Lwiikö 10

Zezwii yɛ nɩkpa a gwlɩ ta nɩkpa kʋgbä'sɔ (72) tie

1‑Mi'la 'plɩɛ 'wëë, 'n ‑Alowli yiɛ'ɛ nɩkpa ‑mumuë a gwlɩ ta nɩkpa kʋgbä'sɔ ‑lɛ ‑sɛ. ‑Gwlɩ 'kädɩɩ ‑nyɛ ‑gwlɩ 'tikïyiea 'sɔ 'mö, saa 'wuë, sɛ ɔ lɛ 'kää ghlɛnɩɩ, 'n ɔ yuëë ‑sɩbhä 'sɔ 'sɔ 'sɔ tie, ɔ 'kʋä nimï 'bhlenɩ. 2Wa lɛ 'kää möä yii, 'n ɔ yuëë 'dɩ 'nyɛ, ɔ lɛ naa: «Lagɔ 'a 'lagblɛɛ, ɛ 'ghïli tenyii, 'n ɛ ‑zɛ, ‑maa nɩkpa ‑wa 'kää ‑mä ɛ 'mö libho nʋʋ, wa'aa ‑zu. Zaa, a nɩ bhibhe 'lagblɛlowlii yɔwʋ, ɔ 'kä libhonʋwa ‑mumuë 'wʋ 'libhï, ɔ 'kʋä ‑mä 'ɔ 'lagblɛɛ 'mö kwä. 3A yɩɛ, sɛ wa pä'ɛ gbï jijo'wʋ wïlaa, ‑sɩbhä n ‑wʋanyɩɛ dɛ'ɛ ‑mä nɩkpa jijo'wʋ tie dɔ'wʋ. Zaa, a nɩ mö. 4‑Maa a ‑kä möä yii, a nɩ tɩ moni ‑su, a nɩ tɩ ‑kotoku ‑su, a nɩ tɩ 'siikpli ‑su. A ‑kä mö dɔ'wʋ ‑wʋʋ, a nɩ tɩ ‑mä 'yio 'wʋ 'nɩgbö a 'kä nɩkpɛ bhälɩ a za. 5'Ligbë ‑ma 'mö a kä plɛɛ, a nɩ nʋ nɩɩ, a 'wuë, 'pʋpʋɛ nɩ ghlanyɩ 'wʋ. 6‑Lɛ 'ligbë 'la 'mö, nɩkpa a ‑muëë yɩbhää ‑wanɩwanɛ ‑kä ‑lɛ ‑wʋʋ, 'pʋpʋɛ yuë 'wʋ ghlɛ, ‑maa 'n ‑sɩbhä a nɩkpa 'nɩ ‑lɛ ‑wʋʋ, ɛ yeanyɩ 'mö 'wlu sɩbhä. 7A nɩ tɩ dɛ'ɛ gʋʋ, a 'kä dɛ'ɛ gʋʋ, ‑maa ‑lɛ 'ligbë 'la 'mö, dɛ wa pälanyɩɛ, a nɩ gʋʋ ‑lɛ ‑këë, 'a mömötɛnyɩɩ ‑kä ghlɛ a 'kä mö. 'Saa wa ‑kaanyɩ ‑lɛ 'nyɛɛ, a nɩ li, a nɩ 'nɩmä. Ɛ'ɛ ‑bhö nyɩasɛ, ‑maa nɩkpɛ a ‑mɔɔ nʋä libhoo, wa kä wa 'kɔ wʋ 'wlumö 'pɛnɩ. 8‑Glɔ ‑mu 'mö a ‑kä plɛɛ, 'n ‑mä a ‑nʋa ‑kaanyɩ pälaa, 'saa wa ‑kaanyɩ 'nyɛɛ, a nɩ li. 9‑Glɔ 'la 'mö a guzuwaa, a nɩ yɛmanuë. A nɩ 'nyɛ ‑mä a ‑nʋa 'dɩ nɩɩ: 'Pɩwʋ mää Lagɔ 'kämanɩɛ kanyɩ yɔwʋ 'dio. 10‑Maa 'n a ‑kä'ɛ ‑glɔ ‑mumuu 'mö ghlɛ 'n ‑mä a ‑nʋa 'nanyɩ pälaa, a nɩ 'pänɩ ‑mä 'du 'mö wɛlɩ nɩɩ: 11A nɩ yɩbhlɩnɩa'a sɛ nɩɩ, 'pɩwʋ mää Lagɔ 'kämanɩɛ kanyɩaaa yɔwʋ 'dio. ‑Maa abhʋa abhlɩ, sɛ a'aa 'yɩbhä a ‑kanyɩ 'yukwli ‑pʋnɩ a za, a ‑nyɛ Lagɔ 'sɔ a jijo'wʋ a wɛlɩa'aa. ‑Sɩbhä a za, ‑a plɛɛ mä'ä 'a ‑glɔɔ 'mö a dʋdʋʋ ‑wʋ mɛanyɩɛ kplɩ zɛmöö, mö ‑a gbɔtɔɔ dɛ'ɛ kplɩ yɔwʋ ‑a 'kanyu yowʋ 'nyɛ aaa! 12‑Maa 'dɩ n nyanyɩɛ dɛ'ɛ nɩɩ, Lagɔ 'a ‑zijle 'kädaa a zlɩɩ ‑kä ghlɛɛ, ‑glɔ 'la 'mo a ‑nʋa 'a nyinylolii a 'pɛna Lagɔ 'kʋä 'nyɛɛ, a yi 'mö 'tɛɛ a yi Sodɔɔmö a ‑nʋa a ‑naa 'wʋ zi.»

