Pianciilna 24
24
Isaac atu Zi khat
1Tu in Abraham huai mama a, Topa in a sepna theampo ah thupha pia hi. 2Ama in a neisa theampo a uk, a naseam haambelpa tungah, “Ka phei kawmah na khut koi in a, kiciam in. 3Hi sung a, Canaan mihingte sung pan ka tapa zi tu na teal ngawl natu in, vantung le leitung Pathian Topa min taw na kiciam tu ka dei hi. 4Ka pianna ngam ah pai kikin, ka beete sung pan ka tapa Isaac zi tu na pui tu hi,” ci hi.
5Ahizong a naseampa in, “A numei in a inn nusia nuam ngawlin hi ngam ah kei hong zui nuam buathong le banglaw tu khi ziam? Nong paina ngam ah na tapa puak kik tu khi ziam?” ci in dongh hi.
6Abraham in, “Tualai ah ka tapa na paipui thak ngawl natu, in kidawm in! 7Vantung Pathian, Topa in ka pa inn pan le ka beete ngam pan hong paipui a, ama in ka suan ka paalte tungah hi ngam kong pia tu hi, ci in ciliaphuai takin kamciam hong pia hi. Tualai ah ka tapa atu zi khat na nga thei natu in ama in na mai ah ama ii vantunglalang sia sawl tu hi. 8A numei in hong zui nuam bua ahile hi kamciam panin, nang na suakta tu hi. Bangbang po ahizong tua munah ka tapa na heak pui kik ngei buatu hi,” ci in zo hi. 9Tuaciang a naseampa in, a topa Abraham ii phei kawmah a khut koi in Abraham ci bang seam tu in kiciam hi.
10Abraham neisa a uk, a naseampa in a topa kalaoh sawm la in, Mesopotamia saksang Nahor teenna khuapi ah pai hi. 11A thet ciang khuapi puasang tuikhuk ah a kalaohte khupdinsak hi. Tua hun in nikai zawk nitak sang hi a, numeite pusuak in a tuitoai hun ahi hi. 12Ama thungen a, “Ka topa Abraham ii Pathian, Topa awng, ka topa tung na kamciam kholet in tuni in hong taangtungsak ta'n. 13Hi sung, ka omna mun tuikhuk ah khuapi sung pan ngaknunote tuitoai in hong pai tu uh hi. 14Keima in amate khat ii tungah, ‘Tui hong nesak ta'n, hesuakna taw na tuibeal niamsuksak in,’ ka ci tu hi. ‘Ne in, na kalaohte atu zongh tui kana toai tu hi,’ hong ci le tua nu sia, na naseampa Isaac atu in na teal kholsa numei hi tahen. Hi bangin hong hi takpi le ka topa tungah na kamciam na kholetna kong tel tu hi,” ci hi.
15A thunget a man ma in, a liangko ah tuibeal a pua Rebecca hong theng hi. Tua nusia, Abraham suapuipa Nahor le a zi Milcahte ii tapa Bethuel ii tanu ahi hi. 16Tua nu sia, ngaknu thiangtho hi lai in, a mealpha mama ngaknuno khat hi. Ama tuikhuk ah tuaksuk a, a beal tui dimin hong kaato kik hi. 17Naseampa, tua nu taw kimu tu in tai a, “Hesuakna taw na tuibeal sung panin ka neak tu tui hong pia ta'n,” ci hi.
18Ama in, “Ne in, syapa awng” ci in, a liangko pan a tuibeal niamsuksak paih a, tui a neak laitakin letsak hi. 19Ama, tui a neak zawkciang, Rebecca in, “Na kalaohte ii a du zaza a neak tu tui zongh ka na toai tu hi,” ci hi. 20Ama in, a tuibeal taw tuitoai in ngan tui piakna kuang sungah sung memeang in, tuikhuk ah tui nawnin tai a, ama ii kalaohte theampo tui a kham mateng tui toaisak hi. 21Tua pa huthe ngawlin, Topa in hong taangtungsak tu ahi katawm maw, ci in ama encik nginge hi.
22Ngaknu nu sia tua teng a man zawkciang, tua pa in a manham khamh kual khat la in, ama naak ah baasak a, khamh hak lian nii zongh la in a baan ah bunsak hi. 23Ama in, “Na pa akua ziam, nong hesuakna hong son ta'n, na pa inn ah tu zan ka mite le keima ngia natu mun a om tu ziam?” ci in dongh hi.
