Zaa 7

Zezwii a ‑daayuë a'bhï 'nɔɔ dlɩ 'wʋ ‑kä

1Yɩ 'plɩɛ sa'a 'wëë, 'n Zezwii yiɛ ‑mä Galilee a ‑gwlɩɩ 'wʋ bi. ‑Maa ‑mä Zwidee, ɔ'ɔɔ 'yɩbhä ɔ 'kä ‑mä 'sibhë. Ɛ'ɛ ‑bhö nyɩasɛ, ‑maa ‑mä a Zwiiföwaa 'a 'kädɩɩ, wa tɛlɩ sɛ wa 'kɔ 'lɩbhä ɔ 'kä 'ku. 2‑Lɛ a 'tɛnyɩ 'la 'mö, Zwiiföwaa a 'fɛtɩ ‑bhlʋ, wa laa ‑gligbïzɛmöglɩfɛtɩɩ, ɛ ylɩɩ yɛ 'dio. 3'N Zezwii a ‑daayuë yoo 'dɩ 'nyɛ nɩɩ: «‑Sɔ 'wʋ ‑n 'kä ‑mä Zwidee mö, nzɩɩ ‑wa ‑gänɩɛ ‑na'a wɛlɩɩ, wa 'kä ‑na'a nʋnʋlii 'ylɩmö. 4‑Maa nɩkpɛ ‑kä ɔ 'nglɩ 'kä mö nʋʋ, ɔ'ɔɔ ɔnyɩ ziza. Zaa, zɩzɛ ‑n pää 'yizee, mö ‑n 'kɛ ‑mä 'pänɩ, 'bhlɩbhë ‑kamö 'ylɩmö.» 5Nyɩasɛ ɔ ‑daayuë 'nɩɛ ‑sɩbhä gbä, ‑maa wa'bhï wa 'nɔɔ dlɩ 'wʋ ‑kä.

6‑Maa Zezwii lɛ naa: «'Na 'tɛnyɩ 'nɩɛ ‑bhlɛ ghlɛ. Abhlɩ, 'a dɔ'wʋ, 'tɛnyɩ 'wuë nɛnɩ ɛ nɛnɩɛ. 7Mä'ä 'pɩwʋ a nɩkpaa, sɛ n nʋä nɩɩ 'wa nʋnʋlii 'zoku yɩ glɩnɩɛ a za, ‑gblɩ wa ‑gblɩɩɛ. ‑Maa abhʋa abhlɩ 'wa 'nanyɩɛ ‑gblɩ. 8‑Sɩbhä a za, 'fɛtɩ 'la, a nɩ mɛ abhlɩ 'wʋ, ‑maa ‑amö na a, n'n‑ä n 'kɛ 'wʋ 'mämö. ‑Maa sɛ'ɛ n gbää nɩɩ, 'na 'tɛnyɩɩ 'nɩɛ ‑bhlɛ ghlɛ.» 9Ɔ 'nyʋää sa'a 'dɩ 'wëë, 'n ɔ yiɛ ‑mä Galilee tʋʋ.

Zezwii yɛ ‑gligbïzɛmöglɩfɛtɩɩ 'wʋ 'mämö

10Zezwii a ‑daayuë möä 'fɛtɩ 'wʋ 'wëë, ɔ'bhë 'n ɔ yiɛ 'wʋ ‑sɔ, 'n ɔ yiɛ ‑mä 'mämö. Ɛ'ɛ ‑bhö nɩkpa a yila 'klʋ, ‑maa zizolɩ 'mö. 11Wa ‑wʋ 'fɛtɩ ‑sɛ dɔ'wʋ, 'n Zwiiföwaa 'a 'kädɩɩ tɛlɔɔ sɛ 'n wa nʋä: «Nɩkpɛ 'la, dɛ a'bhë ɔ ‑wʋ bhä 'nɩ?» 12‑Maa nɩkpaa ‑wa yiɛ 'fɛtɩ ‑sɛɛɛ, wa bäbätɛ 'ngungwa Zezwii a gbʋ 'mö. ‑Mumuë nʋ: «Nɩkpɛ 'la, nɩkpɛ a ‑nɩkpɛɛ.» ‑Mumuë nʋ: «N'nn! Nɩkpa ɔ nyimaa 'wlumö.» 13Sa'a wa 'ngungwaa, ‑maa ‑ɔ 'kää nɩkpabhë a 'yila 'klʋ Zezwii a dɛ gbëaa bhïlaa, ɔ'ɔɔ ‑bhölɩ. Ɛ'ɛ ‑bhö nyɩasɛ, ‑maa Zwiiföwaa 'a yukugänɩwaa 'mö wa guä.