‑Gwlɩ ‑mimii 'nɩɛ 'yɩbhä yɩ 'kä Zezwii dlɩ 'wʋ ‑kä

(Matie 11.20-24)

13«Kolazɛɛ a nɩkpanyɩ, a ‑nyɛ Bɛtɩsayidaa a ‑nʋa 'sɔ, ngäzɩ 'wʋ a 'kää ‑bhö. Ɛ'ɛ ‑bhö nyɩasɛ, ‑maa zɩzɛlii n nʋnɩɛ ‑mä 'a gwlɩɩ 'möö, ‑mä lɛgagwlɩɩ Tiilɩ ‑nyɛ Sidɔɔ 'sɔ 'mö, ‑mä n ‑kɩɩ a nʋnɩɩ, ‑mä a nɩkpa, wa yɛ laa'a ‑pa ligba wa 'kä 'wa ‑lizokuu kɛ'mö ‑sɛ. Wa yi a ‑bädɩ dlu, wa yi a nyɛnglɛlekwi 'mö päla, nzɩɩ wa 'käa nɩkpabhë 'ylimö tulanɩ nɩɩ, wa yɛ 'wa 'nyinylolii yɩbhlɩnɩ. 14Sɩbhä a za, Lagɔ 'a ‑zijle 'kädaa a zlɩɩ ‑kä ghlɛɛ, Tiilɩ ‑nyɛ Sidɔɔ 'sɔ a ‑nʋa ‑waaa Lagɔ ‑yii, wa ‑nyɛ abhʋa 'sɔ a dɔ'wʋ, 'a 'nyinylolii a 'pɛna Lagɔ 'kanyɩɛ 'nyɛɛ, a yi 'mö 'tɛɛ, a yi wa ‑naa 'wʋ zi. 15Zaa, abhʋa Kapɛnaɔmö a ‑nʋänyɩ, a ‑tɔnɩ bhä nɩɩ, Lagɔ yeanyɩ ‑mä ghäyɩ 'wʋ dɛ a dɛ 'gïla ‑a? Ɛ'ɛ ‑bhö ‑sɩbhä ma. ‑Maa ɔ yeanyɩ dʋdʋ 'wʋ ‑lɛ ‑këë a yi ‑mä 'kudu 'wʋ ghlɛ.

16Abhʋa 'na ‑gänɩwaa, ‑ɔ ‑kaanyɩ 'yukwli ‑pʋnɩɩ, na'bhë ‑amö ɔ yɛɛ 'yukwli ‑pʋnɩ. ‑Maa ‑ɔ ‑kaanyɩ 'ylimö fälanɩ, na'bhë ‑amö ɔ yɛɛ 'ylimö fälanɩ. Sɛ ɔ fälanɩɩɛ da'a 'ylimö a za, ‑ɔ tieaaa 'mö ɔ yɛɛ 'ylimö fälanɩmö.»

