Nʋnʋlii 8

Sɔɔlʋ yɛ Zezwii a ‑nʋa a ‑zɩkpaa 'klɩ 'yɩa

1Wa ‑wʋ a‑a Etiɛnɩ 'lɩbhä dɔ'wʋʋ, yɩ nɛnɩ a Sɔɔlʋ dlɩ yɔwʋ. 'Bhöönɩ ‑lɛ a zlɩ 'mö, Zezwii a ‑nʋa ‑wa ‑wʋä ‑mä Zeluzalɛɛmöö, 'n wa yuëë 'klɩ 'yɩa tenyii. ‑Sɩbhä a za, wa 'wuë 'n wa yiɛ yɔwʋ ‑sɛnɩ, 'n wa yiɛ ‑mä Zwidee‑bhölɩɩ 'wuë ‑nyɛ Samalii‑bhölɩɩ 'sɔ 'mö mö. ‑Maa Zezwii 'a tietiewaa kʋgbä'sɔ ‑kpɔ, wa 'yize, mʋa tʋʋä ‑mä Zeluzalɛɛmö. 2Nɩkpa ‑mumuë ‑wa kää Lagɔ a 'mäna 'mlɩɩ, 'n wa yiɛ tenyii Etiɛnɩ 'a 'lɩgbʋʋ 'wi, 'n wa yoo ziza. 3‑Maa Sɔɔlʋ, ɔ yɩbhä a ɔbhlɩ ɔ 'kä Zezwii a ‑nʋa 'yli bhɩa. Zaa, saa 'wuë sɛ wa ‑wʋä, nyɩbhɛlɩ oo, ngwlɩ oo, 'wa 'ligbïï 'mö ‑mä ɔ möä 'n ɔ sʋää ‑mä, 'n ɔ pʋää ‑jie 'mö.

Filiipö yɛ ‑mä Samalii Zezwii 'a 'Mänatɩtɩɩ bia

4Zezwii a ‑nʋa ‑wa ‑sɛnɩ a‑a yɔwʋʋ, saa 'wuë, 'n wa yiɛ ‑sɩbhä Zezwii 'a 'Mänatɩtɩɩ biaa mö. 5'N Filiipö yiɛ ‑mä Samalii a ‑glɔ 'kɔdʋʋ 'mö mö, 'n ɔ yuëë Kliisɩ 'a wɛlɩɩ 'nyɛ. 6'N ɔ nʋä zɩzɛli. Nɩkpa 'wuë wa 'yiɛ 'ylɩmöö, 'yukwli wa ‑pʋnɔɔ 'tɩɩ. 7Zuzukuzokuu ‑yɩ wʋ a‑a nɩkpa a ‑bɛ ‑gömöö, 'mö yɩ kpaa tenyii 'n yɩ 'bhuëë ‑gömö. Kpälɛpkälɛwa a ‑bɛ ‑nyɛ 'wʋbhlinɩwa a ‑bɛ 'sɔ, 'n wa yɛmanɩɛ. 8'N 'mäna 'käda yiɛ ‑glɔ 'la 'wlu 'mänanɩ.

9‑Maa nɩkpɛ ‑bhlʋ wa laa Simɔɔ, ɔ ‑wʋmö a ‑mä ‑glɔ 'la 'mö. 'N ɔ nʋ a ‑damila 'n ɔ sɛ a‑a Samalii‑bhölɩɩ 'mö a ‑nʋa zuzu ‑gömö. 'N ɔ la a‑a ‑sɩbhä a za ɔnyɩ nɩkpɛ 'kɔdɔ. 10'Kädɩ oo, 'yuë oo, wa 'wuë, 'yukwli wa ‑pʋnɔɔ a‑a 'tɩɩ, 'n wa nʋ a‑a nɩɩ: «Nɩkpɛ nɩ, mɔɔ glɩnɩɛ Lagɔ 'a 'mötɛɛnɔ wa laa 'mötɛɛnɔ 'kɔdʋʋ.» 11Nyɩasɛ wa 'nɔɔ sa'a 'yukwli ‑pʋnɩ, ‑maa 'ɔ ‑damilaa 'mö ɔ 'kʋä ‑bɛ 'wʋ zuzu ‑gömö ‑sɛ. 12‑Maa Filiipö yiɛ, 'n ɔ yuëë 'dɩ 'nyɛ nɩɩ: «Zezwii Kliisɩ mɔɔ glɩnɩɛ Puënyɔ, ɔ za ‑a 'kää 'pɩwʋ mää Lagɔ 'kämanɩɛ 'bhle ghlɩ.» Ɔ 'nyʋää dɩ 'laa, 'wʋ wa 'ngwliɛ 'n wa yuëë 'wlu wɔlʋ, 'ngwlɩ ‑nyɛ nyɩbhɛlɩ 'sɔ. 13Simɔɔ a'bhë ɔ ngwli 'wʋ, 'n wa yoo 'wlu wɔlʋ, 'n ɔ ‑gänɩ a‑a Filiipö. Zɩzɛli 'kädɩɩ Filiipö nʋnɩɛ Lagɔ 'a 'mötɛɛnɔɔ 'möö, ɔ ‑kɩɩ 'wʋ yɩlɩɩ, zuzu yɩ sɔɔ ‑gömö.

