Lwiikö 21

'Pʋakuzlenglɔ yɛ Lagɔ 'nyɛ

(Maakö 12.41-44)

1Zezwii ‑wʋ ‑bhlɛ ‑mä Lagɔbudu 'Kɔdʋʋ 'mö, sɛɛ lɩkäwa pää ‑mä ‑dɔkwɩɩ 'mö monii wa nyɛɛ Lagɔ, 'n ɔ ylɛɛ ‑sɩbhä. 2-3'N 'pʋäkuzlenglɔ ‑bhlʋ yiɛ yi. 'N ɔ yiɛ fälɛgöyie 'sɔ ‑mä 'zʋ. Zezwii 'yoo 'ylɩmöö, ɔ lɛ naa: «‑Tiamö n nyanyɩɛ 'dɩ nɩɩ, 'pʋäkuzlenglɔ nɩ, mɔɔ 'nyɛɛ Lagɔ moni a ‑bɛ, mɔɔ ziɛ ‑muë'la 'wuë 'wʋ. 4Ɛ'ɛ ‑bhö nyɩasɛ, ‑maa ‑wa 'nyɛɛ moni a ‑bɛ, ‑ɛ ‑kplɛnuëë kɛɛ, 'mö wa 'zʋä ‑mä. ‑Maa ɔbhlɩ, 'ɔ 'saa 'wuë ɔ kää ɔ 'kä a‑a lii, 'mö ɔ 'nyɛɛ Lagɔ.»

Zezwii lɛ wa yi Lagɔbudu 'Kɔdʋʋ wlɛ

(Matie 24.1-2; Maakö 13.1-2)

5Nɩkpa ‑mumuë mʋa bhïlaa Lagɔbudu 'Kɔdʋʋ a wɛlɩɩ. Wa lɛ 'nyɩɛ wʋ nɛnɩ 'ylimö. Kpɩɩ wa 'sɩbhänuä 'n ‑lii wa 'nyɛɛ Lagɔ ‑yɩ ‑wʋä ‑mä, yɩ 'wuë, 'ylimö yɩ nɛnɩɛ tenyii. 6Zezwii lɛ naa: «‑Budu nɩ a yɩlɩɛ dɛ'ɛ 'wʋʋ, 'ylɩ ‑bhlʋ ‑kä ghlɛɛ, wa yu wlɛ. Kpiyi 'naa 'kä kpiyi 'klʋ tʋʋ 'lɩlɩlɩ.»

'Pɩwʋ ‑kä 'yli bhɩɛɛ yi a 'klɩyɩyɛ

(Matie 24.3-14; Maakö 13.3-13)

7'N wa yoo nimï 'yɩbhä, wa lɛ nɩɩ: «‑Atʋ, 'saa ‑n 'bhööä da'a Lagɔbudu 'Kɔdʋʋ a dɛ bhïlaaa, ‑zlɩmɛ yɩ 'kä bhä 'yli 'wlʋnɩ? Yɩ ‑kä yɩ 'kä 'yli 'wlʋnɩ a 'tɛnyɩɩ, 'saa ‑a 'kɛ bhä 'mö yɩbhlɩnɩ?» 8Zezwii lɛ naa: «A nɩ 'nɛmanɩ anyɩ 'wʋ, wa nɩ tanyɩa dula. ‑Maa nɩkpa a ‑bɛ yia 'yli 'wlʋ, wa yia 'na nglɩɩ 'pä, wa yia nɩɩ, ‑amö wa glɩnɩɛ nʋ. Wa yia'ɛ nɩɩ, 'tɛnyɩ Lagɔ ‑dɩ a‑a, ɛ yɛ ghlɛ nʋ. ‑Maa a nɩ tuëa 'yukwli ‑pʋnɩ. 9A yi tʋgwɩwɛlɩ 'nʋ, wa yi 'bhlɩlowluwa 'klʋkpamö ‑sɛ. A ‑kä ‑li 'la 'wuë a ‑gëbëa 'nʋʋ, dlɩ nɩ tanyɩa 'mö wɔlɔnɩ, ‑maa ‑lɛ a 'tɛnyɩ 'la, ɛ'ɛ ‑bhö ‑bhlɛ 'pɩwʋ a 'ylibhɩɛdaa ma. 10N nɛ naa, bhlɩ ‑mɛmɛɛ ‑nyɛ bhlɩ ‑mɛmɛɛ 'sɔ yia tʋ gwɩ, 'bhlɩlowli ‑mɔmɔɔ a ‑nʋä ‑nyɛ 'bhlɩlowli ‑mɔmɔɔ a ‑nʋä 'sɔ, wa yia'ɛ tʋ gwɩ. 11'Bhlɩ a ‑bɛ ‑gömö a dʋdʋʋ yia tenyii tɩtlɛnɩ, ngɔmʋgupegupe yia ‑mä yi, 'plɩnɩplɩnɩgwi 'kädɩ yia nɩkpa 'lɩbhä. Zɩzɛli 'kädɩ ‑yɩ 'kää nɩkpa dlɩ 'mö wälanɩɩ, yɩ yia ‑mä zlɩ 'mö 'yli 'wlʋnɩ.

