Zaa 5

Zezwii yɛ kpälɛkpälɛnyɔ yɛmanɩ

1Yɩ 'plɩɛ sa'a 'wëë, 'n Zwiiföwaa a Lagɔfɛtɩ ‑bhlʋ yiɛ ghlɛ. Ɛ za Zezwii möä ‑mä Zeluzalɛɛmö. 2Zeluzalɛɛmö a ‑glɔɔ, wʋ ngloluë ‑bhlʋ wa laa wïla a ngloluëa, a yɔwʋ, 'nyibhë 'käda ‑bhlʋ ‑wʋ ‑lɛ, 'mö wa laa Ebleegbʋʋ 'mö Bɛtɩsedaa. A yɔwʋ ‑gligbï ngbï sɩbhä ‑lɛ. 3‑Mä ‑gligbï 'la zɛmö, guzuwa a ‑bɛ, mʋa pöä ‑mä, 'kukwlekäwa plɛ, 'wʋbhlinɩwa plɛ, kpälɛkpälɛwa plɛ. [Nyuu, 'mö wa ‑kʋä wʋ 'kä 'mö zizo. 4Ɛ'ɛ ‑bhö nyɩasɛ, ‑maa wa ‑kä ‑lɛ glɩɩ, 'tɛnyɩ ‑mɛmɛɛ ‑kä ghlɛɛ, Lagɔzuzukwë ‑bhlʋ ma‑a 'bhöönɩɛ ‑mä ghäyɩ 'wʋ 'n a zizaa nyuu 'mö. Wʋ ‑kä 'mö zizo 'wë cuu a tɛkäguzunyɔɔ ‑ɔ 'sibhëë ‑mä, gu a ‑muu yo a 'lɩbhä ‑kë, yɛmanɩ ɔ yɛmanɩɛ.] 5‑Mä wa gla'mö, nɩkpɛ ‑bhlʋ ‑wʋmö a ‑mä, gu kɔɔ ɔbhlɩ ‑bhlɛ 'ylʋbö a glʋ ‑bhlʋ 'ylʋbö kʋgbä ‑gbʋäta 'mö 'lɩbhänɩ. 6Zezwii ghlɛɛ ‑lɛ 'nyibhëa yɔwʋʋ, 'n ɔ yiɛ nɩkpɛ 'la 'ylɩmö ɔ pö‑ö sɛ. Zezwii ‑yi sɛ nɩɩ, guu kɔ ‑bɛ 'wʋ 'lɩbhä zaa, 'n ɔ yoo nimï 'yɩbhä, ɔ lɛ naa: «‑N yɩbhä bhä ‑n 'kä yɛmanɩ ‑a?» 7Ɔ lɛ: «‑Alowli, nyuu ‑kä 'mö zizo a ‑ɔ ‑kaa ‑mä sɛ 'sibhëa, n 'nɔɔ ‑kä nza n glɩɛ dɛ'ɛ. Nanyɩgäsɛ n ‑kä ‑li 'mö yɛla n 'kämö'ɛ ‑lɛ ghlɛɛ, ‑mɔmɔɔ yɛ ‑mä sɛ 'sibhë 'wë.» 8Zezwii lɛ naa: «‑Sɔ 'wʋ, 'libhï ‑na'a ‑sɩsɛlɛɛ 'wʋ, ‑n 'kä nɛmö!» 9Zezwii 'nyɔɔ sa'a 'dɩ cuu, 'n nɩkpɛɛ yiɛ yɛmanɩ. 'N ɔ yiɛ 'ɔ ‑sɩsɛlɛɛ 'wʋ 'libhï 'n ɔ yiɛ nɛmö. ‑Lɛ a zlɩ 'la 'mö, Zwiiföwaa a ‑gwlɛnɩzlɩɛ.

10Zaa, 'wa 'kädɩɩ 'yɩɛ nɩkpɛɛ ‑ɔ yɛmanɩɛ 'ylɩmöö, wa lɛ naa: «‑Gwlɛnɩzlɩɛ zɩ'ɛ. ‑Nn‑ä ‑kä ‑n 'kä ‑na'a ‑sɩsɛlɛɛ kä'mö ‑su.» 11Ɔ lɛ naa: «Nɩkpɛ ‑ɔ yɛmanɩɩɛ, sɛ'ɛ ɔ nyɩaaa 'dɩ nɩɩ: 'Libhï ‑na'a ‑sɩsɛlɛɛ 'wʋ ‑n 'kä nɛmö.» 12Wa lɛ: «‑Ɔ nyɩamöä sa'a 'dɩɩ, ‑a 'yɩ bhä ɔ 'nglɩ a'bhë.» 13‑Maa Zezwii yɛ nɩkpaa a ‑bʋbʋʋ ‑wʋ ‑wʋ a‑a ‑lɛ gwë 'dionɩ 'wë zaa, nɩkpɛɛ ‑ɔ yɛmanɩɛ 'nɩɛ 'ɔ nglɩɩ yɩbhlɩnɩ.

