Nʋnʋlii 10

Lagɔ yɛ Piɛlɩ ‑li 'kädɩ 'ylimö tulanɩ

1‑Mä Sezalee ‑glɔ 'mö, nɩkpɛ ‑bhlʋ ‑wʋ a ‑mä. Ɔ nglɩɛ Kɔnɛyɩ. Ghlʋmɛɛwaa 'a 'slʋjaa a ‑zɩkpa 'käda ‑bhlʋ, wa laa Yitalii‑bhölɩɩ a 'slʋjaa, wa 'kifi ‑bhlʋ ɔ glɩnɩɛ. 2Nɩkpɛ 'la, Lagɔ a 'mäna ɔ kää 'mlɩ. 'Kwädlɩ ɔ ‑nyɛ 'ɔ ‑kosu yɔwʋ a ‑nʋa 'sɔ, Lagɔ 'mö wa bʋbɔɔ. Zwiiföwaa gla'mö a 'pʋäwaa, ɔ nuë tenyii ‑li a ‑li 'wlu. Zila 'wuë 'mö ɔ bhibhe Lagɔ 'yize. 3'Ylɩ ‑bhlʋ 'mö, ‑kidogïle ta 'mö a sɛ, 'n 'ɔ yilaa yiɛ do, 'n ɔ yiɛ gbëaa Lagɔzuzukwë ‑bhlʋ 'ylɩmö, 'n a yiɛ ‑mä 'ɔ 'ligbë 'mö plɛ. A lɛ naa: «Kɔnɛyɩ.» 4'N ɔ yeaa ngänɩsɛ 'wʋ yɩlɩ, ɔ lɛ naa: «‑Atʋ, 'saa bhä 'nɩ?» A lɛ naa: «Lagɔ, ‑na'a ‑li a ‑lii ‑n nʋä, ɔ kɩ 'ylɩmö, ‑na'a bhibhewɛlɩɩ, ɔ kɩ 'nʋ. 5-6‑Mä Zopee glɔ 'mö, ‑mä gïnyɛ yɔwʋ, nɩmakwibhɔtɔnyɔ ‑bhlʋ wa laa Simɔɔ, ɔ 'ligbë 'mö, nɩkpɛ ‑bhlʋ ‑wʋ ‑lɛ, ɔ nglɩɛ Simɔɔ Piɛlɩ. Nɩkpɛ 'la, tio ‑sɩkaa ‑sɩkaa nɩkpa 'wʋ wa 'kɔ kie mö.» 7Lagɔzuzukwëa möä 'wëë, 'n Kɔnɛyɩ yiɛ 'ɔ libhonʋwaa a gla'mö a nɩkpa 'sɔ wäzɩ, 'n 'slʋjeyi ‑bhlʋ ɔ kää dlɩ 'wʋ, ‑ɔ kää Lagɔ a 'mäna 'mlɩɩ. 8Sɛɛ Lagɔzuzukwëa 'nyɔ a‑a 'dɩ 'n ɔ yuëë ‑sɩbhä 'dɩ 'nyɛ, 'n ɔ yuëë ‑mä Zopee tie. 9Zlɩ zɩɛ, wa ‑wʋ mö dɔ'wʋ, wa lɛ 'kä glɔ ghlɛ, ‑lɛ a 'tɛnyɩ 'mö ylʋ lɛ 'kä 'du 'mö ghlɛ, Piɛlɩ ɔbhlɩ, 'n ɔ yiɛ ‑mä ‑budu 'wlu#10.9 ‑budu 'wlu: Zwiiföwaa ‑kä 'wa ‑bïdii 'sɩbhää, yɩ ‑gömö ‑wʋ ‑poo, sɛ wa 'kää ‑mä 'mö zie mö a sɛ. mö ɔ 'kä Lagɔ bhibhe. 10Ɔ ‑wʋ mä 'n ngɔmʋ yoo 'lɩbhä. Zaa, wa ‑wʋ ɔ lile pi dɔ'wʋ, 'n 'ɔ yilaa yiɛ do, ɛ 'kä ‑bhɩɛ sɛ'ɛ 'yɛla 'mö. 11'N zlɩɩ yiɛ nuë do. Lekwi 'kädɛ 'kädɛ a sɛ a ‑lu ‑bhlʋ, 'n wʋ yiɛ ‑mä 'bhöönɩ. Wʋ ‑lɛlɩ 'mö, ɛ 'kä ‑bhɩɛ sɛ'ɛ 'likpï 'mö wa 'kwïlanu, 'n wʋ yiɛ dʋdʋ 'wʋ 'yize. 12‑Mä wʋ 'mö, nɩma a kii 'wuë ‑yɩ kää bhɩ ‑mʋäna mi, gbisogbisonɩma mi, 'n