Nɩkpaa Zezwii tie a‑a wa yɛ 'bɩwʋ yi

17Nɩkpa a gwlɩ ta nɩkpa kʋgbä'sɔ ‑kpɔ, mää Zezwii tiuë a‑a, wa 'bhöönɩɛ ‑mä, wa 'wuë 'mäna 'n wa yiɛ yi. 'N wa yiɛ Zezwii 'tɩtɩ 'nyɛ. Wa lɛ naa: «‑Alowli, zuzukuzokuu a'bhï, ‑a ‑kɩɩ ‑na 'nglɩ 'mö kpëtii, 'klʋkpamö yɩ zʋʋnyɩɛ.» 18Wa ‑sɛɛ 'tɩtɩɩ, Zezwii lɛ naa: «N yɩlɩ a Sataa 'wʋ, 'n ɔ yiɛ ‑mä ghäyɩ 'wʋ 'bhöö 'n ɔ yiɛ mä'ä dʋdʋ 'wʋ bhlinɩ, ɔ 'kä ‑bhɩɛ ‑gbägbadɛ a 'dɛlɩ. 19A yɩɛ, n kanyɩ 'mötɛɛnɔ 'nyɛ, ɛ yi tɩma oo, ɛ yi ‑Lagɔgbïti oo, a 'kɩ ‑gömö nɛmönɩ, a 'kä a ‑gblɩnyɔ 'a 'mötɛɛnɔɔ 'wuë 'wʋ 'titlimö. Ɔ 'naa 'kanyɩ ‑lu a'bhë nʋ 'lɩlɩlɩ. 20‑Maa sɛɛ zuzukuzokuu zʋanyɩɛ 'klʋkpamöö, ‑sɩbhä ma‑a nɩ tanyɩ tenyii 'mäna 'wʋ ‑bhö. ‑Maa sɛɛ Lagɔ yɛɛ ‑mä 'ɔ 'bɔgʋʋ 'mö 'a nglɩɩ 'cɛlɩ 'wëë, ‑sɩbhä ma‑a nɩ ‑bhöanyɩ tenyii 'mäna 'wʋ.»

'Mäna yɛ Zezwii tenyii 'lɩbhä

(Matie 11.25-27; 13.16-17)

21‑Lɛ a 'tɛnyɩ 'la ‑bhʋlʋ ‑kpɔ 'mö 'n 'Wugɔmʋʋ 'Wlɩlɩ yiɛ Zezwii 'mäna a 'käda dlɩ zɛmö 'zʋ 'n ɔ yiɛ Lagɔ bhälɩ, ɔ lɛ naa: «‑Atʋ, zlɩ ‑nyɛ dʋdʋ 'sɔ a ‑lowli, ‑na 'nglɩ nɩ 'ghlimanɩ. Wɛlɩɩ ‑n zizanɩ a‑a, 'nɛɛnɩwaa ‑nyɛ 'bɔgʋyiwaa 'sɔ 'ylii, sɛɛ n kälɩniiɛ ‑waaa dɛsɛ ‑kä nɩkpa 'yila 'klʋ a dɔ'wʋ kɛ 'klʋ a za‑a, n 'ghlimanɩ ‑na 'nglɩ. Nn, ‑Atʋ, ‑sɩbhä ‑n 'yɩbhɩɛ, nza yɩ 'plɩɛ ‑sɩbhä 'wʋ.» 22'N ɔ yiɛ nɩɩ: «‑Amö na dɩba Lagɔ 'nyɛɛ ‑lii 'wuë yowʋ. ‑Bɛ 'nɩɛ 'saa Yuu glɩnɩɛ ‑yi 'n ɛ 'nɩ ‑bhö Dɩbaa mɔɔ, ‑bɛ 'nɩɛ'ɛ 'saa Dɩbaa glɩnɩɛ ‑yi 'n ɛ 'nɩ ‑bhö Yuu mɔɔ, 'n ɛ 'nɩ ‑bhö'ɛ nɩkpa ‑muë Yuu yɩbhää ɔ 'kä Dɩbaa sʋlʋnɩ muë.» 23'N Zezwii yia'aa 'ɔ ‑gänɩwaa 'yi gö, ɔ lɛ naa: «'Saa a 'yɩɛ da'a 'ylɩmö a za, 'mäna nɩ 'lɩbhanyɩ tenyii. 24Nyɩasɛ n'n‑ä ‑sɩbhä gbä, ‑maa Lagɔ 'a bhla'mö a 'möbhïlanɩwa a ‑bɛ, 'n 'bhlɩlowliwa a ‑bɛ, 'saa a yɩɛ dɛ'ɛ 'ylɩmöö, wa 'yɩbhä a wa 'kʋ 'ylɩmö, ‑maa wa 'nuä 'ylɩmö. Wɛlɩɩ a nʋä dɛ'ɛ, wa 'yɩbhä a wa 'kɩ 'nʋ, ‑maa wa 'niɛ 'nʋ.»

