Nʋnʋlii 7

Sɛ'ɛ Etiɛnɩ ‑sɛnɩɛ Zwiiföwaa 'a 'kädɩɩ a 'yila 'klʋ 'mö

1Wa ‑wʋ Etiɛnɩ ‑zijle tu dɔ'wʋ, 'n Lagɔbʋbɔnyɔ 'kɔdɔɔ yoo nimï 'yɩbhä, ɔ lɛ naa: «Wɛlɩ 'la 'wuë wa 'bhööä da'a bhïlaa, ‑tiamö bhä?» 2Etiɛnɩ lɛ naa: «‑Atʋwanyɩ, ‑daayuënyɩ, a ‑pʋnɩ 'yukwli n 'kä 'mö ‑sɛnɩ. N nɛ naa, ‑aa dɩba 'kɔdɔ Ablaamö dɛɛ ɔ'ɔ a‑a ‑bhlɛ 'wʋ ‑sɔ ɔ 'kä ‑glɔɔ wa laa Kalaa 'mö glɩnɩɛ möö, dɛ ɔ glɩ a‑a ‑bhlɛ ‑mä Mezopotamii‑bhölɩɩ möö, Lagɔ ‑ɔnyɩ nglɩɩ 'ghïliɛ, ‑lɛ ɔ tulanɔ a‑a ɔnyɩ 'ylimö, 3'n ɔ yo a‑a 'dɩ 'nyɛ nɩɩ: Ablaamö, 'bhöö mä'ä ‑na'a bhlɩɩ 'mö, tɩ ‑lɛ ‑na'a ‑kosuu yɔwʋ a ‑nʋa. Bhlɩɩ n ‑kamöä 'pänɩ 'mö, ‑n 'kä ‑mä mö.#7.3 Zenɛɛzɩ 12.1.

4Kalɩdeewa a bhlɩɩ 'mö mä ɔ glɩ a‑a, 'n ɔ yiɛ ‑mä 'bhöö, 'n ɔ yiɛ ‑mä Kalaa glɩnɩɛ mö. ‑Maa ɔ dɩba 'kuä 'wëë, 'n Lagɔ yo'ɛɛ 'dɩ 'nyɛ ɔ 'kä ‑mä Kalaa 'bhöö. 'N ɔ yiɛ ‑mä 'bhöö, bhlɩ nɩ a glɩɛ dɛ'ɛ möö, 'n ɔ ye a‑a 'mö yi, 'n ɔ yea'aa 'mö sɛ glɩ. 5‑Lɛ a 'tɛnyɩ 'la 'mö, Lagɔ 'nɔɔ a ‑bhlɛ ‑mä bhlɩ 'la 'mö 'bhle 'nyɛ. Ɔ 'nɔɔ a'bhë ɛ 'pɩɔki 'nyɛ 'lɩlɩlɩ. ‑Maa ɔ lɛ naa, ɔ yonyɩ a zɩkö 'nyɛ. 'N Ablaamö ‑kä a 'ku 'wëë, ɔ 'yuë a 'yuë ye a 'mö glɩ wa 'kɛ ‑kälɩ 'kwädlɩkwädlɩnɩ. ‑Maa ‑lɛ a 'tɛnyɩ 'la 'mö, Ablaamö 'nɩɛ a ‑bhlɛ 'yu ghlɩ 'n Lagɔ yo a‑a ‑sɩbhä 'dɩ 'nyɛ. 6‑Sɛɛ Lagɔ 'nyɔ a‑a 'dɩɩ, ‑sɩbhä ma‑a nɩɩ: Ablaamö, ‑na 'yuë a 'yuë, lɛga 'mö wa lɛ 'kää glɩ. Wa yi ‑mä göwa glɩnɩ, 'n wa yi ‑mä 'klɩ 'yɩnɩ ‑këë 'ylʋbö a 'du ‑bhlʋ (400). 7‑Maa bhlɩ 'la 'mö a ‑nʋa ‑wa 'kʋää wa göwa 'wʋ 'zʋaa, n yuë tenyii ‑zijli tu. ‑Amö Lagɔ, ‑amöö gbää ‑sɩbhä. ‑Na 'yuë a 'yuë, wa ‑kä bhlɩ 'la 'mö 'bhöö, bhlɩɩ n gbä a‑a n 'kuä 'nyɛ 'mö, wa yi ‑mä mö, wa ‑kaa 'kwädlɩ ‑mä bʋbɔnɩ. #7.6-7 Ɛzoodɩ 3.12.

