Lwiikö 3

Zaa Batisɩ yɛ Lagɔlibhoo tɛɛ

(Matie 3.1-12; Maakö 1.1-8; Zaa 1.19-28)

1-2Zakalii ‑yowli Zaa, ɔ ‑wʋ ‑bhlɛ ‑mä 'muse 'klʋ, 'n Lagɔ yoo wäzɩ 'n ɔ yoo tie. ‑Lɛ a 'tɛnyɩ 'la 'mö, 'bhlɩlowli 'kɔdɔɔ wa laa Tibɛlɩ, 'ɔ 'kämanɔɔ ghlɩɛ 'ylʋbö kʋgbä ngbï. Pɔɔsɩ Pilaatɩ glɩnɩ a Zwidee‑bhölɩɩ ‑gömö a ‑gɔmla 'kɔdɔɔ, Eloodɩ 'kämanɩ a Galilee‑bhölɩɩ ‑gömö, 'n ɔ ‑daayu Filiipö 'kämanɩ a‑a Yitilee‑bhölɩɩ ‑nyɛ Tlakonitɩ‑bhölɩɩ 'sɔ ‑gömö. Lizaniasɩ 'kämanɩ a ɔbhlɩ Abilɛɛnɩ‑bhölɩɩ ‑gömö. Aanɩ ‑nyɛ Kayiifö 'sɔ mʋa glɩnɩ a‑a Zwiiföwaa 'a Lagɔbʋbɔwa 'kädɩɩ. 'Tɛnyɩ 'la ‑bhlʋ ‑kpɔ 'mö, ‑lɛ Lagɔ tienɩɛ Zaa. 3'Nyudɔlʋ wa laa Zludɛɛ, wʋ ‑kʋkʋyɔwʋ a bhlɩɩ, 'n ɔ yee 'wʋ bi, sɛɛ Lagɔ 'nyɔɔ 'dɩ, 'n ɔ yiɛ ‑sɩbhä ‑mä wɛlɩ 'pänɩ, ɔ lɛ naa: «A nɩ ligba a 'kä 'a ‑lizokuu kɛ'mö ‑sɛ, nzɩɩ n 'kanyɩ 'wlu wɔlʋ Lagɔ 'käa 'a 'nyinylolii a gbʋʋ 'yi 'tatinɩ.» 4Lagɔ a 'möbhïlanɩnyɔ Ezayii, sɛ'ɛ ɔ 'cɛlɩ a‑a Zaa a dɛ ‑mä 'ɔ Lagɔbɔgʋʋ 'mö nɩɩ:

Nɩkpɛ ‑bhlʋ ‑wʋ ‑mä 'muse 'klʋ ɔ pä wɛlɩ,

sɛ'ɛ ɔ nʋä nɩɩ:

A nɩ gïganɩ 'ywii 'wuë 'wlu.

A nɩ zlɔmanii 'mö,

‑maa ‑Alowli Lagɔ ‑wʋ yi dɔ'wʋ.

5 ‑Gbazwlɩɩ 'wuë, yɩ yi kɔlɔ.

‑Gägö 'kädɩɩ ‑nyɛ 'tikïyiea 'sɔ,

yɩ yi cɩɔnɩ, 'yio 'kä 'wʋ mlɩmanɩ.

'Ywii a sɛɛ cɩcɛcɩcɛnɩɛ 'möö,

‑sɩbhä yi 'mö zlɔmanɩ.

'Ywii ‑yɩ kää 'bhʋkʋbhʋkʋbhʋkʋ 'wʋʋ,

yɩ yi 'wʋ 'mlɩmanɔɔ.

6 ‑Lɛ a dɔ'wʋ,

sɛɛ Lagɔ yiɛ ɔ ‑kanyɩ puëë,

'bhlɩbhë 'wuë yi ‑sɩbhä 'ylɩmö. # 3.4-6 Ezayii 40.3-5.