zɩɩ a kii 'wuë, mɩɩ ‑wʋä ‑mä. 13'N ɔ yiɛ wɛlɩ ‑bhlʋ 'nʋ, yɩ lɛ naa: «Piɛlɩ! ‑Sɔ 'wʋ, 'lɩbhä ‑n 'kä li.» 14Piɛlɩ lɛ naa: «‑Atʋ 'naa nglu. Ɛ'ɛ ‑bhö nyɩasɛ, ‑maa 'saa ‑plɛɛ fɩ Lagɔ a 'yila a dɔ'wʋ, ‑a'a gböö gbää ‑a nɩ tɩ lii, n 'niɛ ‑bhlɛ tɛkäsɛ li.» 15'N wɛlɩɩ yiɛ 'sɔnadɔ'wʋ gbʋ ‑dɩ, yɩ lɛ naa: «'Saa Lagɔ ‑gbää ‑wʋ ‑wʋ 'wlɩlɩɩ, tɩ nɩɩ fɩ wʋ ‑plɛɛ nʋ.» 16Ɔ 'nʋnɩ wɛlɩ 'la 'wʋ ta, 'wë, 'n ‑luu yoo ‑mä zlɩ 'mö 'yli zizonɩ. 17‑Lu 'la Piɛlɩ 'yɩɛ 'ylɩmöö, 'mö ɔ 'pänɩɛ dlɩ kɛ. Ɔ'ɔɔ sɛ wʋ 'kä zɛmö ‑sɛ ‑yi. ‑Maa ‑lɛ a 'tɛnyɩ 'la ‑bhʋlʋ ‑kpɔ 'mö, nɩkpaa kɔnɛyɩ tie a‑a, 'n wa yiɛ glɔ ghlɛ. Wa 'yɩbhää nimï, 'n wa yuëë ‑mä Simɔɔ a 'ligbë 'mö 'pänɩ. 18Wa ghlɛɛ ‑lɛ a ngloluë 'wʋʋ, wa lɛ naa: «A ‑kɔfänɩɛ oo. Nɩkpɛɛ wa laa Simɔɔ Piɛlɩ, dɛ'ɛ ɔ ‑wʋ bhä ‑a?» 19‑Maa Piɛlɩ ɔbhlɩ, ɔ ‑wʋ ‑bhlɛ ‑luu ɔ 'yɩ a‑a 'ylɩmö a zɛmösɛsaa dlɩ kɛ 'pänɩ dɔ'wʋ, 'n 'Wugɔmʋʋ 'Wlɩlɩ yoo 'dɩ 'yɛ nɩɩ: «Piɛlɩ, nɩkpa ta, wa tɛlɩ 'mö sɛ. 20Zaa, ‑sɔ 'wʋ ‑n 'kä kwli, ‑n 'kʋä ‑mä ghlɩ, ‑n ‑nyʋä 'sɔ a 'kä mö. Yɩ nɩ ‑tɩmö dlɩ libhëa, ‑maa ‑amöö tiuëë.» 21Piɛlɩ kwliɛ, 'n ɔ yiɛ nɩkpa 'la 'ylɩmö. Ɔ lɛ naa: «‑Amö a tɛlɩɛ sɛɛ, ‑amöä dɛ'ɛ. ‑Maa ‑a 'kʋ ɔ ‑mä 'nʋ?» 22Wa lɛ naa: «Gbʋ 'nɩɛ ‑mä ‑wʋ. ‑Maa nɩkpɛ ‑bhlʋ wa laa Kɔnɛyɩ, 'slʋja a 'kifi ‑bhlʋ ɔ glɩnɩɛ, mɔɔ tianyɩɛ. Nɩkpɛ 'la, ɔ ‑gä kɛ. Ɔ bʋbɔ Lagɔ 'n Zwiiföwaa zo'ɛɛ tenyii. ‑Maa Lagɔzuzukwë ‑bhlʋ ma‑a 'nyɔɔ 'dɩ nɩɩ, wa nɩ yiimö kie ‑n 'kä ‑mä 'ɔ mä'a mö, sɛ ‑n kää 'mlɩɩ, ‑n 'kɔ ‑sɩbhä 'dɩ 'nyɛ.» 23Wa ‑sɛɛ ‑sɩbhä 'tɩtɩ 'wëë, ɔ lɛ naa: «A nɩ plɛ wa 'kanyɩ 'bhle 'nyɛ a 'kä dɛ'ɛ gʋʋ.» Zlɩ zɩɛ, ɔ ‑nyʋä 'sɔ 'n wa yiɛ 'wʋ ‑sɔ, 'n wa yiɛ mö. Zezwii a ‑nʋä ‑mumuë ‑wa glɩ a‑a ‑mä Zopee, wa 'mämö. 24Wa ‑sɛ 'ylɩ ‑bhlʋ 'yio 'wʋ. Zlɩ zɩɛ, 'n wa yiɛ ‑mä Sezalee glɔ ghlɛ. ‑Lɛ a 'tɛnyɩ 'la 'mö, Kɔnɛyɩ, ɔ ‑nyɛ 'ɔ ‑kosu yɔwʋ a ‑nʋa 'sɔ, ɔ 'tuawa 'kädɩɩ ɔ wäzɩmö a‑a kökä, wa 'wuë wa ‑wʋ ‑mä 'ligbë 'mö, wa ‑kʋnɩ Piɛlɩ. 