24“Ka pa sia Nahor le Milcah ii tapa Bethuel ahi hi. 25Koma inn ah na ngannote atu taangphaw le lopa ko tam mama om a, na ngia natu mun zongh om hi,” ci in ama in zo hi.
26Tuasia ciang tua pa khupdin in Topa bia hi. 27Ama in, “Ka topa Abraham ii Pathian, Topa kipok tahen. Topa in ka topa Abraham tungah a kamciam sia thumaan takin kholet zo hi. Ka topa Abraham ii beete kungah Topa in hong masuan hi,” ci hi.
28Ngaknu nu sia a nu inn ah tai a, thupiang theampo son hi. 29Tu in Rebecca ii suapuipa Laban sia Abraham ii naseampa omna tuikhuk ah pai tu in tai hi. 30Laban in a suapuinu naakba le a baan tungah haakte mu zo a, tua pa in Rebecca tungah a son teng a zaaksa hi. Ama sia a kalaohte kung tuikhuk ah a ding Abraham naseampa kungah pai in, 31“Kei taw inn ah cia tawng. Nang sia Topa ii thupha piakpa khat na hi hi. Banghangin hi lai ah ding ni ziam? Ka inn ah nangma om natu inndoi khat le na kalaohte om natu mun om hi,” ci hi.
32Tua ahiciang tua pa inn sungah tum a, Laban in kalaohte vanh sua in, kalaohte taangphaw le lopa ko pia hi. Tua zawkciang ama in Abraham naseampa le a mite peang sil natu tui paipui hi. 33An a kilui ciang tua pa in, “Kong son tu teng kong son phot mateng an ka ne buatu hi,” ci hi.
Laban in, “Na thuson zom in,” ci hi.
34Ama kipan in, “Keima sia Abraham naseampa khi hi. 35Topa in ka topa nasia takin thupha pia a, a hau khat suaksak hi. Ama in, tuuhon, kealhon, khuihon, ngunn, khamh, sila pate le sila numeite, kalaohte le laate pia hi. 36Ka topa ii zi Sarah a huai zawkciang ka topa atu tapa khat nei a, tua tapa tungah ka topa in a neisa theampo pia hi. 37Ka topa in ama ii thupiak a zui tu in hong kiciamsak hi. Ama in, ‘Canaan ngam numeite sung pan ka tapa zi tu na teal buatu hi. 38Tua sangin, ka pa ii mipuite le ka beete kungah na pai tu a, ama zi tu na teal tu hi,’ hong ci hi. 39Tuaciang, keima in ka topa tungah, ‘A numei in kei hong zui nuam buathong le banglaw tu khi ziam?’ ci in ka dongh hi. 40Ama in, ‘A thu ka nit tawntung Topa in na koppui tu a vantunglalang hong paisak tu a nangma hong taangtungsak tu hi. Nangma in ka mipuite, ka pa innkuan sung panin ka tapa zi tu na nga tu hi. 41Na kiciamna pan na ton natu lampi khat bek om hi: ka beete kungah na pai ciangin amate in nang hong nial le tuasia ciang nang na tong tu hi,’ ci in hong zo hi.