8Sa'a ɔ gbää, 'n ɔ ‑nyɛ Ablaamö yiɛ mɛnɩnɩ. Wa mɛnɩnɩɛ, sɛ'ɛ ɔ 'nyɛɛ Ablaamö 'dɩ nɩɩ: 'A nyɩbhɛlʋyuëa 'wuë, a nɩ ‑duë 'wʋ. Da'a ‑lɛ Ablaamö 'bhööä, ɔ yowli Yizaakö, wa gwälɔɔ a 'ylɩ ‑gbʋätanɛɛ 'mö, 'n ɔ yoo 'wʋ ‑dɩ. Sa'a ‑sɩbhä yizaakö ‑dɩ'ɛɛ ɔbhlɩ ɔ yowli Zakɔɔbö 'wʋ. Dɛ ‑bhʋlʋ ‑kpɔ 'la, ‑lɛ Zakɔɔbö 'bhöö'ɛɛ ɔbhlɩ, ɔ yowluwa kʋgbä 'sɔ ‑kpɔ ‑wa glɩnɩɛ ‑aa dɩbawa 'kädɩɩ, 'n ɔ yuëë 'wʋ ‑dɩ.

9‑Maa ‑aa dɩbawa a dɩbawa 'kädɩ 'la, wa ‑daayu ‑bhlʋ wa laa zɩzɛɛfʋ, 'yli ɔ këluë a‑a. Zaa, 'n wa yoo 'ylɩ ‑bhlʋ 'mö plɩ. Nɩkpa wa plɩnɔɔ kä'möö, bhlɩɩ wa laa Ezipötɩɩ, ‑mä wa ‑nyɔɔ möä. ‑Maa Lagɔ ‑su Zɩzɛɛfʋ, 10'n ɔ yoo kïbhïï 'wuë ngli ‑sɛ. Lagɔ 'nyɔ 'nɛɛnɔ, ‑sɩbhä a za, nɩkpaa 'wuë, 'klʋkpamö wa zoo tenyii. Zaa, Ezipötɩ a 'bhlɩlowli 'kɔdɔɔ, 'n ɔ yiɛ Zɩzɛɛfʋ ‑mä a 'kämanɩnyɔ 'kɔdɔ 'wʋ 'zʋa, 'n ɔ 'kämanɩa'aa 'bhlɩlowli 'a ‑lii 'wuë ‑gömö. 11‑Maa 'ylɩ ‑bhlʋ 'mö, ‑mä Ezipötɩ‑bhölɩɩ ‑nyɛ Kanaa‑bhölɩɩ 'sɔ 'mö, 'n ngɔmʋgupegupe yiɛ ‑mä yi, wʋ za, ‑aa dɩbawa, wa'a ghlɩ lile. ‑Maa ‑mä Ezipötɩ a ‑nʋa wabhlɩ, wa ghlɩ lile 'yize. 12Zaa, ‑aa dɩba Zakɔɔbö 'nwiɛ, 'n ɔ yiɛ ɔ yowluwa ‑mä tie wa 'kä lile pɩaa mö. 'N wa yiɛ ‑mä mö. 13Wa 'bhööä 'mä 'wëë, 'n wa yi'ɛɛ ‑mä 'wʋ 'sɔ mönɩ. Wa ghlɛɛ ‑mä Ezipötɩ glɔɔ, 'n Zɩzɛɛfʋ yiɛ ɔnyɩ ɔ ‑daayuë sʋlʋnɩ, 'n wa yoo yɩbhlɩnɩ. ‑Lɛ Ezipötɩ a 'bhlɩlowli ‑bhööä, 'n ɔ yiɛ Zɩzɛɛfʋ a ‑lowluwa yɩbhlɩnɩ. 14'N Zɩzɛɛfʋ yiɛ ɔ ‑daayuë tie, wa dɩba Zakɔɔbö ‑nyɛ 'ɔ ‑kosu yɔwʋ a ‑nʋa 'wuë 'sɔ, 'n wa yuëë kie mö. Wa ‑bhli nɩkpa a gwlɩ ta, nɩkpa kʋgbä ngbï. 15Sa'a ‑sɩbhä yɩ 'plɩ a‑a 'wʋ, 'n Zakɔɔbö yi a‑a ‑mä Ezipötɩ yi. ‑Mä ɔ glɩ a‑a ‑këë 'n ɔ yi a‑a 'ku. Ɔ yowluwa, ‑aa dɩbawa 'kädɩ ‑muë'la 'wuë, ‑mä wa 'kunɩmöä. 16‑Maa wa 'wuë, 'wa 'bhlɩɩ 'mö a glɔ ‑bhlʋ wa laa Sisɛmö, ‑mä a dʋdʋ wa dɩba Ablaamö pɩa a‑a nɩkpɛ ‑bhlʋ wa laa Emɔɔ a yowluwa kä'möö, ‑mä wa 'bhluä wa lesikpïï, 'n wa yuëë ‑mä zizaa.

