Mataayo 24

Yesu ˆakarööta kuhaanyoru kwo Risëngërö

(Maariko 13:1–2; Ruuka 21:5–6)

1Yesu akaru mo‑riigho re Risëngërö. Hano are aratanura, abhaanabheegha bhaache bhakamutambana kubha bhamwërëki kebhuno chanyumba che Risëngërö chaabhëkuru. 2Amare Yesu akabhabhoorera akabhugha, “Moghogharighi ghoose ghano? Mahëënë ˆnekabhabhoorera retaanyi‑ho eriibhohe rino reghusaagha ighoro e rende. Amabhohe ghoose ghano ngakuhaanyoru!”

Yesu ˆaghasiikëra ighoro e nyaako ino ekuucha

(Maariko 13:3–13; Ruuka 21:7–19)

3Mbe, Yesu aghaye mo‑gheghoro ke Miseyituuni na ghwikara hayo. Abhaanabheegha bhaache bhakamutambana iyo abheene chiri, bhakamobhoori bhakabhugha, “Notobhoorere, amangʼana ghayo ngakorwera nyingake? Wiiki, n‑ekyërëkërëri ke kino gheghotwërëki kubha okuucha koocho na antenero e se haghuhe enyi korwera?”

4Yesu akabhagharokeri akabhugha, “Mubhe amiisho, omooto wowoose ataacha kobhangʼiina! 5Abhaato bhaaru mbakuucha kwo riina reene, bharabhugha, ‘Eni neeni Kirisito!’ Nabho mbakobhangʼiina bhaaru.

6“Kwo riibhagha riyo mookubha morooghu amangʼana gha mahë na nyughunyughu e riihë. Motaacha kubha na amacheeche gho kubha ghayo ngakwëndëru ghaköru, amare antenero eyeene akeere. 7Ase imu nekurööna na ase ayende no obhutëmi bhumu mbokurööna no obhutëmi obhonde. Aghëëcha ne emerighito ghe se ngekorwera mo‑chaase chaaru. 8Ghayo ghoose ngaakubha kinya ghusëëma kwo bhosongo hano omukari ahëënda kwibhora. 9Kwo riibhagha riyo, abhaato mbaakubha bharabhanyaaki na kobhiita, na abhaato bha matöngö ghoose mbakobharëgha, gho kubha moghuntambana eni. 10Niho abhaato bhaaru bhano bhaghutambana bhaghontigha. Mbaakubha bhariigharurana na kurëghana abheene kwo bheene.

11“Eriibhagha riyo, mbakorwera abharööti bhaaru bha bhuröngö na kobhangʼiina abhaato bhaaru. 12Wiiki, gho kubha amasari ngaakubha ghëëngiire, abhaato bhaaru mbaghotigha kobhasiigha abhande. 13Amare wuure aghoghumereri mbagha mo‑ntenero, uyo niwe naghotooribhu. 14Wiiki Angʼana Anchömu e bhutëmi bho Mwishaaro nekuraghanibhu mo‑matöngö ghoose kubha abhaato bhoose bhayimënyë. Kwo riibhagha riyo, niho antenero e se ekuucha.

Chaasiko che nyaako inkoro mo‑mukööwa o Yuteya

(Maariko 13:14–23; Ruuka 21:20–24)

