Ruuka 1
1
Omosooku Tewobhiro
1Oo omosooku Tewobhiro, ghaare ꞉ghaakörëkiine ghate yiito, abhaato bhaaru mbamariri ghwiköngʼi gho kwandëka ighoro yaache. 2Amangʼana ghayo, ꞉mbaaghaandëkiri kinya ꞉toobhooriiru na abhaato bhaare bhagharooche korwera simoka e meremo ghe Yesu. Wiiki nibho ꞉bhaare bharasanchi angʼana e Ryobha. 3Hano nimariri ghoghabhoori bhoheene amangʼana gha Yesu kinya ꞉ghaakörëkiine korwera simoka, nekarighi kubha m‑bhoheene nekwandëkërë ghayo kwo bhuchömu, 4gho ghiri ubhe no obhuhëënë kinya bhuno ꞉weeghiibhu.
Obhurööti bho kwibhoru kwo Yohana Omubhatisaachi
5Kwo riibhagha riire Herote Omokoro are omutëmi mo‑mukööwa o Yuteya, naare‑ho omuchaama umu eriina reeche Sakariya, o mo‑bhoyo bho Abhiya omuchaama.#1:5 Abhiya naare omuchaama hayo kare. Mkaache naare arabherekeru Rusabheeti. Bhoose mbaare bha mo‑rwibhoro ro muchaama Haruuni. 6Bhayo bhabhere mbaare bhahëënë ambërë e Mutëmi Waryobha, na mbaare bharasooka emeghiro gheeche ghyose, na bhataaghitaasiri. 7Bhayo bhabhere, bhataare no omoona, gho kubha Rusabheeti moghomba are, wiiki mbaare bhakunguhiri chwee.
8Orosiko rumu, Sakariya naare araköra omoremo waache o bhuchaama ambërë e Ryobha, gho kubha ndeere eriibhagha re bhoyo bhooche kowuköra. 9Wiiki kurëngʼaana na asughara e bhuchaama, abhaghëndi bhaghatëma akuura ekamoghwera Sakariya kubha niwe aghusöha Ahaghiro Ahatööbhiyu Mwisëngërö, gho ghiri amoghunderi Omutëmi akorose. 10Eriibhagha re ghoghundi akorose, anche ꞉haare hakomiine abhaato bhaaru, bharasabha Eryobha.
11Hayo hayo, Sakariya akarweru muyo na marayika o Mutëmi. Marayika uyo, naare imeeriire eribhaara re kwiro re haghiro ha ghoghunderi akorose iyo. 12Hano Sakariya amorooche, aghiitaki, aghatiina chwee.
13Amare, marayika uyo akamobhoorera, “Oo Sakariya, otatiina! Ghaare ꞉usabhiri Eryobha, ndimariri ghoghooghu. Ibheere mukaacho Rusabheeti, naghokwibhorera omoona o ghesubhe, omoroke eriina reeche Yohana. 14Omoona uyo, niwe aghughëri uchömëru na ghosiighasiigha. Abhaato abhande bhaaru mbaghosiighasiigha gho kwibhoru kooche, 15gho kubha omoona uyo naakubha omokoro ambërë e Mutëmi. Omoona uyo ataacha kunyo amaro ghoghoose ghaare. Korwera mo‑nda e nyina, naakubha ichoriibhu Akörö Ahörëëru. 16Naghugharoki Abhiisiraeri bhaaru kwo Mutëmi waabho Waryobha. 17Akörö yaache no obhotoro bhooche, mbookubha kebhuno bho murööti Eriya. Omoona uyo nakomukangata Omutëmi, gho ghiri amusëëmërë abhaato bha ghutëmëërana nawe. Naghutëmëërani abhaana na bhiishe, nakobhaköra abhaato bhano bhataanyi na asooko bhabhe na amiihëëbhö kinya bhaare bhaghosooka Eryobha.”#1:17 Mööhi Maraaki 3:1, 4:5–6.
18Sakariya akamobhoori marayika uyo, “Neke ghekonyëërëki obhuhëënë bho mangʼana ghayo? Naho eni na mkaane ntokunguhiri!”
19Marayika uyo akabhugha, “Eni, Ghabhuriyeeri, neeni nekwimeerera ambërë e Ryobha. Ndentomiri niiche ghokumënyi angʼana ino anchömu. 20Amare, gho kubha toyiisheriiri, nookubha erimuumu. Tooghotora ghughamba wiiki, mbagha eriibhagha rehike ghano ghaköru, na ngaghuköru kwo riibhagha reeche!”
21Abhaato bhayo mbaare bharaghanya Sakariya aröbhökë koru Ahaghiro Ahatööbhiyu ha Risëngërö, bhakahagha korighi kebhuno aghakëëchëra‑mu. 22Hano ichiri koru‑mu, taatoriri wiiki ghosiikëra, akabha arabhëërëkërëri kwo mabhökö. Hayo hayo bhakamënya kubha narooche amarighi Mwisëngërö. Iwe aghasaagha kubha rimuumu.