14'Fɛtɩ yɛ jijo'wʋ a sɛ ghlɛ, 'n Zezwii yiɛ ‑mä Lagɔbudu 'Kɔdʋʋ 'mö mö, 'n ɔ yiɛ nɩkpa Lagɔwɛlɩɩ 'cɩa. 15Ɔ ‑wʋä bhïla dɔ'wʋʋ, Zwiiföwaa nglii yʋää, 'n wa nʋä: «Nɩkpɛ ‑mɔ nɩ, wa 'nɔ yɩ tɛkäsɛ Lagɔ 'a wɛlɩɩ a 'bɔgʋʋ 'cɩa nɩɩ, sɛ ɔ wɛlɩ ‑wʋ ɔ 'mö, 'n ɔ ‑yi bhä sa'a Lagɔ 'a wɛlɩɩ 'nɩ?» 16Wa nʋä sa'aa, Zezwii lɛ naa: «'Na Lagɔwɛlɩɩ n bhïlaa, ‑amö yɩ'ɩɛ 'mö 'bhöönɩ, ‑maa ‑ɔ tieaaa, 'mö yɩ 'bhöönɩɛ 'mö. 17'Saa nɛnɩɛ Lagɔ dlɩ yɔwʋʋ, nɩkpɛ ‑mɔ ‑kä 'yɩbhä ɔ 'kɩ nʋʋ, 'na 'cɩacʋʋ nɩ, Lagɔ 'mö wʋ ‑kä 'mö 'bhöönɩ, ɔ yi yɩbhlɩnɩ, 'n ɛ ‑kä'ɛ nanyɩ a nglɩ möö, ɔ yi'ɛ yɩbhlɩnɩ. 18Nɩkpɛ a ‑mɔɔ bhïlanɩɛ ɔnyɩ a 'nglɩ 'möö, ɔnyɩ a 'nglɩ ɔ tɛlɩɛ sɛ. ‑Maa nɩkpɛ a ‑mɔɔ tɛlɩɛ ‑ɔ tioo a 'nglɩ sɛɛ, ‑sɩbhä a nɩkpɛ 'la, ɔ 'yize mɔɔ ‑wʋä gbëaa 'mö. 19Moyizɩ a'bhë mɔɔ sʋlʋnanyɩɛ Lagɔ 'a Gböö. ‑Sɩbhä yɩ ‑wʋ 'mö, ‑maa, a gla'mö a ‑nɔ ‑bhlʋ a 'yize, sɛ yɩ gbää, ‑ɔ nɛmöö ‑sɩbhä, ɔ'ɔɔ ‑bhölɩ. Zaa, sɛ yɩ ‑wʋ ɔ 'mö 'n a tɛlɩ bhä sɛ a ‑kaa yɩ za 'lɩbhä 'nɩ?»

20Zezwii gbää sa'aa, wa lɛ naa: «zuzukwëzokwëë ‑n kää ‑gömö. ‑Ɔ tɛlɩ bhä ‑na 'kwie sɛ 'nɩ?» 21Wa nʋä sa'aa, Zezwii lɛ naa: «‑Lu ‑bhlʋ 'tɩɩ 'mö n nʋä ‑gwlɛnɩzlɩ, 'n yɩ yeanyɩɛ 'klɛ 'lɩbha. 22Moyizɩ mɔɔ sʋlʋnanyɩɛ 'wʋdɩdɛ a Gböö. Yɩ za, ɛ yi ‑gwlɛnɩzlɩ ‑kë, a dɩ nɩkpɛ 'wʋ.#7.22 Zenɛɛzɩ 17.10-12. ‑Tiamö abhlɩ Moyizɩ mɔɔ 'nɩɛ a ‑lɛ a 'wʋdɩdɛ 'la tɛɛ, ‑maa ‑aa dɩbawa a dɩbawa mʋa tɛɛ. 23Zaa, sɛɛ Moyizɩ gbää, a 'käa ‑sɩbhä 'klʋkpamö zʋ a za, ɛ yi ‑gwlɛnɩzlɩ ‑kë, 'n a ‑kä nɩkpɛ 'wʋ ‑dɩɩ, sɛ yɩ ‑wʋ ɔ 'mö, n yɛ na a ‑gwlɛnɩzlɩ nɩkpɛ yɛmanɩ 'lɩlɩlɩ a za, 'n a 'pänɩɩ bhä 'klɛ yɔwʋ 'nɩ? 24A ‑kä wɛlɩ 'mö ‑dɩnɩɛ yii, a nɩ ti 'klʋ 'bhïbhlinɩ, ‑maa a nɩ yilii 'mö 'tɩɩ, a 'kɩ 'mözlʋnɩsɛ 'mö ‑dɩnɩ.»