15“Kwo riibhagha riyo mokorighi ‘egheghiro kino kehaaghonchi na ghusari,’#24:15 Mööhi Taniyeri 9:27, 11:31, 12:11. kimeeriire Ahaghiro Ahatööbhiyu Mwisëngërö re Ryobha. Egheghiro kiyo nikyo ghighamburu no omurööti Taniyeri. Omooto wowoose uno aghusöma amangʼana ghano, amënyë kebhuno ghakobhugha. 16Hayo niho abhaato bhano bhaanyi Yuteya, bhangʼösërë mo‑bheghoro! 17Nawe omooto uno akubha atiiriri irëngö, ike angʼösë, atasöha mo‑nyumba kwimoki egheghiro ghyokyose. 18Hangʼu hangʼu, omooto uno anyi a‑moghondo angʼösë, atagharuka anyuma kwimoki erighööti reeche. 19Amare, horeera mbakorighi abhakari bhano bhaanyi inda na bhano bhaakubha bharaghööki mo‑chaasiko chiyo! 20Gho ghayo, musabhe Eryobha kubha kungʼösa koonyu ghotaacha kubha mo‑riibhagha re nyighita ihaari hamu mo‑rosiko ro Riikane.#24:20 Mo‑rosiko ro Riikane. Kurëngʼaana ne emeghiro ghe Bhayahuuti, bhatiishereriiru ghuköra orughëndö ghokera akiromeeta imu, mo-rosiko ro Riikane. 21Nekobhabhoorera hangʼu gho kubha, mo‑chaasiko chiyo, abhaato mbakubhöna anyaako ihaari chwee ino etaamara irwera korwera hano Eryobha ritëëmiri ase mbagha reero. Wiiki anyaako iyo tekorwera naabha. 22Aribha Eryobha retangatoriri ghoghuheehi eriibhagha riyo re nyaako, mbe, taanyi‑ho omooto uno angahöniri. Amare gho ghiri e bhaahöru bhaache, Eryobha ndeghochiköra chibhe inguhe chaasiko chiyo.

23“Mbe, kwo riibhagha riyo, aribha omooto arabhabhoorera arabhugha, ‘Mööhi, Kirisito hano anyi,’ hamu ‘N‑iyo anyi!’, motaacha ghokumi. 24Mbakuucha abharööti bha bhuröngö na abhaato bhano bhakwibherekera Kirisito. Mbaakubha bharaköra ebhyërëkërëri bhekoro ne ebhiraghe bhekoro, kubha bhasaki kobhangʼiina koru bhano bhaahwiru ne Eryobha. 25Mubhe amiisho gho kubha ˆnekabhabhoorera ghayo ghakeere korwera. 26Mbe, aribha abhaato bharabhabhoorera bharabhugha, ‘Mööhi, Kirisito naanyi iyo mwibhara!’, motaacha ghuye iyo. Hamu ‘Mööhi, niibhisiri muno mo‑nyumba!’, motaacha kobhakumi. 27Nekobhugha hangʼu gho kubha, kuucha koone uno neenyi Omoona o Mooto ngookubha gho ghutakani kinya bhuno orunanehi rohaarighibhu korwera roghoro, hayo hayo rohika anyancha. 28Neekubha haheero, kinya ahaghiro hano haanyi na ataasa, hayo niho chamatoonyi chehiikomana haghirohamu.

Kuucha kwo Moona o Mooto

(Maariko 13:24–31; Ruuka 21:25–28)

29“Hano reekubha rehetiri eriibhagha re chaasiko chiyo che nyaako,

‘Eryobha ndeghotooru ekengʼuuri,

omwëri tokoruusi emirëngaari gheeche,

na chanchöta ncheghugho haase koru mwishaaro.

Niho, ebheghiro bhyose bhe mwishaaro bheghosingisu.’#24:29 Mööhi Isaaya 13:10, 34:4; Yoweri 2:10.

30“Niho ghekorighibhu ekyërëkërëri ke Moona o Mooto mwishaaro na abhaato bha matöngö ghoose mbaghusëëma korera kwo haho. Hano nekuucha, abhaato bhoose mbakondighi mo‑mashaaro neenyi na changuru no obhokumi obhokoro. 31Niho nekobhatoma bhamarayika bhaane bhatëmë chantaara kwo riiraka ikoro, kubha bhabhakome abhaahöru bhoose bha Ryobha koru chambaara choose che se. Abhaahöru bhayo mbakuucha korwera eribhaara rimu mbagha ghutabhura eribhaara erende.”