14Yɩ 'plɩɛ sa'a 'wëë, 'n Zezwii ‑nyɛ nɩkpɛɛ yiɛ ‑mä Lagɔbudu 'Kɔdʋʋ 'mö 'wʋ gbanɩ. 'N ɔ yoo 'dɩ 'nyɛ nɩɩ: «‑N yɛa'a yɛmanɩ 'wë. Tɩa'a ‑sɩkaa 'nyinyloli nʋ, yɔlɔylʋ a ‑muu 'tɛɛ 'mö ‑wʋ ziɛ tɛkänʋʋ 'wʋ, wʋ ‑tɩmöa ghlɩ.» 15Ɔ 'nyɔɔ sa'a 'dɩ 'wëë, nɩkpɛɛ möä 'n ɔ yia'aa Zwiiföwaa a 'kädɩɩ 'dɩ 'nyɛ nɩɩ: «Nɩkpɛ ‑ɔ yɛmanɩ a‑a, Zezwii mɔɔ.» 16'Bhöönɩa'a ‑lɛ, Zwiiföwaa 'a 'kädɩɩ, sɛ wa tɛlɩa'aa wa 'kä Zezwii ‑lizoku 'wlu nʋ, sɛ ɔ yɛmanɩɛ nɩkpɛ ‑gwlɛnɩzlɩ a za.

17‑Maa Zezwii ɔbhlɩ, sɛ'ɛ ɔ 'nyʋää 'dɩ nɩɩ: «Na dɩba, zɩ'ɛ a'bhë ‑kë ɔ nʋ 'ɔ libhoo 'yize. ‑Amö na a, ‑sɩbhä n nʋmu'ɛɛ.» 18‑Maa tɛɛnɩa'a ‑lɛ, Zwiiföwaa, sɛ wa tɛlɩa'aa tenyii wa 'kɔ gbʋ 'wlumö 'pä ɔ 'kʋ 'mö 'ku. Ɛ'ɛ ‑bhö nyɩasɛ, ‑maa ɔ yɛ 'wa ‑gwlɛnɩzlɩ a gböö 'klʋkpamö ‑sɛ 'wë, 'n ɔ yi'ɛɛ Lagɔ ɔ dɩba 'mö 'wʋ 'libhï, miɛ nɩɩ, ɔ ‑nyɔɔ 'sɔ 'mö wa mlɩnɩɛ.

Zezwii yɛ 'kämanɔɔ ɔ dɩba Lagɔ 'nyɔɔ a dɛ bhïla

19‑Sɩbha a za Zezwii gbää nɩɩ: «‑Tiamö n nyanyɩɛ dɛ'ɛ 'dɩ nɩɩ, Yuu, ‑lu a ‑muu ɔ 'kää ɔnyɩ a 'nglɩ 'mö nʋnɩɩ, wʋ'ʋä ‑bhölɩ, ‑maa sɛɛ Dɩbaa zʋä, sɛ ɔ yɩɛ 'ylɩmöö, ‑sɩbhä ɔ zʋä ɔ'bhë. ‑Lii 'wuë Dɩbaa nʋää, 'mö ɔ nʋmöä. 20Ɛ'ɛ ‑bhö nyɩasɛ, ‑maa sɛɛ Dɩbaa ‑wɔɔɔ a za, 'ɔ ‑lii 'wuë ɔ nʋä, 'mö ɔ sʋlʋnɔɔ. Yuu, 'saa Dɩbaa 'kɔɔ sʋlʋnɩ, ɔ 'kää nʋʋ, yɩ yi 'ghïli, yɩ yi tɛkänɩɩ 'wʋ zi, yɩ yeanyɩ zuzu ‑gömö ‑sɛ. 21Miɛ nɩɩ, sɛɛ Dɩbaa glaa kuukuuwa, 'n ɔ nyʋää zɩkpalelee, ‑sɩbhä Yuu nyɛɛ ‑mɔ ɔ yɩbhää zɩkpalele. 22Dɩbaa a'bhë, ɔ'ɔɔ nɩkpa ‑zijli tunɩ ‑maa Yuu 'mö ɔ 'nyɛɛ 'kämanɔɔ 'wuë ɔ 'kʋä ‑zijli tu. 23Nzɩɩ nɩkpaa 'wuë, sɛ wa zʋä Dɩbaa 'klʋkpamöö, wa 'kɔ ‑sɩbhä 'klʋkpamö 'zʋmö. Zaa, ‑ɔ 'nɩ Yuu 'klʋkpamö zʋʋ, Dɩbaa ‑ɔ tioo, 'mö ɔ 'nɩ 'zʋmöä da'a 'klʋkpamö.

