Lwiikö 4

Sataa yɛ ‑mä Zezwii 'pä

(Matie 4.1-11; Maakö 1.12-13)

1Zezwii, 'Wugɔmʋʋ 'Wlɩlɩ ‑wɔɔ ‑gömö tenyii, 'n ɔ yiɛ ‑mä Zludɛɛ yɔwʋ 'bhöö, 'n Lagɔ 'a 'Wugɔmʋʋ ‑nyɔɔ yiɛ ‑mä 'muse 'klʋ mö. 2Ɔ ‑sɛ ‑mä 'ylɩ a gwlɩ 'sɔ, ‑sɩbhä Sataa pɔɔ ‑mä 'yize. Ylɩ 'la 'wuë 'mö, Zezwii 'nɩɛ ‑lu li. Zaa, yɩ 'plɩɛ 'wëë, 'n ngɔmʋ yoo 'lɩbhä. 3'N Sataa yoo 'dɩ 'nyɛ. Ɔ lɛ naa: «N‑n ‑kä ‑tiamö Lagɔ a 'Yu glɩnɩɩ, kpiyi nɩ, 'nyɛ 'dɩ, ɛ 'kä lile 'mö yinɩ.» 4Ɔ gbää sa'aa, Zezwii lɛ naa: «Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ: Lilea a 'yize ma‑a 'nɩɛ 'nglɩ ‑kä nɩkpɛ 'kä ‑bhölɩ.#4.4 Detlenɔɔmö 8.3.»

5'N Sataa ‑nyɔɔ yiɛ ‑gäga ‑bhlʋ 'wlu mö. 'N ɔ yoo ‑gba ‑bhʋlʋ ‑kpɔ 'mö mä'ä 'pɩwʋ a 'kämanɔ 'wuë 'ylimö tulanɩ. 6-7Ɔ lɛ naa: «Mä'ä 'pɩwʋ a ‑gwlɩ 'la 'wuë ‑amö wa 'nyɩɛ, zaa, ‑mɔ n ‑kä na a 'yɩbhä, n yonyɩ 'nyɛ. Zaa, ‑nmö ‑naa, n‑n ‑kä dɛ'ɛ na dlɩ 'mö ‑kokomïladigbï glu 'pä ‑n ‑kaa bʋbɔɔ, n ‑yimi 'nyɛ.» 8Ɔ gbä'ɛɛ sa'aa, Zezwii lɛ naa: «Sɛ'ɛ yɩ cɛlɩɛ nɩɩ: ‑Na ‑lowli Lagɔ a 'yize a dlɩ 'mö, ‑lɛ ‑n kää ‑n 'kä ‑kokomïladigbï glu 'pä ‑n 'kɔ bʋbɔ.#4.8 Detlenɔɔmö 6.13.»

9Zezwii 'nyɔ'ɛɛ sa'a 'dɩɩ, 'n ɔ ‑nyɔɔ yia'aa ‑mä Zeluzalɛɛmö mö, ‑mä Lagɔbudu 'Kɔdʋʋ a ghäyɩ ghäyɩ, 'n ɔ ‑nyɔɔ yiɛ ‑mä mö. Ɔ lɛ naa: «N‑n ‑kä ‑tiamö Lagɔ a 'Yu glɩnɩɩ, 'bhöö mä'ä ghäyɩ 'wʋ, ‑n 'kä ‑nanyɩ zɛmö 'pä. 10Ɛ'ɛ ‑bhö nyɩasɛ, ‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Lagɔ yi 'ɔ zuzukuu 'dɩ 'nyɛ,

yɩ ‑kamö 'wʋ ‑kʋ.

11Sɛ'ɛ yɩ cɛlɩ'ɛɛ ‑mä nɩɩ:

Lagɔzuzukuu, yɩ ‑yimö ‑su,

‑n tɩa kpiyi a'bhë gozo.» # 4.10-11 Soomö 91.11-12.