32Yesu akëëndërëra ghosiikëra akabhugha, “Mweghani eghetuubhaani koru mo‑mote o motiini. Hano mokorighi chaasa cheghasebhoka na kubhari, niho mokumënya kubha ambura ˆeghatingʼi ghutëëka. 33Hangʼu hangʼu, na niinyu hano moghogharighi amangʼana ghayo ghoose, mumënyë kubha okuucha koone ghoghatingʼi. 34Mahëënë ˆnekabhabhoorera, orwibhoro runo rotaakoheta, amangʼana ghano ghoose ghakeere kohikeerana. 35Erishaaro na ase mbekoheta, amare amangʼana ghaane ghataakoheta naabha.

Eryobha eryene niryo ryeche orosiko ro ghugharuka kwo Yesu

(Maariko 13:32–37; Ruuka 17:26–30, 17:34–36)

36“Amare, ighoro e rosiko ne eriibhagha re kuucha koone, taanyi‑ho omooto uno eche, koru bhamarayika bha Mwishaaro, amare n‑Taata waane omwene chiri. 37Gho ghayo, okuucha koone eni uno neenyi Omoona o Mooto ngookubha kinya bhuno ere mo‑chaasiko che Nuhu. 38Mo‑chaasiko chiyo hano ambura e ghwichoreru ere ekeere kuucha, abhaato mbaare bhararaaghëra na kunyo, mbaare bharakwira na ghokwiru mbagha orosiko runo Nuhu asöhiri mo‑safina. 39Abhaato bhayo, bhataamanyiri kubha neke ghekuucha korwera mbagha hano oghwichoreru kwo manche korweriire na kobhiita bhoose. Hangʼu nibhu ekubha kuucha koone eni uno neenyi Omoona o Mooto. 40Kwo riibhagha riyo abhaato bhabhere mbaakubha a‑moghondo, umu naghughëghu no owonde naghusaagha. 41Wiiki erabha abhakari bhabhere bhaakubha bharase haghirohamu mo‑robhohe, umu naghughëghu no owonde naghusaagha. 42Mbe, mubhe miisho, gho kubha moteeche orosiko runo eni Omutëmi waanyu nekuucha. 43Amare mumënyë bhoheene angʼana ino, aribha omwene anyumba angamënyiri eriibhagha rino omwibhi akuucha, nangiisëëmiri ghochonga kubha omwibhi ataacha kuucha na kuhaanyura eghisëku ke nyumba yaache. 44Gho ghiri iyo, na niinyu mubhe mwisëëmiri eriibhagha ryose, gho kubha eni Omoona o Mooto nekuucha kwo riibhagha rino motitëngʼiire.”

Eghetuubhaani ke musësë omuhëënë

(Ruuka 12:41–48)

45Yesu akabhabhoori abhaanabheegha bhaache akabhugha, “Mbe, n‑niwe omusësë omuhëënë wiiki uno anyi na amangʼiini? N‑omusësë uno omutëmi waache amotooriri kubha omwimeerereri o bhasësë abhande mo‑ka yaache, kubha abhe arabhaha ebhiinyakurë kwo riibhagha rino rirëngʼaaniire. 46Neekubha ngʼoni kwo musësë uyo hano omutëmi waache aragharuka koru mo‑rughëndö, amubhönë araköra hangʼu. 47Mahëënë ˆnekabhabhoorera, omutëmi uyo nakomotiiri omweya mo‑moremo uyo kubha abhe omwimeerereri o bheghiro bheeche bhyose bhino anyi nabhyo!

48“Amare aribha omusësë uyo m‑mobhe, naghwituuri mo‑körö yaache arabhugha, ‘Omutëmi waane naghukëëchëra ghugharuka,’ 49niho asëëmë kobhatëma abhasësë bhaghëndi bhaache, na kuraaghëra na kunyo haghirohamu na abhanyo bha maro. 50Mbe, omutëmi waache uyo naghugharuka orosiko ne eriibhagha rino atiitëngʼiire. 51Niho omutëmi wuure akomurööna na komutëma anchagho inkoro na komurëkëra hano chaghughuuti cheenyi. Iyo niho abhaato bhayo bhakorera na ghukararaati amiino gho ghiri e bhuhëmbërëra bhuhaari.”

Currently Selected:

Mataayo 24: ntk

Highlight

Copy