‑Ɔ tie bhä Zezwii?

25Zeluzalɛɛmö a nɩkpa ‑mumuë, wa lɛ: «'Ɔ! Nɩkpɛ wa tɛlɩ a‑a sɛ wa 'kä 'lɩbhää, ɛ'ɛ ‑bhö bhä dɛ'ɛ mɔ ‑a? 26A 'yoo ‑ka 'ylɩmö, ɔ bhïlanɩ ‑zijleplukwë 'mö 'n wa'a ‑doo gbʋ 'wʋ. Zaa, ‑a'a 'yukugänɩwaa, wa kɔ bhä wabhlɩ Puënyɔɔ Lagɔ ‑sɛɛ ‑lɛ 'mö yɩbhlɩnɩ ‑a? 27'Lɩlɩlɩ a dɔ'wʋ, Puënyɔɔ Lagɔ ‑sɛɛ ‑lɛ, ɔ ‑kä 'yli 'wlʋʋ, ‑bɛ 'naa 'kä a yɩ ɔ 'bhöönɩ dɛ ‑yi la, ‑maa nɩkpɛ ‑mɔ nɩ ɔbhlɩ, ‑a ‑yi ɔ 'bhöönɩdɛ.»

28‑Maa Zezwii ɔbhlɩ, ɔ ‑wʋ ‑mä Lagɔbudu 'Kɔdʋʋ 'mö nɩkpa 'cɩa dɔ'wʋ, 'n ɔ yiɛ wɛlɩ ghäyɩ 'pä, ɔ lɛ naa: «'Lɩlɩlɩ a dɔ'wʋ, 'saa n glɩnɩɛ ‑tiamö, a ‑yuu bhä? Dɛ n 'bhöönɩɛ, a ‑yi bhä ‑lɛ ‑a? Nanyɩ a 'nglɩ 'mö n'n‑ä yinɩ. ‑Ɔ tieaaa, mɔɔ ‑wʋä dlɩ'wʋkäsɛ, ‑maa a 'nɔɔ'ɛ mä'ä ‑yi 'yɛ. 29‑Amö na a, ɔ dlɩ 'mö ‑mä n 'bhöönɩɛ, mɔɔ tieaaa zaa, n ‑yoo.»

30Sa'a ɔ 'nyʋää 'dɩ. ‑Sɩbhä a za, wa yɩbhä wa 'kɔ köbhä. ‑Maa, wa gla'mö a nɩkpɛ ‑mɔɔ 'kɔɔ kɛ 'wʋ fää, ɔ'ɔɔ ‑bhölɩ. Ɛ'ɛ ‑bhö fʋ, ‑maa 'ɔ 'tɛnyɩ a'bhë, ɛ'ɛɛ ‑bhlɛ ghlɛ. 31‑Maa nɩkpa a ‑bʋbʋʋ gla'mö, ‑bɛ nglu 'wʋ wa 'kɔ dlɩ 'wʋ ‑kä. Sɛ'ɛ wa nʋä nɩɩ: «Puënyɔɔ Lagɔ ‑sɛɛ ‑lɛ, ‑ɔ 'kää yii, ɔ yi bhä zɩzɛ 'pä, ɔ yi ‑mɔ nɩ 'wʋ zi ‑a?»