14‑Maa Zezwii 'a tietiewaa ‑wa tʋʋ a‑a ‑mä Zeluzalɛɛmö, wa ‑nʋä nɩɩ, Samalii a ‑nʋa yɛ Lagɔ 'a 'Mänatɩtɩɩ 'wʋ ngluu, ‑n wa yiɛ ‑mä Piɛlɩ ‑nyɛ Zaa 'sɔ tie. 15Wa ghlɛɛ ‑mä, ‑wa nglu a‑a Lagɔ 'a 'Mänatɩtɩɩ 'wʋʋ, 'n wa yiɛ wa 'wlumö Lagɔ bhibhe ɔ 'kʋä 'Wugɔmʋʋ 'Wlɩlɩ ‑gömö 'zʋ. 16Ɛ'ɛ ‑bhö nyɩasɛ, ‑maa ‑lɛ a dɔ'wʋ, 'Wugɔmʋʋ 'Wlɩlɩ 'nɩɛ a ‑bhlɛ wa gla'mö a nɩkpɛ ‑gömö yi. ‑Maa ‑Alowli Zezwii a 'nglɩ 'mö wa wɔluë a‑a 'wlu cuu. 17Zaa, ‑sɩbhä a za, Piɛlɩ ‑nyɛ Zaa 'sɔ yiɛ 'n wa yuëë kätɩkpö 'wlu 'zʋ, 'n wa yiɛ wa 'wlumö Lagɔ bhibhe, 'n 'Wugɔmʋʋ 'Wlɩlɩ yuëë ‑gömö yi.

18Wa 'zʋä nɩkpa 'la kätɩkpö 'wlu 'n 'Wugɔmʋʋ 'Wlɩlɩ yuëë ‑gömö yii, Simɔɔ 'yɩɛ ‑sɩbhä 'ylɩmöö, 'n ɔ yiɛ moni ‑mä ‑sɛ ɔ 'kɛ Piɛlɩ ‑nyɛ Zaa 'sɔ 'nyɛ. 19Ɔ lɛ naa: «'A 'mötɛɛnɔɔ a kää da'aa, a nɩ nyɩa ‑sɩbhä a 'mötɛɛnɔ, nzɩɩ ‑n ‑kä nɩkpɛ kätɩkpö 'wlu zʋʋ, 'Wugɔmʋʋ 'Wlɩlɩ 'kɔ ‑gömö yi.» 20‑Maa Piɛlɩ lɛ naa: «Simɔɔ, sɛ ‑n pää dlɩ nɩɩ, 'Mötɛɛnɔɔ Lagɔ 'nyɛɛ 'fʋʋ, ‑n yu moni 'mö pɩa a za, ‑n ‑nyɛ ‑na'a moni 'sɔ a nɩ tlɩ. 21Lagɔ 'a 'yila 'klʋ a dɔ'wʋ, ‑na'a dlɩpäsaa 'nɩɛ nɛnɩ zaa, ‑a ‑nyɛmö 'nɩɛ wɛlɩ 'wʋ ‑gbɔ. 22Ligba ‑n 'kä ‑na'a dlɩpäsɛzokwëa kɛ'mö ‑sɛ, ‑n 'kä ‑Alowli Lagɔ ‑bɛlɩ 'pä, ɔ ‑kä 'wʋ ngluu, ɔ 'käa ‑na'a ‑lizokuu a gbʋʋ 'yi 'tatinɩ. 23‑Maa n ‑yi sɛ nɩɩ gudlɩ ‑n kää, 'nyinylolinʋnyɔ a 'yize ‑n glɩnɩɛ.» 24Piɛlɩ gbää ‑sɩbhä, ɔ ‑nyɛ Zaa 'sɔ, 'n Simɔɔ yuëë yɔwʋ bhibhe, ɔ lɛ naa: «N bhianyɩ, a'bhï abhʋaa nɩ bhibhe na dɛ Lagɔ yɔwʋ, 'saa a gaa da'a wʋ ‑tɩɩa ghlɩ.»

