Nʋnʋgbɩɩ 1

Zozii lä Kplɔɔkplɔɔ‑wugɔɔ yi kwli

1'Klʋkpää kʋnyɔ Teofilö‑, ‑bhɔɔdää' wälɩɩ 'fɩɩn Zozii ‑nʋ lä 'nɩ ɔ cɩa‑ lä nä, ɩmɩ ‑amʋ Lukö, n ‑jɩjlä lä. 2'Klünö 'mɩ ɔ ‑nʋ lä ‑kaaa 'nɩ ɔɔ' Laagɔduu' ‑gblääylʋʋ yi lä ŋëë. ‑Mä 'fɩa ‑yä ɔ 'kä gblää‑ nä, sä ɔ ylä bhlä nynä ‑mä ɔɔ' lobho lobhonyʋa nʋ nä, ɔ ‑sonʋwa sɔɔ Kplɔɔkplɔɔ‑wʋgɔɔ 'päwaa 'mnö.

3Zozii kuu‑ 'nɩ ɔ ‑glɔɔ lä 'kuëë nä, kɔ ‑ghlʋwa 'yii. Ylɩɩ gwlɩ 'sɔ 'mnö, ɔ ‑ghlʋwa 'yi ‑yä, ɔ 'kwa plɛɛ' bhlüa nynä ɔɔ' ‑wʋ kuu‑ ‑mä ɔ ‑yä. Ɔ ‑yʋwa 'sɔ ‑kʋ ‑lɔɔ 'nɩ, ɔ cɩwa‑ Laagɔɔ' 'Leyiduu' yëkuu' wälɩ.

4'Tänyɩ bhlo ‑kʋ ‑lɔɔ 'nɩ, Zozii ‑yʋwa 'sɔ ‑kʋ lüdä 'nɩ ɔ yiwa soo, ɔ lä a 'nä ‑sä ‑lä Zolizalɛmʋ‑duu gwë ‑mä, ‑lʋʋ 'Bäɔ cii‑ bhlä nynä ‑mä ɔ yi'anyɩ 'nyɛ, 'nɩ ‑ʋnö walɩ‑ n ‑sonö'anyɩ lä nä, a ‑bɛɛnʋ! 5A ni Zään Badisö nä, 'nyuu ɔ ŋʋʋ‑ nyɩkpa 'wlu, ‑mä anyɩ, ‑ɔ ‑too yɩ ‑mɔɔ ylɩɩ zio ‑yä, Laagɔ 'kanyɩ Kplɔɔkplɔɔ‑wugɔɔ 'wlu 'ŋʋ.

Zozii gblää‑ Laagɔduu'

6Zozii cii‑ lä sɔɔ nä, nyɩkpaa‑ 'wlää‑ bhlä ‑lɔɔ 'wlu nä, kwa ylɔɔ‑, wlä Kwlienyɔ‑, naa, ‑lɔɔ' 'tänyɩyɩ 'mnö ‑n 'ga lä bʋkʋ 'Yizlɛnyʋa 'kämälɩɩ' ‑tëbhuu 'nyɛ ‑a? 7'Nɩ ɔ yiwa soo, ɔ lä ‑lɔɔ' 'gliyee ‑yä ‑lɔɔ lio yibhëlɩɩ nä, ɩɩ' ‑wʋ anyɩa' wälɩ plöö‑. ‑Mä n 'Bä ‑bhlo 'coo, ɔmɔɔ‑ ‑kä lä ‑lɔɔ' 'tänyɩɛɛ döölɩɩ' 'päwa. 8Anyɩ nä, Kplɔɔkplɔɔ‑wugɔɔ ka'anyɩ 'kʋ kwlii‑ nä, ʋ yi'anyɩ 'päwä 'nyɛ. ‑Lɔɔ a 'kä lä 'naa ‑dläfʋɛɛ' lünyʋä 'plö. A yi Zolizalɛmʋduu' mʋ, a yi 'sɩɩ Zudee‑bhlɩɛɛ' dää 'fɩɩn mʋ, 'nɩ a yi 'sɩɩ Samalii‑bhlɩɛ 'mnö ‑yä 'ylʋzɔɔ dää 'fɩɩn mʋ 'nɩ, a yi ‑mɔɔ 'naa ‑dläfʋɛ lüü. 9Zozii cii‑ ylä sɔɔ nä, kɔ cie‑ ‑laagɔɔ' ‑gbläälɩ 'kʋ. 'Kʋgënyʋa‑ ‑kʋ bhlä ‑lɔɔ nä, wa ‑kʋɔ wloodä ‑aaa, 'nɩ ɔ yiwa 'yikʋ 'mʋmnɔ 'nyukpɔɔ nëëdë. 10‑Mä wa ‑kʋ bhä ‑lätee ‑laagɔɔ' wloodä, 'nɩ 'kpobhuu ‑bhlo 'kʋ nyɩkpa 'sɔ ‑ghlää ‑lɔɔ 'kʋ. Wa ‑plä bhä ‑bänö 'päpö. 11Wlä Galileenyʋänyɩ‑, ‑ɔ ‑kʋ bhä ‑lɔɔ 'nɩ a wloo bhä ‑laagɔɔ? Zoziinɔ ‑ɔ ‑bha'anyɩ lä ‑lää nëëdë 'nɩ ‑ɔ gblää‑ lä ‑laagɔɔ' nä, sa nio‑ lä 'yi 'nɩ ɔ gblää‑ lä nä, ɔɔ' yi‑tänyɩɛ 'mnö nä, 'sɔɔ ‑säkä ‑säkä a 'kɔ lä 'sɩɩ 'yi 'ni ‑yä ɔ 'kä kwli.