42“Tuni in, tuikhuk kung ka thet ciang, ka thungetna in, ‘Ka topa Abraham ii Pathian Topa awng, nong hesuakna in ka sep tu teng hong taangtungsak ta'n. 43Hi sung tuikhuk ah om khi hi. Ngaknu khat tuitoai tu hong pai ciang a tuibeal sung pan tui neak tu hong piak natu in ka ngen tu hi. 44Ama lungkim in, ka kalaohte atu zongh tui hong pia le, tua nu sia ka topa tapa ii zi tu in na tealsa sia hisak in,’ ka ci hi. 45Thim dide a ka thunget ka man ma in, Rebecca in a liangko tungah tuibeal pua in hong pai a, tuitoai tu in tuikhuk ah hong tuaksuk hi. Keima in ama tungah, ‘Nong hesuakna in ka neak tu tui hong pia ta'n,’ ka ci hi. 46Ama in, manlang takin a liangko pan a tuibeal niamsakin, ‘Ne in, na kalaohte zongh tui ka pia tu hi,’ hong ci hi. Tua ahiciang kei zongh tui ne a, ka kalaohte zongh ama in tui pia hi. 47Keima in ama tungah, ‘Na pa akua ziam?’ ci in ka dongh hi. Ama in, ‘Ka pa sia Nahor le Milcah ii tapa Bethuel ahi hi,’ ci in hong zo hi. Tuasia ciangin, a naak ah naakba ka khai a, a baante tungah haakte ka bunsak hi. 48Khupdin in Topa ka bia hi. Ka topa Abraham ii Pathian, Topa ka pok hi. Ama in ka topa ii beepa kung ma ah hong masuan zo a, hi lai ah ka topa ii tapa atu a tanu ka mu zo hi. 49Tu in hi bang ka topa tungah vaipuak na nei teng na khuangkhim tu na ngaisun uh a, ama tungah a kilawm bangin vawt na sawm uh le nong hesuakna in hong son tavun; hi thei bo na ci uh le zong hong son tavun, tua hile ka nasep tu zia ka khensat tu hi,” ci hi.
50Laban le Bethuel in, “Hi thu Topa kung pan hong pai ahiciang, kote khensat tu hi ngawl hi. 51Hi sungah Rebecca om hi; ama ciapui tavun. Topa mama ii cisa bangin na topa tapa ii zi hi tahen,” ci in zo hi. 52Abraham naseampa in hi thu teng a zaak ciang, kunsuk in Topa bia hi. 53Tua zawkciang ama ii ken nikteen puansilh, ngunn le khamh kizepna teng sua khia in Rebecca pia hi. A suapuipa le a nu zongh a manham letsongte pia lai hi.
54Tuasia zawkciang Abraham ii naseampa le a mite anne tuidawn in, tua munah zan ngiak uh hi. Amate zingsang a thaw uh ciangin ama in, “Ka topa kungah hong ciasak kik tavun,” ci hi.
55Ahizong, Rebecca suapuipa le a nu in, “Ngaknu nu taw nipi khat ahibuale ni sawm hong omkhawmsak lai ta'n, tua zawkciang hong cia thei tu hi,” ci uh hi.
56Ahizong ama in, “Kote hong taamsak heak vun. Topa in ka khualhawna hong zosak hi; ka topa kungah hong cia kiksak tavun,” ci hi.
57Amate in, “Ngaknu nu samin ama in bang a ci ziam, ih dongh tel tu hi,” ci in zo hi. 58Tua ahiciang amate in Rebecca samin, “Hi pasalpa na zui paih nuam ziam?” ci in dongh hi.
Ama in, “Ka zui paih nuam hi,” ci in zo hi.
59Tua ahikom amate in Rebecca le a innkuan ii naseam ngei sia nu zongh Abraham ii naseampa le a mite taw paisak uh hi. 60Tuaciang amate in hi bangin Rebecca thupha pia uh hi:
“Suapui nu, nang, a tul a thente ii nu suak ta'n!
Na suan na paalte in, a ngalte ii khuapite zo tahen!”
61Tua zawkciang Rebecca le a numei khangmoite Abraham ii naseampa taw paikhawm tu in, kithoai a, kalaoh tungah to uh hi. Tuaciang amate vaiding siat uh hi.
62Isaac sia, “A Nungta Hong Mu Pa ii Tuikhuk” a kici duisung ah pai in Canaan thangsang ah teang hi. 63Nikai zawk nitak sangin a lo sungah lam a seau le kalaohte hong pai mu hi. 64Rebecca in Isaac a mu ciang a kalaoh tung pan tuaksuk a, 65Abraham ii naseampa tungah, “Lo sungah lamseau a, ei sang hong zuan pa akua ziam?” ci in dongh hi.
Naseampa in, “Ama sia ka topa hi,” ci in zo hi. Tua ahiciang ama in, a mai khuna puan la in, a mai khu hi.
66Naseampa in Isaac tungah a nasepna theampo son siat hi. 67Tua zawkciang Isaac in a nu Sarah teenna ngei tuipuanbuk sungah Rebecca paipui in ama sia a zi hong suak hi. Isaac in Rebecca it a, tua ahikom a nu thi huvau in ama a kihenepna suak hi.
