Mataayo 21

Yesu ˆaghaturungʼaneru gho chandiryato

(Maariko 11:1–11; Ruuka 19:28–40; Yohana 12:12–19)

1Hano Yesu na abhaanabheegha bhaache bhatingʼiri Yerusareemu, haghuhe ne ekyaro ke Bhetibhaaghe mo‑gheghoro ke Miseyituuni. Yesu akabhatoma abhaanabheegha bhaache bhabhere, 2akabhabhoorera akabhugha, “Mughëndë mo‑kyaro kino keenyi ambërë yaanyu. Hano moghusöha‑mu, mokorighi atikere ibhöhuru no omoona waache. Mochisaasure, mochindëëtërë hano. 3Aribha omooto wowoose arabhabhoori ighoro e chaatikere chiyo, momugharokeri mobhughe, ‘Omutëmi naghöchëënda,’ iwe nakobhiisherereri muuche nacho.”

4Ghayo ꞉ngaaköruru kubha ehikeerane angʼana ino Omutëmi Waryobha abhughiri gho nchëra e omurööti waache kubha,

5“Obhabhoorere abhaato bha Sayuuni#21:5a Sayuuni. Kwo ngʼana ino, umööhi Yerusareemu mo‑mangʼana amaköngʼu. kubha,

‘Mööhi, Omutëmi waanyu nakuucha ghokoonyu,

m‑muhörëëru, nakuucha ino atiiriri atikere,

na atikere iyo n‑ekimööri.’”#21:5b Mööhi Sakariya 9:9.

6Mbe, abhaanabheegha bhayo bhaaghaye bhaghaköra kinya Yesu ꞉abharagheriiri. 7Hano bhagharokiri o‑Yesu na atikere yiire haghirohamu ne ekimööri keeche, bhakaara changibho cheebho echimu ighoro e tikere ne ekimööri kiyo na Yesu aghiikara ighoro e changibho chiyo. 8Erikinda ikoro chwee re bhaato rekaara changibho cheebho mo‑nchëra na abhande bhakanunga ebhihaghe bhe mete na kobhyara mo‑nchëra kwërëki asooko ghokooche. 9Abhaato bhano ꞉bhaare bhakangatiri ambërë na bhano ꞉bhaare bharamoru anyuma, bhaghatiiri amaraka bharabhugha,

“Hosaana Omoona o Tawuti!

Niitabhiiru uno akuucha kwo riina re Mutëmi Waryobha!#21:9 Mööhi Sabhuri 118:25–26.

Hosaana Waryobha omokoro o bhyose!”

10Hano Yesu asöhiri mo‑moghya o Yerusareemu, omoghya woose okarighitera. Abhaato bhaghasëëma kobhoorani bharabhugha, “N‑niwe uyo?”

11Erikinda riire re bhaato rekabhagharokeri rerabhugha, “Uyo n‑Yesu, omurööti wuure o mo‑moghya o Nasareeti, mo‑mukööwa o Ghariraaya.”

Yesu ˆakabhahëëbha abhasorocha mo‑riigho re Risëngërö

(Maariko 11:15–19; Ruuka 19:45–48; Yohana 2:13–22)

12Niho Yesu aghasöha mwigho re Mwisëngërö, akabhabhöna abhaato bhano ꞉bhaare bharaghori na ghoghora ebheghiro muyo, akabhahëëbha bhoose. Aghaturunkani chameecha che bhano ꞉bhaare bharakerani chambiiri ne ebhetumbe bhe bhano ꞉bhaare bharaghori chaasarari. 13Yesu akabhabhoorera akabhugha, “Yandëkuru mo‑Mandëkö Amatööbhiyu kubha, ‘Anyumba yaane neekubha anyumba e masabhi.’#21:13a Mööhi Isaaya 56:7. Amare inyu ˆmokayiköra kubha akööbhö e manyangara.”#21:13b Mööhi Yeremiya 7:11.

14Mbe, eriibhagha Yesu anyi mo‑riigho re Mwisëngërö, abhahuku na abhabhëëru bhakaacha ghokooche, iwe akabhahöri. 15Amare abhakoro bha bhachaama na abheeghi bha meghiro mbarooche ebheroghooro bhino Yesu aköriri, wiiki mbooghwire abhaana bharachaghana mo‑riigho re Mwisëngërö bharabhugha, “Hosaana kwo Omoona o Tawuti!” Gho ghiri iyo bhaghakarara chwee. 16Bhakamobhoori Yesu bhakabhugha, “Kana, nokooghu bhuno abhaana bhano bhakobhugha?”