'Kʋgënyʋa 'ylɩbhɔ‑ Zolizalɛmʋduu'

12Ɩ ‑kʋ bhɛ lä sɔɔ nä, kä 'kʋgënyʋa 'ylɩbhɔ‑. Wa ‑bha yɩ 'kükëa 'wlu 'nɩ wa yi Zolizalɛmʋduu' yi. 'Kükëa 'mä wa laa lä Olivie‑kükëa. Aa' ‑wʋ Zolizalɛmʋ‑duu dä ‑tlʋ. ‑Lɔɔ' ‑blɔklëa nʋ yiosä kilooye. 13Wa ‑ŋëë ylä Zolizalɛmʋduu' nä, kwa gblää‑ 'tasɩ ‑bhutu 'wlu. ‑Bhutuyɩ 'wlu ‑mɔɔ wa kʋ bhä ‑zä. 'Kʋgënyʋa‑ ‑kʋ bhlä ‑mɔɔ nä, a ni waa' 'ŋnöö. Pɩɛlö ‑yä Zään ‑yä Zakö. Adlee ‑yä Filipʋ ‑yä Tomaa. Batlemii ‑yä Matie ‑yä Afee ‑yowli Zakö. Simɔɔ wa ‑zie lä 'Bhlɩɩ 'Kʋ Bhläänyɔ#1.13 'Bhlɩɩ 'Kʋ Bhläänyɔ: Nyɩkpaa' ‑nänʋä sä 'ŋnöö ‑zɔɔ nynä ‑mä, ɔ ‑glö bhä 'bhlɩ 'kʋ bhläänyʋaa' ‑jɛnyɩɛ 'mnö nyɩkpɔ, 'nɩ ‑nänʋä ci 'sɩɩ nynä ‑mä ɔ ‑glö bhä Moyizöö' ‑Jlämaa' 'kʋ bhläänyɔ. nä, ɩyä Zakö ‑yowli Zudö. 14Wa 'jɛnyɩ bhä 'nɩ wa 'wlää bhä ‑lɔɔ 'wlu 'nɩ wa bhibhie bhä 'kɔɔkɔ. 'Ŋwnɩä ‑kʋmʋwa bhä nëëdë. Zozii ɔ 'nɔ Malii, ɩyä Zozii ɔ bhelie ‑kʋmʋ bhä 'sɩɩ ‑lɔɔ.

Matɩasö bhlüü‑ Zuda Sikalɩɔtö 'kpobhuu 'kʋ

15‑Mä nyɩkpaa' ‑lʋa ‑wa ŋoo‑ bhlä Zozii' ciciwälɩɩ kʋ nä, wa yi bhä nyɩkpaa' gwlɩ ‑ngboplo (120) bhlü. Ylʋʋ ‑bhlo ‑kʋ ‑lɔɔ 'nɩ wa 'wlää‑ bhä 'wlu, 'nɩ Pɩɛlö yi 'kʋ ‑bha, ɔ 'nyniguwa‑ nëëdë 'nɩ ɔ yiwa soo, ɔ lä 16bhelienyɩ‑, ɩ ‑ŋwa bhä 'zaazɩ 'kʋ nynä ‑mä, sä Kplɔɔkplɔɔ‑wugɔɔ cii‑ lä ‑mɔɔ Laagɔ‑bɔɔgʋʋ ‑mnö nä, sɔɔ glää! Wälɩɩ ʋ ŋʋʋ‑ lä ‑a tötɔ Davidö nëë' 'nɩ ɔ cii‑ lä nä, Zudaa' yëkuu' wälɩ‑ ɔ ci bhlä. Zozii' 'bhlänyʋa, Zudaa 'mɔɔ‑ ‑kʋwa bhlä 'yikʋ 'nɩ ‑ɔ 'tienʋwa‑ bhlä. 17Ɔ ‑glö bhä ‑anyɩa nëëdëë' nyɩkpɔ, 'nɩ ‑anyɩa lebhenɛ 'mnö nä, ɔ ‑kämʋ bhä 'sɩɩ ‑tëbhu. 18‑Mä nyɩkpa‑doluu' monie wa nyɩɔ‑ lä nä, ɔ bhlie‑ 'kʋ 'nɩ ɔ zɔɔ‑ 'klä. 'Klänä 'mnö ‑mɔɔ ɔ sloo‑ gu ‑blɩɩ, 'nɩ ɔɔ' 'gʋʋ gaa‑. 'Nɩ ɔɔ' 'mnöö 'mɩɩ ‑dloo. 19Zolizalɛmʋ‑dunʋ mnö nyɩkpaa 'fɩɩn ‑yi wälɩnɩ. Ɩmɩɩ‑ ‑kä 'ŋnö 'nɩ wa laa lä ‑lɔɔ' 'klaa Akɛdama. Kɩ sä lä wa 'bhuwälɩɩ' ‑zɔɔ nynä ‑mä doluu' 'klä. 20‑Bhlɛ ɩ ‑jɩjlɔ Laagɔɔ' Lɔlɔɔ' 'bɔɔgʋʋ 'mnö nynä ‑mä