Currently Selected:
Pianciilna 24: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
Pianciilna 24
24
Isaac atu Zi khat
1Tu in Abraham huai mama a, Topa in a sepna theampo ah thupha pia hi. 2Ama in a neisa theampo a uk, a naseam haambelpa tungah, “Ka phei kawmah na khut koi in a, kiciam in. 3Hi sung a, Canaan mihingte sung pan ka tapa zi tu na teal ngawl natu in, vantung le leitung Pathian Topa min taw na kiciam tu ka dei hi. 4Ka pianna ngam ah pai kikin, ka beete sung pan ka tapa Isaac zi tu na pui tu hi,” ci hi.
5Ahizong a naseampa in, “A numei in a inn nusia nuam ngawlin hi ngam ah kei hong zui nuam buathong le banglaw tu khi ziam? Nong paina ngam ah na tapa puak kik tu khi ziam?” ci in dongh hi.
6Abraham in, “Tualai ah ka tapa na paipui thak ngawl natu, in kidawm in! 7Vantung Pathian, Topa in ka pa inn pan le ka beete ngam pan hong paipui a, ama in ka suan ka paalte tungah hi ngam kong pia tu hi, ci in ciliaphuai takin kamciam hong pia hi. Tualai ah ka tapa atu zi khat na nga thei natu in ama in na mai ah ama ii vantunglalang sia sawl tu hi. 8A numei in hong zui nuam bua ahile hi kamciam panin, nang na suakta tu hi. Bangbang po ahizong tua munah ka tapa na heak pui kik ngei buatu hi,” ci in zo hi. 9Tuaciang a naseampa in, a topa Abraham ii phei kawmah a khut koi in Abraham ci bang seam tu in kiciam hi.
10Abraham neisa a uk, a naseampa in a topa kalaoh sawm la in, Mesopotamia saksang Nahor teenna khuapi ah pai hi. 11A thet ciang khuapi puasang tuikhuk ah a kalaohte khupdinsak hi. Tua hun in nikai zawk nitak sang hi a, numeite pusuak in a tuitoai hun ahi hi. 12Ama thungen a, “Ka topa Abraham ii Pathian, Topa awng, ka topa tung na kamciam kholet in tuni in hong taangtungsak ta'n. 13Hi sung, ka omna mun tuikhuk ah khuapi sung pan ngaknunote tuitoai in hong pai tu uh hi. 14Keima in amate khat ii tungah, ‘Tui hong nesak ta'n, hesuakna taw na tuibeal niamsuksak in,’ ka ci tu hi. ‘Ne in, na kalaohte atu zongh tui kana toai tu hi,’ hong ci le tua nu sia, na naseampa Isaac atu in na teal kholsa numei hi tahen. Hi bangin hong hi takpi le ka topa tungah na kamciam na kholetna kong tel tu hi,” ci hi.
15A thunget a man ma in, a liangko ah tuibeal a pua Rebecca hong theng hi. Tua nusia, Abraham suapuipa Nahor le a zi Milcahte ii tapa Bethuel ii tanu ahi hi. 16Tua nu sia, ngaknu thiangtho hi lai in, a mealpha mama ngaknuno khat hi. Ama tuikhuk ah tuaksuk a, a beal tui dimin hong kaato kik hi. 17Naseampa, tua nu taw kimu tu in tai a, “Hesuakna taw na tuibeal sung panin ka neak tu tui hong pia ta'n,” ci hi.
18Ama in, “Ne in, syapa awng” ci in, a liangko pan a tuibeal niamsuksak paih a, tui a neak laitakin letsak hi. 19Ama, tui a neak zawkciang, Rebecca in, “Na kalaohte ii a du zaza a neak tu tui zongh ka na toai tu hi,” ci hi. 20Ama in, a tuibeal taw tuitoai in ngan tui piakna kuang sungah sung memeang in, tuikhuk ah tui nawnin tai a, ama ii kalaohte theampo tui a kham mateng tui toaisak hi. 21Tua pa huthe ngawlin, Topa in hong taangtungsak tu ahi katawm maw, ci in ama encik nginge hi.
22Ngaknu nu sia tua teng a man zawkciang, tua pa in a manham khamh kual khat la in, ama naak ah baasak a, khamh hak lian nii zongh la in a baan ah bunsak hi. 23Ama in, “Na pa akua ziam, nong hesuakna hong son ta'n, na pa inn ah tu zan ka mite le keima ngia natu mun a om tu ziam?” ci in dongh hi.
