Ruuka 17

Ameeghi ighoro e kwabhërana

(Mataayo 18:6–7, 18:21–22; Maariko 9:42)

1Yesu akabhabhoorera abhaanabheegha bhaache akabhugha, “Amasaki ghano ghaghughëri abhaato bhakörë amasari, ngaakubha‑ho chaasiko choose. Amare, horeera nakorighi omooto uno aghogharëëta! 2Nengabheere ngʼoni ghokooche omooto uyo, abhöhëru orobhohe ro ghusëëra mwighöti, na kurëkëru mo‑nyancha, ataacha ghughëri umu o bhasuuhu bhano ghuköra amasari! 3Gho ghayo, mubhe moriichonga bhoheene!

“Aribha omohiiri waacho araghutaaseri, omohiinye, na aratuukuunera eriisari reeche, omwabhërë. 4Koru araghutaaseri mara mohungate kwo rosiko, na hano hano agharuka ghokoocho arabhugha, ‘ˆNeghatuukuuna,’ omwabhërë!”

Otwëngërë bhokumi

5Niho abhatomu bhayo bhakamobhoorera Omutëmi bhakabhugha, “Otwëngërërëri obhokumi bhwito!” 6Akabhagharokeri, “Aribha moonyi no obhokumi bhoongʼana kinya akahëkë ka harataari, mongabhooriire omote uno o mokoowa kubha, ‘Nwiheke umërë mo‑nyancha!’ Woose nongabhasookiri.

Abhatomu bha Yesu bhatiirighi kubha, ibho ngʼoni

7“Tobhughe umu ghate yaanyu naanyi no omutamishi omoremi hande omoriishi o changʼöndu. Omutamishi uyo aragharuka aka, omutëmi waache hayo hayo naghotora komobhoorera, ‘Nuuche bhwango wiikare uraaghërë’? 8Tiyaanyi! Tigha nakomobhoorera abhughe, ‘Numbanurere ebhiinyakurë, usëëmë kuuhökëri, hano neekubha nimariri kuraaghëra na kunyo, niho na niiye oramara uraaghërë na kunyo.’ 9Mbe! Omutamishi uyo araköra ghano omutëmi waache amobhooriire, omutëmi uyo nakomwitabheri gho kubha ꞉naaköriri ghano are amobhooriire? Tiyaanyi!

10“Hangʼu hangʼu na niinyu, moramara ghuköra ghoose ghano nebhabhooriire, mobhughe, ‘Itu n‑abhatamishi toonyi. Ntuköriri ghano toore turëngʼaaniire ghuköra agheene.’ ”

Ikomi ꞉mbaahöruru, umu aghatooribhu

11Hano Yesu are araghe Yerusareemu, akahetera mo‑robhebhe ghate e se e Samaariya na Ghariraaya. 12Orosiko rumu, aghasöha mo‑kyaro kimu, aghatëmëërana na abhaato ikomi bhano bhaanyi no obhubhabharu bho mbiti. Abhaato bhayo, bhakiimeerera kurë nawe, 13bhaghatiiri amaraka bharabhugha, “Omutëmi Yesu, otorigheri changori!”

14Yesu hano abharooche, akabhabhoorera akabhugha, “Mughëndë mwiyërëkani mo‑bhachaama.”#17:14 Mööhi Abharaawi 14:1–32. Mbe, bhaaghaye, ne eriibhagha bhaanyi mo‑nchëra, bhakahöribhu.

15Umu o bhayo, hano arooche kubha akahöra, hayo hayo aghagharuka o‑Yesu, arareghongi Eryobha kwo riiraka ikoro. 16Hano ahikiri, akiirëkëra kebhuuma mo‑maghoro gha Yesu, ino aramobhoorera ˆoghachömi. Omooto uyo, n‑Omusamaariya are.

17Yesu akabhoori akabhugha, “Taanyi abhaato ikomi nihöriri? Kana, bhaare abhande kende hayi bhaanyi? 18Taanyi‑ho koru umu uno ahiitiri ghugharuka koreghongi Eryobha, ekabha n‑omughëni uno omwene?” 19Akamara Yesu akamobhoorera akabhugha, “Imeerera, ughëndë, obhokumi bhoocho ˆbhoghaghotoori.”