25‑Maa Zezwii 'a tietiewa 'la 'sɔ ‑kpɔ, wa bhïlanɩɛ ‑mä nɩkpabhë a 'yila 'klʋ Lagɔ 'a wɛlɩɩ 'wëë, 'n wa yiɛ ‑mä 'bhöö, 'n wa yiɛ ‑mä Zeluzalɛɛmö 'bɩwʋ mö. Wa ‑wʋä mö dɔ'wʋʋ, ‑mä Samalii a gwlɩ a ‑bɛ 'mö, wa bianɩ ‑mä Zezwii 'a 'mätɩtɩɩ.

Etiopii a nɩkpɛ yɛ Zezwii a ‑nɔ 'zʋ

26'Ylɩ ‑bhlʋ 'mö, Filipö glɩ ‑lɛ 'n Lagɔzuzukwë ‑bhlʋ yoo 'dɩ 'nyɛ nɩɩ: «Filiipö, ‑mä zɛmöbɛyɩ a pɩɔ 'yli, 'yioo ‑wʋ 'bhöönɩɛ Zeluzalɛɛmö ‑wʋ möä ‑mä ‑glɔɔ wa laa Gazaa, nɩkpa a ‑bɛ 'nɩ bhliɛ, mönɩ ‑mä!» 27'N Filiipö yiɛ 'wʋ ‑sɔ, 'n ɔ yiɛ ‑mä mö. Ɔ nɛmö ‑mä 'yio 'wʋ, 'n ɔ yiɛ nɩkpɛ ‑bhlʋ 'ylɩmö. Nɩkpɛ 'la, bhlɩɩ wa laa Etiopii, ‑mä a nɩkpɛ ɔ glɩnɩɛ. ‑Mä a ‑klɔgbɔnglɔ 'kɔdɔɔ wa laa Kadaasɩ, ‑ɔ 'kämanɩɛ ‑mä 'a bhlɩɩ ‑gömöö, ɔ libhonʋnyɔ 'kɔdɔ ‑bhlʋ nɩkpɛ 'la glɩnɩɛ. Kadaasɩ 'a lɩɩ 'wuë 'mö ɔ 'kämanɩɛ ‑gömö. Nɩkpɛ 'la, lɛlɩ ɔ lɛlɩɛ. ‑Mä Zeluzalɛɛmö ‑mä ɔ 'bhööä Lagɔ bʋbɔɔ zaa, 28ɔ 'bhele ɔ ‑wʋä 'bɩwʋ mö dɔ'wʋ. Ɔ glɩ ‑mä 'ɔ ‑sʋkwiejlitomobii 'mö. 'Bɔgʋʋ Lagɔ a 'möbhïlanɩnyɔ Ezayii 'cɛlɩ a‑a, ɔ ‑wuu 'mö zɛlɩ dɔ'wʋ. Nɩkpɛ 'la 'n Filiipö yoo ngëbleblu 'ylɩmönɩ. 29'N 'Wugɔmʋʋ 'Wlɩlɩ yiɛ Filiipö 'dɩ 'nyɛ nɩɩ: «‑Sʋkwiejlitomobi 'la, mö ‑n 'kɛ yɔwʋ 'dio.» 30'N Filiipö yiɛ guë, 'n ɔ yiɛ lɛ ghlɛ. Nɩkpɛɛ ‑wʋ 'bɔgʋ 'la 'mö zɛlɩ dɔ'wʋ, 'n Filiipö yiɛ 'nʋ. 'N ɔ yoo nimï 'yɩbhä nɩɩ: «'Saa ‑n zɛlɩɛ da'a 'mö sɛ yɩ sɛɛ zɛmö, ‑n ‑yi bhä ‑sɩbhä?» 31Ɔ lɛ naa: «'N nɩkpɛ ‑nɩɩ yɩ zɛmö sʋlʋnɩɩ, sɛ n 'kɩ bhäa'aa 'mö 'nʋ 'nɩ? Zaa, ‑gbälɛ ‑n ‑kaa yɔwʋ sɛ glɩ, ‑n ‑ka'mi zɛmö sʋlʋnɩ.» 'N Filiipö yiɛ ‑gbälɛ. 32Wɛlɩɩ nɩkpɛ 'la zɛlɩ a‑a 'möö, sɛ'ɛ yɩ nʋ a‑a nɩɩ:

Ɔ 'kä ‑bhɩɛ 'bhabhlɛ a ‑mɛ

wa ‑nyɛɛ ‑wʋ ‑mä nɩmadɩbɛyɩ mö dɔ'wʋ.

