Lukö 15

'Bhabhlöyuo ‑ɔ ‑too 'nɩ wa nii‑ lä nää' ‑nyädlaa

(Matie 18.12‑14)

1 Lapoo‑ylänyʋa ‑yä gbenyenyinyʋa yi bhä Zozii yëku waa' ‑lefɩɩn 'nɩ wa puo bhä 'nyukwlii. 2‑Mä Falizɩɛnyʋa ‑yä ‑Jlämöcɩanyʋa 'sɔ gbään bhä 'mnö ɔɔ' ‑za 'nɩ wa ci bhä, wlä nyɩkpɔnɔ nä, kɔ tla gbenyenyinyʋa wlɩ, 'nɩ ɔ ‑yʋwa 'sɔ lüü 'sɩɩ 'kʋ!

3'Nɩ Zozii yiwa ‑nyädlä soo, 4ɔ lä anyɩa nëëdëë' nyɩkpɔ kä 'bhabhlö gwlɩ ‑ngbü (100) ‑kä 'nɩ ɩɩ' nëëdëë' ‑bhlo kä ‑too nä, 'bhabhlöö' gwlɩ ‑mɔɔnä 'nɩ 'kʋgbä ‑pɛɛnä ‑kʋ lä ‑lɔɔ nä, kɔ tii ‑lɔɔ 'popie 'mnö 'nɩ ‑ɛ ‑too lä nä, ɔ tänɩɛ ‑kaaa 'nɩ ɔ 'nie! Yio ‑a? 5Ɔ kɛ yɩ nii‑ nä, kä 'mnö mɛnöɔ yɩ. 'Nɩ ‑pʋpɛɛ 'mnö, ɔ pä 'bhabhlɛɛ sɔkɔtakpä 'kʋ, 6'nɩ ɔ lɛɛ gbëë'. Ɔ kä ‑yi 'nɩ ɔ laa ɔ 'nagwɩä ‑yä ɔɔ' 'kʋ kʋʋnyʋä nynä a yi ‑ya nʋ ‑pʋpɛ ‑mä 'naa 'bhabhlɛɛ‑ ‑too bhlä nä, n yɛ 'ni! 7Zozii lä n sonö'anyɩ nynä ‑mä gbenyenyinyɔ ‑bhlo 'coo kä gbenyenyii' ‑bhaa 'nɩ ɔ kä Laagɔɔ' ‑blɔɔ 'kʋ ‑yii nä, ‑pʋpɛ 'kädɛɛ nʋɔ ‑mɔɔ Laagɔduu'. 'Nɩ ‑pʋpɛɛ ‑ɛ nʋɔ lä ‑mɔɔ nä, ɛ zi ‑pʋpɛɛ ‑lɛɛ ‑ɛ nʋɔ lä 'yigënyʋää' gwlɩ ‑mɔɔnä ‑yä 'kʋgbä ‑pɛɛnää' ‑za nä.

‑Flëëgie ‑ɛ ‑too 'nɩ wa nii‑ lä nää' ‑nyädlaa

8Bʋkʋ nä, 'ŋnɔ kä ‑flëëgüyi 'kʋgbä ‑kä 'nɩ ɩɩ' nëëdëë' lɛɛ ‑bhlo kä ‑too nä, kɔ dö 'näpɛ 'yii, 'nɩ ɔ nynipë ɔɔ' ‑bhutuu 'fɩɩn 'mnö, 'nɩ ɔ tänɩɛ 'nɩä 'nɩä ‑kaa 'nɩ ɔ nie. Yio ‑a? 9Ɔ kɛ yɩ nii‑ nä, 'nɩ ɔ laa ɔɔ' 'nagwɩä ‑yä ɔɔ' 'kʋ kʋʋnyʋa 'nɩ ɔ sonʋwa nynä ‑mä a ‑ya ‑a nʋ ‑pʋpɛ ‑mä 'naa ‑flëëgie ‑ɛ ‑too bhlä nä, n yɛ 'ni! 10‑Nä kä n sonö'anyɩ yɩ nynä ‑mä gbenyenyinyɔ ‑bhlo 'coo kä ɔɔ' gbenyenyii 'mnö ‑bha 'nɩ ɔ kä Laagɔɔ' ‑blɔɔ 'kʋ ‑yi nä, ‑mɔɔ Laagɔduu' kä ‑Laagɔzizii nʋ ‑pʋpɛ.