12Ɔ gbä'ɛɛ sa'aa, Zezwii lɛ naa: «Sɛ'ɛ Lagɔwɛlɩɩ gbää nɩɩ: Tɩ ‑na ‑Lowli Lagɔ 'mö 'bɩa ɔ ‑käa bhɛnɩ a za.»#4.12 Detlenɔɔmö 6.16.

13Sataa ghlɛnɩɛ sa'a kii 'wuë 'mö, ɔ'ɔɔ 'yio ghlɩɩ, 'n ɔ yoo ‑bhlɛ yɔwʋ 'bhöö, ɔ 'kä'ɛ 'tɛnyɩ ‑mɛmɛɛ 'mö ‑li 'mö yɛlaa yi.

Zezwii yɛ 'ɔ libhoo tɛɛ

(Matie 4.12-17; Maakö 1.14-15)

14‑Mi'la 'plɩɛ 'wëë, Lagɔ 'a 'Wugɔmʋʋ 'a 'mötɛɛnɔɔ ‑wʋ tenyii Zezwii ‑gömö, 'n ɔ yiɛ ‑mä Galilee‑bhölɩɩ 'mö 'bɩwʋ mö. Ɔ ‑wʋ ‑mä 'n 'ɔ nglɩɩ yiɛ saa 'wuë mlɩmanɩ. 15‑Mä a Zwiiföwaa 'a Lagɔbïdii 'mö, 'n ɔ 'cɩanɩɛ ‑mä nɩkpa Lagɔwɛlɩɩ. Nɩkpaa 'wuë, ɔ 'dɩ a ‑dɩ wa sɛɛ.

Zezwii a 'bhele a ‑nʋa 'nɔɔ ‑wa

(Matie 13.53-58; Maakö 6.1-6)

16'Ylɩ ‑bhlʋ 'mö, ‑mä Nazalɛɛtɩ, mää Zezwii 'ghlimanɩ a‑a, 'n ɔ yiɛ ‑mä mö. ‑Gwlɛnɩzlɩɩ ghlɛɛ, 'n ɔ yiɛ ‑mä Lagɔbuduu 'mö mö 'ɔ 'kwädlɩ a saa. Wa ‑wʋ ‑mä, 'n Zezwii yiɛ 'wʋ ‑sɔ, ɔ 'kä nɩkpabhë a 'yila 'klʋ Lagɔwɛlɩɩ a 'bɔgʋʋ 'mö zɛlɩ. 17Zaa, 'n wa yoo Lagɔ a 'möbhïlanɩnyɔ Ezayii 'a 'bɔgʋʋ yowʋ 'nyɛ. Ɔ këluä 'klʋʋ, 'n ɔ yiɛ wɛlɩ ‑bhlʋ ‑mä ghlɩ. Sɛ'ɛ yɩ nʋä nɩɩ:

18 «Lagɔ 'a 'Wugɔmʋʋ ‑wʋʋ ‑gömö.

Lagɔ mɔɔ ‑saaa ‑lɛ, n 'kä ngäzɩwa 'Mänatɩtɩ 'nyɛ.

Mɔɔ tieaaa, n 'kä ‑jiewaa 'dɩ 'nyɛ nɩɩ,

'wa ‑jiea yi bhɩɛ,

n ‑kä 'kukwlekäwa 'dɩ 'nyɛ nɩɩ,

'wa yilaa yi do,

n 'kä'ɛ 'klɩyɩwa 'wa ‑gblɩwaa ngli ‑sɛ,

19 n 'kʋä'ɛ 'dɩ 'nyɛ nɩɩ,

'Ylʋba ‑anyɩ 'mö ɔ 'kää wa ngäzɩdlɩ 'pää,

a yi ghlɛ.» # 4.18-19 Ezayii 61.1-2.

