Ruuka 5

Yesu ˆakaahura abhaanabheegha bhaache a bhambërë

(Mataayo 4:18–22; Maariko 1:16–20)

1Orosiko rumu, Yesu naare imeeriire haghuhe na anyancha e Ghenesareeti,#5:1 Anyancha e Ghenesareeti. Eriina reeche erende nekobherekeru, anyancha e Ghariraaya. areeghi abhaato angʼana e Ryobha. Bhaakabha bharamwishukerera, gho ghiri bhamutëghëërërë, aghatookera bhamotooriri ghateghate bharatachana. 2Yesu akarighi amaryato abhere, rubhareka ro nyancha iyo. Abhaweesani mbaare bhaghatighiri gho kubha mbaare bhareeghi charwërö cheebho. 3Aghatiira mo‑ryato rimu, rino reere re Simiyooni, akamusabha Simiyooni kubha asuke hasuuhu eryato mo‑nyancha. Akamara, Yesu aghiikara moose, akëëndërëra kweghi abhaato.

4Hano amariri kobheeghi, akamobhoorera Simiyooni akabhugha, “Noohire obhwato, tughëndë mo‑ghetibhokera ke nyancha, mwiki charwërö cheenyu, moweesane chaasu.” 5Simiyooni akamugharokeri akabhugha, “Oo Omutëmi wiito, ntoweesiine gho changuru obhotiko bhoghima, amare totaabhwine gheghiro ghyokyose! Mbe, neghochiiki charwërö ibheere gho kubha n‑iye ˆokabhugha.”

6Mbe, Simiyooni na abhaghëndi bhakarëkëra charwërö cheebho mo‑manche. Bhakaweesana chaasu chaaru chwee, kerende charwërö cheebho cheghasëëma ghutanduka. 7Gho ghayo, ekabhaköra bhahonge amabhökö ghaabho ighoro kobherekera abhaghëndi bhano ꞉bhaare mo‑bhwato obhonde kubha bhaache kobhatoori. Hano bhiichiri, bhaghiichori amaryato abhere chaasu, koru ghakëënda komeru.

8Hano Simiyooni arooche ghano gharweriire hayo, akahighama ambërë e Yesu, akamobhoorera akabhugha, “Oo Omutëmi, otiikara na neeni, gho kubha eni n‑omooto o masari neenyi!”

9Simiyooni ꞉naabhughiri amangʼana ghayo, gho kubha iwe na abhaghëndi bhaache, ꞉mbaahaghiri gho kubha ꞉mbaaweesiine chaasu chaaru chwee. 10Yakobho na Yohana, bhërëëti bha Sebhetaayo, mbaare bharaweesana haghirohamu na Simiyooni. Bhoose ghakabharoghoori chwee.

Ibheere Yesu akabhugha, “Oo Simiyooni, otatiina gho kubha korwera reero ino, nookubha omoweesani o bhaato,#5:10 Omoweesani o bhaato. Egheteemoro keeche n‑kubha, naakubha araraghaneri abhaato Angʼana Anchömu e Ryobha. kinya bhuure ore omoweesani o chaasu.” 11Simiyooni na abhaghëndi bhaghagharoki amaryato ghaabho rubhareka nyancha, bhaghatigha ebheghiro bheebho bhyose hayo, bhakamutambana Yesu.

Yesu ˆakamuhöri omubhabharu o mbiti

(Mataayo 8:1–4; Maariko 1:40–45)

12Yesu hano are mo‑moghya umu o mo‑mukööwa o Ghariraaya, akaacha omooto umu anyi na ambiti omobhere moghima. Hano amorooche Yesu, aghagho kebhuuma, akamusasaama arabhugha, “Oo Omutëmi, örëënda, noghotora koomusa.” 13Yesu aghaghöröröki okubhökö, akamoturi, akamobhoorera, “Nekwënda, omusu!” Hayo hayo, obhoshaagha bhooche bho mbiti bhookahöra.

14Yesu akamobhoorera akabhugha, “Otabhoorera omooto wowoose ghano gharweriire! Amare, nooghi wiyërëkani mo‑muchaama kubha nuhöriri na koruusi amaruusi kinya emeghiro ghe Musa ghekwërëkërëri, kwërëki kubha nuhöriri.”#5:14 Mööhi Abharaawi 14:1–32.

15Koru hangʼu, amangʼana gha Yesu ghakëëngëra ghusancha chwee mo‑bhaato. Abhaato bhayo mbaare bharaacha ghokooche amakinda na amakinda, bhabhönë ghutëghëërëra ameeghi ghaache, na kuhöribhu amabhabharu ghaabho. 16Amare kwo riibhagha ryaru Yesu naare arabhatigha aghi ahaghiro hano abhaato bhataanyi asabha Eryobha.

Yesu naanyi no obhotoro bho kwabhëra amasari

(Mataayo 9:1–8; Maariko 2:1–12)

17Orosiko rumu, Yesu naare areeghi abhaato. Ghate yaabho, mbaare‑mu Amabharisaayo na abheeghi bha meghiro. Abhaato bhayo ꞉mbaaruure mo‑bhyaro bhe Ghariraaya, na Yuteya, na mo‑moghya o Yerusareemu. Yesu naare no obhotoro bho Ryobha bho kuhöri.