23Hano amariri chaasiko cheeche che kuhöki Mwisëngërö, aghaye awaache. 24Mbe, mkaache Rusabheeti aghaghëgha anda, akamara emyëri etaano ibhisiri, arabhugha, 25“Omutëmi, niwe anköriire hangʼu! Kwo riibhagha rino naahiitiri konduuseri chaasoni ambërë e bhaato.”
Obhurööti bho kwibhoru kwo Yesu
26Eriibhagha anda e Rusabheeti ehikiri emyëri esaasabhe, Eryobha rekamotoma marayika Ghabhuriyeeri mo‑moghya o Nasareeti, mo‑mukööwa o Ghariraaya, 27kwo muukë umu, eriina reeche Mariyamu. Nawe naare ararwacheru obhuku no omosubhe umu, akobherekeru Yusubhu, o mo‑rwibhoro ro mutëmi Tawuti.
28Marayika uyo aghaye o‑Mariyamu, akamobhoorera akabhugha, “Neghoghukëëri, iye uno witabhiiru chwee! Omutëmi naanyi haghirohamu na niiye.” 29Mariyamu, hano oghwire amangʼana gha marayika uyo, omotema waache okanyaaka chwee, akiibhoori, “N‑ghukëërani ke kuno?”
30Amare, marayika uyo akamobhoorera, “Otatiina Mariyamu! Numariri ghwitabheru ne Eryobha. 31Tëghëërëra! Ibheere noghughëgha anda, na wiibhore omoona o ghesubhe, no omoroke eriina reeche Yesu.#1:31 Mööhi Isaaya 7:14. 32Naakubha omokoro, nakobherekeru Omoona o Ryobha omokoro o bhyose. Omutëmi Waryobha, nakomuköra abhe Omutëmi omokoro, kinya ishakoro Tawuti are. 33Naghwikara no obhutëmi bho bhaato bhoose bha Isiraeri, emiishe ghyose. Obhutëmi bhooche, bhotaaghosira naabha.”
34Mariyamu, akamobhoori marayika uyo akabhugha, “Nibhu ghano ghaakubha, na ntiimara mumënya omosubhe?” 35Akamugharokeri akabhugha, “Akörö Ahörëëru neghoghwikera, no obhotoro bho Ryobha Omokoro o Bhyose, mbookubha ighoro yaacho ghe kiriiri. Omoona uyo okwibhora, naakubha omwahöru, naakubha arabherekeru Omoona o Ryobha. 36Koru ibheere ömöönyu Rusabheeti, n‑inda anyi e myëri esaasabhe, nangabha akunguhiri, ekeenyuma mbaare bharamughamba kubha moghomba. 37Kwo Ryobha, ghetaanyi‑ho kino ghetaakubha.”
38Mariyamu aghagharokeri akabhugha, “Eni n‑omutamishi o Mutëmi neenyi, ibhe hangʼu ghokoone kinya obhughiri.” Hangʼu marayika uyo amariri ghosiikëra, aghaye.
Mariyamu ˆaghaye ghukëërani o‑Rusabheeti
39Mo‑chaasiko chiyo chiyo, Mariyamu aghaköra orughëndö ghuye o‑Rusabheeti, mo‑moghya umu o bheghoro bhe Yuteya, akahika o‑Sakariya. 40Hano asöhiri o‑Sakariya, akamukëëri Rusabheeti. 41Rusabheeti, hano oghwire erikëërani re Mariyamu, omoona uno anyi mo‑nda yaache aghatuumatuuma. Hayo hayo, aghiichöribhu Akörö Ahörëëru, 42akabhugha kwo riiraka ikoro kubha, “Mo‑bhakari bhoose, iye witabhiiru! Wiiki nokwibhora omoona, itabhiiru! 43Eni, n‑niwe, koru nyina o Mutëmi wiito akaacha ghunkëëri? 44Hangʼu ꞉nyooghwire erikëërani reecho, hayo hayo omoona uno anyi mo‑nda yaane, aghatuumatuuma gho ghuchömëru. 45Ngʼoni iye, gho kubha wiisheriiri ghano Omutëmi akobhooriire kubha ngaghuköru!”
Omwembo o Mariyamu
46Mbe, Mariyamu akabhugha,
“Omotema waane, nokomoghongi Omutëmi Waryobha,
47na noghosiigherasiighera Waryobha, Omotoori waane,
48gho kubha, nahiitiri eni omutamishi waache,
nangabha neenyi omooto o hangʼu hangʼu o haase.
Koru ibheere, abhaato bha chanyiibhoru choose,
mbaakubha bharabhugha kubha ngʼoni eni.
49Eryobha re bhotoro,
ndimariri ghunkörëra amangʼana gha koroghoora.
Eriina reeche n‑Omutööbhiyu!
50Naakubha araghwera bheghongi abhaato bha chanyiibhoro choose,
chino chekomoghwera.
51Naköriri amangʼana makoro kwo mabhökö ghaache.
Nabhasanchiini bhano ꞉bhaare bhariitëngʼëra emetema gheebho.