25‑Maa piɛlɩwa yiɛ, Piɛlɩ lɛ 'kä ‑mä 'ligbë 'mö plɛ, 'n Kɔnɛyɩ yoo 'yio 'wʋ yi, 'n ɔ yiɛ ‑lɛ ɔ dlɩ 'mö ‑kokomïladigbï glu 'pä, 'n ɔ yoo 'wlu 'nyɛ. 26'N piɛlɩ yoo 'wlu 'libhï. Ɔ lɛ naa: «Kɔnɛyɩ, ‑sɔ 'wʋ, ‑maa na'bhë, ‑na sɛ a nɩkpɛ n glɩnɩɛ.» 27'N ɔ yiɛ 'wʋ ‑sɔ. Wa ‑wʋ 'dɩ ‑sɛ dɔ'wʋ, 'n wa yiɛ ‑mä 'ligbë 'mö plɛ. Nɩkpa 'kɔkɔmlɛ ‑wʋ ‑mä. 28Piɛlɩ yuëë 'ylɩmöö, ɔ lɛ naa: «A ‑kɔfanɩɛ oo, ‑maa a ‑yi sɛ nɩɩ, ‑abhʋa Zwiiföwaa, ‑a'a gböö a dɔ'wʋ, nɩkpaa ‑waaa Zwiiföwa glɩnɩɩ, ‑aaa ‑kä ‑a 'kʋä 'bhlie mö, ‑aaa'ɛ ‑kä ‑a ‑nyʋä 'sɔ ‑a 'kä 'wʋ 'sibhësibhënɩ. ‑Maa Lagɔ mɔɔ sʋlʋnɩɩɛ nɩɩ, n'n‑ä n 'kä nɩkpɛ a dɛ nɩɩ, ‑mɔ nɩ 'zokwë ɔ glɩnɩɛ Lagɔ a 'yila 'klʋ a dɔ'wʋ zaa, n ‑nyɔɔ 'sɔ ‑aaa ‑kä ‑a 'kä 'wʋ 'sibhësibhënɩ. 29‑Sɩbhä a za, a möööä kiee, n'n‑ä gʋgɔ, 'n n yiɛ yi. Zaa, wɛlɩɩ ‑yɩ kää 'nglɩ 'n a ‑yiiɛ kie möö, a nɩ nyɩa'mi.» 30-33Kɔnɛyɩ lɛ naa: «‑Aa, n 'kɩ 'nʋ. ‑Maa sɛ'ɛ a ‑kidogïle ta 'mö, n ‑wʋ ‑mä 'na ‑buduu 'mö bhibhe dɔ'wʋ, n lɛ zʋ a sɛ'ɛ cuu, 'n n yiɛ nɩkpɛ ‑bhlʋ 'ylɩmö. ‑Banaa ɔ ‑suä 'möö, a lɩ 'mö. Nɩkpɛ 'la, 'n ɔ ‑yiiɛ 'dɩ 'nyɛ nɩɩ: Kɔnɛyɩ, ‑na'a bhibhewɛlɩɩ, Lagɔ kɩ 'nʋ, ‑na'a ‑li a ‑lii ‑n nʋä, ɔ kɩ 'ylɩmö. Zaa ‑mä Zopee glɔ 'mö, ‑mä gïnyɛ yɔwʋ, nɩmakwibhɔtɔnyɔɔ wa laa Simɔɔ, ɔ 'ligbë 'mö, nɩkpɛ ‑bhlʋ ‑wʋ ‑lɛ, ɔ nglɩɛ Simɔɔ Piɛlɩ. Nɩkpɛ 'la, tio nɩkpa 'wʋ, wa 'kɔ kie mö. Sa'a ‑sɩbhä nɩkpɛɛ nyɩaaa 'dɩ, 'n ɔ yiɛ mö. ‑Lɛ a 'ylɩ ‑mʋänaa zɩ'ɛ dɛ'ɛ. Zaa ɔ ‑nyɩaaa 'dɩ cuu, 'n n ‑yimöä nɩkpa 'wʋ tie, 'n wa ‑yimöä kie mö n‑n yiɛ yi. Zaa ‑ayo ‑këë, sasɛ ‑n yiɛ. ‑Maa ‑a 'wuë ‑a 'kä Lagɔ 'yukwli ‑pʋnɩ, nza ‑a ‑wʋä dɛ'ɛ. Zaa, sɛɛ Lagɔ nyɩamöä 'dɩɩ, ‑n ‑kanyɩ ‑sɩbhä 'dɩ 'nyɛ.»

