Mataayo 13

Eghetuubhaani ke mobhusuri o chambusuro

(Maariko 4:1–9; Ruuka 8:4–8)

1Orosiko ruyo ruyo, Yesu akaru mo‑nyumba iyo, aghaye ghwikara rubhareka ro nyancha. 2Erikinda ikoro chwee rekamusëëta, niho aghasöha mo‑bhwato bhuno bhoore mo‑nyancha, aghiikara‑mu kubha bhatamwikomanera. Erikinda riyo rekiimeerera rubhareka ro nyancha. 3Mbe, Yesu akabhabhoorera amangʼana maaru kwo bhetuubhaani arabhugha, “Mutëghëërërë! Naare‑ho omobhusuri umu uno ꞉aghiire kobhusura chambusuro cheeche. 4Eriibhagha are arabhusura, chambusuro echende cheghaghwera mo‑nchëra, ebhinyönyi bhekaacha bheghachirë. 5Chambusuro echende cheghaghwera mwitare, hano hataanyi ne eriiröbhë ryaru. Chambusuro chiyo chekamëra bhwango gho kubha riiröbhë ndeere isuuhu ighoro. 6Amare hano omu ubhariri, emimërö ghiyo ghekanyaara na kooma, gho kubha emerya gheeche ghetaare gheghiire haase. 7Chambusuro echende cheghaghwera mo‑maho. Hano amaho ghayo ghakoriri, ghaghachibhandereri chambusuro chiire. 8Chambusuro echende cheghaghwera mwiröbhë ichömu. Hano chekoriri, echimu chekabhyara amakorobhese eriighana rimu, ne echende miröngö esaasabhe ne echende miröngö etato. 9Omooto wowoose uno anyi na amatu gha kooghu, no oghu!”

Kino ꞉ghiighëriri Yesu asiikërë kwo bhetuubhaani

(Maariko 4:10–12; Ruuka 8:9–10)

10Abhaanabheegha bha Yesu bhakaacha na komobhoori bharabhugha, “Ngwake oghosiikëra na abhaato bhano kwo bhetuubhaani?”

11Akabhagharokeri akabhugha, “Eryobha ndebhahunyuriire inyu kumënya ghano ghaanyi mo‑kebhisere ighoro e bhutëmi bho Mwishaaro, amare ibho bhakeere kumënya ghayo, 12gho kubha uno anyi ne egheghiro nakuhaabhu, na kwëngëru bhyaru. Amare uno ataanyi ne egheghiro nakuhöku koru kiire are ararighi kubha naanyi nakyo. 13Neghosiikëra nabho kwo bhetuubhaani, gho kubha nangabha bhakorighi n‑kinya bhataakorighi, nangabha bhakooghu n‑kinya bhataakooghu, koru bhataakumënya. 14Ghano ngaghuköru ghokoobho kubha ghahikeerane ghano omurööti Isaaya ꞉andëkiri kubha,

‘Mahëënë kooghu mokooghu, amare motaakumënya.

Mahëënë kumööhërëri mokumööhërëri, amare motaakorighi.

15Mbe, gho kubha emetema ghe bhaato bhano m‑miköngʼu,

na amatu ghaabho ghataakooghu,

na amiisho ghaabho ngahinderiiri.

Aribha tengabheere hangʼu,

na amiisho ghaabho ngangarooche,

na mbangooghwire kwo matu ghaabho,

ne emetema gheebho ngengamënyiri,

mbagha mbangangarokiire, nebhahöri.’#13:14–15 Mööhi Isaaya 6:9–10.

16“Amare Eryobha ndebhitabhiiri inyu, gho kubha amiisho ghaanyu ngakorighi na amatu ghaanyu ngakooghu. 17Mahëënë ˆnekabhabhoorera kubha mbaare‑ho abharööti na abhatööbhiyu bhaaru bhano ꞉bhaare bhariighomba ghogharighi ghano mokorighi inyu, amare bhataagharooche. Wiiki, mbaare bhariighomba ghoghooghu ghano mokooghu inyu, amare bhataaghooghwire.

Yesu ˆaghateemora eghetuubhaani ke mobhusuri

(Maariko 4:13–20; Ruuka 8:11–15)

18“Mbe, inyu mutëghëërëra egheteemoro ghe ghetuubhaani kiyo ke mobhusuri o chambusuro. 19Omooto wowoose uno akooghu angʼana e bhutëmi bho Ryobha amare atayimënya, Erishambu ndekuucha na koyisara angʼana ino Eryobha ryemiri mo‑motema waache. Omooto uyo natuubhiine na chambusuro chino ꞉cheeghweriire mo‑nchëra. 20Chambusuro chino ꞉cheeghweriire mwitare rino retaanyi ne eriiröbhë ryaru, nchetuubhiine no omooto uno akooghu angʼana e bhutëmi bho Ryobha, hayo hayo ayesongʼaana gho ghuchömëru. 21Amare gho kubha taanyi ne emerya moose yaache, angʼana iyo nekubhamu kwo riibhagha isuuhu. Aribha anyaako hamu anyööri eramubhöna gho ghiri e ngʼana iyo, hayo hayo ayetigha. 22Chambusuro chino ꞉cheeghweriire mo‑maho, nchetuubhiine no omooto uno akooghu angʼana e bhutëmi bho Ryobha, amare naghwituuri chwee ighoro e mangʼana gha riimanya rino no obhwighombi bho bhwame. Ghayo ngahabhandereri angʼana, nayo ekindu ghuköra emeremo. 23Amare chambusuro chiire ꞉cheeghwire mwiröbhë ichömu, nchetuubhiine no omooto uno akooghu angʼana e Ryobha na koyimënya. Omooto uyo naghusönga amakorobhese eriighana rimu, owonde miröngö esaasabhe na owonde miröngö etato.”