Wa ‑kä 'bhabhlɛ a debïli 'wʋ ‑dɩ dɔ'wʋ ‑wʋ,

sɛɛ ɛ'ɛ ‑dɩ'ɛ gbʋʋ, ‑sɩbhä ɔ'ɔɔ gbʋ ‑dɩ 'lɩlɩlɩ.

33 ‑Di wa ziooo.

Wa 'nɔɔ 'yɛ zugwë 'nyɛ.

Ɔ tɩ 'yuë 'pɩwʋ oo, ‑bɛ 'nɩɛ sɛ ‑yi.

‑Maa 'lɩbhä wa 'lɩbhɔɔ cuu, 'n ɔ yiɛ 'ku. # 8.32-33 Ezayii 53.7-8.

34'N ɔ yiɛ Filiipö nimï 'yɩbhä, ɔ lɛ naa: «Lagɔ 'a 'möbhïlanɩnyɔɔ ‑ɔ bhïlaa wɛlɩ nɩ‑ɩ, ‑mɔ ɔ gaa bhä da'a nɩ? Ɔnyɩ ɔ gaa bhä 'nɩɩ, ‑maa ‑mɔmɔɔ ɔ gaa bhä? N bhiamö nyɩaa 'dɩ.» 35Filiipö lɛ naa, puënyɔ Zezwii 'mö Ezayii gaaa da'a. Tɛɛnɩ Ezayii 'a wɛlɩ 'la 'wʋ, 'n Filiipö yiɛ nɩkpɛɛ Zezwii 'a 'Mänatɩtɩɩ 'nyɛ. 36Filiipö ‑wɔɔ ‑sɩbhä 'dɩ 'nyɛ dɔ'wʋ, 'n wa yiɛ dɛ ‑bhlʋ ghlɛ, 'nyu ‑wʋ ‑lɛ. 'N nɩkpɛɛ yoo nimï 'yɩbhä nɩɩ: «Nyuä dɛ'ɛ, ‑naa ‑kaa bhä 'wlu wɔlʋ ‑a?» [37Filiipö lɛ naa: «N‑n ‑kä ‑tiamö Zezwii dlɩ 'tɛɛnɩɩ, n ‑yimö 'wlu wɔlʋ.» Ɔ lɛ naa: «N kɩ dlɩ 'wʋ nɩɩ Zezwii Kliisɩ, Lagɔ 'a Yuu 'mö ɔ glɩnɩɛ.»] 38Ɔ gbää ‑sɩbhää, 'n ɔ yiɛ ‑sʋkwiejlitomobii 'nigba, ɔ ‑nyɛ Filiipö 'sɔ, 'n wa yiɛ ‑mä 'nyu 'mö sɛ 'sibhë, 'n Filiipö yoo 'wlu wɔlʋ. 39Wa 'wlʋä ‑mä 'nyu 'möö, 'n ‑Alowli 'a 'Wugɔmʋʋ yiɛ Filiipö 'wʋ 'libhï. Nɩkpɛɛ lɛ zʋ a sɛ'ɛ, Filiipö 'nɩa'a ‑lɛ ‑wʋ, ‑maa ‑sɩbhä yɩ ‑wʋ 'mö, ɔ 'wuë 'mäna 'n ɔ yiɛ mö. 40Filiipö ɔbhlɩ, ‑glɔɔ wa laa Azɔɔ ‑mä wa 'yɩnɔɔ 'ylɩmö. Ɔ 'bhööä ‑mää, ‑gwlɩ 'wuë ɔ ghlɛnɩɛ 'möö, ɔ ‑wʋ ‑mä Zezwii 'a 'Mänatɩtɩɩ bia dɔ'wʋ ‑këë, 'n ɔ yiɛ ‑glɔɔ wa laa Sezalee 'mö ghlɛ.

Currently Selected:

Nʋnʋlii 8: bet

Highlight

Copy