24‑Tiamö n nyanyɩɛ dɛ'ɛ 'dɩ nɩɩ, ‑ɔ ‑kä 'na wɛlɩɩ 'yukwli ‑pʋnɩ, ‑ɔ tieaaa, ‑ɔ ‑kɔɔ dlɩ 'tɛɛnɩɩ, 'pɩwʋ mää 'naa 'kää 'yli bhɩɛɛ, ɔ yɛ ‑mä ghlɩ. Lagɔ 'naa 'kɔ 'ɔ 'nyinylolii a 'pɛna 'nyɛ, ‑maa ɔ yɛ 'kwie ngli 'wlʋ, ɔ yɛ 'pʋpʋɛ ghlɩ. 25‑Tiamö n nyanyɩɛ dɛ'ɛ 'dɩ nɩɩ, 'tɛnyɩ ‑bhlʋ yia'a ‑pa ghlɛ. Ɛ yɛ ghlɛ 'wë a'bhë, dɛɛ 'kuukuuwaa 'kää Lagɔ 'a Yuu a bhïlawɛlɩɩ 'nʋnɩɩ. ‑Wa 'kɩɛ 'nʋʋ, wa yi mä'ä 'pɩwʋ nimï yi. 26Ɛ'ɛ ‑bhö nyɩasɛ, ‑maa sɛ'ɛ n gbää nɩɩ: Lagɔ, 'mö ‑bhölɩbhölɛ 'wuë 'bhöönɩɛ 'mö. ‑Maa sɛ ɔ nyɛɛ ɔ'bhë nɩkpa ‑bhölɩbhölɛɛ, 'ɔ yuu 'mö ɔ 'nyɛɛ 'mötɛɛnɔ ɔ 'kä ‑sɩbhä nɩkpa ‑bhölɩbhölɛɛ 'nyɛmö. 27'Mö Lagɔ 'nyɛɛ 'mötɛɛnɔ, ɔ 'kä nɩkpa ‑zijli tu. Ɛ'ɛ ‑bhö nyɩasɛ, ‑maa mɔɔ glɩnɩɛ Nɩkpɛ a 'Yu. 28Sɛ n gbää da'a, ‑sɩbhä nɩ tanyɩa ngli yɩa, ‑maa 'tɛnyɩ ‑bhʋlʋ yi ghlɛ. Ɛ ‑kä ghlɛɛ, 'kuduwaa 'wuë yi Lagɔ 'a Yuu a wäzɩwɛlɩɩ 'nʋ. 29Wa 'wuë, wa yi glu 'wlʋ. Wa ‑kä glu 'wlʋʋ, 'saa nɛnɩɛ Lagɔ dlɩ yɔwʋʋ, ‑wa nwi a‑a, wa yi ‑bhölɩbhölɛ ghlɩ, ‑maa ‑wa nʋä a‑a ‑lizokuu, Lagɔ yuë 'wa 'nyinylolii a 'pɛna 'nyɛ.

30‑Lu a ‑mu n 'kää nanyɩ a 'nglɩ 'mö nʋnɩɩ, wʋ'ʋä ‑bhölɩ. Zaa, n ‑kä nɩkpa ‑zijli tu dɔ'wʋ ‑wʋʋ, ‑ɔ tieaaa 'ɔ sɛ ɔ nyɩaaa 'dɩɩ, ‑sɩbhä n tuëë ‑zijli. 'Na ‑zijlitutwe 'mö ɛ zlɔnɩɛ, ɛ'ɛ ‑bhö nyɩasɛ, ‑maa 'na sɛ n yɩbhää, ‑sɩbhä n'n‑ä 'zʋ, ‑maa ‑ɔ tieaaa, 'ɔ sɛ ɔ yɩbhää, ‑sɩbhä n zʋä.»