12‑Maa ‑li 'la 'wuë, yɩ ‑kä yɩ 'kä ghlɛɛ, ‑gblɩ wa 'kanyɩɛ ‑gblɩ. Wa yeanyɩa köbhä, ‑mä Zwiiföwaa 'a Lagɔbïdii 'mö, wa 'kanyɩ ‑mä ‑zijli tunɩ. Wa yeanyɩa ‑jie 'mö 'pä. Sɛ a glɩnɩɛ na ‑nʋä a za, wa yeanyɩ 'bhlɩlowluwa ‑nyɛ 'kämanɩwa 'kädɩ 'sɔ a 'yila 'klʋ kwä wa 'kanyɩ ‑zijli tu. 13‑Maa yɩ 'wuë 'mö, 'a 'tɛnyɩ a ‑nɛ a ‑nɛɛ, a 'kää ‑mä wa 'yila 'klʋ na dɛ 'mö bhïlanɩ mɛɛ. 14Zaa, 'saa a 'kää ‑mä wa 'yila 'klʋ bhïlanɩ a dɔ'wʋ, dlɩ nɩ tanyɩ nyɩasɛ libho, 15‑maa na'bhë, ‑amöö 'kanyɩɛ 'nɛɛnɩwɛlɩ 'wlumö 'zʋ, a ‑kɩɩ bhïlaa, 'a ‑gblɩwaa a gla'mö a nɩkpɛ 'naa 'kɩ 'yukwli yɔwʋ ‑sɛ, ‑bɛ 'naa 'kɩ'ɛ 'mö kpɛnɩ. 16'A waa ‑nyɛ a bhɛya 'sɔ, ɛ yi a ‑lowluwa ‑nyɛ a ‑daayuë 'sɔ muë ‑kë, mʋa 'kanyɩɛ 'a ‑gblɩwaa kä'mö plɩnɩ, wa 'kä a gla'mö a ‑mumuë 'lɩbhä wa 'kä 'ku. 17Sɛ a glɩnɩɛ na ‑nʋä a za, nɩkpa 'wuë yeanyɩa ‑gblɩ. 18‑Maa yɩ 'wuë 'mö, abhʋa na ‑nʋa, a gla'mö a ‑nɔ ‑bhlʋ a'bhë a nyukwëyeyi 'naa ‑kä tʋʋ. 19Zaa, dɛ a kää sɛɛ, a nɩ nyɔnʋ ‑lɛ kɛ. ‑Lɛ a dɔ'wʋ, a yi 'pʋ.»

Zezwii lɛ wa yi Zeluzalɛɛmö a ‑glɔɔ sɛ yɛla

(Matie 24.15-21; Maakö 13.14-19)