32Sɛɛ nɩkpaa 'ngungwaa Zezwii a gbʋ 'möö, 'n Falizɩɛwaa yiɛ ‑sɩbhä 'nʋ. Wa ‑nyɛ Lagɔbʋbɔwaa a 'kifiea 'sɔ, 'n wa yiɛ 'wa ‑kʋkʋwa ‑mumuë tie wa 'kɔ köbhää mö. 33'N Zezwii yuëë 'dɩ 'nyɛ nɩɩ: «N ‑wʋanyɩɛ ‑bhlɛ dɛ'ɛ jijo'wʋ 'ylɩya nɩ 'mö, yɩ ‑kä 'plɩ 'wëë, ‑ɔ tieaaa, ‑mä ɔ yɔwʋ, 'n n 'kää ‑mä mö. 34A ‑yii sɛ tɛlɩ, ‑maa a 'naa ‑kaa ghlɩ. Ɛ'ɛ ‑bhö nyɩasɛ, ‑maa dɛ n 'kää möö, a'aa bhɛnɩ a 'kä ‑lɛ mö.» 35Zezwii gbää sa'aa, 'n Zwiiföwaa 'yɩbhäyɩbhänɩɛ wa 'yize nimï nɩɩ: «'Ɔ! Dɛ ɔ 'kä bhä sa'a mönɩ, a‑a 'naa 'kɔ bhä ghlɩ 'nɩ? ‑A'bhɩa Zwiiföwa ‑muë'la ‑wa mlɩnɩɛ ‑mä Glɛkö‑bhölɩɩ 'möö, 'mö ɔ 'kä bhä ‑mä ghlɩ 'nɩɩ? ‑Maa Glɛköwaa a'bhï, 'mö ɔ 'kä bhä 'cɩaa mö ‑a? 36‑Maa zaa, wɛlɩkïbhë nɩ ɔ bhïlaa dɛ'ɛɛ, 'n ɔ nʋä nɩɩ: A ‑yii sɛ tɛlɩ, ‑maa a 'naa ‑kaa ghlɩ, ɛ'ɛ ‑bhö nyɩasɛ, ‑maa dɛ n 'kää möö, a'aa bhɛnɩ a 'kä ‑lɛ mö, sɛ a sɛ bhä zɛmö 'nɩ?»

37'Fɛtɩ a 'gbëbhlenɩzlɩɩ ‑ɛ glɩnɩɛ zlɩ 'kädɛɛ a'bhëë, 'n ɛ yia'aa ghlɛ. ‑Lɛ a zlɩ 'la 'mö, Zezwii 'nɩgbö ‑lɛ 'fɛtɩsɛwaa a 'yila 'klʋ 'n ɔ yiɛ wɛlɩɩ ghäyɩ 'pä, ɔ lɛ naa: «‑Mɔ 'nyutʋ ‑kä 'lɩbhää, ɔ nɩ yinɩɩ ɔ 'kä 'nɩmä. 38‑Ɔ ‑kaa dlɩ 'tɛnɩɩ, 'nyudɔlwɩ a ‑mi nyɛɛ ‑bhölɩbhölɛɛ mi 'kɔɔ 'mö 'bhöönɩ. ‑Sɩbhä Lagɔbɔgʋʋ 'mö a wɛlɩkïbhë ‑bhlʋ gbää.» 39‑Maa Zezwii ‑kä 'nyudɔlwɩ a ‑mi nyɛɛ ‑bhölɩbhölɛ nʋʋ, Lagɔ 'a 'Wugɔmʋʋ ‑ɔ 'kää ‑wa 'tɛɛnɔɔ dlɩ ‑gömö yii, 'mö ɔ gaaa. ‑Lɛ a 'tɛnyɩ 'la 'mö Zezwii 'nɩɛ a ‑bhlɛ 'ɔ 'ghïlinɔɔ 'wʋ 'libhï zaa, Lagɔ 'a 'Wugɔmʋʋ 'nɩɛ a ‑bhlɛ mä'ä dʋdʋ 'wʋ yi.