'Yuoo‑ zloo‑ bhlä ɔ 'bää 'gbëa nää' ‑nyädlaa

11'Nɩ Zozii yiwa bʋkʋ soo, ɔ lä nyɩkpɔ ‑bhlo, ɔmɔɔ‑ ‑kä bhlä ɔɔ' 'yuŋwadie 'sɔ. 12‑Mä 'tänyɩ ‑kʋ ‑lɔɔ 'nɩ bʋkʋʋ' ‑lɔɔ yi ɔ 'bä soo, ɔ lä ‑A 'bä, jaa ‑n 'gä lä të nä, ‑n 'nyɛ 'gää 'naa ‑laa ‑a gä'ä bhlä 'kʋ ŋëë nä! Ɔ cii‑ bhɛlä sɔɔ nä, kä 'bäɔ ‑dëë yɩ ɔɔ' kääkäälɩɩ ɔ ‑yowlie. 13‑Mä ylɩɩ zio plöö‑ ylä nä, kä bʋkʋʋ' ‑lɔɔ ŋʋʋ‑ yɩ ɔɔ' daa 'kpä, 'nɩ ɔ ‑yä monie 'sɔ yi 'bhlɩ kätää' jlä ‑kää mʋ fɛɛn. ‑Mɔɔ ɔ ‑kʋ ylä ‑käpä ‑käpä nʋdä ‑aaa, 'nɩ moniinɛ ɔ bhɛɛ‑ bhlä nä, ɛ yi ‑didi plɔɔ 'fɩɩn.

14‑Mä 'tänyɩ ‑kʋ ‑lɔɔ 'nɩ ‑gbugbe 'kädɛ ‑plä 'bhlɩɛ 'mnö. Nä ɔ yä bhɛlä 'sɩɩ ɔɔ' monie 'fɩɩn nyima nä, ɔɔ' 'ni bhɛ lülülʋʋ. 15'Nɩ ‑mɔɔ lowluu', ɔ yi nyɩkpɔɔ' 'klää lebhe 'ni. Ɔ wloo bhä nyɩkpɔɔ' bholuzälöö 'kʋ. 16‑Mä ɔ wlui bhlä 'kʋ 'nɩ ‑gbugbe kɔ 'bhlä nä, ɔɔ' plɛ nynä ‑mä ɔ lü bholuzälöö' lülülɩɩ, ‑mä waa' 'nyɩɔnyɩ bhɔɔ.

17'Tänyɩ ‑kʋ yɩ ‑lɔɔ 'nɩ, ɔ yi bhobho ‑plɩɩ, ɔ lä ‑maa, n 'bää 'gbëa 'mnö lebhe‑nʋnyʋa 'fɩɩn wa ‑kä lülülɩɩ, 'nɩ wa lü 'nɩ ɩ ji 'kʋ. 'Nɩ n ‑kʋ lä ‑mää 'nɩ ‑gbugbe 'bhlänö'ö lä 'kuudä ‑a! 18N yi 'kʋ ‑bha 'nɩ n yi n 'bä yëku mʋ, 'nɩ n yio soo nynä ‑mä ‑a 'bä, bheeje ‑mä n yä nyenyi nʋ! N yä Laagɔ dëlü nyenyi nʋ, 'nɩ n yä 'sɩɩ ‑mɔɔ dëlü nyenyi nʋ! 19Nä, nn' yɩɔ 'kʋ ‑ŋwa nynä ‑mä n 'plö ‑naa 'yu nä, ‑n klä'ä yɩ nynä ‑naa ‑gänʋnyʋa nëëdëë' nyɩkpɔ! 20'Nɩ 'yuo yi 'kʋ ‑bha 'nɩ ɔ yi ɔ 'bä yëku 'ylɩbhɔ.

‑Mä, ɔɔ' 'bä 'ninöɔ‑ lä ‑blëlë 'yi nä, kä ŋäzö ‑jɛnöɔ 'kʋ. 'Nɩ ɔ yi paa 'nɩ, ɔ yio 'kʋ gboo ‑kää mʋ. 21‑Mä ɔ ‑yowlio ‑sonöɔ, ɔ lä ‑a 'bä, bheeje ‑mä n yä nyenyi nʋ! N yä Laagɔ dëlü nyenyi nʋ, 'nɩ n yä 'sɩɩ ‑mɔɔ dëlü nyenyi nʋ! Nä, nn' yɩɔ 'kʋ ‑ŋwa nynä ‑mä n 'plö ‑naa 'yu!