20«'Tɛnyɩ ‑mɛmɛɛ yi ghlɛɛ, a yi tʋgwɩwa 'kɔkɔmlɛ 'ylɩmö, wa yi Zeluzalɛɛmö 'gble 'mö pälɩ. ‑Zlɩ yɩ ‑kä ‑sɩbhä 'wʋ 'plɩɩ, a nɩ yɩbhlɩnɩ sɛ nɩɩ, Zeluzalɛɛmö a wlɛwlɛtɛnyɩ yɛ 'dio. 21Zaa, ‑lɛ a 'tɛnyɩ 'la ‑kä ghlɛɛ, Zwidee‑bhölɩɩ 'mö a ‑nʋa, wa nɩ mö ‑mä ‑gägö 'wlu ‑guë. ‑Ɔ ‑kä ‑mä Zeluzalɛɛmö glɔ 'mö ‑wʋʋ, ɔ nɩ futo. ‑Wa ‑kä 'lagbïle 'mö ‑wʋʋ, wa nɩ tɩ ‑mä Zeluzalɛɛmö yi. 22Ɛ'ɛ ‑bhö nyɩasɛ, ‑maa ‑lɛ a 'tɛnyɩ 'la 'mö, ‑lɛ Lagɔ 'kää Yizlaɛlɩ 'a ngëyii 'mö a ‑nʋa 'wa 'nyinylolii a 'pɛna 'nyɛnɩ. Wɛlɩɩ 'wuë ‑yɩ cɛlɩɛ klɩ 'la a dɛ ‑mä Lagɔbɔgʋʋ 'möö, ‑lɛ yɩ 'kää 'yli 'wlʋnɩ. 23‑Lɛ a 'tɛnyɩ 'la 'mö, gbadɩngwlɩɩ ‑nyɛ gwangwlɩɩ 'sɔ, mʋa 'kää ngäzɩ 'wʋ ‑bhö tenyii. Ɛ'ɛ ‑bhö nyɩasɛ, ‑maa sɛɛ Lagɔ 'kää 'ɔ ngëyii ɔ ‑sɛɛ ‑lɛ 'mö a ‑nʋa ‑zijli tu a za, bhlɩ 'la 'mö a 'zwɩzizee, 'mö ɛ 'kää tenyii 'tɛɛ. 24Wa yi ‑mumuë ‑gbëlie 'pä, wa yi ‑mumuë swɩ nimï gwanɩ wa 'kʋä dʋdʋʋ a këtiea 'wuë ‑gömö kwä. Lɛgäwaa ‑waaa Lagɔ ‑yii, mʋa 'kää Zeluzalɛɛmö a ‑glɔɔ nyima 'lɩlɩlɩ, wa 'kʋ ‑kälɩ. Sa'a ‑këë, 'wa 'tɛnyɩ Lagɔ 'nyʋää, ɛ 'kä bhɩɛ.»

Zezwii yɛ 'ɔ 'bɩwʋyiyee a dɛ bhïla

(Matie 24.29-35; Maakö 13.24-31)

25«‑Lɛ a 'tɛnyɩ 'la 'mö, ‑mä 'ylʋväla 'mö, ‑mä cʋʋ 'mö, 'n ‑mä ‑zɛlɩɩ 'mö, zɩzɛli yia ‑mä 'yli 'wlʋnɩ. Gïnyɛ a ‑gbɔkwälɩ yia 'mö 'tɛmanɩ, ɛ ‑jiji yia tenyii zumanɩ. Mä'ä dʋdʋ 'wʋ a nɩkpaa, yɩ yuë nganɔ 'wʋ bhömanɩ tenyii, ‑sɩbhä a za swɩ yuë yɔwʋ 'kunɩ. 26‑Lii ‑yɩ 'kää mä'ä dʋdʋ 'wʋ 'yli 'wlʋnɩ, nɩkpa ‑kɩɩ dlɩ 'wʋ 'pää, nganɔ yuë 'lɩbhä wa yi 'ku. Ɛ'ɛ ‑bhö nyɩasɛ, ‑maa 'saa ‑wʋä ‑mä zlɩ 'mö 'wuë, yɩ yia bidibidi 'wlu 'mlamlanɩ. 27‑Mi'la 'wuë ‑käa'a 'plɩ 'wëë, 'n zlɩɩ lɛ 'kää nuë do, Nɩkpɛ a 'Yu, 'n ɔ 'kä ‑mä 'bhöö, ɔ 'kä 'ɔ 'kämanɔɔ 'kɔdʋʋ 'mö yinɩ, ɔ ‑wʋ 'ylʋväla a 'dɛlɩ a sɛ lɩ dɔ'wʋ, 'n ɔ 'kää yi, nɩkpaa yo 'ylɩmö. 28‑Sɩbhä a za, ‑li 'la 'wuë, yɩ ‑kä 'yli 'wlʋnɩ dɔ'wʋ ‑wʋʋ, a nɩ yɩbhlɩnɩ sɛ nɩɩ, 'a yɔlɔylʋʋ a 'möwlʋtɛnyɩɩ yɛ 'dio 'wë zaa, a nɩ tɩ gba'agbagba'a bhli, ‑maa a nɩ 'tɛmanɩ 'yli yɔwʋ.»

