Lúkɩ 20
20
Ɔ̀ nyɛ́ Zozíi pɔ́waá?
(Matíe 21.23‑27; Málɩ́kɩ 11.27‑33)
1Yruú a múó kʋ́, Zozíi kʋ Lagɔ̀wlʋ̀kádʋ̀ɔ̀ a mnɩ́ ɔ́ cɩ́a nyʋa bhè ɔ́ salaá Lagɔ a Námadìè, fɩɩ́n bhè Lagɔ̀bʋ̀bɔ̀nyʋa káda, lɔ̀ a másɛnyʋa lé dɔ̀panyʋa yio gɔ̀ 2lé á yrɔ́ɔ́ mà: «Nyɔ gbáa nyɛ́ mɔ̀ lɔ̀ lé ɩ̀ nie wɔlɩ́ɛ́ lɩ̀à áa, ɔ̀ nyɛ́ lɛ́ kɛtɛkʋ́ mɔ̀ bhʋ́anɩ pɔ́wa áa?» 3Zozíi anɩ́: «Ná sɛ́fʋɔ́, náa yrá caa amɔ a, a srʋ mɔ́ɔ: 4Nyɔ gbá cíe Záan lé ɔ́ ŋwʋ́ nyʋa nyú wlú à? Lagɔ cíeó, mà nyʋa cíeóo?» 5Zozíi yrá a, á bhlalɩɩ́ kʋ́ á pʋpʋ́ a nyièdɩ, ɩ́mɩ́ ŋwɔ́ɔ mà: «À nɩ̀ cí mànɩ́ Lagɔ cíe Záan a, ɔ́ yi àmɔ̀ yrá mà bhè ɛ̀kʋ̀ʋ̀ lé a nɩ́ ɔ cícíwɔlɩɛ́ wɔlɩ́ kʋ́ bhá à? 6À nɩ̀ cí sáà mànɩ́ nyʋa cíeó a, nyʋa fɩ́ɛ́ kʋ̀ jrè gɔ̀ a, á yi àmɔ̀ cɔ́kpalɩ́ pá á ká àmɔ̀ bhlá, máà á yì saá mà Záan, Lagɔ a nékʋ́cinyɔ ɔ́ ŋwɔ́ɔ wázɔ̀.» 7Bhʋ́ á srʋ Zozíi mà: «Nyɔɔ́ ɔ̀ cíe Záan a, à nɩ́ ɔ́ yì.» 8Zozíi anɩ́: «Àa, a nɩ nɩ́ ɔ́ yì a, ná sɛ́fʋ dɛ́ɛ́ ɩ́ bhá pɔ́waá lé ɩ́ nie wɔlɩ́ɛ́ fɩ́ɛ́ lɩ̀à a, nɩ́ ka amɔ srʋ.»
Glàyʋ̀làgba a mnɩ́ a nɔnʋzrɩ̀nyʋa a núnúó
(Matíe 21.33‑46; Málɩ́kɩ 12.1‑12)
9Zozíi pá núnúó a múó jrèè, ɔ́ anɩ́ mà: «Nyɔ a múó glɩ glàyʋ̀làgba, lé ɔ́ gháyɩ lágbàà nɔnʋzrɩ̀nyʋa gɔ̀ lé ɔ́ mʋ lówùduú ɔ ká cɩ́cátanyɩ zi. 10Tányɩɛ́ mʋ́ glàyʋ̀ɔ̀ zalɩmà a, lágbɩ̀kànyɔ̀ɔ̀ cíe ɔ cóyʋ nɔnʋzrɩ̀nyʋ̀àà gɔ̀, a ká yɩ́ bhábhà bhè a kɔ́ɔ́ nɩ dá nyɛ́. Mà nɔnʋzrɩ̀nyʋ̀àà bhli nyɔɔ́ kʋ́ lé á bhitoó, lé á jɩ́lɔɔ́, lé nyɔɔ́ la gblɔ̀gbɩpʋpʋ́ lé ɔ́ yi. 11Lé ɔ́ cíe sɔ́kʋ́ ɔ cóyʋ ànɔ, lé á bhitoó, á trʋlɔɔ́ lé á jɩ́lɔɔ́, lé ɔ ya glɔ̀gbɩ pʋpʋ sɔ́ yrɩ́bha lé á yi. 12Lé ɔ́ cíelaá ta cóyʋ gɔ̀, céamúó sɔ́kʋ́, á bhlio kʋ́ lé á bhitoó á ŋwʋ́ ɔ́ jí lé á jɩ́lɔɔ́. 13Bhʋ́ lágbɩ̀kànyɔ̀ɔ̀ anɩ́: Cégbá ɩ́ yi yɩ́ lɛ́ nɩ áa? Ná yi yɩ́ mɔ́ɔ mɔ̀glʋ̀ ná wàwàyʋ̀ɔ̀ cíe, ɩ́ yì saá mà ɔ́mɔ́ á yì kpá ŋwʋ́. 14Mà nɔnʋzrɩ̀nyʋ̀àà yɛ́ yʋ́ɔ́ a, á bhla fɩ́ɛ́ wɔlɩ́ kʋ́ á pʋpʋ a nyièdɩ, ɩ́mɩ́ ŋwɔ́ɔ mà: Jáalinyɔɔ́ ɔ́mɔ́ yie ɔ̀, à bhlɔ́ɔ́ lé lágbàà ká àmɔ̀ wlɩ plɩ́ɩ! 15Á bhlio kʋ́ lé á sɔɔ́ lágbàà a mnɩ́ lé á bhlɔ́ɔ́.»