17‑Maa ‑lɛ gwälɛɛ 'mö 'wëë, 'saa Lagɔ gbä a‑a ɔ 'kä Ablaamö a 'yuë a 'yuë 'nyɛ yɩ lɛ 'kää 'yli 'wlʋnɩɩ, ‑aa dɩbawa, 'n wa yiɛ ‑mä Ezipötɩ zumanɩ tenyii, 'n wa yiɛ 'nyli 'mlu. 18'N nɩkpɛ ‑mɔmɔɔ yiɛ ‑mä a 'bhlɩlowli 'zʋ. ‑Maa nɩkpɛ 'la, Zɩzɛɛfʋ 'a 'saa ɔ glɩnɩ a‑a, ɔ 'nuä ‑yi. 19Zaa, ‑aa dɩbawa, ‑gblɩ ɔ ‑gbluë a‑a, 'n ɔ 'yuë a‑a 'klɩ. Ɔ lɛ naa, wa nɩ 'pä ‑aa dɩbawa 'a yuë 'pɩpɩ 'kwlɛ 'mö wa 'kä 'ku. 20‑Lɛ a 'tɛnyɩ 'la ‑bhʋlʋ ‑kpɔ 'mö, ‑lɛ wa gwälɩnɩ a‑a Moyizɩ. ‑Bayu ɔ glɩnɩ a‑a 'n ɔ ‑bhö a‑a Lagɔ 'mäna 'wʋ. Wa 'nyɩanɔɔ ‑mä ɔ dɩba a 'ligbë 'mö 'cwɩ ta 'mö. 21‑Maa ɔ ‑da ‑nyɛ ɔ dɩba 'sɔ yɛlɔɔ 'wʋʋ, 'bhlɩlowli a yɛnglɛ, 'n ɔ yoo 'wʋ 'libhï, 'n ɔ yoo ɔnyɩ a 'yu a sɛ 'bhʋa. 22Sa'a ‑sɩbhä yɩ 'plɩɛ 'wʋ, 'n Moyizɩ yiɛ Ezipötɩ a ‑lii 'wuë 'cɩɛ, 'n ɔ yiɛ 'nɛɛnɩnyɔ 'kɔdɔ a ‑mɔ ‑ɔnyɩ bhïlawɛlɩ ‑nyɛ nʋnʋli 'sɔ nɩkpa ‑waa tenyii 'zʋ. 23‑Maa Moyizɩ ghlɩɛ 'ylʋbö a gwlɩ 'sɔɔ, ɔ ‑daayuë Yizlaɛlɩ a ‑nʋa, 'n wa 'tʋ yoo 'lɩbhä, 'n ɔ yiɛ mö ɔ 'kʋä yɩbhlɩnɩ. 24Ɔ möä, ɔ ‑wʋ 'plɩ dɔ'wʋ 'n ɔ yiɛ ɔ ‑daayu ‑bhlʋ 'ylɩmö. Ezipötɩ a nɩkpɛ ‑bhlʋ ‑wɔɔ 'lɩbhä dɔ'wʋ. 'N ɔ yoo 'bɩmö 'wlʋ, 'n ɔ yiɛ ɔ kpa ‑sɛ, 'n ɔ yiɛ Ezipötɩyi 'lɩbhä 'n ɔ yiɛ 'ku. 25Moyizɩ 'zʋä sa'aa, ɔ ‑tɔnɩ a ɔbhlɩ nɩɩ, ɔ ‑daayuë yi sɛ yɩbhɩmanɩ nɩɩ, Lagɔ 'a nɩkpɛɛ ‑ɔ 'kʋää galɛ 'mö ‑sɛ 'mö ɔ glɩnɩɛ, ‑maa wa 'niɛ ‑sɩbhä 'mö 'nʋ. 26Zlɩ zɩ'ɛɛ, ɔ lɛ 'bhöö 'lɛ ɔ ‑daayuë 'sɔ wa ‑wʋ wa 'yize gwɩ dɔ'wʋ. 'N ɔ yuëë ‑sɛnɩ ɔ 'kʋä wamanɩ. Ɔ lɛ naa: ‑A'bhɩanyɩ, ‑daayuë a glɩnɩ yɩɛ nɩɩ, sɛ yɩ ‑wʋ bhä 'mö 'n a gwɩ bhä 'nɩ? A nɩ tɩ gwɩ. 27‑Maa Moyizɩ gbää ‑sɩbhää, 'n ‑ɔ ‑wʋä ɔ 'lilɛ 'zwɩ zia dɔ'wʋ yiɛ 'klɛ 'pä, ɔ lɛ naa: ‑Ɔ 'zʋamö bhä ‑naa ‑aa 'kifi ‑nyɛ ‑zijlitunyɔ 'sɔ 'wʋ 'nɩ? 28Sɛ ‑n 'lɩbhä a‑a ‑kido 'wʋ Ezipötɩyii, ‑n yɩbhä bhä ‑n ‑kaa ‑sɩbhä 'lɩbhämö ‑a? 29Ɔ gbää sa'a, 'n nganɔ yiɛ Moyizɩ 'lɩbhä 'n ɔ yiɛ futo, 'n ɔ yiɛ ‑mä bhlɩɩ wa laa Madia 'mö glɩnɩɛ mö. Ɔ gwälɩnɩ ‑mä 'yuë 'sɔ.