7Zaa 'pää wɛlɩ 'laa, nɩkpa a ‑bɛ yi a ‑lɛ ɔ yɔwʋ, ɔ 'kʋäa 'wlu wɔlʋ a za. ‑Maa wa yiɛ, sɛ'ɛ ɔ 'nyʋää 'dɩ nɩɩ: «'Bhʋtɩmɛnɩkpanyɩ, ‑ɔ 'nyanyɩ bhä 'dɩ nɩɩ, Lagɔ 'a ‑zijle 'kädaa ‑anyɩɩ 'tɛnyɩɩ ‑wʋä ghlɛ dɔ'wʋʋ, a yea ngli 'pʋ 'nɩ? 8A nɩ tulanɩɛ yɩ ‑ka ‑mä 'a nʋnʋlii 'mö 'ylimö nɩɩ, a yɛ ligba a 'kä 'a ‑lizokuu kɛ'mö ‑sɛ. ‑Maa a nɩ tɩa dlɩ 'pä nɩɩ, Ablaamö a 'yuë a 'yuë a glɩnɩɛ zaa, ‑mi'la 'nanyɩɛ 'wʋ yɩlɩ. Sɛ'ɛ n nyanyɩɛ 'dɩ nɩɩ, kpɩ nɩ a yɩlɩɛ dɛ'ɛ 'wʋʋ, Lagɔ bhɛnɩ ɔ 'kɩ Ablaamö a 'yuë a 'yuë 'wʋ 'zʋa. 9Swi 'wuë ‑yɩɩ tlʋä 'bhï a bhïï, glu wa 'kɩɛ 'klɛnɩ, wa 'kɩ sia. Sɛ'ɛ n gbää nɩɩ, 'gbïpëa wa 'kɩɛ 'klɛnɩɩ, wa ka suu glɛ 'wë.» 10'N wa yoo nimï 'yɩbhä nɩɩ: «Zaa, yɩ ‑wʋä sa'a 'mö a dɔ'wʋ, sɛ ‑a nɩ 'zʋ bhä?» 11Ɔ lɛ naa: «‑Ɔ ‑kä ‑banɩ 'sɔ ‑kää, ɔ nɩ 'nyɛ ‑ɔɔɔ ‑lu ‑kä ‑bäna ‑bhlʋ. ‑Ɔ ‑kä lile ‑kä, ɔ nɩ 'nyɛmö ɔ 'bhɩa.» 12Lapoomoni a 'wʋbhliwa ‑mumuë ‑wa yimöä Zaa yɔwʋ ɔ 'kʋä 'wlu wɔlʋ a za‑a, 'n wa yoo nimï 'yɩbhä nɩɩ: «‑Atʋ, zaa, sɛ ‑a 'kä bhä ‑abhlɩ 'zʋ?» 13Zaa lɛ naa: «Sɛɛ lapoomoni 'nɩɛ 'wʋ ‑dii, a nɩ tɛ ‑sɩbhä 'wʋ dimanɩ.» 14'N 'slʋja ‑mumuë yoo nimï 'yɩbhämö nɩɩ: «Sɛ ‑a 'kä bhä ‑abhlɩ 'zʋ?» Ɔ lɛ naa: «A nɩ tɩ nɩkpɛ ‑gla 'wʋ kwä, a nɩ tɩ'ɛ nɩkpɛ 'wʋ 'kïla. 'Saa wa 'pɛnanyɩɛ, wʋ nɩ ‑zunanyɩ kɛ.»