40Nɩkpaa a ‑bʋbʋʋ 'mö a ‑nʋä ‑mumuë ‑wa ‑pʋnɩɛ Zezwii 'a wɛlɩ 'la 'yukwlii, wa lɛ naa: «Nɩkpɛ nɩ, Lagɔ 'a 'möbhïlanɩnyɔɔ, ‑ɔ 'kä a‑a yii, 'mö ɔ glɩnɩɛ ‑tiamö.» 41‑Mumuë lɛ naa: «Puënyɔɔ Lagɔ ‑sɛɛ ‑lɛ, 'mö ɔ glɩnɩɛ.» ‑Mumuë lɛ naa: «Zaa, Puënyɔɔ Lagɔ ‑sɛɛ ‑lɛ, ‑mä Galilee ‑mä ɔ 'kä a bhä 'bhöönɩ ‑a? 42‑Maa sɛ'ɛ yɩ'ɩɛ bhä'ɛ ‑mä Lagɔbɔgʋʋ 'mö cɛlɩ nɩɩ, Puënyɔɔ Lagɔ ‑sɛɛ ‑lɛ, Daviidɩ a 'yu a 'yu ɔ 'kää glɩnɩ? Zaa, Zwidee a ‑glɔɔ Betelɛɛmö, Daviidɩ a 'bhele, ‑mä ɔ 'kää 'bhöönɩ.» 43Sa'a wa nʋä, 'n wa yiɛ Zezwii a za nimï 'bhööbhöönɩ. 44Wa gla'mö a ‑mumuë, wa yɩbhä a nyɩasɛ wa 'kɔ köbhä, ‑maa ‑bɛ 'nɔɔ kɛ 'wʋ fä.

45Nɩkpaa ‑wa mö a‑a Zezwii köbhää, 'n wa yiɛ ‑mä Lagɔbʋbɔwaa a 'kifiea ‑nyɛ Falizɩɛwaa 'sɔ ‑wa tiuë a‑a yɔwʋ 'wlu sɩbhä. 'Kädɩ 'la 'yuëë 'ylɩmöö, wa lɛ: «'Ɔ! Nɩkpɛ a mö a‑a köbhää, dɛ ɔ ‑wʋ bhä?» 46Wa lɛ naa: «Nɩkpɛ 'nɩɛ ‑bhlɛ tɛkäsɛ ɔ saa bhïla.» 47Falizɩɛwaa lɛ naa: «A lɛ 'saa 'nɩ? Ɔ kanyɩ bhä'ɛ abhlɩ 'wlumö nyimamö ‑a? 48‑A'a 'yukuganɩwaa, wa ‑nyɛ ‑abhʋa Falizɩɛwaa 'sɔ, ‑aa gla'mö a ‑nɔ ‑bhlʋ a'bhë kɔ bhä tɛkäsɛ dlɩ 'wʋ ‑kä ‑a? 49‑Maa ‑muë 'la 'wuë, wa'aa Moyizɩ 'a Gböö ‑yi, zaa, ‑bhätlɩnɩ wa ‑bhätlɩnɩɛ.»

50Wa gbää sa'aa, Falizɩɛwaa a gla'mö a ‑nɔ ‑bhlʋ wa laa Nikodɛɛmö, ‑ɔ ghlɩ a 'yɛ 'ylɩ bhlʋ 'mö ‑mä Zezwii, ɔ lɛ naa: 51«‑A 'bhɩanyɩ, mä'ä ‑a 'bhele a dɔ'wʋ, ‑a 'nɩ nɩkpɛ a ngli a wɛlɩ 'nʋ, ‑a 'ni sasɛ 'ylɩmö 'wëë, ‑a kä bhä ‑a 'kɔ gbʋ köbhä ‑a?» 52Ɔ gbää ‑sɩbhää, wa lɛ naa: «‑Ɔ! Galileeyi 'la, ɛ 'kä ‑bhɩɛ ɔ 'bhele a nɩkpɛ ‑n glɩnɩmö. ‑N ‑kä ‑bhɛɛ, zɛlɩ sasɛ Lagɔbɔgʋʋ 'mö, ‑na'bhë ‑n 'kä sɛ yɩbhlɩmanɩ nɩɩ, Lagɔ a 'möbhïlanɩnyɔ ‑ɔ 'kää Galilee 'bhöönɩɩ, ɔ'ɔɔ ‑bhölɩ.» [53Wa kpɛnɩɛ sa'a 'wëë, 'n wa yiɛ yɔwʋ ‑sɛnɩ 'n wa yiɛ 'ligbï 'mö mö.

Currently Selected:

Zaa 7: bet

Highlight

Copy