22Ɩ ‑kʋɔ nëë' ‑bhlɛ, ɔ 'bä paa‑ ‑gänʋnyʋa wälɩ, ɔ lä a ‑lä ‑bänä! A ‑lä ‑bänaa' ‑lɛ 'nänaa ‑yä a plaa 'naa 'yuo 'mʋ! A ‑lä ‑kpätlʋwee ‑yä a 'ŋʋɔ wliiyee! Ɩyä a ‑lä ‑asädlɛɛ ɔ 'kä plä! 23A mʋ ‑yä, ‑bhlüüga ‑a nää‑ lä 'kʋ ‑bhʋkʋ ‑bhʋkʋ nä, a 'bhlaa ‑yä ‑a 'gä lü ‑a 'gä ‑pʋpɛ nʋ 24‑mä, 'naa 'yunɔ ‑ɔ ‑kʋ lä ‑lää nä, ɔ yä bhɛ 'ku, 'nɩ ɔ ‑yi lä bʋkʋ zëkpë 'kʋ! Ɔ yä bhɛ too, 'nɩ ɔ yä lä nio! Wälɩnɩ ‑kä 'ŋnö 'nɩ 'gbëa 'mnö nyɩkpaa nʋ bhɛ ‑pʋpɛ.

25‑Mä lɔɔ' 'tänyɩɩ nä, 'bäɔ tɛɛtɛɛ‑yuo ‑kʋ bhä 'klää 'nɩ ɔ nʋ bhä lebhe. Ɔ bha ylä lebhe 'kʋ 'nɩ ɔ yi lä nä, ɔ lɔ poo 'nyukwli nä, läglö gbä 'nɩ dunyʋä ye. 26'Nɩ ɔ yi ɔ 'bää ‑gänʋnyʋaa' lɔɔ ‑bhlo laa, 'nɩ ɔ yio 'ylä. 27'Nɩ nyɩkpɔɔ yio 'dö sää, ɔ lä ‑n bheli, ‑ɔ ‑mʋ bhlä nä, ɔmɔɔ‑ ‑yi lä. Wälɩ 'nöɔ ‑wʋ lä ‑ŋëë 'nɩ ɔ yä lä 'ylɩbhɔ nä, ɩ ‑kä 'ŋnö 'nɩ ‑n 'bä bhlää‑ ‑bhlüüga ‑a nää lä kpänyɩ 'kʋ nä. 28‑Mä ‑gänʋnyɔɔ cii‑ lä sɔɔ nä, kä nyëbluo paa‑ gbʋgblɛ. Plɛkʋ sio bhɛ lä nä, ɔɔ' 'ylä bhɛ nynä ɔ 'kä gbëë' plä. Ɩ ‑kä 'ŋnö 'nɩ ɔ 'bä ‑mʋɔ ‑blɔkʋ, 'nɩ ɔ yio bhibhie nynä ɔ yi gbëë'. 29'Yuo lä ‑abä, n nʋ‑ʋ lä ‑gä nä, ‑lɔɔ yä 'mʋ tlʋmä. 'Nɩ ‑kä n ŋʋʋ‑ʋ 'sɩɩ 'kɔɔkɔ 'klʋkpää, ‑mä ‑n nö'ö ‑läzä 'sää wli‑yulɛɛ' ‑kpakpa 'bhlä nynä ‑mä, n ‑yä 'naa 'nagwɩä 'sɔ 'kä gäma! 30‑Mä ‑n ‑yowli, ‑nɔnɔ ‑ɔ ‑fämʋ lä ‑naa kääkäälɩɩ 'nɩ ‑ɔ ‑bhusuënɩɩ lä 'ŋwnɩa 'yii nä, ɔmɔɔ‑ ‑yi lä nä, ɔɔ' ‑zä n bhlää‑ lä ‑bhlüügaa‑ nää‑ lä 'kʋ nä!

31'Bäɔ lä 'naa 'yunɔ, ‑mɔɔ nä, kä ‑n ‑yä ‑amʋ 'sɔ ‑kʋ 'kɔɔkɔ ‑lää nä, ‑lɩɩ 'fɩɩn n ‑kä lä nä, ‑naa lɩɩ lä. 32‑Mä, ‑n bheli, ‑ɔ ‑kʋ lä ‑lää nä, ɔ yä bhɛ 'ku 'nɩ ɔ ‑yi lä zëkpë 'kʋ. Ɔ yä bhɛ too, 'nɩ ‑a yɔ lä 'ni. Nä, ɩ ‑ŋwa bhä 'kʋ nynä ‑mä ‑a nʋ ‑pʋpɛ ‑yä ‑a gäma.

Currently Selected:

Lukö 15: god

Highlight

Copy