30Mä'a ‑mä ɔ glɩɛ ‑këë 'ylʋbö a gwlɩ 'sɔ. 'Ylɩ ‑bhlʋ 'mö, ɔ ‑wʋ ‑mä 'muse 'klʋ, ‑lɛ ‑gäga wa laa Sinayii yɔwʋ, 'n ɔ yiɛ ‑klɔkwa ‑bhlʋ 'ylɩmö, a ‑wʋ ngämɔ dɔ'wʋ. ‑Mä ‑klɔkwa 'la 'mö, 'n ɔ yiɛ ‑mä Lagɔzuzukwë ‑bhlʋ 'ylɩmö. 31Moyizɩ 'yɩɛ ‑li 'la 'ylɩmöö, zuzu yɩ ‑sɔɔɔ ‑gömö. Zaa, 'n ɔ yiɛ ‑lɛ 'dio ɔ 'kä sasɛ 'saa zʋä ‑sɩbhä 'ylɩmö. 'N ɔ yiɛ wɛlɩ 'nʋ. ‑Alowli Lagɔ mɔɔ bhïliiɛ, ɔ lɛ naa: 32‑Na dɩbawa 'kädɩɩ Ablaamö mɔ, Yizaakö mɔ 'n Zakɔɔbö, ‑amö wa Lagɔ, ‑amöä dɛ'ɛ. Lagɔ gbää sa'aa, Moyizɩ nganɔɔ yinɔɔ 'wʋ 'n ɔ yiɛ tɩtlɛnɩ. Ɔ 'kä 'wlu 'libhï ɔ 'kä ‑mä yɩlɩ a dɔ'wʋ dlɩɩ libhoo. 33'N ‑Alowli Lagɔ yoo 'dɩ 'nyɛ nɩɩ: Moyizɩ, dʋdʋʋ ‑n 'nɩgböä dɛ'ɛ 'wʋʋ, Lagɔdʋdʋʋ wʋ glɩnɩɛ. Zaa, ‑sɛ ‑na'a 'siikplii kplɩ 'mö. 34'Na ngëyii n ‑sɛɛ ‑lɛ 'mö a ‑nʋa, klɩɩ wa 'yɩnɩɛ ‑mä Ezipötɩ, n kɛ 'ylɩmö, 'wa 'wiwiwɛlɩɩ n 'kɩ 'nʋ. Nza n yiɛ n 'kʋä yɩ 'wuë ngli ‑sɛ. Zaa, ‑sɩkaa a dɔ'wʋ, ‑sɔ 'wʋ ‑n 'kä ‑mä Ezipötɩ 'bɩwʋ mö. ‑Amöö tieamöä ‑mä. Sa'a ‑sɩbhä Lagɔ 'nyɛ a‑a Moyizɩ 'dɩ. 35Moyizɩ, ɔ 'bhele a ‑nʋa ‑sɛ a‑a nimï nɩɩ: ‑Ɔ 'zʋamö bhä ‑aa 'kifi ‑nyɛ ‑aa ‑zijlitunyɔ 'sɔ 'wʋʋ, Moyizɩ 'la ‑bhʋlʋ ‑kpɔ 'mö Lagɔ 'zʋaa wa 'kifi 'wʋ, 'n ɔ yoo tie ɔ 'kʋä galɛ 'mö ‑sɛ. Lagɔzuzukwëa ɔ 'yɩɛ ‑mä ‑klɔkwa 'mö 'ylɩmöö, ‑sɩbhä a 'nyɔɔ Lagɔ a 'nglɩ 'mö 'dɩ. 36Yizlaɛlɩ a ‑nʋa, wa 'wlʋä galɛ 'möö, Moyizɩ 'la ‑bhʋlʋ ‑kpɔ mɔɔ ‑gënuëë 'yuku. Mɔɔ nʋä zɩzɛli 'kädɩ. Dɛ wa ‑wʋä ‑bhlɛ ‑mä Ezipötɩ 'n wa ‑wʋ'ɛɛ nyuu wa laa gïnyɛzlɛ 'tʋ dɔ'wʋ, 'n ‑mä 'muse 'klʋ mä wa ‑sɛɛ 'ylʋbö a gwlɩ 'sɔ ‑kpɔ, Moyizɩ mɔ nʋä zɩzɛli 'kädɩɩ. 37Mɔɔ 'nyɛɛ 'ylɩ ‑bhlʋ 'mö Yizlaɛlɩ a ‑nʋa 'dɩ nɩɩ: A ‑lowli Lagɔ yi ‑mä a jijo'wʋ ɔ 'möbhïlanɩnyɔ ‑ɔ 'kää na saa ‑wʋ ‑sɛ.#7.37 Detlenɔɔmö 18.15. 38‑Maa 'tɛnyɩ 'mö Yizlaɛlɩ a ‑nʋa 'yɩbhänɩ a‑a ‑mä 'muse 'klʋ Sinayii a ‑gäga zɛmö 'wluu, Moyizɩ mɔɔ ‑wʋ a‑a ‑mä ‑gäga 'klʋ, 'mö Lagɔzuzukwëa 'nyɛ a‑a Lagɔ a 'nglɩ 'mö 'dɩ. Wɛlɩɩ ‑yɩ 'kää nɩkpa puë 'mö a 'nyɔɔ, 'n ɔ yiɛ ‑aa dɩbawa 'nyɛ 'n wa ‑yinyi'ɛɛ wabhlɩ 'nyɛmö.