15Nɩkpa 'wuë, Kliisɩ, puënyɔɔ Lagɔ ‑sɛɛ ‑lɛ, 'mö wa ‑kʋnɩ a‑a, zaa sɛ wa pää dlɩ a dɔ'wʋ, Zaa mɔɔ glɩnɩɛ ‑kamä puënyɔ 'la. 16Sa'a a za ɔ 'nyʋää wa 'wuë 'dɩ nɩɩ: «Nɩkpɛ a ‑mɔɔ 'ghïliɛ tenyii ‑ɔ ziiiɛ 'wʋʋ, ɔ yi yi. N'n‑ä a'bhë 'ke ‑kä n 'kä 'ɔ 'siikplii ‑mä ɔ kplɩ 'mö ‑sɛ. ‑Amö na a, 'nyu a 'yize n wɔlʋnanyɩɛ 'wlu. ‑Maa ɔbhlɩ ɔ ‑kä yii, 'Wugɔmʋʋ 'Wlɩlɩ ‑nyɛ ‑kosu 'sɔ, 'mö ɔ 'kanyɩɛ 'mö 'wlu wɔlʋnɩ. 17Ɔ ‑sua 'ɔ ‑bɩtɛɛ ɔ 'kä 'mö pʋ. Ɔ ‑kä 'mö pʋ 'wëë, yʋʋ, 'mö ɔ 'kää ‑mä gbʋ 'wʋ zʋ. ‑Maa fölɩɩ yɩbhlɩ, ‑kosu a ‑muu 'naa 'kää 'kwädlɩ 'ngïmo 'mö, ‑mä ɔ 'kɩɛ 'pä.» 18Sa'a ‑sɩbhä Zaa 'nyʋää Lagɔ 'a 'Mänatɩtɩɩ. 'N ɔ yiɛ 'dɩmözʋwɛlɩɩ a ‑bɛ ‑lɛ ‑gömö 'zʋ. 19'N ɔ yi'ɛɛ 'kämanɩnyɔ Eloodɩ 'dɩ 'nyɛ nɩɩ: «Sɛ ‑n ‑sɛɛ ‑na ‑daayu Filiipö 'ɔ nglɔɔ Elodiadɩ yɔwʋ a za, 'zoku ‑n nʋä. ‑N yɛ'ɛ ‑lizoku ‑mimii a ‑bɛ nʋ.» Zaa Batisɩ 'nyɔɔ sa'a 'dɩɩ, 20'n Eloodɩ yi'ɛɛ 'ɔ ‑lizokuu 'wʋ gbaanɩ, miɛ nɩɩ, ‑jie 'mö ɔ 'pɔɔ.

Zaa yɛ Zezwii 'wlu wɔlʋ

(Matie 3.13-17; Maakö 1.9-11)

21Zaa Batisɩ yɛ a nɩkpa a ‑bɛ 'wlu wɔlʋ 'wë 'n Zezwii yoa'aa ‑mä ghlɩ, 'n ɔ yoo 'wlu wɔlʋmö. Zezwii ‑wʋ Lagɔ bhibhe dɔ'wʋ, ɔ lɛ zʋ a sɛ'ɛ, zlɩɩ yɛ nuë do. 22'N 'Wugɔmʋʋ 'Wlɩlɩ yiɛ sɛ 'sibhë, ɔ 'kä ‑bhɩɛ ‑kpakʋ. 'N ɔ yiɛ Zezwii ‑gömö yi. 'N wɛlɩ yiɛ ‑mä zlɩ 'mö 'bhöönɩ, yɩ lɛ naa: «‑Nmö glɩnɩɛ 'na dlɩsɛkäyuu, ‑nmö ‑bhööä 'mäna 'wʋ.»

Zezwii Kliisɩ a dɩba a dɩbawa 'a nglɩɩ miɛ dɛ'ɛ

(Matie 1.1-17)