Bhʋ́ Zozíi yrá yɩ́ lɛ́ mà: «Cégbá mʋ́ glàyʋ̀làgbàà a kanyɔ yi yɩ́ lɛ́ nɩ áa? 16Ɔ́ nɩ yi a, ɔ́ yi nɔnʋzrɩ̀nyʋ̀àà bhlá, lé ɔ́ yi lágbàà yígàdà nyʋa gɔ̀ gháyɩ.» Wɔlíɛ́ ɔ́ cí a, ɩ́ bhli a, nyʋa aanɩ: «Ɩ́ na ŋnɩ kɔ́ɔ̀kɔ́!» 17Zozíi dʋdʋ̀ a diin lé ɔ́ srʋ á mà: «Lagɔ̀bɔ̀gʋ a mnɩ́ a wɔlɩdrèè à ŋwɔ́ɔ mà:
Cɔ́kpalɩ́bhuó, ghlɩpanyʋa pá wá klá a,
Ámá à gbá zɩmnɛ́ wlʋɔ́ wlɩɩ́. # 20.17 A zɛlɩɩ sáà Lɔlɔ 118.22.
Á gba áa?
18Nyɔɔ́ nɩ̀ bhli bhʋ́anɩ cɔ́kpalɩ́bhuó jɩ̀ zɔ̀ a, ɔ wlú yi gá, ɩ́zà nyɔ jɩ̀ a nɩ bhli a, á yio wlawlaà.»
19Zozíi cí sɩ́tɛ̀ a, Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá yɩbhlɩ saá mà ámá ɔ́ sa, ɩ́ ka ŋnɩ́ lé á yrá yɩ́ kakamnɩ́lɛ́ lɩ̀à ɔ́ kʋ́ bhlibhlíé, mà á gúu nyʋaá kʋ̀ ʋ́ a kʋ́.
Sezáa a lapóo a pɛ́lɛɛ́
(Matíe 22.15‑22; Málɩ́kɩ 12.13‑17)
20Wlʋ́ yɩ́ ʋ́ a, áa bɛlɛ yɩ́ Zozíi, áa ŋwʋ́ɛ́ yɩ́ ɔ nɩnɩgbɩɛ fɩ́ɛ́ yɩ́gɔ̀, á cíeloó yrʋnyʋa bɩ́ a kɔ́ɔ́ zɔ̀ sa, lé ɔ nɩ páa wɔlɩ́ neé a, a kɔ́ɔ́ kʋ́ bhli a kɔ́ɔ́ Wlɔmɛ́ɛnyʋa a kámanyɔɔ́ wlɩ ŋwʋ́. 21Á yrɔ́ɔ́ mà: «Másɛɛ̀, à yì saá mà, ɩ̀ cíe lé ɩ̀ cɩ́a námasa; nɩɩ gbázɩ̀ nyʋa mʋ́, wɔlɩ́ɛ́ Lagɔ yrá a, ɩ́mɩ́ ɩ̀ cɩ́a. 22Naa, srʋ ca àmɔ̀ a: Wlɔmɛ́ɛnyʋa a lóo Sezáa a lapóo, à pɛ́ la a, mà à ná pɛ́ la áa?» 23Mà cémʋ́ Zozíi yɩbhlɩ a yɩ́ a mnɩ́ a wɔlɩ́ a, ɔ́ srʋ á mà: 24«A pápa ca mɔ́ɔ flèejìè a, kɛ́ɛ́ yɛ́.» Á lɔɔ́ flèejìè a, bhʋ́ ɔ́ yráa mà: «Nyɔ gbá kɔ̀ɔ̀ wlú yà ɔ ŋnɩ́ sɔ́ kʋ flèejìè lɩ̀à jɩ̀ a?» Á anɩ́: «Lóoó Sezáa.» 25Bhʋ́ Zozíi srʋ á mà: «Áá! Lɛ́ ŋwɔ́ɔ Sezáa a lɛ́ a, a nyɛ́ ɛ́ Sezáa, ɩ́zà ɛ̀ ŋwɔ́ɔ Lagɔ a nɛ a, a nyɛ́ ɛ́ Lagɔ!» 26Wɔlíɛ́ ɔ́ cíi nyʋaá fɩ́ɛ́ drɩ̀ a, ɩ́ mnaá neé lé nyɔ a múó nɩ́ wɔlɩdrè bɩ́ dí, á lɔ̀fɩ́ɛ́ dìdinii.