39‑Maa ‑aa dɩbawa, Moyizɩ 'nyʋä a‑a ‑lɛ a wɛlɩ 'laa, wa'aa a 'wʋ nglu wa 'kɔ 'klʋkpamö 'zʋ. 'N wa yoo 'klʋ yɔwʋ ‑sɛ. 'N wa dilaa yiɛ 'mö 'bhɛlɔ wa 'kä ‑mä Ezipötɩ 'bɩwʋ mö. 40'Ylɩ ‑bhlʋ 'mö, Moyizɩ 'nɩɛ ‑lɛ ‑wʋ, ɔ ‑daayu Aghlɔɔ, 'n wa yoo 'dɩ 'nyɛ, wa lɛ naa: ‑Bhɛ ‑aa ‑lagwɩ yɩ ‑kanyɩ 'yuku ‑gänɩ, ‑a 'kä ‑mä Ezipötɩ 'bɩwʋ mö. ‑Maa Moyizɩ ‑ɔ ‑gänɩnyɩ a‑a 'yuku mä ɔ mö a‑a, ‑aa 'saa 'kɔ ‑mä ghlɩɛ ‑yi. 41Sa'a wa gbää 'n wa yiɛ 'bhilibhɛlʋ a sɛ a ‑lu bhlɛ 'tɩɩ, 'mö wa laa 'wa ‑lagɔɔ, 'n wa yuä bʋbɔ. 'Wa ‑lagɔ 'la wa bhlɛɛ, 'n wa yiɛ 'wʋ za 'pɩpɩ 'pä. 42Wa 'zʋä ‑sɩbhä, 'n Lagɔ yuëë ‑gömö panɩ, 'n ɔ yuëë 'yi 'tatinɩ. 'N wa laa'aa ‑zɛlɩɩ 'wa ‑lagwɩɩ, 'n wa bʋbwɩa'aa. Nza yɩ cɛlɩɛ ‑mä Lagɔ 'a 'möbhïlanɩwaa a Lagɔbʋgwɩɩ 'mö nɩɩ, Lagɔ lɛ naa:

Abhʋa Yizlaɛlɩ a ‑nʋa,

'ylʋbö a gwlɩ 'sɔ ‑kpɔ a ‑sɛɛ ‑mä 'muse 'klʋʋ,

‑sɩbhä a 'lɩbhänɩɛ ‑mä nɩma 'yize 'n a bʋbɔniɛ.

43 ‑Maa na za a 'niɛ bʋbɔnɩ.

‑Maa ‑lagɔ wa laa Malɔɔkö,

wʋ ‑gligbëa 'mö a 'sɩbhää, 'n a ‑nyaa nɛmöä.

'N ‑lagɔ wa laa Ghlefaa,

wʋ ‑zɛleyi a sɛ a ‑lu a ‑bhɛɛ,

'mö a ‑nyɛɛ nɛmö'ɛɛ.

‑Li nɩ 'wuë, 'mö a ‑bhɛɛ a 'kɩ bʋbɔ.

Zaa, ‑Sɩkaa a dɔ'wʋ, n yi 'nglɩ ‑kä, wa yeanyɩ gwa,

wa ‑nyɛ abhʋa yi mö,

‑glɔɔ wa laa Babilɔɔnɩ,

‑mä wʋ nimïnimï, ‑mä wa 'kanyɩɛ kwä. # 7.42-43 Amɔɔsɩ 5.25-27.