20Wɛlɩ 'la 'mö ɔ zɛlɩɛ 'mö. 'N ɔ yiɛ 'bɔgʋʋ 'klʋ ‑gba 'n ɔ yuä Lagɔbudu a 'yliwʋnyɔɔ yowʋ 'nyɛ, 'n ɔ yiɛ sɛ glɩ. ‑Wa ‑wʋä ‑mä 'wuë, wa ‑wʋ ‑völɩɩ 'n wa yiloa'aa kä'mö. 21'N ɔ yiɛ 'mö ‑sɛnɩ, ɔ lɛ naa: «Lagɔwɛlɩ nɩ n 'bhööä dɛ'ɛ 'mö zɛlɩɛɛ, zɩ'ɛ a'bhë, dɛ a ‑wiiɛ dɛ'ɛ 'yukwli ‑pʋnɩ dɔ'wʋʋ, yɩ yɛ 'yli 'wlʋnɩ.» 22‑Wa wʋ a‑a ‑mä 'wuë, 'ɔ wɛlɩ a ‑wɛlɩɩ ɔ bhïlaa a za, nglii mlʋää 'n wa 'yɩbhäyɩbhänɩɛ nimï nɩɩ: «Zaa, ɛ'ɛ ‑bhö ɔ da'a Zɩzɛɛfʋ ‑yowli mɔ ‑a?» 23Zezwii 'nʋä 'wa dlɩpäsaa 'möö, ɔ lɛ naa: «N ‑yi sɛ 'nine a lɛ ‑kaaa ‑sɩkaa 'pänɩ nɩɩ, ‑Dʋtaayii, puëë yɩ ‑ka ‑nanyɩ. 'N a 'kä'ɛ nɩɩ, zɩzɛlii 'wuë ‑n nʋnɩ a‑a ‑mä Kapɛnaɔmö, ‑a 'nʋ yɩ 'dɩ. Zaa, mä'ä ‑na 'bhele a'bhë, nʋnɩɛ yɩ ‑ka ‑mä ‑sɩbhä a zɩzɛli. 24‑Maa 'dɩ n nyanyɩɛ dɛ'ɛ nɩɩ, Lagɔ a 'möbhïlanɩnyɔ wa 'kää ‑mä ɔ 'bhele a'bhë 'klʋkpamö zʋʋ, ɔ'ɔɔ ‑bhölɩ. 25‑Tiamö n nyanyɩɛ dɛ'ɛ 'dɩ nɩɩ, Lagɔ a 'möbhïlanɩnyɔ Elii a 'tɛnyɩ 'mö, dɛɛ 'nyizakwëa 'nɩ a‑a 'ylʋbö ta 'kïbhë 'mö lɩbhänɩ, 'n ngɔmʋgupegupe yi a‑a mä'ä Yizlaɛlɩ‑bhölɩɩ 'wuë 'mö yii, ‑lɛ a 'tɛnyɩ 'la 'mö, 'kuzlengwlɩ a ‑bɛ ‑wʋ a ‑tiamö mä'ä Yizlaɛlɩ. 26‑Sɩbhä yɩ ‑wʋ 'mö, ‑maa Lagɔ 'nɩɛ Elii käbökuzlenglɔ 'wʋ tie, Elii 'kɔ lile 'nyɛ. 'N ɛ 'nɩ ‑bhö Sidɔɔ‑bhölɩɩ 'mö a glɔ ‑bhlʋ wa laa Salɛtaa, ‑mä a 'kuzlenglɔ ‑bhlʋ mɔ. 27'Lagɔ a 'möbhïlanɩnyɔ Elizee a 'tɛnyɩ 'mö 'yɛ, 'zlalɩbhäwa a ‑bɛ ‑wʋ a mä'ä Yizlaɛlɩ. ‑Maa Lagɔ 'nɩɛ wa gla'mö a ‑nɔ ‑bhlʋ a'bhë yɛmanɩ. ‑Maa lɛgäyi ‑bhlʋ wa laa Naamaa, ‑ɔ 'bhöönɩɛ ‑mä Silii‑bhölɩɩ 'möö, 'mö Lagɔ yɛmanɩɛ.» 28Zezwii gbää sa'aa, nɩkpa 'wuë ‑wa ‑pʋnɔ a‑a 'yukwlii, 'klɛ 'mö yɩ pʋlʋää tenyii. 29Wa 'wuë 'n wa yiɛ 'wʋ ‑sɔ 'n wa yoo ‑mä glɔ 'mö ‑sɛ, ‑mä ‑gägaa 'wa ‑glɔɔ sɩbhää 'klʋ a ‑badeyi 'wlu, 'n wa ‑nyɔɔ yiɛ ‑mä ‑gbälɛ, wa 'kɔ zɛmö 'pä. 30‑Maa wa ghlɛɛ ‑mä, 'n Zezwii yuëë jijo'wʋ 'wlʋ, 'n ɔ yiɛ mö.