Sɛ ‑n ‑waa ‑nanyɩ ‑wa ‑sɩbhä ‑na 'lilɛ

25'Ylɩ ‑bhlʋ 'mö, Moyizɩ 'a Gböö a 'cɩanyɔ ‑bhlʋ mɔɔ ghlɩɛ ‑mä Zezwii. 'N ɔ yoo zɔvasɛ nimï 'yɩbhä, ɔ lɛ naa: «‑Atʋ, 'pɩwʋ mää 'naa 'kää 'yli bhɩɛ, sɛ n 'kä bhä 'mözʋmözʋmö n 'kä ‑mä ghlɩ?» 26Zezwii lɛ naa: «‑A'a Gböö a 'bɔgʋʋ 'mö, 'saa cɛlɩ bhä ‑mä?» 27Ɔ lɛ naa: «Sɛ'ɛ yɩ cɛlɩɛ ‑mä nɩɩ: ‑Na ‑lowli Lagɔ, ‑n kä ‑n 'kɔ ‑wa, ‑mä ‑na'a dlɩɩ 'wuë zɛmö, ‑na'a dlɩpäsaa 'wuë 'mö, ‑na'a 'mötɛɛnɔɔ 'wuë 'mö, ‑na'a ‑bhölɩbhölɛɛ 'wuë 'mö. 'N sɛɛ ‑n ‑waa ‑nanyɩ ‑wa ‑sɩbhä ‑na 'lilɛ.#10.27Detlenɔɔmö 6.5; Levitiikö 19.18.» 28Ɔ gbää sa'a, Zezwii lɛ naa: «Miɛ ‑tiamö. Zaa, 'zʋ ‑sɩbhä. ‑Lɛ a dɔ'wʋ, ‑n yi 'pɩwʋ mää 'naa 'kää 'yli bhɩɛ ghlɩ.» 29‑Maa nɩkpɛɛ yɩbhä ɔ ‑nɩɩ mɩɩ nɩ tʋʋ ‑lɛ zaa, 'n ɔ yiɛ Zezwii nimï 'yɩbhä, ɔ lɛ naa: «‑Ɔ glɩnɩ bhä na 'lilɛ 'nɩ?» 30Zezwii lɛ naa: «'Ylɩ ‑bhlʋ 'mö, nɩkpɛ 'bhöönɩ Zeluzalɛɛmö, ɔ ‑wʋ Zelikoo mö dɔ'wʋ, 'n jɛzlʋwa yoo ‑mä 'yio 'wʋ köbhänɩ, 'n wa yoo wlu ‑dɩ, 'saa ɔ ‑su a‑a 'wuë, 'n wa yonyɩɛ kä'mö ‑sɛ, 'n wa yoo 'kukusɛ 'lɩbhä, 'n wa yoo ‑lɛ sɛ bhlɩ 'n wa yiɛ futo. 31Ɔ pö ‑lɛ, 'n Zwiiföwaa a Lagɔbʋbɔnyɔ ‑bhlʋ yiɛ 'plɩɛ yi. Ɔ 'yo 'ylɩmö, ‑maa 'yio a pɩɔ ‑mu'la 'wʋ ‑mä ɔ 'tʋä 'wʋ 'n ɔ yiɛ mö. 32'N nɩkpɛ ‑mɔmɔɔ yi'ɛɛ 'plɩɛ yi. Ɔ 'yoo 'ylɩmöö, sɛɛ ‑mɔ'la 'plɩɛ, ‑sɩbhä ɔ 'plɩmöä. Ɔbhlɩ, Leviiwaa a gla'mö a ‑nɔ ‑bhlʋ ɔ glɩnɩɛ. 33Wa 'plɩɛ 'wëë, 'n tanɔɔ yiɛ 'plɩɛ yi. Ɔbhlɩ, Samalii a nɩkpɛ ɔ glɩnɩɛ. Ɔ ‑wʋ lowlu 'mö mö dɔ'wʋ 'n ɔ yiɛ nɩkpɛ 'la ‑mä 'yio 'wʋ ghlɩnɩ. Ɔ 'yoo 'ylɩmöö, 'n ɔ ngäzɩ yoo tenyii 'lɩbhä. 34'N ɔ yoo 'wʋ 'libhï 'n ɔ yiɛ ɔ yɔwʋ a jɩɩ glʋ 'tɩɩ 'n ɔ yiɛ 'wʋ 'zʋ ‑plɛplɛplɛ 'n ɔ yiɛ 'wʋ gwa. 'N ɔ yoo ‑lɛ 'ɔ ‑sʋkʋʋ ‑gömö 'zʋ, 'n ɔ ‑nyɔɔ yiɛ mö. ‑Mä lɛgäwa a 'mögʋʋbudu ‑bhlʋ 'mö, 'n ɔ yoo ‑mä kwä. 'N ɔ yoo 'yli 'zʋnɩ 'tɩɩ. 35Zlɩ zɩɛ, 'n ɔ yiɛ ‑lʋayi a 'du ‑bhlʋ (2.000) 'wäla, 'n ɔ yiɛ ‑budulowlii yowʋ 'nyɛ. Ɔ lɛ naa: 'Libhï ‑bhlɛ sɛ'ɛ 'wʋ, na nɩkpɛ n ‑nyɛɛ yiɛ, ‑n 'kɔ 'yli 'zʋnɩ. ‑Maa n yɛɛ mö n 'kä yi. N ‑kä ‑mä ‑wʋ a moni ‑n 'kää ɔ 'wlumö plɩɩ, 'n ɛ ‑kä ‑zu ɛ ‑kä ‑mɛ nɩ 'wʋ zii, n ‑kä yii, n yi ɛ gɔgbʋ ‑sɛ. 36Zaa, ‑na dɔ'wʋ, nɩkpɛɛ jɛzlʋwaa 'lɩbhää da'a 'kukusɛɛ, nɩkpa 'la ta ‑kpɔ gla'mö a ‑mɔɔ 'zʋ bhä ɔ 'lilɛ 'nɩ?» 37Ɔ lɛ naa: «‑Ɔ pää ɔ ngäzɩdlɩɩ, mɔɔ 'zʋä ɔ 'lilɛ.» Zezwii lɛ naa: «‑Aa! Zaa, sɛ ɔ 'zʋä da'aa, ‑n ‑kä möö, 'zʋmö ‑sɩbhä.»