29'N Zezwii yiɛ wɛlɩ 'wʋ pälɩ, ɔ lɛ naa: «A'bhï a 'yɩɛ ‑ka fiigösu ‑nyɛ swi ‑mimii 'sɔ 'ylɩmö. 30Yɩ ‑kä tɛpɔ yɩ ‑kä 'wʋ nɛmanɩɩ, a ‑yi sɛ nɩɩ, yɩ tlʋtlʋtɛnyɩɩ yɛ 'dio. 31Sɛ ‑bhʋlʋ ‑kpɔ 'la ‑sɩbhä ma‑a. ‑Li 'la 'wuë n gaaa da'aa, yɩ ‑kä 'yli 'wlʋnɩ dɔ'wʋ ‑wʋʋ, a nɩ yɩbhlɩnɩ sɛ nɩɩ, 'tɛnyɩɩ Lagɔ 'a 'kämanɔɔ 'kää nɩkpabhë a 'yila 'klʋ gbëdanguu bhlii, ɛ yɛ 'dio 'wë. 32‑Maa ‑tiamö n nyanyɩɛ dɛ'ɛ 'dɩ nɩɩ, nɩkpaa ‑wa ‑bhölɩɛ ‑sɩkaa, wa gla'mö a ‑mumuë 'naa 'kä ‑bhlɛ 'ku, 'n wa 'nɩɛ ‑li 'la 'wuë 'ylɩmö 'wëë. 33Zlɩɩ ‑nyɛ dʋdʋʋ 'sɔ, yɩ yi 'plɩ, ‑maa 'na bhïlawɛlɩɩ mɩɩ 'naa 'kää 'kwädlɩ 'plɩɩ.»

A nɩ ‑ligba a 'kä ‑lɛ glɩ

34«A nɩ 'nɛmanɩa anyɩ 'wʋ. A nɩ tɩa lililibho ‑nyɛ nʋnɩmälibho 'sɔ ‑kä. Mä'ä 'pɩwʋ a dlɩpäpʋʋ 'wuë nɩ tanyɩa 'wlumö 'wʋ yie, nzɩɩ, ‑lɛ a zlɩ 'la tanyɩa zɛmö ‑vu. 35‑Maa ‑lɛ a zlɩ 'la, sɛɛ ‑dɛda ‑gbïli'ɛ zibhï 'wlumöö, ‑sɩbhä ɛ 'käa mä'ä dʋdʋ 'wʋ a nɩkpa 'wuë zɛmö ‑vu. 36Zaa, a nɩ ‑ligba a 'kä ‑lɛ glɩ. A nɩ bhibhe 'kwädlɩ Lagɔ 'yize, ‑li 'la 'wuë ‑kä ghlɛɛ, yɩ tanyɩa swɩ yɔwʋ 'kuanɩ, nzɩɩ Nɩkpɛ a 'Yu ‑kä yii, a 'kɔ 'yila 'klʋ yi a dɔ'wʋ zʋ tanyɩa 'lɩbhä.»

37Sɛɛ zila zɩɛ 'yize, ‑sɩbhä Zezwii 'cɩanɩɛ ‑mä Lagɔbudu 'Kɔdʋʋ 'mö Lagɔwɛlɩɩ. Swe ‑kä yuluu, ‑mä Olivieswii a ‑gägaa 'wlu, 'n ɔ möä ‑mä gʋʋä. 38'Zɔkpɔ 'pii 'mö, 'n nɩkpa 'wuë möä ‑mä Lagɔbudu 'Kɔdʋʋ 'mö, wa 'kɔ 'yukwli ‑pʋnɩ.

Currently Selected:

Lwiikö 21: bet

Highlight

Copy

Want to have your highlights saved across all your devices? Sign up or sign in

Learn More About BdG2