Kúdùkuo á galɔ̀ wɔlɩ́?
(Matíe 22.23‑33; Málɩ́kɩ 12.18‑27)
27Nyʋa á wlele Sadisɩɛ́nyʋa a, a nɩ́ bhá kúdùkuo a galɔ̀ wɔ̀lɩ́ɛ́ cɩ́cása kʋ́, ámá nyʋaá, áa zùò yi Zozíi gɔ̀, lé á yrɔ́ɔ́ mà: 28«Másɛɛ̀, Moyízɩ a lɔ̀ cíe mà:
Nyɔ yà ɔ ŋwnɔ́ sɔ́ nɩ nɩ́ yʋ́ va lé ɔ nɩ kú a,
Ɔ nɩ́ayʋ bhá kʋ́zrɩ̀ŋwnɔ̀ɔ̀ lé lɔ́lɔ́kpaá nɩ ka tuo. # 20.28 A zɛlɩɩ sáà Detro 25.5‑6.
29Naa Másɛɛ̀, ɩ̀ dʋdʋɛɛ, níayúó a gbàásɔ́ a wɔlɩ́. Tagàanɔɔ́ sí a, ɔ yà ŋwnɔ́ɔ́ sɔ́ nɩ́ yʋ́ va, lé ɔ́ kú. 30Lé sɔ́anɔɔ́ bhá kʋ́zrɩ̀ŋwnɔ̀ɔ̀, 31lé taánɔɔ́ bhá sɔ́kʋ́ ŋwnɔ́ɔ́ a múóó, céamúó, á yɔ̀sɔ́ nɩ́ yʋ́ va lé áa sɔ́ɔ́ pla mɔ̀ɔ lé á kú, sɩ́tɛ̀ àààn, lé áa gbàásɔ́ɔ́ bhɩa, a nɩ́ yʋ́ tɩ. 32Zɔ̀bhɩ̀àdàà ŋwnɔ́ a sɛ́fʋ pla mɔ̀ lé ɔ́ kú. 33Ɩ́ kʋ lɛ́ saá a, kúdùkuo nɩ galɔ̀ kɛ́zɔ̀ a, á gbàásɔ́ a nyièdɩ, nyɔ gbá nà kà ŋwnɔ́ɔ́ bhá à?» 34Bhʋ́ Zozíi srʋ á mà: «Dɛ́ zɩkpa zɔ̀, bhʋ́alɛ́ yuwle yà ŋwná sɔ́ síé, 35mà nyʋaá Lagɔ gbázɩ̀ mʋ́ lé à kà galɔ̀ kɔ́ɔ́ ɔ̀ yie a zà a, a nɩ́ ka yɩ́ Lagɔduú mɔ̀ɔ síi, 36lé á nɩ́ ka yɩ́ sáà kú. Kplɔkplɔzìzi bhísakʋ́ á na ká yɩ́ kʋ. Á ya wá yɩ́ galɔ̀ a, á ya pʋ, á ŋwɔ́ɔ yɩ́ Lagɔ a yúó. 37Ànɩ̀ɛ̀ ŋwɔ́ɔ kúdùkuo a galɔ̀ wɔlɩ́ɛ́ a, Moyízɩ mɔ̀glʋ̀ yɩ́ɩ wá cí, tányɩɛ́ mʋ́ ɔ́ cí wá vɩ́dà vɩ́dàkpàká a wɔlɩ́ɛ́ a, bhʋ́ ɔ́ wle wá Lagɔ: Ablaámʋ a Lagɔ, Izákɩ a Lagɔ, lé Zakɔ́bʋ a Lagɔ.#20.37 A zɛlɩɩ sáà Námɛɛ́ 3.2,6.» 38Zozíi srʋ á sɔ́kʋ́ mànɩ́: «Lagɔ nɩ́ kúdùkuo a Lagɔ ŋwɔ́ɔ, mà nyʋaá à gà lé à kʋ̀ pɩ́pɩ́ kʋ́ a, á Lagɔ ɔ́ ŋwɔ́ɔ. À nɩ̀ ŋwɔ́ɔ Lagɔ a zà a, á lɔ̀fɩ́ɛ́ à gà lé à kʋ̀ kɔ́.» 