Zezwii yɛ nɩkpɛ zuzukwëzokwë ‑gömö kpëti

(Maakö 1.21-28)

31Mä Galilee‑bhölɩɩ 'mö a ‑glɔɔ wa laa Kapɛnaɔmö, 'n Zezwii yiɛ ‑mä mö. ‑Gwlɛnɩzlɩɩ ghlɛɛ, 'n ɔ yiɛ ‑mä a Lagɔbuduu 'mö nɩkpa Lagɔwɛlɩɩ 'cɩanɩ. 32‑Wa ‑pʋnɔɔɔ 'yukwlii, 'ɔ 'cɩacɩasaa ‑sɩbhä zuzu a ‑sʋää ‑gömö. Ɛ'ɛ ‑bhö nyɩasɛ, ‑maa nɩkpɛ a ‑mɔ Lagɔ ‑wʋ ‑gömö a sɛ ɔ bhïlaa. 33‑Mä Lagɔbudu 'la 'mö, nɩkpɛ ‑bhlʋ ‑wʋmö a ‑mä, zuzukwëzokwë ɔ kää ‑gömö. Nɩkpɛ 'la, 'n ɔ yiɛ tenyii 'mö 'kpa, ɔ lɛ: 34«O‑o aa! Nazalɛɛtɩ a Zezwii aaa, 'saa‑wɛlɩ ‑wʋnyɩ bhä jijo'wʋ 'nɩ? ‑N ‑kanyɩ 'yli bhɩa a za ‑n yi bhä ‑a? N ‑yi ‑mɔ ‑n glɩnɩ 'tɩɩ. ‑Ɔ ‑wʋ 'Wlɩlɩ, ‑ɔ 'bhöönɩ ‑mä Lagɔ dlɩ 'mö, mö ‑n glɩnɩɛ.» 35'N Zezwii yiɛ zuzukwëzokwëa yɔwʋkanɩsɛ 'dɩ 'nyɛ nɩɩ: «'Pä ‑lɛ ‑na'a nuëa. 'Bhöö ‑sɩkaa nɩkpɛ nɩ ‑gömö.» 'N zuzukwëzokwëa yiɛ ‑lɛ nɩkpa 'wuë a 'yila 'klʋ nɩkpɛɛ sɛ bhlɩ, 'n a yoo ‑gömö 'bhöö. A 'nɔɔ ‑lizoku 'wlu nʋ 'lɩlɩlɩ. 36‑Wa ‑wʋä ‑lɛ 'wuë, 'n zuzu yuëë ‑gömö 'bhöö 'n wa 'yɩbhäyɩbhänɩɛ nimï nɩɩ: «Wɛlɩ a ‑mi bhä sɛ ‑ma nɩ 'nɩ? Nɩkpɛ ‑mɔ nɩ 'mö ɔ 'tɛɛ. Nza ɔ nyɛɛ zuzukuzokuu 'dɩ 'n yɩ 'bhööä nɩkpa ‑gömö.» 37'N Zezwii 'a nglɩɩ yiɛ ‑mä Galilee‑bhölɩɩ 'wuë ‑gömö mlɩmanɩ.