Piɛlɩ yɛ Kɔnɛyɩwa Lagɔ 'a wɛlɩɩ 'nyɛ

34Kɔnɛyɩ gbää sa'aa, Piɛlɩ lɛ naa: «N kɩ 'nʋ, ‑maa na'bhë n ‑yia'a ‑sɩkaa sɛ nɩɩ, Lagɔ, ɔ'ɔ gbäzɩ nɩkpa 'mö, ‑maa ɔ dɔ'wʋ, nɩkpaa 'wuë, ‑bhʋlʋ wa glɩnɩɛ. 35Nɩkpɛ, mä ɔ ‑kä 'bhöönɩ oo, mä ɔ 'nɩ 'bhöönɩ oo, 'n ɔ ‑kä Lagɔ 'klʋkpamö zʋ, sɛɛ Lagɔ yɩbhää ɔ ‑kä ‑sɩbhä 'zʋʋ, ɛ nɩkpɛ 'la mɔɔ ‑bhöä Lagɔ 'mäna 'wʋ. 36Zezwii Kliisɩ 'mö Lagɔ tiee ɔ 'kä Yizlaɛlɩ a ‑nʋa 'dɩ 'nyɛ. 'Mänatɩtɩɩ ɔ 'nyʋää, miɛ nɩɩ: Zezwii Kliisɩ a za, wa yi 'tɩɩglɩglɛ ghlɩ. Zezwii mɔɔ glɩnɩɛ 'bhlɩbhëa 'wuë a ‑lowli. 37‑Maa nɩkpɛɛ wa la a‑a Zaa Batisɩ ‑ɔ wɔlʋ a‑a nɩkpaa 'wluu, 'bhöönɩ ɔ 'tɛnyɩ 'mö, 'saa 'plɩɛ, tɛɛnɩ ‑mä Galilee‑bhölɩɩ 'mö ‑këë ‑mä Zwidee‑bhölɩɩ 'mö, yi 'wuë a ‑yii. 38Miɛ nɩɩ, Nazalɛɛtɩ a Zezwii Lagɔ 'zʋä 'Wugɔmʋʋ 'Wlɩlɩ ‑gömö, ɔ 'nyɛɛ 'ɔ 'mötɛɛnɔɔ, 'ɔ wɛlɩɩ a 'nwi. 'Mö Zezwii, Lagɔ ‑wɔɔ ‑gömö zaa, saa 'wuë 'n ɔ nʋ a‑a ‑sɩbhä ‑li a ‑li. Nɩkpaa Sataa 'kämanɩ a‑a ‑gömöö, 'n ɔ yɛmanuë a‑a. 39‑Lii 'wuë ɔ nʋä ‑mä Zeluzalɛɛmö 'n ‑mä Zwiiföwaa a bhlɩɩ 'wuë ‑gömöö, ‑a'bhï ‑a 'yi 'ylɩmö. Zezwii ‑bhʋlʋ ‑kpɔ 'la, Zwiiföwaa su 'klʋ wa kʋnɔɔ, 'n ɔ yiɛ 'ku. 40‑Maa ɔ 'kuä 'wë a ylɩɩ a tanɛɛ 'mö, 'n Lagɔ yoo gäla, 'n ɔ yoo glu ‑sɛ. 'N Lagɔ yoo tie ɔ 'kä ɔnyɩ nɩkpa 'ylimö tulanɩ. 41Nɩkpaa 'wuë 'mö ɔ 'nɩɛ ɔnyɩ 'ylimö tulanɩ, ‑maa ‑abhʋa 'ɔ tietiewaa Lagɔ ‑sɛɛ ‑lɛ, ‑abhʋa Zezwii tulanɩɛ ɔnyɩ 'ylimö, ‑a 'kä nɩkpa 'dɩ 'nyɛ nɩɩ, ɔ ‑bhölɩ 'yize. Lagɔ ‑sɔɔ glu 'wëë, ɔ yiinyɩ gla'mö, ‑a ‑nyɔɔ 'sɔ a‑a yiɛ 'wʋ linɩ. 42'N ɔ ‑yinyɩɛ tie ‑a 'kä 'ɔ 'Mänatɩtɩɩ bia, nɩkpaa 'wuë 'kɩ nʋ, ‑a 'kʋä'ɛ 'dɩ 'nyɛ nɩɩ: Zezwii, Lagɔ kɔ ‑lɛ ‑sɛ, nzɩɩ nɩkpaa 'wuë ‑wa ‑bhölɩɛ oo, ‑wa yɛ 'ku 'wë oo, wa 'wuë ɔ 'kʋä ‑zijli tu. 43‑Maa Lagɔ 'a 'möbhïlanɩwaa 'wuë, Zezwii a dɛ wa bhïla a‑a nɩɩ, ɔ yi yi, ‑wa ‑kɔɔ dlɩ 'tɛɛnɩɩ, wa 'wuë, ɔ za, Lagɔ yi 'wa 'nyinylolii a gbʋʋ 'yi 'tatinɩ.»

