa amangʼana ga eriihe, na eritoongʼana, mutoobhoha! Gayo gareenderwa geebhuke mbere, nawe, obhuteero bhwa ekyaro bhuribha bhukyari okuhika.”

10Yeesu akagendererya okubhakeerya ega, “Ekyaro ekimwi, kirirwana na ekindi, na obhukama obhumwi, bhurirwana na obhukama obhundi. 11Kira ahasi haribha na ebhirigiti bhya erirobha ebhinene, enjara enduru, na amarweri amabhiibhi bhukongʼu. Na okurwa murwire, kuribha-ho ebhimanyiiriryo ebhinene. Abhantu bharirora amangʼana amarito ganú garibhakanga bhukongʼu.

12“Nawe, eribhaga gayo gonsego gataratuuka, abhantu bharibhahira kubhakuru bha amasinagogi, naho mubhohwe mwigereja enu muranyankibhwa. Na abhandi murihirwa okubhuturirwa ekiina kubhakama na abhaanangwa kurusumo rwani. 13Hayo nho, murinyoora omweya gwa okubha abheemiririri bhaani embere yaabho.

14“Kwa ego, mwamure mumitima gyenyu ega, mutige okuseemya ganú murigamba, okwibhagirira mukiina. 15Oni omwene, ndibhahaana egintungwa, na amangʼana ganú murigamba, abhasigu bheenyu bhatarigaanga kora bhatarigahakaana.

16“Murikorerwa eniku kora na abheebhuri bheenyu, abhamura bheenyu, abhahiiri bheenyu na abhasaani bheenyu. Gati yeenyu, abhandi muriitwa. 17Abhantu bhonsego bharibhajimira kurusumo rwa eriina ryani. 18Nawe, amangʼana gayo, gataribhanyahaara, kora orutuukya orumwi kumitwe gyenyu rutaribhura. 19Obhuhoru bhwenyu bhurituuribhwa, hanú muriikongʼererya.

Waryubha aribhuturira ekiinaabhantu bha ekyaro kya Isiraeri

(Mataayo 24:15-21; Mariko 13:14-19)

20“Nawe, hanú murirora ega, omugi gwa Yerusaremu#21:20 Yerusaremu. Maaha eringʼana rinu mu Moonjooro eguru ya Amangʼana Amakongʼu. gwinaarirwe na abhasirikare, mbe mumanye ega, eribhaga rya okugusarya rihikiri. 21Hayo, bhanú orinyoora bharingi mukyaro kya Yudea, bhakenyere muginkuku. Bhanú orinyoora bharingi Yerusaremu muyo, bharwe-mo bhwangu. Na bhanú orinyoora bharingi mumigunda, bhatahunjuka mumugi muyo. 22Ndagamba ego, kwa okubha, eginsiku giyo, ngyo gya okuriha ekisiiyomba, naho amangʼana gonsego ganú gaangʼoorwa, gahikire obhuteero bhwago. 23Kuginsiku giyo, ndabhamaahira ekyabhira abhakari bha eginda na bhanú orinyoora bharaneenʼya! Ndabhamaahira ekyabhira, kwa okubha kuribha na enyanko enene bhukongʼu mukyaro kya Isiraeri. Kweki, Waryubha arijibhya bhururu abhantu bha mukyaro kiyo. 24Abhantu abhandi bhariitwa kwa amapanga. Abhandi bharigwatwa na okuhirwa mubhyaro ebhindi. Omugi gwa Yerusaremu guritungwa na abhantu okurwa kubhyaro ebhindi, bhanú bhataringi Abhayahudi. Gayo garikoreka okuhikira eribhaga ryabho rya okutunga hanú ririhwa.

Yeesu arahairira okuhunjuka kwaye

(Mataayo 24:29-31; Mariko 13:24-27)

25“Kuribha na ebhimanyiiriryo kuryubha, omweri, na eginjota. Na mukyaro hanu, eginyanja giribha na amabhooka amaaru garahirira. Abhantu bhanú bhataringi Abhayahudi, bharibha na enyanko na obhoobha. 26Mbe, gayo gonsego hanú garituuka mukyaro, abhantu bharyobhoha bhukongʼu. Bharigwa erihiku kwa ekisigo kya okukangwa, enu bharaganyirira amangʼana amabhiibhi bhukongʼu, ganú garaatuuke mukyaro. Na eginguru gya kurwire gyonsego girisingisibhwa.#21:26 Maaha mubhitabho bhya Isaaya 13:10, 34:4; Joeri 2:10.

27“Hayo nho, abhantu bhonsego bharimurora Omwana wa Adamu araaja kumasaaru kwa eginguru na obhukuru obhwaru. 28Mbe, amangʼana gayo, hanú garyamba okukoreka, mwikongʼererye, okuterema kwa okubha eribhaga rya okutuuribhwa kwenyu, orinyoora riringi haangʼi!”

Ekirengyo kya omuti gwa omutini

(Mataayo 24:32-35; Mariko 13:28-31)

29Kweki, Yeesu akabhakeerya abheehigira bhaaye ekirengyo ega, “Mumaahe omutini, na emiti egindi gyonsego. 30Hanú murarora ega, omuti gwambiri okusebhuka, rumwigo muramanya ega, eribhaga rya embura riringi haangʼi.

31“Egoego, na bheenyu hanú murirora amangʼana ganu garakoreka, mumanye ega, obhukama bhwa Waryubha bhuringi haangʼi. 32Ndabhakeerya obhuheene ega, abhantu bha orwibhuro runu, bhatarihita, gayo gonsego gakyari okwibhuka. 33Ekyaro na orwire bhirihita, nawe amangʼana gaani gariguma koko!

Orusiku rwa obhuteero ruriija rumwigo

34“Mwiyangararire! Emitima gyenyu gitariija okugwatwa na orunamba rwa okukora amangʼana ga mukyaro bhuyagayaga, okurehwa, na obhoobha bhwa obhuhoru. Nyoore tiigo, orusiku rwa okuhunjuka Omwana wa Adamu, ruribhaajira mutamanyiri. 35Orusiku ruyo ruribhaajira rumwigo abhantu bhonsego bha mukyaro. 36Kwa ego, mubhe mwiseemerye eribhaga ryonsego! Mugendererye okumusabha Waryubha, naho abhabheere okwambuka gonsego ganú garituuka, na okwimirira embere ya Omwana wa Adamu.”

37Mbe, kuginsiku giyo, Yeesu yaaringa areehigirya abhantu murubhanja rwa erisyengerero erikuru rya Waryubha. Obhutiku, yaagyanga okuraara munkuku ya Emijeituni. 38Abhantu abhaaru bhaamwenjanga nyenkyo juri, okugya murubhanja rwa erisyengerero, naho bhamwitegeerere.

Currently Selected:

Ruuka 21: Kabwa

Highlight

Copy