Yesu akabhagharokeri akabhugha, “Nyoghwire. Kana motaamara musöma amangʼana ghano ghaandëkuru mo‑Mandëkö Amatööbhiyu kubha,

‘Mo‑menu ghe bhaana abhasuuhu ne ebhengʼwerere,

nimu muyo asëëmiiri aghongo’#21:16 Mööhi Sabhuri 8:2.?”

17Yesu akabhatigha abhaato bhayo, akaru Yerusareemu, aghaye komisi mo‑kyaro ke Bhetaniya.

Yesu ˆakawiihiima omotiini uno otaanyi na amakorobhese

(Maariko 11:12–14, 11:20–24)

18Hano Yesu are aragharuka Yerusareemu atabhoori, akooghu anchëra. 19Niho akarighi omote umu uno okobherekeru omotiini rubhareka mo‑nchëra, aghiishuka haghuhe, akabhöna otaanyi ni ikorobhese ryoryose, onyi na amato agheene chiri. Niho akawobhoorera omote uyo akabhugha, “Korwera reero otasönga amakorobhese wiiki!”#21:19 Yesu ꞉niihiimiri omote o motiini kwërëki kebhuno Eryobha rekobhatenera ekiina Abhayahuuti, gho kubha bhataakubha na amakorobhese gha maköri amachömu. Hayo hayo, omote uyo okanyaara.

20Hano abhaanabheegha bhaache bhagharooche ghayo, bhakaroghoora chwee, bhakamobhoori bhakabhugha, “Nibhu ekabha omote uno okanyaara bhwango hangʼu?”

21Yesu akabhagharokeri arabhugha, “Mahëënë ˆnekabhabhoorera, aribha moonyi no obhokumi ino motaanyi na ahaho, na niinyu moghotora ghoghaköra kinya ghano niköriri mo‑mote uno. Wiiki motaaghuköra ghano agheene hangʼu, koru aribha morabhoorera egheghoro kino, ‘Iheka na kwirëkëra mo‑nyancha,’ nagho ngaghuköru. 22Aribha moonyi no obhokumi, ghyokyose kino moghusabha Eryobha, ndekobhaha.”

Abhakangati bha Bhayahuuti ˆbhakaanga obhuhëënë

(Maariko 11:27–33; Ruuka 20:1–8)

23Yesu aghasöha wiiki Mwisëngërö, akabha areeghi. Niho abhakoro bha bhachaama, na abhagharuka bha Bhayahuuti bhaaghaye komobhoori bharabhugha, “Ghano iye oghuköra, noghuköra kwo bhotoro bhwa we? Na n‑niwe uno akoheere obhotoro bhuno?”

24Yesu akabhagharokeri akabhugha, “Na neeni nekobhabhoori angʼana imu. Mbe, aribha morangarokeri iyo, na neeni nekobhabhoorera n‑kwo bhotoro ke neghuköra ghano. 25Kana, obhotoro bho Yohana bho kubhatiisa abhaato hayi ꞉bhoorweriire? ꞉Mboorweriire Mwishaaro kwo Waryobha ghasi mo‑bhaato?”

Niho bhaghiisiikërëra bhakabhugha, “Aribha toragharokeri kubha ꞉mbooruure Mwishaaro, naghotobhoori kubha, ‘Mbe, ngwake kana motabhokumiri?’ 26Wiiki, aribha toragharokeri kubha ꞉mbooruure mo‑bhaato, ntoghotiina erikinda re bhaato bhano, gho kubha bhoose mbaanyi no obhuhëënë kubha Yohana m‑murööti are.” 27Mbe, bhaghagharokeri bhakabhugha, “Toteeche.”

Yesu akabhabhoorera akabhugha, “Na neeni nteekobhabhoorera n‑kwo bhotoro ke neghuköra ghano.”

Eghetuubhaani ke bhaana bhabhere

28Yesu aghasiikëra wiiki akabhugha, “Inyu mokorighi bhu ighoro eghetuubhaani kino? Naare‑ho omooto umu uno are na abhaana bhabhere bha kebhureni. Akamutambana omoona o mumbërë, akamobhoorera akabhugha, ‘Oo omoona waane, nooghi ukörë emeremo mo‑moghondo o misabhiibhu reero.’ 29Omoona uyo akamugharokeri akabhugha, ‘Nteeghuye.’ Amare akamara aghagharura amiihëëbhö ghaache, aghaye aghaköra.

30“Niho omugharuka uyo aghaye kwo moona waache o kabhere na komobhoorera kinya wuure owonde. Iwe akamugharokeri akabhugha, ‘Neeghuye taata.’ Amare taghiire. 31Kana, mo‑bhabhere bhayo, n‑niwe uno aköriri kinya bhuno ishe waache ꞉ëndiri?”