24“Ka pa sia Nahor le Milcah ii tapa Bethuel ahi hi. 25Koma inn ah na ngannote atu taangphaw le lopa ko tam mama om a, na ngia natu mun zongh om hi,” ci in ama in zo hi.
26Tuasia ciang tua pa khupdin in Topa bia hi. 27Ama in, “Ka topa Abraham ii Pathian, Topa kipok tahen. Topa in ka topa Abraham tungah a kamciam sia thumaan takin kholet zo hi. Ka topa Abraham ii beete kungah Topa in hong masuan hi,” ci hi.
28Ngaknu nu sia a nu inn ah tai a, thupiang theampo son hi. 29Tu in Rebecca ii suapuipa Laban sia Abraham ii naseampa omna tuikhuk ah pai tu in tai hi. 30Laban in a suapuinu naakba le a baan tungah haakte mu zo a, tua pa in Rebecca tungah a son teng a zaaksa hi. Ama sia a kalaohte kung tuikhuk ah a ding Abraham naseampa kungah pai in, 31“Kei taw inn ah cia tawng. Nang sia Topa ii thupha piakpa khat na hi hi. Banghangin hi lai ah ding ni ziam? Ka inn ah nangma om natu inndoi khat le na kalaohte om natu mun om hi,” ci hi.
32Tua ahiciang tua pa inn sungah tum a, Laban in kalaohte vanh sua in, kalaohte taangphaw le lopa ko pia hi. Tua zawkciang ama in Abraham naseampa le a mite peang sil natu tui paipui hi. 33An a kilui ciang tua pa in, “Kong son tu teng kong son phot mateng an ka ne buatu hi,” ci hi.
Laban in, “Na thuson zom in,” ci hi.
34Ama kipan in, “Keima sia Abraham naseampa khi hi. 35Topa in ka topa nasia takin thupha pia a, a hau khat suaksak hi. Ama in, tuuhon, kealhon, khuihon, ngunn, khamh, sila pate le sila numeite, kalaohte le laate pia hi. 36Ka topa ii zi Sarah a huai zawkciang ka topa atu tapa khat nei a, tua tapa tungah ka topa in a neisa theampo pia hi. 37Ka topa in ama ii thupiak a zui tu in hong kiciamsak hi. Ama in, ‘Canaan ngam numeite sung pan ka tapa zi tu na teal buatu hi. 38Tua sangin, ka pa ii mipuite le ka beete kungah na pai tu a, ama zi tu na teal tu hi,’ hong ci hi. 39Tuaciang, keima in ka topa tungah, ‘A numei in kei hong zui nuam buathong le banglaw tu khi ziam?’ ci in ka dongh hi. 40Ama in, ‘A thu ka nit tawntung Topa in na koppui tu a vantunglalang hong paisak tu a nangma hong taangtungsak tu hi. Nangma in ka mipuite, ka pa innkuan sung panin ka tapa zi tu na nga tu hi. 41Na kiciamna pan na ton natu lampi khat bek om hi: ka beete kungah na pai ciangin amate in nang hong nial le tuasia ciang nang na tong tu hi,’ ci in hong zo hi.