Zezwii 'a wɛlɩɩ a 'yukwlipʋnɩpʋnɛ mɛɛ kää tenyii dɛsɛ

38Zezwii ‑nyɛ 'ɔ ‑gänɩwaa 'sɔ, wa ‑wʋ Zeluzalɛɛmö mö dɔ'wʋ, 'n wa yiɛ glɔ ‑bhlʋ 'mö plɛ. ‑Mä ‑glɔ 'la 'mö a 'nglɔ ‑bhlʋ 'mö wa laa Maatɩ, 'n ɔ yiɛ Zezwii päla. 39Maatɩ kä nglʋdaayu ‑bhlʋ 'mö wa laa Malii, 'n ɔ yiɛ Zezwii yɔwʋ sɛ glɩ, ɔ 'kä 'ɔ 'cɩawɛlɩɩ 'yukwli ‑pʋnɩ. 40‑Maa Maatɩ ɔbhlɩ, 'ligbë 'mö a libhoo kɔ 'wlu 'mänanɩ zaa, ɔ'ɔɔ kä'mö ‑ghönɩ 'lɩlɩlɩ. 'N ɔ yiɛ Zezwii 'dɩ 'nyɛɛ mö. Ɔ lɛ naa: «‑Alowli, sɛ n ‑wʋä dɛ'ɛ na 'yize libho 'wuë nʋ dɔ'wʋ, 'n na ‑daayu glɩɛ da'aa, ‑nn bhä ‑sɩbhä 'wʋ yɩlɩ ‑a? Zaa, 'nyɔ yɩ 'dɩ ɔ ‑kaa kwänɩ.» 41Maatɩ gbää sa'aa, Zezwii lɛ naa: «‑Nmö ‑naa Maatɩ, ‑li a ‑bɛ a gbʋʋ plɛnɩmöä, yɩ za ‑n ylɔɔ. 42‑Maa ‑lu ‑bhlʋ ‑kpöö, mʋʋ kää tenyii dɛsɛ. 'Mö Malii ‑sɛɛ dɛ'ɛ ‑lɛ. Mʋʋ nɛnɩɛ, 'mö nɩkpɛ 'naa 'kɔɔ 'kwädlɩ kä'mö ‑sɛ.»

Currently Selected:

Lwiikö 10: bet

Highlight

Copy

Want to have your highlights saved across all your devices? Sign up or sign in

Learn More About BdG2