‑Lɔɔ' nyɩkpɔɔ nä,

Ɔɔ' 'gbëa doo në ‑yä

Nyɩkpɔɔ' kʋa ‑lä yɩ 'mnö! # 1.20 Ɩ bha Lɔlɔ 69.26.

'Nɩ, ɩ ‑jɩjlɔ 'sɩɩ nynä ‑mä

'Yigäda‑nyɩkpɔ kʋ ɔɔ' 'kpobhuu 'mnö. # 1.20 Ɩ bha Lɔlɔ 109.8.

21Ɩ ‑kʋ ylä sää nä, a ‑ya ‑sä nyɩkpɔ ‑yä ‑a 'gɔ Zudaa' bhlëë' 'ŋʋʋ. 'Tänyɩɩ Kwlienyɔ Zozii ‑kʋ‑anyɩ bhlä ‑lätee nëëdë 'nɩ ɔ ‑yanyɩ 'sɔ nää bhlä nä, nyɩkpaa ‑wa gü‑anyɩ bhlä 'kɔɔkɔ 'kʋ nä, a ‑ya ‑sä ‑mɔɔ nyɩkpɔ. 22‑A ciee yɩ 'tänyɩɩ Zään Badisöö' ŋʋɔ lä 'nyuu 'wlu nä ‑kaaa ‑yä ‑a ŋëë yɩ 'tänyɩɩ ɔ ‑bhanyɩ lä nëëdë 'nɩ ɔ gblää‑ lä ‑laagɔɔ' nä, ‑wa gü‑anyɩ lä ‑lɔɔ' 'tänyɩɛ 'mnö 'kʋ nä, ɩ ‑ŋwa 'kʋ nynä ‑mä ‑a ‑sä ‑mɔɔ nyɩkpɔ ‑yä ɔ ‑yanyɩ 'sɔ 'kä Kwlienyɔɔ' 'kuëë glɔɔlɩɩ' ‑dläfʋɛɛ lüü däbhloo'.

23Pɩɛlö cii‑ lä sɔɔ nä, nyɩkpanä nëëdë, wa ‑sä ‑mɔɔ nyɩkpaa 'sɔ. ‑Bhlo wa lɔɔ bhä Zozɛfʋ. Zozɛfʋ nä, wa lɔɔ bhä 'sɩɩ Basabasö, 'nɩ wa bhizio bhä Zutusö. ‑Lɔɔ' 'sɔnalɔɔ 'mɔ wa laa bhä Matɩasö. 24'Nɩ wa yi nyɩkpanää' ‑za bhibhie, wlä Kwlienyɔ‑! ‑Mɔɔ nä, ‑mɔɔ ni lä nyɩkpɔɔ' pleyii 'yi! Nä, nyɩkpanä 'sɔ ‑a yä lä 'ŋnö 'pä nä, ‑n ‑sä waa' nëëdëë' ‑bhlo ‑yä 25‑tëbhuu Zudaa ‑kä bhlä 'nɩ ɔ yä lä të nä, ‑lɔɔ' nyɩkpɔɔ 'kʋʋ kään. ‑Mä Zudaa nä, ‑gbäsɩɩ ɔ ‑ŋwa bhlä 'kʋ nä, ɔ yä ‑mɔɔ mʋ. 26Wa ‑bhibhie ylä sɔɔ nä, 'nɩ wa yi ‑nugbe 'pä ‑yä, ‑ɔnö lɛɛ‑ gä ‑lü nä, wa 'kɔ Zudaa' bhlëë' 'ŋʋʋ. Wa paa‑ lä ‑nugbee nä, Matɩasöö' ‑lɛɛ 'mɛɛ‑ ‑lü. Matɩasönɔ nä, ɔmɔ wa ‑gbɛ lä Zozii' lobho lobhonyʋa 'kʋgbä ‑bhlo kätää'.

Currently Selected:

Nʋnʋgbɩɩ 1: god

Highlight

Copy