44Dɛɛ ‑aa dɩbawa nɛmö a‑a ‑bhlɛ ‑mä 'muse 'klʋʋ, Lagɔgligbë ‑bhlʋ ‑a tulanɩ a‑a 'ylɩmö nɩɩ Lagɔ ‑wʋä jijo'wʋʋ, 'mö wa ‑su a‑a. Lagɔ a'bhë mɔɔ tulanɩ a‑a Moyizɩ ‑gligbë 'la 'ylimö, 'n ɔ yoo a 'dɩ 'nyɛ nɩɩ, ɔ nɩ 'sɩbhä ‑sɩbhä a ‑na ‑kpöö. 45‑Gligbë 'la, 'mö ‑aa dɩbawa a dɩbawa tɩɛ 'wa 'yuë a 'yuë yɔwʋ. Wa ‑nyaa nɛmö ‑këë, 'n wa ‑nyaa yiɛ ‑mä Kanaa‑bhölɩɩ 'mö ghlɛ. ‑Lɛ a 'tɛnyɩ 'la 'mö, Zozwie mɔɔ ‑gënuë a‑a 'yuku 'n wa yi a‑a Lagɔ a 'nglɩ 'mö bhlɩ 'la 'mö a ‑nʋa 'wuë 'bhlɩ 'wʋ ‑sɛ, 'n wa yiɛ ‑mä sɛ glɩ. Lagɔgligbë nɩ, a ‑bhölɩ ‑këë, 'n ‑aa dɩba 'kɔdɔ Daviidɩ yiɛ 'bhlɩlowli 'zʋ. 46Daviidɩ, Lagɔ gbää ‑ɔ nɛnɔ dlɩ yɔwʋʋ, mɔɔ bhibhee Lagɔ yɔwʋ nɩɩ: Lagɔ, ‑nmö ‑nyɛ ‑aa dɩba Zakɔɔbö mɛnɩnɩ a‑a, n bhiamö nglu 'wʋ wa 'kä ‑na dɛ ‑bhlʋ 'sɩbhä ‑n 'käa'a ‑lɛ glɩ 'yize. 47Lagɔ ngluä 'wʋ 'wëë, Daviidɩ mɔɔ 'nɩɛ ‑lɛ 'sɩbhä, ‑maa ɔ yowli Salomɔɔ mɔɔ 'sɩbhää ‑budu, Lagɔ 'kä 'kwädlɩkwädlɩnɩ ‑mä glɩ.

48‑Sɩbhä yɩ ‑wʋ 'mö, ‑maa sɛ'ɛ n gbää nɩɩ, Lagɔtapɛ, ‑bïdi a ‑mi nɩkpa sɩbhää mö, ɔ'ɔ glɩ ‑mä. Nza Lagɔ a 'möbhïlanɩnyɔ Ezayii gbä a‑a ‑pa 'wʋ nɩɩ: 49‑Alowli Lagɔ lɛ naa:

‑Mä zlɩ 'mö ma‑a glɩnɩɛ 'na glɩdaa,

'n dʋdʋkpäta glɩnɩɛ 'na kplɩɩ a 'zʋdaa.

Saa 'wuë, ‑sɩbhä n 'kämanɩɛ ‑gömö.

Zaa, ‑budu a ‑mu a ‑kaa bhä 'wʋ 'sɩbhä,

‑wʋ 'kä bhä na nyɛpɛnɩdɛ glɩnɩ 'nɩ?

50 ‑Mä ghäyɩ 'wʋ a ‑lii 'wuë ‑nyɛ dʋdʋ 'wʋ a ‑lii 'wuë 'sɔ,

‑amöö 'niɛ bhä ‑bhɛ ‑a? # 7.49-50 Ezayii 66.1-2.