18Mbe, bhakaacha abhaato, bhaghëghiri omooto mo‑machëëra uno are akuure eribhaara. Bhakëënda bhamusöhi mo‑nyumba, kubha bhamotoore ambërë e Yesu. 19Amare bhataatoriri, gho kubha ꞉haare ne erikinda ikoro re bhaato. Niho, bhaghatiira a‑ghisara, bhamughëghiri omooto uyo, bhakahöbhöra eribhanga ikoro, bhakaruusi changyo mo‑ghisara, bhakamwiki na machëëra yaache ambërë e Yesu. 20Hano Yesu arooche obhokumi bhuno ꞉bhaare nabho abhaato bhayo, akamobhoorera akabhugha, “Oo omusaani, amasari ghaacho ngaabhiiru!” 21Abheeghi bha meghiro na Amabharisaayo bhayo, hayo hayo bhaghasëëma kwingʼunyera mo‑metema gheebho bharabhugha, “N‑niwe uyo kana aghosiikëra amangʼana gha kwirëngʼaani ne Eryobha? Taanyi‑ho uno aghotora kwabhëra amasari gha mooto, n‑Eryobha eryene chiri niryo reghotora!”

22Yesu aghaghamënya ghano ꞉bhaare bhariihëëbha, akabhabhoori akabhugha, “Neke mokwihëëbha mo‑metema gheenyu? 23Mbe, n‑diihë rino reenyi ihoho? Komobhoorera kubha, ‘Nekwabhiire amasari ghaacho,’ ghasi komobhoorera kubha, ‘Imeerera, ughëndë’? 24Eni nekwënda mumënyë bhoheene kubha, eni Omoona o Mooto neenyi no obhotoro bho kwabhëra amasari mo‑se ino.” Niho Yesu akamobhoorera omooto wuure are akuure ribhaara, akabhugha, “ˆNeghakobhoorera, imeerera, ghëgha machëëra yaacho, oghi awaacho.”

25Hayo hayo, omooto uyo akiimeerera ambërë e bhaato bhayo. Akiimoki machëëra yaache, aghaye awaache ino arareghongi Eryobha. 26Abhaato bhoose bhano ꞉bhaare hayo, bhakahagha chwee na ghughöötu no obhotiini. Wiiki, mbaare bharareghongi Eryobha, bharabhugha “Reero ntorooche amangʼana gha koroghoori!”

Yesu niichiri kobhatoori abhaköri bha masari

(Mataayo 9:9–13; Maariko 2:13–17)

27Achekumara ghayo, Yesu akahoroka mo‑nyumba iyo, akarighi omutöbhi umu o righööti eriina reeche Raawi. Raawi uyo naare ikeere mo‑kebhuru keeche ghe ghutöbhëri righööti.

Yesu akamobhoorera akabhugha, “Oo Raawi, untambane.” 28Hayo hayo Raawi akiimeerera, aghatigha bhyose, akamutambana Yesu.

29Akamara Raawi akamukörëra Yesu obhughëni bhokoro awaache. Awaache hayo ꞉mbiikomiine‑ho abhatöbhi bha righööti bhaaru chwee, na abhaato abhande bhaakabha bhararaaghëra haghirohamu. 30Eghaghëri Amabharisaayo na abheeghi bhaabho bha meghiro ghe Musa, bhakabhingʼunyerangʼunyera abhaanabheegha bha Yesu, bharabhugha, “Kana mokuraaghëra na kunyo haghirohamu na abhatöbhi bha righööti, na abhaköri bha masari?”

31Yesu akabhagharokeri akabhugha, “Abhaato abhahöru, bhataakwënda omughabho, amare abhabhabharu nibho bhakwënda omughabho! 32Eni ntiichiri kobhabherekera bhano bhakwirighi kubha, m-bhahëënë ambërë e Ryobha. Amare niichiri kobhabherekera bhano bhaanyi na amasari, kubha bhatuukuune.”

Yesu n‑kinya omokwiri

(Mataayo 9:14–15; Maariko 2:18–20)

33Abhaato bhayo bhakamobhoorera Yesu bhakabhugha, “Abhaghëndi bha Yohana eriibhagha ryaru mbahiiyima ebhiinyakurë, bharasabha Eryobha. Koru abhaghëndi bha Mabharisaayo, bhoose mbahaaköra hangʼu hangʼu. Amare bhano bhabhaacho, neke gheghughëri bhataakwiyima, mbakwëndërëra kuraaghëra na kunyo?”

34Yesu akabhagharokeri akabhugha, “Eriibhagha omokwiri akeere haghirohamu na abhaghëni bhaache mwikwirëra, nibhu moghuköra abhaghëni bhayo bhiiyime ebhiinyakurë na bheekunyo? 35Amare, mo‑chaasiko chino chekuucha, omokwiri nakoruusibhu ghate yaabho. Mo‑chaasiko chiyo, niho bhaakubha bhariiyima ebhiinyakurë.”

Amangʼana amahë gha Yesu

(Mataayo 9:16–17; Maariko 2:21–22)

36Yesu akabhabhoorera eghetuubhaani ekende, akabhugha, “Taanyi‑ho mooto uno akonunga egheteneka koru mo‑ngibho ahë, aghetumerani mo‑ngibho ankungu. Gho ghuköra hangʼu, naakubha atandwire bhoowa angibho yaache ahë. Wiiki, egheteneka kiyo ke ngibho ahë, ghetaaghotuubhaana na angibho ankungu.

37“Wiiki taanyi‑ho omooto uno aghotoora adivaayi ahë mo‑maghöchi gha mashëërö#5:37 Amashëërö ghayo n‑gha chambërëtë ꞉ghaare. amakungu. Mbe, gho ghuköra hangʼu, adivaayi ahë erabhera, neghwati amaghöchi ghayo. Na amaghöchi ghayo, ngaghusarëka. 38Adivaayi ahë nekwëndëru ghotooru mo‑maghöchi amahë.

39“Omooto uno anariri adivaayi e kare, taaghwighomba adivaayi ahë. Nakobhugha kubha, ‘Adivaayi e kare niyo amachömu.’”

Currently Selected:

Ruuka 5: ntk

Highlight

Copy