42“Tuni in, tuikhuk kung ka thet ciang, ka thungetna in, ‘Ka topa Abraham ii Pathian Topa awng, nong hesuakna in ka sep tu teng hong taangtungsak ta'n. 43Hi sung tuikhuk ah om khi hi. Ngaknu khat tuitoai tu hong pai ciang a tuibeal sung pan tui neak tu hong piak natu in ka ngen tu hi. 44Ama lungkim in, ka kalaohte atu zongh tui hong pia le, tua nu sia ka topa tapa ii zi tu in na tealsa sia hisak in,’ ka ci hi. 45Thim dide a ka thunget ka man ma in, Rebecca in a liangko tungah tuibeal pua in hong pai a, tuitoai tu in tuikhuk ah hong tuaksuk hi. Keima in ama tungah, ‘Nong hesuakna in ka neak tu tui hong pia ta'n,’ ka ci hi. 46Ama in, manlang takin a liangko pan a tuibeal niamsakin, ‘Ne in, na kalaohte zongh tui ka pia tu hi,’ hong ci hi. Tua ahiciang kei zongh tui ne a, ka kalaohte zongh ama in tui pia hi. 47Keima in ama tungah, ‘Na pa akua ziam?’ ci in ka dongh hi. Ama in, ‘Ka pa sia Nahor le Milcah ii tapa Bethuel ahi hi,’ ci in hong zo hi. Tuasia ciangin, a naak ah naakba ka khai a, a baante tungah haakte ka bunsak hi. 48Khupdin in Topa ka bia hi. Ka topa Abraham ii Pathian, Topa ka pok hi. Ama in ka topa ii beepa kung ma ah hong masuan zo a, hi lai ah ka topa ii tapa atu a tanu ka mu zo hi. 49Tu in hi bang ka topa tungah vaipuak na nei teng na khuangkhim tu na ngaisun uh a, ama tungah a kilawm bangin vawt na sawm uh le nong hesuakna in hong son tavun; hi thei bo na ci uh le zong hong son tavun, tua hile ka nasep tu zia ka khensat tu hi,” ci hi.
50Laban le Bethuel in, “Hi thu Topa kung pan hong pai ahiciang, kote khensat tu hi ngawl hi. 51Hi sungah Rebecca om hi; ama ciapui tavun. Topa mama ii cisa bangin na topa tapa ii zi hi tahen,” ci in zo hi. 52Abraham naseampa in hi thu teng a zaak ciang, kunsuk in Topa bia hi. 53Tua zawkciang ama ii ken nikteen puansilh, ngunn le khamh kizepna teng sua khia in Rebecca pia hi. A suapuipa le a nu zongh a manham letsongte pia lai hi.
54Tuasia zawkciang Abraham ii naseampa le a mite anne tuidawn in, tua munah zan ngiak uh hi. Amate zingsang a thaw uh ciangin ama in, “Ka topa kungah hong ciasak kik tavun,” ci hi.
55Ahizong, Rebecca suapuipa le a nu in, “Ngaknu nu taw nipi khat ahibuale ni sawm hong omkhawmsak lai ta'n, tua zawkciang hong cia thei tu hi,” ci uh hi.
56Ahizong ama in, “Kote hong taamsak heak vun. Topa in ka khualhawna hong zosak hi; ka topa kungah hong cia kiksak tavun,” ci hi.
57Amate in, “Ngaknu nu samin ama in bang a ci ziam, ih dongh tel tu hi,” ci in zo hi. 58Tua ahiciang amate in Rebecca samin, “Hi pasalpa na zui paih nuam ziam?” ci in dongh hi.
Ama in, “Ka zui paih nuam hi,” ci in zo hi.
59Tua ahikom amate in Rebecca le a innkuan ii naseam ngei sia nu zongh Abraham ii naseampa le a mite taw paisak uh hi. 60Tuaciang amate in hi bangin Rebecca thupha pia uh hi:
“Suapui nu, nang, a tul a thente ii nu suak ta'n!
Na suan na paalte in, a ngalte ii khuapite zo tahen!”
61Tua zawkciang Rebecca le a numei khangmoite Abraham ii naseampa taw paikhawm tu in, kithoai a, kalaoh tungah to uh hi. Tuaciang amate vaiding siat uh hi.
62Isaac sia, “A Nungta Hong Mu Pa ii Tuikhuk” a kici duisung ah pai in Canaan thangsang ah teang hi. 63Nikai zawk nitak sangin a lo sungah lam a seau le kalaohte hong pai mu hi. 64Rebecca in Isaac a mu ciang a kalaoh tung pan tuaksuk a, 65Abraham ii naseampa tungah, “Lo sungah lamseau a, ei sang hong zuan pa akua ziam?” ci in dongh hi.
Naseampa in, “Ama sia ka topa hi,” ci in zo hi. Tua ahiciang ama in, a mai khuna puan la in, a mai khu hi.
66Naseampa in Isaac tungah a nasepna theampo son siat hi. 67Tua zawkciang Isaac in a nu Sarah teenna ngei tuipuanbuk sungah Rebecca paipui in ama sia a zi hong suak hi. Isaac in Rebecca it a, tua ahikom a nu thi huvau in ama a kihenepna suak hi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016