39Lɔ̀ a másɛnyʋa á zùò kʋ la ʋ́, á srʋ ɔ́ mà: «Másɛɛ̀, wɔlɩ́ɛ́ ɩ̀ cí a, nà bhɩa ʋ́ mɩ́!» 40Ɩ́ bhli a, nyɔ nɩ́ yɩ́ sɔ́kʋ́ mɔ́ wɔlɩ́ kʋ́ yráà.
Kláyɩ́sɩ lé Davídɩ
(Matíe 22.41‑46; Málɩ́kɩ 12.35‑37)
41Zozíi srʋ á mànɩ́ «Ɛ̀kʋ̀ lé á nie mà: Kláyɩ́sɩ Davídɩ a yʋ́ ɔ́ ŋwɔ́ɔ áa? 42Davídɩ mɔ̀glʋ̀ ya wá mɩ́ lɔbhlɩbɔ̀gʋ a mnɩ́ cíi, ɔ́ cí wá mà:
Kanyɔ Lagɔ srʋ wá ná Kanyɔ mà:
Plɩ́ɩ ná lilie kʋ́ kà sá bɔ́ɔ̀
43 Bɔ́ɔ ʋ́ àààn lé ká nɩ lé
Kà nàa gblɩ̀nyʋa jɩ̀namnɩgbìté mʋ́ pláa. # 20.42‑43 A zɛlɩɩ sáà Lɔlɔ 110.1.
44Naa, sɩ́tɛ̀ mʋ́ Davídɩ mɔ̀glʋ̀ wlele wá Kláyɩ́sɩ Kanyɔ, cégbá mʋ́ ɩ́ kʋ yɩ́ sɔ́kʋ́ lé ɔ́ Kanyɔ yi sɔ́kʋ́ ɔ yʋ́ plɩ́ à?»
A mányɩ lɔ̀ a másɛnyʋa a nɩnɩgbɩ kʋ́
(Matíe 23.1‑36; Málɩ́kɩ 12.38‑40)
45Nyʋaá fɩ́ɛ́ à pʋ Zozíi nyúkwlí a, a klʋ́ jɩ̀ ɔ́ srʋ ɔ́ kʋjɩ̀nyʋ̀àà mà: 46«A mányɩ lɔ̀ a másɛnyʋa a nɩnɩgbɩ kʋ́, ámá à pla bànɩ̀kádɩ mʋ́ lé à bie, á yrá lé dɛɛ́ nyʋa zù a, a pá ʋ́ má yúó lé a ŋwʋ́ ʋ́ má. A nɩ pla zúfʋcɛcɩghlɩɛ́ a mnɩ́ a, á wà drɩ̀ a kpí a mnɩ́ bɔ́ɔlɛ. Lé a nɩ wle a sáà lilíé a zà a, kpíkadɩ a mnɩ́ a bɔ́ɔlɛɛ́ á yrá. 47Á bháʋ́ kʋ́zrɩ̀ŋwna a kakalɩ, lé a nɩ bhibhie a, á trʋmalɛ á bhibhie wɔlɩ́ɛ́ mʋ́, nyʋa káá yɩ́gɔ̀ ŋwʋ́. Náa srʋɛ amɔ mà wɔlɩ́ɛ́ fɩ́ɛ́ á nie lɛ́ a, á yi kɛ́zɔ̀ Lagɔ a drɩ̀ ɩ́ kpaá pɛ́ɛ.»
Currently Selected:
Lúkɩ 20: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