23Zezwii kä 'ylʋbö a glʋ ‑bhlʋ 'ylʋbö kʋgbä a sɛ, 'n ɔ yiɛ libhoo Lagɔ tioo 'wʋ tɛɛ. Sɛɛ nɩkpaa pää dlɩ a dɔ'wʋ, Eli a yowli Zɩzɛɛfʋ a 'yu Zezwii glɩnɩɛ. 24Eli a dɩba mɔɔ paa Mataatɩ, Mataatɩ a dɩba mɔɔ paa Levii, Levii a dɩba mɔɔ paa Mɛkii, Mɛkii a dɩba mɔɔ paa Yanayii, Yanayii a dɩba mɔɔ paa Zɩzɛɛfʋ, 25Zɩzɛɛfʋ a dɩba mɔɔ paa Matatiasɩ, Matatiasɩ a dɩba mɔɔ paa Amɔɔsɩ, Amɔɔsɩ a dɩba mɔɔ paa Naɔmö, Naɔmö a dɩba mɔɔ paa Ɛsɩli, Ɛsɩli a dɩba mɔɔ paa Nagayii, 26Nagayii a dɩba mɔɔ paa Maatɩ, Maatɩ a dɩba mɔɔ paa Matatiasɩ, Matatiasɩ a dɩba mɔɔ paa Semɩɩɛ, Semɩɩɛ a dɩba mɔɔ paa Yozɛɛkö, Yozɛɛkö a dɩba mɔɔ paa Yodaa, 27Yodaa a dɩba mɔɔ paa Yoanaa, Yoanaa a dɩba mɔɔ paa Ghlezaa, Ghlezaa a dɩba mɔɔ paa Zolobabɛɛlɩ, Zolobabɛɛlɩ a dɩba mɔɔ Salatiɛlɩ, Salatiɛlɩ a dɩba mɔɔ paa Neli, 28Neli a dɩba mɔɔ paa Mɛkii, Mɛkii a dɩba mɔɔ paa Adi, Adi a dɩba mɔɔ paa Kozaamö, Kozaamö a dɩba mɔɔ Emadaamö, Emadaamö a dɩba mɔɔ paa Ɛɛlɩ, 29Ɛɛlɩ a dɩba mɔɔ paa Zezwii, Zezwii a dɩba mɔɔ paa Eliezɛɛ, Eliezɛɛ a dɩba mɔɔ paa Yoliimö, Yoliimö a dɩba mɔɔ paa Mataatɩ, Mataatɩ a dɩba mɔɔ paa Levii, 30Levii a dɩba mɔɔ paa Simeɔɔ, Simeɔɔ a dɩba mɔɔ paa Zwidaa, Zwidaa a dɩba mɔɔ paa Zɩzɛɛfʋ, Zɩzɛɛfʋ a dɩba mɔɔ paa Yonaamö, Yonaamö a dɩba mɔɔ paa Eliakiimö, Eliakiimö a dɩba mɔɔ paa Melea, 31Melea a dɩba mɔɔ paa Mɛnaa, Mɛnaa a dɩba mɔɔ paa Matataa, Matataa a dɩba mɔɔ paa Nataa, Nataa a dɩba mɔɔ paa Daviidɩ, 32Daviidɩ a dɩba mɔɔ paa Yizayii, Yizayii a dɩba mɔɔ paa Obɛɛdɩ, Obɛɛdɩ a dɩba mɔɔ paa Boozɩ, Boozɩ a dɩba mɔɔ paa Salaa, Salaa a dɩba mɔɔ paa Naasɔɔ, Naasɔɔ a dɩba mɔɔ paa Aminadaabö, 33Aminadaabö a dɩba mɔɔ paa Adɩmɛɛ, Adɩmɛɛ a dɩba mɔɔ paa Aani, Aani a dɩba mɔɔ paa Ɛzlɔɔmö, Ɛzlɔɔmö a dɩba mɔɔ paa Falɛɛsɩ, Falɛɛsɩ a dɩba mɔɔ paa Zwidaa, 34Zwidaa a dɩba mɔɔ paa Zakɔɔbö, Zakɔɔbö a dɩba mɔɔ paa Yizaakö, Yizaakö a dɩba mɔɔ paa Ablaamö, Ablaamö a dɩba mɔɔ paa Talaa, Talaa a dɩba mɔɔ paa Nawɔɔ, Nawɔɔ a dɩba mɔɔ paa Seluukö, 35Seluukö a dɩba mɔɔ paa Ghlago, Ghlago a dɩba mɔɔ paa Falɛɛkö, Falɛɛkö a dɩba mɔɔ paa Ebɛɛlɩ, Ebɛɛlɩ a dɩba mɔɔ paa Salaa, 36Salaa a dɩba mɔɔ paa Kayinaamö, Kayinaamö a dɩba mɔɔ paa Afasaadɩ, Afasaadɩ a dɩba mɔɔ paa Sɛɛmö, Sɛɛmö a dɩba mɔɔ paa Nowee, Nowee a dɩba mɔɔ paa Lemɛɛkö, 37Lemɛɛkö a dɩba mɔɔ paa Matuzala, Matuzala a dɩba mɔɔ paa Enɔɔkö, Enɔɔkö a dɩba mɔɔ paa Zalɛɛdɩ, Zalɛɛdɩ a dɩba mɔɔ paa Malelɩɛlɩ, Malelɩɛlɩ a dɩba mɔɔ paa Kayinaa, Kayinaa a dɩba mɔɔ paa Enɔsɩ, 38Enɔsɩ a dɩba mɔɔ paa Sɛɛtɩ, Sɛɛtɩ a dɩba mɔɔ paa Adaa a dɩba, Lagɔ mɔɔ.

Currently Selected:

Lwiikö 3: bet

Highlight

Copy