Bhaghagharokeri bhakabhugha, “Wuure o mumbërë.”

Niho Yesu akabhabhoorera akabhugha, “Mahëënë ˆnekabhabhoorera, abhatöbhi bha righööti na abhasöngörëëri mbaghukangata ghusöha mo‑bhutëmi bho Ryobha. 32Yohana ꞉niichiri ghokoonyu kubha abhëërëki anchëra e bhuhëënë, na niinyu motaamokumiri. Amare abhatöbhi bha righööti na bhasöngörëëri ꞉mbaamokumiri. Koru hangʼu inyu eriibhagha morooche ghoose ghayo, motiisheriiri ghugharura amiihëëbhö ghaanyu na komokumi.

Eghetuubhaani ke bharemi abhabhe

(Maariko 12:1–12; Ruuka 20:9–19)

33“Mutëghëërërë eghetuubhaani ekende. Naare‑ho omooto umu uno aremiri omoghondo waache na kwemi emisabhiibhu. Akinaareri orubhagho, aghatuka eriiribha ghateghate e moghondo re komitera amanche gha misabhiibhu, wiiki akaabhëka omunara omurë o kwimeerera ighoro abhanendi bha moghondo. Akamara, akabhaha omoghondo abharemi, kwo miishererani gha kuhööha omunöghö, akamara aghaköra orughëndö.

34“Hano eriibhagha re ghughësa rehikiri, akabhatoma abhatamishi bhaache kwo bharemi bhaare kubha bhaghëndë bhamwimokeri eribhaara reeche re munöghö. 35Amare, abharemi bhayo bhakabhaghööta abhatamishi bhayo, umu bhakamutëma, no owonde bhakamwita no owonde bhakamurasa na amabhohe. 36Omwene omoghondo akabhatoma wiiki abhatamishi abhande bhaaru ghokera bhano atomiri ekimbërë. Abharemi bhayo bhakabhakörëra kobhe abhatamishi bhayo kinya bhuno bhaköriire a bhambërë. 37Akamara, akamotoma omoona waache, akabhugha, ‘Uno n‑omoona waane, iwe mbakomosooka.’ 38Amare hano abharemi bhaare bhamorooche omoona uyo, bhaghiisiikërëra bhakabhugha, ‘Uno, niwe omughabhi. Ibheere ntomwite, aghabho yaache ibhe ghokwito.’ 39Mbe, bhakamughööta, bhakamohoroki anche e moghondo, bhakamwita.”

40Yesu akabhabhoori akabhugha, “Mbe, aribha omwene omoghondo uyo aragharuka koru mo‑rughëndö rooche, nibhu akobhaköra abharemi bhayo?”

41Ibho bhaghagharokeri bhakabhugha, “Nakobhiita kobhe abhabhe bhayo, no omoghondo waache nakobhaha abharemi abhande bhano bhakomoreha bhoheene amakorobhese ghaache kwo riibhagha reeche.”

42Niho Yesu akabhabhoorera wiiki akabhugha, “Kana, motaamara musöma ghano ghaandëkuru mo‑Mandëkö Amatööbhiyu? Ngaandëkuru kubha,

‘Eriibhohe rino abhaabhëki ꞉bhaangiri,

niryo ribheere eriibhohe ikoro re bhoroso.

Omutëmi Waryobha niwe aköriri riyo,

naryo n‑de koroghoori ghokwito.’#21:42 Mööhi Sabhuri 118:22–23.

43“Gho ghayo, ˆnekabhabhoorera kubha, inyu motaaghusöha mo‑bhutëmi bho Ryobha, amare abhaato abhande nibho bhaghwisherereru ghusöha‑mu. Abhaato bhayo m‑bhano bhaghotora ghuköra bhoheene mo‑moghondo waache, kubha ghabhönëkë amakorobhese ghano ghakorichömëri Eryobha. 44Mbe, omooto wowoose uno akubha aghweriire hano haanyi ne eriibhohe riyo, naghoteneka teneka. Wiiki, wowoose uno rekomoghwera, ndekomuse inkongʼorimu.”#21:44 Mööhi Isaaya 8:14–15; Taniyeri 2:31–45.

45Hano Amabharisaayo na abhakoro bha bhachaama bhooghwire ebhetuubhaani bhe Yesu, bhakamënya kubha mbeere bherabhaghamba ibho. 46Niho bhaghatabhara anchëra e komughööta, amare bhaghatiina erikinda re bhaato gho kubha ibho mbamënyiri Yesu kubha n‑omurööti.

Currently Selected:

Mataayo 21: ntk

Highlight

Copy