Nʋnʋlii ‑Yɩ bhïlaa Zezwii a dɛ miɛ dɛ'ɛ

31«N ‑kä a nanyɩgäsɛ nanyɩ a dɛ bhïlaa, na wɛlɩɩ 'nɩɛ yɩ 'kä a dlɩ'wʋkäli glɩnɩ. 32‑Maa käbönɔɔ bhïlaa na dɛ, n ‑yi sɛ nɩɩ, gbëaa ɔ bhïlaa na dɛ. 33A'bhï, abhʋaa tie a‑a nɩkpa Zaa Batisɩ 'wʋ, 'n ɔ yiɛ na dɛ gbëaa bhïla. 34Sɛɛ nɩkpɛ gbää na dɛ, ‑sɩbhä ma‑a 'nɩɛ na dɔ'wʋ dɛsɛ ‑kä, ‑maa a 'kä 'pʋ a za, nza n gbää ‑sɩbhä. 35Zaa Batisɩ ɔbhlɩ, 'napɛ a ‑mɛ wa dɩ'ɛ 'yi ‑ɛ lɩ'ɛɛ, ɛ saa, ‑sɩbhä ɔ ‑wʋ a‑a. 'N a yiɛ 'ylɩya 'mö lɩlɛ 'la 'mänasɛ 'wʋ nglu.

36‑Tiamö a bhlɩ, Zaa Batisɩ bhïla na dɛ, ‑maa ‑amö na a, nʋnʋlii na dɩba tieaaa 'wʋ n ‑bhɛɛ, mɩɩ bhïlaa na dɛ, mɩɩ ziɛ Zaa Batisɩ 'a bhïlawɛlɩɩ 'wʋ. 37Na dɩba ‑ɔ tieaaa, ɔ'bhë mɔɔ bhïlamö'ɛɛ na dɛ. ‑Maa abhʋa abhlɩ, 'ɔ ngli a wɛlɩɩ, a 'niɛ ‑bhlɛ tɛkäsɛ 'nʋ, ɔ'bhë, a 'nɔɔ ‑bhlɛ tɛkäsɛ 'ylɩmö. 38Lagɔ 'a wɛlɩɩ 'nɩɛ ‑mä a dila zɛmö ‑wʋ, nza ‑mɔ ɔ tiee, a 'nɔɔ dlɩ 'wʋ ‑kä. 39Lagɔbɔgʋʋ 'mö a wɛlɩɩ, 'mö a cɩɛɛ 'kwädlɩ. 'Fʋ a'aa ‑sɩbhä 'zʋ, ‑maa a ‑yi sɛ nɩɩ wɛlɩ a ‑mii 'kanyɩɛ ‑bhölɩbhölɛ 'nyɛɛ, mɩɩ cɛlɩɛ ‑mä. Wɛlɩ 'la, mɩɩ bhïlaa na dɛ. 40‑Sɩbhä yɩ ‑wʋ 'mö, ‑maa a'aa 'yɩbhä a ‑kaa yinɩ, n 'kanyɩ ‑bhölɩbhölɛ 'nyɛ.

Zezwii lɛ ɔ'ɔɔ ɔnyɩ a 'nglɩ sɛ tɛlɩ

41Nɩkpa 'kä na 'nglɩ 'ghlimanɩ a gbʋʋ mʋʋ ‑nɩɩɛ plɛnɩ. 42‑Maa abhʋa abhlɩ, n ‑yeanyɩ, a'aa Lagɔ ‑wa. 43Na dɩba mɔɔ tieaaa, 'n a'aa 'yɩbhä a ‑kaa päla. ‑Maa käbönɩkpɛ ‑kä ɔnyɩ a 'nglɩ 'mö yinɩɩ, päla a pälɔɔ. 44Nɩkpa 'kä a 'dɩ a dɩ ‑sɛ a gbʋʋ a 'yize mʋʋ plɛnanyɩɛ. ‑Maa a 'kä Lagɔ dlɩ yɔwʋ nɛmanɩ a gbʋ mʋʋ 'nanyɩɛ plɛnɩ. Yɩ za a'a ngluä a ‑kaa dlɩ 'wʋ ‑kä. 45A nɩ yɩbhlɩnɩ sɛ nɩɩ, na dɩba a 'yila 'klʋ a dɔ'wʋ ‑amöö 'naa 'kanyɩ gbʋ köbha. ‑Maa Moyizɩ a'bhë, a gbää a kä dlɩ 'wʋʋ, mɔɔ 'kanyɩɛ gbʋ köbha. 46'Fʋ n'n‑ä ‑sɩbhä gbä, ‑maa ɔ'bhë, na dɛ ɔ 'cɛlɩ a‑a. Zaa, a ‑kɔɔ a ‑tiamö dlɩ 'wʋ ‑kä, na'bhë, a ‑yii a dlɩ 'wʋ ‑kä. 47‑Maa 'saa ɔ 'cɛlɩ a‑a, a 'ni'ɛ dlɩ 'wʋ ‑kää, na'bhë, sɛ a 'kä bhä 'na wɛlɩɩ dlɩ 'wʋ ‑kä 'nɩ?»

Currently Selected:

Zaa 5: bet

Highlight

Copy

Want to have your highlights saved across all your devices? Sign up or sign in

Learn More About BdG2