Eghetuubhaani ghe ghetoki

24Yesu akabhabhoorera eghetuubhaani ekende akabhugha, “Obhutëmi bho Mwishaaro mbotuubhiine no omooto uno ꞉emiri ambusuro inchömu a‑moghondo. 25Amare hano abhaato bhoose bhamisiri, omobhisa waache aghaye akeemi eghetoki mo‑changano, akamara aghatanura. 26Hano changano chiyo chimëriri na ghusëëma kobhyara, eghetoki kiire kyose gheghasëëma kobhyara.

27“Abhatamishi bha mwene omoghondo bhakamutambana, bhakamobhoori bhakabhugha, ‘Oo omutëmi, ntweche kubha ꞉weemiri chambusuro inchömu a‑moghondo, kana eghetoki kiire, hayi kerweriire?’

28“Akabhagharokeri akabhugha, ‘Omobhisa niwe aköriri ghayo.’

“Abhatamishi bhaache bhakamobhoori bhakabhugha, ‘Kana nokwënda tughëndë tokiihe?’

29“Nawe akabhugha, ‘Tiyaanyi, motakiiha gho kubha aribha moriiha eghetoki, moghotora kwiha haghirohamu na changano. 30Mobhetighe bhyose bhekore haghirohamu mbagha eriibhagha re ghughësa. Eriibhagha riyo, nekobhabhoorera abhaghësi kubha bhashame bhakome eghetoki na ghoghetoora mo‑matuumu kubha ghyekibhu. Amare changano bhachekome na ghochetindeka mo‑ghitara keene.’”

Eghetuubhaani ke hëkë e harataari

(Maariko 4:30–32; Ruuka 13:18–19)

31Yesu akabhabhoorera eghetuubhaani ekende akabhugha, “Obhutëmi bho Mwishaaro mbotuubhiine na ahëkë e harataari ino omooto ꞉imokiri na koyeemi mo‑moghondo waache. 32Ahëkë iyo n‑insuuhu chwee, ghokera echende choose, amare eramara kumëra na ghokora nehaabha inkoro ghokera chaanyi choose che mo‑kinyaweera. Ahëkë iyo nehaakora na kubha omote omokoro koru ebhinyönyi bhe mwishaaro mbehaacha na kwabhëka‑mu ebhenyumba mo‑chaasa cheeche.”

Eghetuubhaani ke bhotu bho kimëra

(Ruuka 13:20–21)

33Yesu akabhabhoorera eghetuubhaani ekende akabhugha, “Obhutëmi bho Mwishaaro mbotuubhiine no obhotu bho kimëra bhuno omukari ꞉imokiri aghasangerani mo‑matebhe atato gha bhotu, kerende obhotu bhuyo bhoose bhoghatöta.”

Kino ꞉ghiighëriri Yesu asiikërë kwo bhetuubhaani

(Maariko 4:33–34)

34Yesu naare araghabhoorera amakinda gha bhaato bhayo ghoose kwo bhetuubhaani. Taare arasiikëra ghyokyose ghokoobho mbagha asiikërë gho ghetuubhaani. 35Ghayo ꞉ngaaköruru kubha ghahikeerane ghano omurööti asiikiire kubha,

“Neghosiikëra na abhaato gho nchëra e bhetuubhaani.

Neekubha nerabhabhoorera ghano ghabhisuru korwera ghutëëmu gho se.”#13:35 Mööhi Sabhuri 78:2.

Yesu ˆaghateemora eghetuubhaani ghe ghetoki

36Akamara Yesu akariragha erikinda riire re bhaato, aghasöha mo‑nyumba. Abhaanabheegha bhaache bhakamusëëta, bhakamobhoorera bhakabhugha, “Toteemorere eghetuubhaani kiire ghe ghetoki kino keere a‑moghondo.”