'Wugɔmʋʋ 'Wlɩlɩ yɛ ‑Waaa Zwiiföwa glɩnɩ ‑gömö yi

44-46Sa'a ‑sɩbhä Piɛlɩ 'nyʋää 'dɩ. ‑Maa ɔ kɩ ngli cuu, nɩkpaa 'wuë ‑wa ‑pʋnɔɔ 'yukwli, 'n 'Wugɔmʋʋ 'Wlɩlɩ yuëë ‑gömö yi. Gbɩ a ‑mii wa'aa ‑yi 'mö, ‑mä wa 'ghlimanɩɛ Lagɔ a 'nglɩ. ‑Maa Zezwii a ‑nʋä ‑muë'la Piɛlɩ ‑nyɛɛ 'sɔ wa yi a‑a, ‑wa glɩnɩɛ Zwiiföwaa, wa 'yiɛ 'ylɩmöö, zuzu yɩ ‑sʋää ‑gömö tenyii. Ɛ'ɛ ‑bhö nyɩasɛ, ‑maa nɩkpa 'la Lagɔ 'zʋä 'Wugɔmʋʋ 'Wlɩlɩ ‑gömöö, wa'a ‑bhö Zwiiföwaa. ‑Maa Piɛlɩ lɛ naa: 47«Nɩkpa nɩ, sɛɛ Lagɔ zʋʋnyɩ a‑a 'Wugɔmʋʋ 'Wlɩlɩ ‑gömöö, ‑sɩbhä ɔ 'zʋmuënyɩɛ dɛ'ɛ ‑gömö. Zaa, 'saa 'kä bhä 'nglɩ ‑kä 'n wa 'naa 'kʋä bhä 'wlu wɔlʋ 'nɩ?» 48Wa nɩ wɔluë 'wlu Zezwii Kliisɩ a 'nglɩ 'mö. Sa'a ‑sɩbhä Piɛlɩ gbää, 'n wa yuëë 'wlu wɔlʋ. ‑Maa wa wɔluëë 'wlu 'wëë, 'n wa yiɛ Piɛlɩ yɔwʋ bhibhe nɩɩ, ɔ nɩ tɩɛ ‑bhlɛ mö, ‑maa ɔ nɩ ‑sʋʋä 'ylɩya yɔwʋ.

Currently Selected:

Nʋnʋlii 10: bet

Highlight

Copy

Want to have your highlights saved across all your devices? Sign up or sign in

Learn More About BdG2