Zezwii yɛ guzuwa a ‑bɛ yɛmanɩ

(Matie 8.14-17; Maakö 1.29-34)

38Zezwii 'bhööä ‑mä Lagɔbudu 'möö, 'n ɔ yiɛ ‑mä Simɔɔ a 'ligbë 'mö mö. Ɔ lɛ 'bhöö 'lɛ, Simɔɔ a 'wʋtɛnglɛ, wëtlokwëë lɩbhɔɔ tenyii zaa, ɔ ghlɛɛ ‑lɛ, 'n wa yoo 'dɩ 'nyɛ nɩɩ, ɔ nɩ yo 'ylɩmö. 39'N ɔ yiɛ ‑lɛ nglɔɔ yɔwʋ ‑dɔ 'wʋ yi, 'n ɔ yiɛ wëtlokwëa 'dɩ 'nyɛ nɩɩ, bhɩɛ ‑sɩkaa nglɔ nɩ ku 'mö. 'N wëtlokwëa yiɛ nglɔɔ ku 'mö bhɩɛ, 'n ɔ yiɛ 'wʋ ‑sɔ cuu, 'n ɔ yuëë 'wʋ pi.

40‑Kidosɛ ghlɛɛ, 'n nɩkpaa ‑nyɛ 'wa guzuwaa a kii 'wuë yiɛ yi. 'N Zezwii yuëë ‑sɩbhä wa 'wuë bhʋlʋbhlʋ kätɩkpö 'wlu zʋ 'n ɔ yuëë yɛmanɩ. 41Nɩkpa a ‑bɛ ‑wa kä a‑a zuzukuzoku ‑gömöö, 'n yɩ 'bhuëë ‑gömö, yɩ ‑wʋ 'mö 'kpa dɔ'wʋ nɩɩ: «Lagɔ 'a Yuu mö ‑n glɩnɩ aa.» ‑Maa Zezwii, yɔwʋkanɩsɛ ɔ 'nyɩɛ 'dɩ nɩɩ yɩ nɩ 'pä ‑lɛ nuë, ɛ'ɛ ‑bhö nyɩasɛ, ‑maa yɩ yi sɛ nɩɩ Kliisɩ, Puënyɔɔ Lagɔ ‑sɛɛ ‑lɛ 'mö ɔ glɩnɩɛ.

42Zlɩ zɩɛ, 'n Zezwii yiɛ ‑mä glɔ 'mö 'bhöö, dɛ ‑bhlʋ dɛɛ nɩkpɛ 'nɩɛ ‑wʋ, 'n ɔ yiɛ ‑lɛ mö. 'N nɩkpa a ‑bɛ yoo sɛ tɛlɩɛ mö. Wa ghïloo, wa lɛ naa: «‑Tɩnyɩa'a yɔwʋ 'bhöö.» 43Zezwii lɛ naa: «N'nn, ‑maa n kä n 'kä'ɛ ‑mä ‑gwlɩ ‑mi'la ‑gömö mö, 'pɩwʋ mää Lagɔ 'kämanɩɛ a 'Mänatɩtɩɩ biamö. Ɛ'ɛ ‑bhö nyɩasɛ ‑maa yɩ za Lagɔ tieaaa.» 44'N ɔ yiɛ mö. ‑Mä Galilee‑bhölɩɩ 'mö a Lagɔbïdii 'mö, 'n ɔ yiɛ ‑mä Lagɔwɛlɩɩ bhïlanɩ.

Currently Selected:

Lwiikö 4: bet

Highlight

Copy

Want to have your highlights saved across all your devices? Sign up or sign in

Learn More About BdG2