Okuucha kwo Moona o Mooto

(Mataayo 24:23–28, 24:37–41)

20Orosiko rumu, Amabharisaayo bhakamobhoori Yesu bhakabhugha, “Obhutëmi bho Ryobha, nyingake bhokuucha?” Akabhagharokeri akabhugha, “Obhutëmi bho Ryobha, bhotaakuucha gho kobhwisuncha. 21Abhaato bhataaghotora kobhugha, ‘Mumööhi! Kabhuno bhoonyi hano!’ Hamu, ‘Mumööhi! Mboonyi haare!’ Mutëghëërërë, obhutëmi bho Ryobha mboonyi ghate yiito hano.”

22Akamara, Yesu akabhabhoorera abhaanabheegha bhaache akabhugha, “Mo‑chaasiko chino chekuucha, moghwighomba korighi koru orosiko rumu ro chaasiko che Moona o Mooto, na motaakororighi. 23Abhaato mbakobhabhoorera, ‘Mumööhi! Kawuure haare!’ Hamu ‘Mumööhi! Kauno hano!’ Amare abhaato bhayo, motabhatambana. 24Nebhabhooriire ghayo gho kubha, eriibhagha eni Omoona o Mooto neghugharuka, nekuucha kinya bhuure orunanehi rohaarwera hayo hayo na komoreka chambaara choose. 25Amare singa, nekwëndëru nibhönë anyaako yaaru na kwangu na abhaato bha rwibhoro runo.

26“Kinya bhuure ꞉ghaabheere mo‑chaasiko che Nuhu, hangʼu ghaakubha mo‑chaasiko che ghugharuka koone eni Omoona o Mooto. 27Mo‑chaasiko che Nuhu, abhaato mbaare bhararaaghëra na kunyo, mbaare bharakwira na ghokwiru, mbagha orosiko ruure hano Nuhu asöhiri mo‑safina. Ase yoose eghiichora amanche, bhaghasireekerera bhayo bhoose.

28“Koru mo‑chaasiko che Rooti amangʼana ngabheere hangʼu hangʼu. Abhaato mbaare bhararaaghëra na kunyo, bharaghora na ghoghori, bhararema na kwabhëka. 29Amare, orosiko ruure hano Rooti aruure Sotoma, omororo muhaari oghatëëka kinya ambura koru mwishaaro, okabhasireekereri abhande bhoose.

30“Hangʼu hangʼu ekubha orosiko runo eni Omoona o Mooto nekuucha. 31Orosiko ruyo, omooto arabha anyi irëngö re nyumba yaache, ike angʼösë, atasöha mo‑nyumba kwimoki ebheghiro bheeche bhino bheenyi mo‑nyumba. Hangʼu hangʼu, omooto uno anyi a‑moghondo angʼösë, atagharuka aka kwimoki ghyokyose. 32Mohiite ghaare ghamorweriire muka Rooti!#17:32 Eryobha rekamutëma muka Rooti kwo bhuhaari, gho kubha omukari uyo ꞉niighombiri ghugharuka Sotoma, omoghya uno Eryobha reere reteniire ekiina na kowosireekereri. Mööhi Simoka 19:26. 33Omooto woose uno aghusaki kobhuhöni obhuhöru bhooche nakobhobhori, wowoose uno akubha isëëmiri kobhobhori obhuhöru bhooche nakobhotoori.

34“ˆNekabhabhoorera kubha, obhotiko bho rosiko ruyo, abhaato bhabhere mbaakubha bhamisiri obhorere bhumu, umu naghughëghu no owonde naghusaagha. 35Orosiko ruyo, abhakari bhabhere mbaakubha bharase haghirohamu mo‑robhohe, umu naghughëghu no owonde naghusaagha. [36Abhaato bhabhere, mbaakubha bharahöki omoremo a‑moghondo, umu Eryobha ndekomwimoki no owonde ndekomotigha.]”

37Abhaanabheegha bhakamobhoori bhakabhugha, “Omutëmi, hayi ghaghuköru ghayo?” Akabhagharokeri akabhugha, “Ahaghiro hano haanyi na ataasa, hayo niho chamatoonyi chehiikomana haghirohamu.”

Currently Selected:

Ruuka 17: ntk

Highlight

Copy