Mataayo 28

Yesu ˆakaryoka

(Maariko 16:1–10; Ruuka 24:1–12; Yohana 20:1–10)

1Mbe, orosiko ro Riikane hano rohetiri, atabhoori mo‑rungʼöörö orosiko ro Chumabhiiri, Mariyamu o koru mo‑moghya o Maghitara haghirohamu na Mariyamu owonde bhaaghaye kumööhi ambeehera yiire.

2Mööhi, hakarwera omorighito mokoro o se. Marayika o Mutëmi aghiika koru Mwishaaro, aghaye mo‑mbeehera, akarehiringiti eriibhohe riire rubhareka na koriikarera. 3Marayika uyo eghisösö keeche nkeere kinya orunanehi na changibho cheeche ncheere cheero chayi. 4Hano abhaashirikare bhagharooche ghayo, bhaghatiina chwee na kubha kinya bhano bhakuure.

5Hayo marayika uyo akabhabhoorera abhakari bhayo akabhugha, “Motatiina! Nyeeche kubha mwichiri komutabhara Yesu uno bhamumambiri mo‑musarabha. 6Taanyi hano, naryokiibhu koru mo‑bhaku kinya bhuno are abhabhooriire. Muuche morighi hano bhaare bhamuraariri. 7Mbe, moghi bhwango mobhabhoorere abhaanabheegha bhaache kubha, ‘Naryokiri koru mo‑bhaku na nabhakangatiri ghuye Ghariraaya. Iyo niho mokomubhöna.’#28:7 Mööhi Mataayo 26:32. Ibheere, nebhughiri kino niichiri kobhabhoorera!”

8Niho abhakari bhayo bhaghatanura bhwango koru mo‑mbeehera kwo haho na ghuchömëru ghokoro. Bhakayaara ghuye kobhaha amangʼana abhaanabheegha bha Yesu ghano marayika ꞉abhabhooriire. 9Mbe, hano bhaare bharaghe kobhabhoorera, mööhi, Yesu aghatëmëërana nabho, akabhabhoorera akabhugha, “Nekobhakëëri!” Mbe, abhakari bhayo bhakamwishukerera Yesu, bhakamusëngëra gho nchëra e ghughööta amaghoro ghaache. 10Niho Yesu akabhabhoorera akabhugha, “Motatiina. Moghi mobhabhoorere abhahiiri bhaane#28:10 Abhahiiri bhaane. Yesu hano, naare arabhasiikërëra abhaanabheegha bhaache. bhaghëndë Ghariraaya niho bhakumböna.”

Abhachongi bha mbeehera e Yesu ˆbhaghasiikëra obhuröngö

11Mbe, eriibhagha abhakari bhayo ꞉bhaare mo‑nchëra bharaghe, abhaashirikare abhamu bhano ꞉bhaare bharachonga ambeehera e Yesu bhaaghaye mo‑moghya o Yerusareemu. Hano bhahikiri, bhakabhabhoorera abhakoro bha bhachaama ghoose ghano ghaköruru.

12Mbe, abhakoro bha bhachaama bhayo bhaghatëmëërana haghirohamu na abhagharuka bha Bhayahuuti, bhakarwacha na ghwishererani kobhaha amasooya gha chambiiri chaaru abhaashirikare bhaare. 13Bhakabhabhoorera bhakabhugha, “Aribha omooto wowoose arabhabhoori ighoro e ghano ghaköruru mobhughe, ‘Obhotiko hano toore tomisiri chandöörö, abhaanabheegha bha Yesu ꞉mbiichiri bhakiibha erihundughu reeche.’ 14Amangʼana ghano gharamohikera Bhiraato, itu ntoghosiikëra nawe kubha motaacha ghusöha mo‑nyaako.” 15Niho abhaashirikare bhayo bhakiimoki chambiiri chiire na kobhoorera abhaato kinya abhakangati bha Bhayahuuti ꞉bhaabhabhooriire. Amangʼana ghayo ghaghasancha chwee mo‑Bhayahuuti, na mbakeere bharaghasiikëra mbagha reero.

Amëërëkërëri gha Yesu gha ntenero kwo bhaanabheegha bhaache

(Maariko 16:14–18; Ruuka 24:36–49; Yohana 20:19–23; Amaköri gha Bhatomu 1:6–9)

16Abhaanabheegha bha Yesu ikomi na umwa bhaaghaye Ghariraaya mo‑gheghoro kiire Yesu are abharagheriiri. 17Hano bhamorooche, bhakamusëngëra, amare abhamu bhaghiituuri kubha, hamwabhe taanyi Yesu. 18Yesu akaacha ghokoobho, aghasiikëra nabho, akabhabhoorera akabhugha, “Eryobha ndeheere obhotoro bhoose bho Mwishaaro na mo‑se. 19Mbe, mughëndë kwo bhaato bha matöngö ghoose na kobhaköra kubha abhaanabheegha bhaane. Mobhakörë bhabhe abhaanabheegha bhaane gho kobhabhatiisa, kwo riina re Taata, na re Moona na re Akörö Ahörëëru. 20Wiiki mobheeghi ghoghaghööta ghoose ghano nebherekeriiri inyu. Mööhi! Neekubha haghirohamu na niinyu eriibhagha ryose mbagha mo‑ntenero e se.”

Currently Selected:

Mataayo 28: ntk

Highlight

Copy