37Yesu akabhagharokeri akabhugha, “Omooto wuure ꞉emiri ambusuro anchömu natuubhiine na neeni Omoona o Mooto. 38Omoghondo wuure notuubhiine na ase, chambusuro inchömu chiire nchetuubhiine na abhaato bha bhutëmi bho Ryobha. Amare eghetoki kiire ngetuubhiine na abhaato bha mobhisa wuure. 39Omobhisa uno ꞉emiri eghetoki natuubhiine ne Erishambu. Omughësö notuubhiine no orosiko ro ghoteneru ekiina ase, na abhaghësi mbatuubhiine na bhamarayika bha Ryobha. 40Kinya bhuure abhatamishi bha a‑moghondo bhakwiha na ghweki eghetoki mo‑mororo, nibhu ekubha mo‑rosiko ro ghotenera ekiina ase. 41Eni Omoona o Mooto nekobhatoma bhamarayika bhaane kubha bhabhakome koru mo‑bhutëmi bhoone abhaato bhoose bhano bhakorumeeri abhande bhakörë amasari, na abhaköri bha masari bhoose. 42Bhamarayika bhayo mbakobharëkëra abhaato bhoose mo‑riinata re mororo, muyo mbaakubha bhararera na ghukararaati amiino gho ghiri e bhuhëmbërëra bhuhaari. 43Mbe, abhaato bhoose bhano bhaanyi no obhuhëënë ambërë e Ryobha, mbaakubha bhararëngaari kinya eryobha mo‑bhutëmi bhwi Ishe waabho. Omooto wowoose uno anyi na amatu gha kooghu, no oghu!

Eghetuubhaani ghe gheghiro ke riighori ikoro

44“Obhutëmi bho Mwishaaro mbotuubhiine na agharinga ino ebhisuru a‑moghondo. Hano omooto umu ayebhwine, akiimoki, akayebhisa wiiki. Mbe, aghachömëru chwee, aghaye aghaghori ebheghiro bhyose bhino are nabhyo, aghaghora omoghondo uyo.

45“Wiiki, obhutëmi bho Mwishaaro mbotuubhiine no omosorocha umu uno aghiire ghutabhara eghikörë ke riighori ikoro. 46Hano abhwine eghikörë kimu ke riighori ikoro, aghaye aghaghori ebheghiro bhyose bhino are nabhyo, akaacha aghagheghora.

Eghetuubhaani ke rwërö

47“Wiiki, obhutëmi bho Mwishaaro mbotuubhiine no orwërö runo abhaweesani ꞉bhaarëkiire mo‑nyancha. Hano bharurëkiire, orwërö ruyo roghaghööti chaasu che manga maaru. 48Hano orwërö ruure rwichwire, abhaweesani bhakaroruta rubhareka ro nyancha. Bhaghiikara haase na ghokoma chaasu chanchömu bhaghachetoora mo‑ntahi, amare chaasu chambe bhaghachite. 49Hangʼu nibhu ekubha orosiko ro ghotenera ekiina ase. Bhamarayika bha Ryobha mbakuucha na kobhaahukani abhaato bhano bhaköriri amasari, na bhano bhaanyi no obhuhëënë ambërë e Ryobha. 50Bhamarayika bhayo mbakobharëkëra abhaköri bha masari mo‑riinata re mororo, muyo mbaakubha bhararera na ghukararaati amiino gho ghiri e bhuhëmbërëra bhuhaari.”

Yesu nakweghi ighoro e meeghi amahë na gha kare

51Yesu akabhabhoori abhaanabheegha bhaache akabhugha, “Moghamënyiri ghoose ghayo nebhabhooriire?”

Ibho bhaghagharokeri bhakabhugha, “Ntoghamënyiri.”

52Iwe akabhabhoorera akabhugha, “Omweghi wowooseo meghiro ghe Musa uno akubha omoonamwegha mo‑bhutëmi bho Mwishaaro, natuubhiine no omwene anyumba uno aharuusi mo‑bheghiro bheeche, ebheghiro ebhihë na bhe kare.”

Abhaato bha Nasareeti ˆbhakamwanga Yesu

(Maariko 6:1–6; Ruuka 4:16–30)

53Hano Yesu amariri ghosiikëra ebhetuubhaani bhiyo, aghatanura hayo. 54Hano ahikiri mo‑moghya o waabho, aghasëëma kobheeghi abhaato mo‑risinaghooghi reebho. Abhaato bhayo bhakaroghoora na kobhoorani bharabhugha, “Omooto uno hayi abhwine amangʼiini ghano no obhotoro bho ghuköra ebheroghooro bhino? 55Kana, uno taanyi omoona o murandi o chambaawe? Kana, eriina re nyina waache taanyi Mariyamu? Kana, bhaömööbhö taanyi bha Yakobho, na Yusubhu, na Simiyooni na Yuuta? 56Kana, abhasubhaati bhaabho taanyi bhaare tumanyiri nabho haghirohamu? Mbe, hayi aghabhwine ghoose ghano?” 57Niho bhakaanga komokumi.

Amare Yesu akabhabhoorera akabhugha, “Omurööti nahaabha na asooko ahaghiro ahande hoose, amare taanyi mo‑se yaache, na mo‑ka yaache.”

58Mbe, gho kubha abhaato bhayo bhataamokumiri, Yesu taaköriri ebheroghooro bhyaru iyo.

Currently Selected:

Mataayo 13: ntk

Highlight

Copy