51‑Sɩbhä Ezayii gbä a‑a. ‑Maa abhʋa, wa'a 'nyanyɩ 'dɩ. Lagɔ 'a wɛlɩɩ a dɔ'wʋ, 'a dilaa 'mö yɩ 'tunɩɛ, 'yukwli 'mö a 'tɛɛ. 'Wugɔmʋʋ 'Wlɩlɩ ‑kaanyɩ 'dɩ 'nyɛɛ, a'a nglu 'ɔ wɛlɩɩ 'wʋ, 'yukwli yɔwʋ a sɩɛ 'kwädlɩ 'yize. Sɛɛ a dɩbawa ‑wʋ a‑a, ‑sɩbhä a ‑wʋä. 52Lagɔ 'a 'möbhilanɩwaa 'wuë a gla'mö a ‑mɔ a dɩbawa 'nɩɛ 'klɩ 'yɩaa, ɔ'ɔɔ ‑bhölɩ. Nɩkpaa a'bhë Lagɔ tiuëë 'wʋ, wa 'kʋä 'dɩ 'nyɛ nɩɩ, ‑ɔnyɩ nʋnʋli zlɔnɩ 'mö ɔ yi yii, 'lɩbhä wa 'lɩbhʋää 'n wa yiɛ 'ku. ‑Sɩkaa a dɔ'wʋ ‑ɔnyɩ nʋnʋli zlɔnɩ 'mö a'bhë 'mö a 'zʋnɩ'ɛɛ abhlɩ tʋ zɛmö 'n a yoo 'lɩbhä 'n ɔ yiɛ 'ku. 53Lagɔ 'a Gböö, Lagɔ a'bhë mɔɔ 'nyanyi a‑a, 'ɔ zuzukuu 'mö ɔ ghlɛnɩɛ 'mö 'n ɔ yeanyi a‑a 'nyɛ. ‑Maa ‑lɛ a gbö 'la, a 'niɛ 'klʋkpamö 'zʋ.»

Wa yɛ Etiɛnɩ 'lɩbhä

54Etiɛnɩ gbää ‑sɩbhä cuu, ‑Zijlituwaa 'wuë, 'n wa yiɛ tenyii 'klɛ 'pä, 'n 'wa yilaa yiɛ 'mö zɛlɩ. 55‑Maa Etiɛnɩ, 'Wugɔmʋʋ 'Wlɩlɩ ‑wɔɔ tenyii ‑gömö. 'N ɔ yiɛ ‑mä ghäyɩ 'wʋ yɩlɩ, 'n 'ɔ yilaa yiɛ do, 'n ɔ yiɛ Lagɔ 'a 'ghïlinɔɔ 'ylɩmö. Zezwii 'nɩgbö ‑mä Lagɔ a luukɛ 'wʋ. 56Etiɛnɩ lɛ naa: «A yɩɛ, zlɩɩ yɛ nuë do, Nɩkpɛ a 'Yu, n yiloo 'wʋ, ɔ 'nɩgbö ‑mä Lagɔ a luukɛ 'wʋ.» 57Ɔ ‑gbää ‑sɩbhä cuu, 'n wa yiɛ tenyii 'mö 'kpa, 'n wa yiɛ 'yukwïla gbɔtɔ. Wa 'wuë, 'n wa yoo ‑gömö sɛ 'sulo. 58-59'N wa yoo gbɩsɩ, 'n wa ‑nyɔɔ yiɛ ‑mä ‑glɔɔ a zɛgbälɩ 'wʋ mö, 'n wa yoo 'kpɩ 'mö 'lɩbhä ɔ 'kä 'ku. Wa ‑wɔɔ sa'a 'kpɩ 'mö 'lɩbhä dɔ'wʋ, 'n ɔ yiɛ Lagɔ bhibhe, ɔ lɛ naa: «‑Atʋ Zezwii, n bhiamö nglu 'wʋ, ‑n ‑kä 'kuu, n 'kä ‑mä ‑na yɔwʋ yi.» 60'N ɔ yiɛ ‑kokomïladigbï glu 'pä, 'n ɔ yiɛ tenyii 'mö 'kpa, ɔ lɛ naa: «‑Atʋ Lagɔ aa, 'wa ‑lizoku nɩ a gbʋʋ, 'tatinuu yi aa.» Ɔ gbää ‑sɩbhä 'wëë, 'n ɔ nyɛmʋʋ yia'aa bhɩɛ. ‑Maa nɩkpa ‑wa 'lɩbhɔɔ da'aa, wa lɛ 'kɔ a‑a 'lɩbhää yii, 'wa ‑banɩɩ, nyɛgbayu bhlʋ wa laa Sɔɔlʋ, 'mö wa 'nyɩ a‑a yowʋ ɔ 'kɩ 'klʋ ‑kʋnɩ.

Currently Selected:

Nʋnʋlii 7: bet

Highlight

Copy

Want to have your highlights saved across all your devices? Sign up or sign in

Learn More About BdG2