Ruuka 9

Yesu ˆaghatoma abhatomu bhaache ikomi na bhabhere

(Mataayo 10:5–15; Maariko 6:7–13)

1Orosiko rumu Yesu akabhabherekera abhatomu bhaache ikomi na bhabhere. Akabhaha obhotoro bho kuhëëbha emisambu ghyose koru mo‑bhaato, no obhotoro bho kuhöri amabhabharu ghoose. 2Akabhatoma, bhaghëndë kuraghaneri abhaato angʼana e bhutëmi bho Ryobha, na kobhahöri abhabhabharu na koruusi emisambu.

3Akabhabhoorera akabhugha, “Motaghëgha gheghiro ghyokyose mo‑rughëndö roonyu. Motiimoki ahimbo, hamu omorigho, hamu ekiinyakurë, hamu chambiiri, na hamu changibho ibhere.

4“Wiiki aka yoyoose ino moghusöha, mwikare muyo, mbagha orosiko ruure mookoru mo‑kyaro kiyo. 5Wiiki aka yoyoose ino abhaato bhaache bhataakobhaghënëhi, mohoroke‑mu, mwikongʼoote orotu runo roonyi mo‑maghoro ghaanyu. Gho ghuköra hangʼu, ibhe obhwibhateri ghokoobho, kubha Eryobha ˆrekabhaanga.”

6Niho abhatomu bhayo, bhaaghaye bharahetera mo‑bhyaro. Mbaare bharabharaghaneri abhaato Angʼana Anchömu, na kuhöri abhabhabharu haghirohamu na kuhëëbha emisambu ahaghiro hoose hano bhaghiire.

Yesu ˆakamuköra Herote kunyaaka mo‑körö

(Mataayo 14:1–12; Maariko 6:14–29)

7Ghoose ghano Yesu are araköra, omukangati Herote Antibha naare arooghu amangʼana ghaache. Ibheere ghakamuköra aghatiina, gho kubha, abhaato abhande mbaare bharabhugha kubha, Yesu niwe Yohana uno aryokiri koru mo‑bhaku. 8Abhande, mbaare bharabhugha kubha, n‑omurööti Eriya niwe ˆakaacha wiiki. Mbaare‑ho na abhande, bhano ꞉bhaare bharabhugha kubha, n‑umu o bharööti bha kare niwe aryokiri.

9Niho, Herote akabhugha, “Yohana, ꞉niimariri komonunga omutu! Mbe, n‑niwe, uyo nekooghu amangʼana ighoro yaache?” Mbe, Herote naare arëënda amorighi Yesu.

Yesu ˆakabharaagheri abhaato bhaaru ghokera ebheku bhitaano

(Mataayo 14:13–21; Maariko 6:30–44; Yohana 6:1–14)

10 Abhatomu bhayo bha Yesu, hano bhagharokiri o‑Yesu, bhakamobhoorera ghoose ghano ꞉bhaaköriri. Akabhiimoki aghaye nabho mo‑moghya uno okobherekeru Bhetisaayita.

11Abhaato hano bhamënyiri kubha naghiire iyo, bhakamotumbana. Akabhaghënëhi bhoheene, aghasëëma kobheeghi amangʼana gha bhutëmi bho Ryobha. Abhabhabharu bhano ꞉bhaare ghate yaabho akabhahöri.

12Eriibhagha re mughörööbha eryobha ˆreeghaye ghosikera, abhatomu bhayo ikomi na bhabhere bhakaacha bhakamobhoorera bhakabhugha, “Ahaghiro hano toonyi, m‑mwiteregho. Nobharaghe, abhaato bhano obhiisherereri bhaghëndë, mo‑bhyaro na ahaghiro ahande hano haanyi haghuhe, kubha bhiibhönërë ebhiinyakurë na ha komisi.”

13Yesu akabhagharokeri akabhugha, “Mobhahë inyu ebhiinyakurë!” Bhakamugharokeri bhakabhugha, “Itu totaghöötë gheghiro ghyokyose, amare ntoonyi ne emighaate etaano hangʼu na chaasu ibhere. Nokwënda tughëndë tobhaghorere abhaato bhano bhoose ebhiinyakurë?” 14Mbe, mo‑bhaato bhano ꞉bhaare hayo, abhasubhe mbaare ebheku bhitaano (5,000).

Yesu akabhabhoorera bhaghëndi bhaache akabhugha, “Mobhabhoorere abhaato bhiikare haase amakinda amakinda, amakinda ghoose ghabhe gha abhaato miröngö etaano etaano.” 15Niho, bhaghaköra kebhuno abharagheriiri. Mbe, abhaato bhoose bhaghiikara.

16Yesu akiimoki chaasu chiyo ibhere, ne emighaate ghiyo etaano. Aghagharaamereri Mwishaaro, akabhugha, “ˆOghachömi Waryobha.” Niho aghaghesuura, akabhaha bhaghëndi bhaache, bhabhahë abhaato.

17Abhaato bhayo bhoose bhakaraaghëra, bhaghiighota. Bhaghakoma amatigho gha bhiinyakurë bhino bhisaaghiri, bhaghiichori ebhetonga ikomi na bhibhere.

Bheetero ˆaghiishereri kubha Yesu niwe Kirisito

(Mataayo 16:13–20; Maariko 8:27–30)

18Orosiko rumu, Yesu na abhaanabheegha bhaache mbaare haghirohamu, bhiiyahwire. Yesu naare arasabha Eryobha. Akamara, akabhabhoori akabhugha, “Abhaato mbakobhugha kubha, eni neeni we?” 19Bhakamugharokeri bhakabhugha, “Abhande, mbakobhugha kubha, iye niiye Yohana Omubhatisaachi. Wiiki abhande mbakobhugha, iye n‑omurööti Eriya na abhande mbakobhugha kubha, iye n‑omurööti o kare uno aryokiri.”

20Yesu akabhabhoori wiiki akabhugha, “Amare inyu kana, mokobhugha eni neeni we?” Bheetero akamugharokeri akabhugha, “Iye niiye Kirisito, uno otomuru ne Eryobha!”

21Niho Yesu akabhashaangʼi abhaanabheegha kubha, bhataacha kobhoorera omooto wowoose kubha iwe niwe Kirisito.

Yesu ˆakarööta ghoku na koryoka kooche

(Mataayo 16:21–28; Maariko 8:31—9:1)

22Akabhabhoorera akabhugha, “Eni Omoona o Mooto, nekwëndëru ninyaakibhu chwee, na kwangu na abhagharuka bha Bhayahuuti, na abhakoro bha bhachaama bha Ryobha, na abheeghi bha meghiro. Neghwitu, amare orosiko ro ghatato nekoryoka.”

23Akamara, Yesu akabhabhoorera bhoose kubha, “Omooto wowoose uno akwënda ghuntambana, nakwëndëru iyange omwene, aghëghë omusarabha waache chaasiko choose, antambane. 24Mbe, wowoose uno akwënda kobhuhöni obhuhöru bhooche, iwe nakobhobhori obhuhöru bhooche. Wiiki wowoose uno akobhobhori obhuhöru bhooche gho ghiri yaane, nakobhotoori. 25Omooto, arabhöna ebheghiro bhyose bhe mo‑se ino, amare abhori hande ghwisireekereri omwene, naakubha abhwine bhwëra ke?

26“Wowoose uno akondigheri chaasoni eni na amangʼana ghaane, Omoona o Mooto woose nakomorigheri chaasoni omooto uyo, hano akuucha kuucha mo‑bhokumi bhooche obhokoro, na bhwi Ishe, na bho bhamarayika bhaache abhatööbhiyu.

27“Mbe, mahëënë ˆnekabhabhoorera, ghate e bhaato bhano bhiimeeriire hano, mbaanyi‑ho abhande bhano bhataaghoku, bhataamara bharighi obhutëmi bho Ryobha!”

Abhaghëndi ˆbhakarighi obhokoro bho Yesu mo‑bhutëmi bhooche

(Mataayo 17:1–8; Maariko 9:2–8)

28Chaasiko inyaanye chiiche koheta korwera hano asiikiire amangʼana ghayo, Yesu akabhiimoki Bheetero, na Yohana, na Yakobho, aghatiira nabho mo‑gheghoro, gho ghiri asabhe Eryobha iyo.

29Hano ahikiri mo‑gheghoro, aghasëëma ghusabha Eryobha. Hano are arasabha, eghisösö ke bhosho bhooche gheghiigharura. Amaghööti ghaache, ghaakabha meero chayi, ghararëngaari chwee.

30Hayo hayo, hakarwera abhaato bhabhere bharasiikëra nawe, abhaato bhayo mbaare Musa na Eriya! 31꞉Mbaarweriire mo‑bhokumi obhokoro bharasiikëra na Yesu ighoro e kohikeerani amënda gha Ryobha kwo roko rooche iyo Yerusareemu.

32Eriibhagha riyo, Bheetero na abhaghëndi mbaare bhamisiri chandöörö indito. Hano bhiitakiri, bhakamorighi Yesu ararëngaari mo‑bhokumi bhooche obhokoro. Bhakabharighi wiiki abhasubhe bhabhere, bhiimeeriire haghirohamu nawe.

33Eriibhagha bhayo bhabhere ꞉bhaare bharataana na Yesu, Bheetero akamobhoorera akabhugha, “Oo Omutëmi wiito! Ekabha bhoheene itu kubha hano. Twabhëkë hano ebhebhuru bhitato, kimu kibhe ghekeecho, ne ekende ke Musa, ne ekende ke Eriya.” Hano Bheetero asiikëriire ighoro e kwabhëka ebhebhuru, taamënyiri kino aghosiikëra.

34Eriibhagha Bheetero are arasiikëra ghayo, hakarwera erishaaro, rekabhakundekeri. Bhaghatiina chwee hano bhakundekiiru ne erishaaro riyo. 35Koru Mwishaaro, hakarwera eriiraka, rerabhugha, “Uno n‑Omoona waane, omwahöru waane! Momutëghëërërë!”

36Eriiraka riyo riiche ghosira, abhaghëndi bhayo, bhakamorighi Yesu anyi omwene chiri. Ghayo ghoose ghano ꞉bhaarooche hayo, ibho bhaghakira nagho, taanyi‑ho omooto uno abhooriiru mo‑chaasiko chiyo.

Yesu ˆakahëëbha omusambu koru mo‑moona

(Mataayo 17:14–18; Maariko 9:14–27)

37Hano bhookiire, Yesu na abhaanabheegha bhaache bhayo bhatato bhaghiika koru mo‑gheghoro, bhaghatëmëërana ne erikinda ikoro re bhaato.

38Ghate e bhaato bhayo, ꞉haare no omooto umu uno ꞉atiiriri eriiraka, akabhugha, “Oo Omweghi, neghoghusabha, omumööhëri omoona waane uno, niwe omwene chiri. 39Mööhi, omusambu nohaamusöhërëra, omuköra akörë eriireghe. Wiiki nohaabha oramukörëra eriirimo, ino eriihuru reramoru mo‑monu, nohaamunyaaki chwee, na tohaamotigha bhwango. 40Nebhasasaamiri abhaanabheegha bhaacho kubha bhawuhëëbhë, amare bhataatoriri.”

41Niho Yesu akabhagharokeri akabhugha, “Inyu orwibhoro runo rotaaghokumi, runo rorumeeriri! Neghwikara na niinyu na kobhaghumereri mbagha nyingake? Murëëtë omoona waacho hano.”

42Hano are aramohira hayo hayo, omusambu uyo okamoghwishi haase omoona uyo, okamukörëra eriirimo. Niho, Yesu akawohiinya, akamuhöri omoona uyo, akamugharoki ghwi ishe.

43Abhaato bhoose, hano bharooche obhotoro obhokoro bho Ryobha, bhakaroghoora chwee.

Yesu ˆaghasiikëra wiiki ighoro e roko rooche

(Mataayo 17:22–23; Maariko 9:30–32)

Abhaato bhayo bhoose, hano ꞉bhaare bhakeere bhararoghoora ighoro e maköri ghoose gha Yesu, akabhabhoorera abhaghëndi bhaache, akabhugha, 44“Amangʼana ghano nekobhabhoorera ibheere, mutëghë amatu. Eni Omoona o Mooto neghughöötu na kohiru mo‑mabhökö gha bhaato.”

45Amare, ghayo Yesu ꞉abhabhooriire, bhataaghamënyiri, gho kubha angʼana iyo neere ekeere ebhisuru ghokoobho, bhataayimënya. Bhaghatiina komobhoori ighoro e ngʼana iyo.

N‑niwe anyi omokoro mo‑bhoose

(Mataayo 18:1–5; Maariko 9:33–37)

46Mbe, hakarwera erihakaana ghate e bhaanabheegha bha Yesu kubha, n‑niwe ghate yaabho akubha omokoro ghokera abhaghëndi.

47Yesu akamënya amiihëëbhö gha metema gheebho. Mbe, akiimoki omoona omosuuhu, akamwimeereri haghuhe nawe, 48akabhabhoorera akabhugha, “Omooto wowoose uno akomughënëhi omooto o haase kinya omoona uno kwo riina reene, naakubha angënëhiri eni woose. Wiiki omooto uno aghungënëhi, namughënëhiri uno antomiri. Ibheere, omooto uno anyi omosuuhu ghate yaanyu bhoose, uyo niwe omokoro ghokera bhoose.”

Omooto owonde uno akoruusi omusambu

(Maariko 9:38–40)

49Yohana akamobhoorera Yesu akabhugha, “Oo Omutëmi wiito, ntomorooche omooto uno are arahëëbha emisambu kwo riina reecho. Itu toghasaki komurëki, gho kubha iwe taanyi mughëndi wiito.” 50Yesu akamugharokeri akabhugha, “Motamurëki wiiki! Omooto uno ataakobhaanga, uyo mughëndi waanyu.”

Yesu ˆakaangu Samaariya

51Eriibhagha re Yesu re ghugharuka Mwishaaro ndeere ˆreghatingʼi. Niho akëënda hayo hayo ghuye Yerusareemu, aghatanura. 52Aghatoma abharaghani bhamukangate. Hano ꞉bhaare bharaghe, bhaghasöha mo‑kyaro kimu ke Bhasamaariya, kubha bhamusëëmërë ahaghiro ha komisi na amangʼana aghande. 53Amare, abhiikari bha iyo bhakaanga komughënëhi, gho kubha naare araghe Yerusareemu.

54Abhaanabheegha bhaache, Yakobho na Yohana, eriibhagha bharooche ghayo, bhakamobhoori, “Oo Omutëmi wiito, nokwënda tusabhe omororo wiike koru Mwishaaro obheeki bhasireekerere, [kebhuno Eriya ꞉aköriri]?”#9:54 Mööhi 2 Abhatëmi 1:10, 12, 14.

55Hano bhasiikiire amangʼana ghayo, Yesu akabhishoororeri akabharëki. [Akabhugha, “Moteeche n‑körö e ngabhu moonyi nayo,] 56gho kubha Omoona o Mooto tiichiri ghosireekereri chaakörö che bhaato, amare niichiri ghochetoori.” Bhaakaru hayo bhaaghaye mo‑kyaro ekende.

Komutambana Yesu n‑ghuköngʼu

(Mataayo 8:19–22)

57Eriibhagha Yesu na abhaanabheegha bhaache ꞉bhaare bharaghënda mo‑nchëra, omooto umu akamobhoorera akabhugha, “Hohoose hano oghuye, neghoghutambana!”

58Yesu akamugharokeri akabhugha, “Chaambwe ncheenyi na chakoobho ne ebhinyönyi mbeenyi ne ebhenyumba. Amare eni uno neenyi Omoona o Mooto nteenyi koru na ha ghotoora omutu!”

59Yesu akamobhoorera omooto owonde akabhugha, “Untambane!” Omooto uyo akamugharokeri akabhugha, “Oo Omutëmi, nonyisherereri singa neghi nemoryeke taata waane.”

60Amare Yesu akamugharokeri akabhugha, “Iye nutambane! Abhaato bhano bhataakorekumi Eryobha n‑kinya abhaku. Tigha bharyekane abheene kwo bheene. Amare iye, nooghi uraghaneri abhaato angʼana ighoro e bhutëmi bho Ryobha.”

61Wiiki omooto owonde, akamobhoorera Yesu akabhugha, “Oo Omutëmi, neghoghutambana. Amare singa onyisherereri, nighëndë nebharaghe abhaato bha mo‑ka yaane.”

62Yesu akamobhoorera akabhugha, “Omooto wowoose uno amariri ghughööta eriishërë korema, amare ishoorori kumööhi anyuma, uyo taakurëngʼaanera kubha omutamishi mo‑bhutëmi bho Ryobha.”

Currently Selected:

Ruuka 9: ntk

Highlight

Copy