52Na bhano ꞉bhaare bharatëmi kwo bhotoro bhwaru,
akabharuusi mo‑bhutëmi bhoobho,
amare abhaato bhano bhaanyi ne eriimanya re haase,
bhabhe abhaato abhakoro.
53Bhano bhaanyi na anchëra,
namariri kobhiighoti no omurëmbë,
amare abhaame,
akabhahëëbha amabhökö bhoowa.
54Namariri ghotoori omutamishi waache Isiraeri,
akahiita komoghwera bheghongi,
55kinya bhuure are abhabhooriire bhasookoro bhiito,
Abhurahamu na abhaato bhoose bha rwibhoro rooche,
emiishe ghyose.”
56Mariyamu, akamara kinya emyëri etato anyi hayo o‑Rusabheeti, akamara aghagharuka awaache.
Okwibhoru kwo Yohana Omubhatisaachi
57Chaasiko che kwibhora Rusabheeti, hano chehikiri, akiibhora omoona o ghesubhe. 58Abhaatani bhaache, na abhahiiri bhaache, hano bhooghwire kubha Omutëmi namoghweriire bheghongi, bhaghasiighasiigha haghirohamu nawe.
59Omoona uyo, hano ahikiri chaasiko inyaanye, bhakaacha komusaara. Bhakëënda komoroka Sakariya, eriina ri ishe. 60Amare, nyina akaanga, akabhugha, “Tiyaanyi! Nakobherekeru Yohana.” 61Bhakamugharokeri bhakabhugha, “Neke gheghughëri naho mo‑bhahiiri bhaanyu, taanyi‑ho omooto o riina riyo!”
62Hayo, Bhakabhoori ishe, gho komwërëkërëri kwo mabhökö, gho ghiri abhabhoorere eriina rino akwënda komoroka omoona waache. 63Akabhasabha ekibhaawe, aghakyandëka, kubha, “Eriina reeche, niwe Yohana.” Bhoose bhakahagha chwee.
64Hayo hayo aghatachöru ororeme rooche, aghasëëma ghosiikëra wiiki, akareghongi Eryobha. 65Abhaatani bhaache bhoose bhakahagha chwee. Amangʼana ghayo, ghaghasancha chwee mo‑bheghoro bhyose bhe Yuteya. 66Bhano ꞉bhaaghooghwire bhaakabha bhariibhoori, “Omoona uno, naakubha omooto ke?” ꞉Mbiibhoriri hangʼu, gho kubha, obhotoro bho Mutëmi mboore haghirohamu nawe.
Omwembo o Sakariya
67Sakariya, ishe omoona uyo, aghiichöribhu Akörö Ahörëëru, akaruusi obhurööti arabhugha,
68“Omutëmi Waryobha o Bhiisiraeri aghongibhu,
gho kubha, niichiri kobhatoori abhaato bhaache bhatighooroku.
69Natoheere Omotoori o bhotoro.#1:69 Omotoori o bhotoro. Gho Keyunaani yandëkuru oruhëmbë ro ghotoori. Mo‑Mandëkö Amatööbhiyu, oruhëmbë ro tyenyi n‑eghetuubhaani ke mooto uno anyi na changuru.
Omotoori uyo naakubha o mo‑rwibhoro ro mutamishi waache Tawuti,
70kinya Eryobha ꞉riimariri kobhugha hayo kare,
gho nchëra e bharööti bhaache abhatööbhiyu.
71꞉Ndeetobhooriire kubha,
ndeghototoori mo‑bhabhisa bhiito,
na kwo bhaare bhoose bhaturëghiri.
72Wiiki akabhugha kubha,
naakubha araghwera bheghongi bhasookoro bhiito,
na arahiita eriiraghano reeche eritööbhiyu.
73Eriiraghano riyo ꞉ndeemotooriire sookoro wiito Abhurahamu eriiraheri kubha,
74ndeghototoori mo‑mabhökö gha bhabhisa bhiito,
tubhe torarihökëri totaanyi no obhotiini,
75gho ghuköra ghano rekwënda,
na kubha no obhutööbhiyu ambërë yaache,
mo‑chaasiko chiito choose.
76Oo omoona waane,
nookubha orabherekeru kubha omurööti o Ryobha,
Omokoro o Bhyose,
gho kubha, nokomukangata Omutëmi Waryobha,
gho ghiri abhönë abhaato bhamariri ghusëëmibhu gho kuucha kooche.
77Nakobhabhoorera abhaato bhaache,
bhuure bhaghotooribhu,
gho nchëra e kwabhëru amasari ghaabho.
78Eryobha riito,
ndetoghweriire ebheghongi chwee.
Obhotoori bhooche koru Mwishaaro,
mboghotorwera ke mirëngaari,
79na ghotomorekera bhano tumanyiri mo‑kengʼuuri,
na bhano twangiire mo‑kiriiri ke roko.
Ndeghotukangata, tubhe toraheta mo‑nchëra e murëmbë.”
80Omoona uyo, aghakora, na akörö yaache eghaköngʼa. Aghaye akamanya mwibhara, mbagha kohikera kwo riibhagha re kobhahökëri Abhiisiraeri.
Currently Selected:
Ruuka 1: ntk
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved
