Matie 23

Zezwii lɛ wa nɩ 'nɛmanɩ Falizɩɛwaa ‑nyɛ Moyizɩ 'a Gböö a 'cɩawaa 'sɔ 'wʋ

(Maakö 12.38-39; Lwiikö 11.43,46; 20.45-46)

1Yɩ 'plɩɛ sa'a 'wëë, 'n Zezwii yiɛ ‑bʋbʋʋ ‑nyɛ 'ɔ ‑gänɩwaa 'sɔ 'dɩ 'nyɛ, ɔ lɛ naa: 2«Moyizɩ 'a Gböö a 'cɩawaa ‑nyɛ Falizɩɛwaa 'sɔ, Moyizɩ a 'bhle 'mö wa ‑wʋä, mʋa sɛnanyɩɛ 'ɔ Gböö zɛmö. 3Zaa, a kä a 'kʋä 'klʋkpamö zʋ, sɛ wa nyanyɩɛ 'dɩ 'wuë, a 'kä ‑sɩbhä 'zʋ. ‑Maa 'wa nɛmönɛmösaa, a nɩ tɩa ‑sɩbhä nɛmö. Ɛ'ɛ ‑bhö nyɩasɛ, ‑maa sɛ wa 'cɩaa nɩkpaa, wa'bhï wa'a nɛmö ‑sɩbhä. 4'Wa 'cɩacɩasaa, ‑sɩbhä ‑bhɩɛ 'gbluku 'kädɩ. Wa ‑kɩɩ nɩkpa 'wlu sula 'wëë, wa'a kwänuë sɛ'ɛ 'tikïyie 'wʋ yɩ ‑suswee. 5'Wa nʋnʋlii 'wuë 'mö, 'yila wa tɛlɩɛ sɛ. Lagɔbɔgʋʋ 'mö a kïbhï ‑mimii a ‑bɛ, 'mö wa cɛlɩɛ, 'n wa gwɩɛ sɛ, 'n wa gwaniɛ 'klʋ, 'n wa gwani'ɛɛ swɩ yɔwʋ. Sɛ'ɛ Lagɔ gbä a‑a nɩɩ, wa nɩ 'zʋ 'wa ‑bänɩɩ ‑yʋkʋpɩyie nuë 'wʋ yɩ 'kä 'gbëbhï 'yli ‑kä. ‑Maa wabhlɩ, ‑lɛ a ‑yʋkʋpɩyie 'la, 'bhʋɔmanɩ wa 'bhʋɔmaniɛ. 6'Kädɩ ‑kʋä wäzɩ, wa ‑nyʋä 'kä 'wʋ linɩɩ, 'bhli a ‑bhlii 'mö wa gbäzɩɛ 'mö. ‑Mä Lagɔbïdii 'mö, wa ‑kä'ɛ ‑mä bhibhee möö, wa yɩbhä wa 'kä'ɛ ‑mä 'yuku a ‑klikpï a ‑klikpïï 'mö sɛ glɩ. 7‑Mä 'du 'mö, wa yɩbhä wa nɩ bhäluë 'klʋkpamözʋsɛ. Wa yɩbhä'ɛ wa nɩ lʋä 'cɩawa 'kädɩ. 8‑Maa abhʋa na ‑nʋa abhlɩ, a nɩ tɩ sɛ tɛlɩ wa 'kanyɩ Lagɔwɛlɩ a 'cɩawa 'kädɩ 'la, ‑maa a 'wuë, ‑daayuë a ‑muëë mlɩnɩɛ 'mö Lagɔ 'a 'yila 'klʋ a dɔ'wʋʋ, 'mö a glɩnɩɛ. A kä 'cɩanyɔ ‑bhlʋ cuu. 9A nɩ tɩ mä'ä dʋdʋ 'wʋ nɩkpɛ a Dɩba la, ‑maa a 'kä Dɩba ‑bhʋlʋ ‑kpöö, mɔɔ ‑wʋä ‑mä ghäyɩ 'wʋ. 10Abhʋa na ‑nʋa, a 'yize gla'mö, ‑bɛ nɩ tɩ ɔnyɩ 'kämanɩnyɔ la. ‑Maa Puënyɔɔ Lagɔ ‑sɛɛ ‑lɛ, ɔ ‑bhʋlʋ ‑kpɔ, mɔɔ 'kämananyɩɛ ‑gömö. 11A gla'mö a dɔ'wʋ, ‑ɔ ‑kä ɔ 'kä 'kɔdɔɔ glɩnɩ nʋʋ, ɔ nɩ ‑bhɩɔ 'mö ɔ 'kä a 'yliwʋnyɔ glɩnɩ. 12Sɛ'ɛ n gbää nɩɩ, ‑ɔ ‑kä ɔnyɩ 'kɔdɔ 'mö 'wʋ 'libhïï, Lagɔ yo dʋdʋ 'wʋ ‑lɛ, ‑maa ‑ɔ ‑kä ɔnyɩ 'tikëyi 'mö 'wʋ 'libhïï, 'mö Lagɔ 'kää 'kɔdɔ 'wʋ 'zʋa.

Zezwii yɛ Moyizɩ 'a Gböö a 'cɩawaa ‑nyɛ Falizɩɛwaa 'sɔ wɛlɩ bhïlanɩ

(Maakö 12.40; Lwiikö 11.39-52; 20.45-47)

13Abhʋa Moyizɩ 'a Gböö a 'cɩawaa, a ‑nyɛ Falizɩɛwaa 'sɔ, 'kwlɩsɔkäwa a glɩnɩɛ, kplee 'kanyɩɛ köbhä! Ɛ'ɛ ‑bhö nyɩasɛ, ‑maa 'pɩwʋ mää Lagɔ 'kämanɩɛ, nɩkpaa ‑wa yɩbhää wa 'kä ‑mä möö, 'mö a sɛɛ 'yio 'wʋ. A'bhï, ‑a'a mö ‑mä, ‑maa ‑wa 'yɩbhä a‑a wa 'kä ‑mä möö, 'wa 'yioo, 'mö a klɛɛ.

[14Abhʋa Moyizɩ 'a Gböö a 'cɩawa, a ‑nyɛ Falizɩɛwa 'sɔ, 'kwɩsɔkäwa a glɩnɩɛ, kplee 'kanyɩɛ köbhä. Ɛ'ɛ ‑bhö nyɩasɛ, ‑maa a ‑kä Lagɔ bhibhee, a bhibhe ‑këkëkë 'yila 'kanyɩa 'wʋ mö a za. ‑Maa ‑tiamö a dɔ'wʋ, ylʋwa a glɩnɩɛ, 'n a sɛɛ 'Kuzlengwlɩɩ a ‑lii 'wuë kä'mö. ‑Sɩbhä a za, 'a ‑zijlea yi tenyii 'mö 'tɛɛ.] 15Abhʋa Moyizɩ 'a Gböö a 'cɩawa, a ‑nyɛ Falizɩɛwaa 'sɔ, 'kwlɩsɔkäwa a glɩnɩɛ, kplee 'kanyɩɛ köbhä. Abhʋa tʋä nyuu 'n a möä dʋdʋkpäta 'wuë ‑gömö, saa 'wuë, 'n a tɛlɩɛ sɛ a 'kä nɩkpɛ ‑bhlʋ ghlɩ, ɔ 'kä 'a ‑zɩkpaa 'mö a ‑nɔ 'zʋ. Ɔ ‑kɔɔ 'zʋ 'wëë 'n a nyimoo 'lɩlɩlɩ, 'n ɔ zeanyɩɛ 'wʋ, 'wʋ 'sɔ, 'n ɔ zʋä ‑kosu 'mö a mömönyɔ. 16Sɛ'ɛ n gbää nɩɩ, kplee 'kanyɩɛ köbhä. A 'kä ‑bhɩɛ 'kukwlekäwa 'wë, 'n a ‑suä 'a zɩbʋnɩkpa. A lɛ naa: Nɩkpɛ ‑kä Lagɔbudu 'Kɔdʋʋ 'mö zligonɩ 'wë, 'saa ɔ gbä a‑a ɔ 'kä nʋ 'n ɔ 'nua'a nʋʋ, yɩ'ɩɛ 'mö 'tɛɛ. ‑Maa ‑sikaa ‑a ‑wʋä ‑mä Lagɔbudu 'Kɔdʋʋ 'möö, 'n nɩkpɛ ‑kaa 'mö zligonɩ 'wëë, 'saa 'la ɔ gbä a‑a ɔ 'kä nʋʋ, ɔ nɩ nu klɩpaa. 17‑Ɔɔ'nɛnɩwanyɩ, a'aa ‑tiamö sɛ yɩlɩ. ‑Sikaa ‑a ‑wʋä ‑mä Lagɔbudu 'Kɔdʋʋ 'mö ma, 'n Lagɔbudu 'Kɔdʋʋ a'bhë, ‑wʋnyɩ za ‑sikaa glɩnɩɛ Lagɔ a 'yize a ‑la mu, yɩ 'sɔ ‑kpɔ a dɔ'wʋ, 'saa kä bhä dɛsɛ? 18Sɛ'ɛ a nʋ'ɛɛ nɩɩ: 'Klʋbʋbɔnɩtebhlea, ‑n ‑kaa 'mö zligonɩ 'wë, 'saa ‑n gbä a‑a, ‑n 'kä nʋ, ‑wʋnyɩ za ‑n zligonɩ a‑a 'tebhlea 'möö, n‑n 'nʋa'a nʋʋ, yɩ'ɩɛ 'mö 'tɛɛ. ‑Maa 'saa wa zʋä ‑lɛ 'tebhlea 'klʋ, wa 'kʋ Lagɔ bʋbɔnɩɩ, n‑n ‑kʋʋ 'mö zligonɩ 'wëë, 'saa 'la ‑n gbä a‑a ‑n 'kä nʋʋ, nu klɩpaa. 19Sɛ'ɛ n gbää nɩɩ, a'aa ‑tiamö sɛ yɩlɩ. Bʋbɔnɩluu wa zʋä ‑lɛ 'tebhlea 'klʋ mu, 'n 'tebhlea a'bhë, ‑anyɩ za ‑lu 'la glɩnɩɛ Lagɔ a 'yize a ‑lu ma, yɩ 'sɔ ‑kpɔ a dɔ'wʋ 'saa kä bhä dɛsɛ? 20Sɛ'ɛ n gbää nɩɩ, ‑n ‑kä 'klʋbʋbɔnɩtebhlea 'mö zligonɩɩ, 'saa wa zʋä ‑lɛ wa 'kʋ Lagɔ bʋbɔnɩɩ, mö ‑n zligonɩmöä 'gämö 'mö. 21‑N ‑kä Lagɔbudu 'Kɔdʋʋ 'mö zligonɩɩ, Lagɔ a'bhë ‑ɔ ‑këluuä, mö ‑n zligonɩmöä 'gämö 'mö. 22‑N ‑kä'ɛ zlɩɩ 'mö zligonɩɩ, ‑mä zlɩ 'mö, Lagɔ ‑ɔ 'kämanɩɛ ‑lii 'wuë ‑gömöö, ‑mä ɔ ‑wʋä zaa, ɔ'bhë mö ‑n zligonɩmöä 'gämö 'mö.

23Abhʋa Moyizɩ 'a Gböö a 'cɩawa, a ‑nyɛ Falizɩɛwa 'sɔ, 'kwɩsɔkäwa a glɩnɩɛ, kplee 'kanyɩɛ köbhä! 'A zɛpʋmöpälii 'tikïtikïyiea, a ‑kɩɩ ‑sɛɛ, ɛ ‑kä jɛja, ɛ ‑kä 'buuti, 'n ɛ ‑kä'ɛ ‑zɔlɔkpɩɩ, 'mö a zɛlɩɛ, yɩ kʋgbänanɩɩ 'wuë 'mö a libhïä 'wʋ, 'n a nʋä sɛ'ɛ ‑a nyɛɛ Lagɔ. A zʋ sa'a, ‑maa a 'kä nɩkpa ‑gömö a dɔ'wʋ ‑kpöö 'wʋ ‑wʋ, a 'kä ngäzɩdlɩ ‑kä, sɛ a yɛɛ gbä 'wëë, a 'kä ‑sɩbhä 'zʋ, yɩ dɔ'wʋ, a gbʋ 'nɩɛ ‑mä ‑wʋ. ‑Maa 'lɩlɩlɩ a dɔ'wʋ, Lagɔ 'a Gböö 'mö a kïbhï 'la ta ‑kpɔ, mɩɩ kä a‑a yɩ 'kanyɩ dɛsɛ kɛ ‑känɩ, 'mö a kä a‑a a 'kä 'klʋkpamö zʋ 'wë, ‑mi a nʋä da'a, a 'kɩ ‑lɛ ‑gömö 'zʋ. 24A ‑kä 'a nʋʋ 'nɩmää yii, a kplu 'mö ‑këkëkë, a tɩa 'zɔzɔyeyi mla a za. ‑Maa ‑sɩbhä yɩ ‑wʋ 'mö, nɩmɛ wa laa samoo, ɛ ‑gwlibhë 'la, ɛ ‑kä ɛ mlamladɔ'wʋʋ, a ngulu 'wʋ a 'kä ɛ 'wuë mla.

25Abhʋa Moyizɩ 'a Gböö a 'cɩawa, a ‑nyɛ Falizɩɛwaa 'sɔ, 'kwlɩsɔkäwa a glɩnɩɛ, kplee 'kanyɩɛ köbhä! A ‑kä 'a 'kɔpɩɩ ‑nyɛ 'a 'bïï 'sɔ wɔlʋ yɩ 'kä 'wlɩlɩ plɛ Lagɔ a 'yila 'klʋ a dɔ'wʋʋ, yɩ ku yɔwʋ a 'yize ‑lɛ a wɔlʋä. 'N ‑mä yɩ 'mlɩ yiee ‑lii 'a dlɩpäsɛzokwëa 'pänanyɩɛ 'wʋ, a ghliɛ 'wi ‑nyɛ ‑mi a ‑sɛɛ nɩkpaa ‑glasɛ kä'mö 'sɔ 'wʋ. 26Falizɩɛyi ‑nmö 'nɩɛ sɛ yɩlɩɩ! Wɔlʋä ‑mä 'kɔpʋʋ a 'mlɩ 'wë, nzɩɩ ‑mä ‑nyɛ ku yɔwʋ 'sɔ, yɩ 'kä 'gämö 'wlɩlɩ ‑wʋnɩ.

27Abhʋa Moyizɩ 'a Gböö a 'cɩawa, a ‑nyɛ Falizɩɛwaa 'sɔ, 'kwlɩsɔkäwa a glɩnɩɛ, kplee 'kanyɩɛ köbhä! Sɛɛ lesikpï bunɔ'ɛ, 'n yɩ klʋʋ nɛnɩ'ɛ 'ylimö, 'n ‑mä yɩ 'mö nɩkpakwa su'ɛ ‑mä, 'n ‑mä ‑bhö'ɛ ‑nyɛnɩ 'wʋ tenyii, ‑sɩbhä a ‑wʋmöä. 28Ɛ'ɛ ‑bhö nyɩasɛ, ‑maa nɩkpa ‑kaanyɩ 'wʋ yɩlɩɩ, wa lɛ wabhlɩ nɩɩ, a zlɔnɩ 'mö Lagɔ a 'yila 'klʋ a dɔ'wʋ, ‑zɛglɛgbaa, ‑mä a dila zɛmö 'wuë, 'kwlɩsɔkäkʋ ‑nyɛ 'nyinyloli ‑mimii 'sɔ mɩɩ suä ‑mä.

29Sɛ'ɛ n gbää nɩɩ, abhʋa Moyizɩ 'a Gböö a 'cɩawaa, a ‑nyɛ Falizɩɛwaa 'sɔ, 'kwlɩsɔkäwa a glɩnɩɛ, kplee 'kanyɩɛ köbhä! Lagɔ 'a bhla'mö a 'möbhïlanɩwaa, 'wa lesikpïï 'mö a sɩbhää sasɛ. Nɩkpa ‑mumuë ‑wa zlɔnɩ a‑a 'mö Lagɔ a 'yila 'klʋ a dɔ'wʋʋ, 'n a blɔ'ɛɛ 'wa lesikpïï. 30A ‑kä ‑sɩbhä 'zʋ dɔ'wʋ ‑wʋʋ, sɛ'ɛ a nʋä nɩɩ: ‑Aa dɩbawa a dɩbawa a 'tɛnyɩ 'mö, ‑a ‑kä a ‑bhölɩɩ, ‑a ‑nyʋä 'naa 'kä a gwë ‑gbaanɩ ‑a 'kä Lagɔ 'a 'möbhïlanɩwaa 'lɩbhä. 31‑Mä 'a bhïlawɛlɩɩ 'mö, abhʋa köbhaa da'a anyɩ gbʋ nɩɩ, ‑wa 'lɩbhä a‑a Lagɔ 'a 'möbhïlanɩwaa, wa 'yuë a glɩnɩɛ. 32Zaa, 'saa a dɩbawa a dɩbawa tɛɛ a‑a, a nɩ bhɩʋ zɛmö. 33Tɩmanyɩ! 'Bhʋtɩmanɩkpanyɩ! A pä bhä dlɩ nɩɩ, ‑kosuu ‑wʋʋ 'ngïmoo 'wʋʋ, a yu ngli 'pʋ ‑a? 34A ‑pʋnɩ 'yukwli, Lagɔ 'a 'möbhïlanɩwaa, n yeanyuë 'wʋ tie, n yeanyɩ 'nɛɛnɩwa 'wʋ tie, Moyizɩ 'a Gböö a 'cɩawaa, n yeanyuë 'wʋ tie. A yi ‑mumuë 'lɩbhä wa yi 'ku, a yi ‑mumuë su 'klʋ kʋnɩ, ‑mä 'a Lagɔbïdii 'mö, a yi ‑mä ‑mumuë 'sɛlɩnɩ, ‑gwlɩɩ 'wuë ‑gömö, mä wa ‑wʋä, a yuë ‑mä ghlɩ, a yuë 'zwɩ zia. 35Yɩ za, nɩkpaa 'wuë ‑waaa gbʋ ‑gömö ‑kä, a dɩbawa 'lɩbhä 'fʋʋ, wa 'lɩbhälɩbhägbʋʋ, abhʋa Lagɔ 'kää wʋ 'pɛna 'nyɛ. Abɛɛlɩ, ‑ɔ zlɔnɩɛ 'mö Lagɔ a 'yila 'klʋ a dɔ'wʋʋ, tɛɛnɩ dɛ wa 'lɩbhɔɔ a 'tɛnyɩ 'mö, wa ‑wʋ nɩkpaa 'lɩbhä dɔ'wʋ ‑këë, 'n wa yiɛ Belekia ‑yowli Zakalii 'wʋ ghlɛ. Zakalii, a 'bhɩa 'lɩbhänɩɛ ‑mä Lagɔligbëa 'mö, ‑lɛ 'pɩwʋ a bʋbɔnɩdaa ‑nyɛ Lagɔbudu 'Kɔdʋʋ 'sɔ a jijo'wʋʋ, 'mö n gaaa. 36'Dɩ n nyanyɩɛ dɛ'ɛ nɩɩ, nɩkpa 'la 'wuë wa 'lɩbhää, abhʋa ‑sɩkaa a nɩkpaa, abhʋa Lagɔ 'kää 'wa 'lɩbhälɩbhägbʋʋ ‑gömö 'zʋ.

Zezwii yɛ Zeluzalɛɛmö a ‑nʋa a za 'wi

(Lwiikö 13.34-35)

37Yeee! Zeluzalɛɛmö a ‑nʋänyɩ, Yeee! Zeluzalɛɛmö a ‑nʋänyɩ, Lagɔ 'a 'möbhïlanɩwaa, abhʋa lɩbhʋä. ‑Muë Lagɔ tianyɩɛ 'wʋ, abhʋaa lɩbhʋää 'kpɩ 'möö, sɛɛ ‑kɔkɔ pä'ɛ wʋ 'yuë ‑këpï zɛmö, ɔ 'kʋä 'wʋ kpëti, ‑sɩbhä n yɩbhä a‑a nyɩasɛ n 'kanyɩ a 'wuë ‑lɛ na yɔwʋ 'wlu 'yɩbhanɩ, ‑maa a'aa 'wʋ nglu 'lɩlɩlɩ. 38A yɩɛ, tɛɛnɩa'a ‑sɩkaa dɛ'ɛ, 'a ‑glɔɔ, Lagɔ yu 'wʋ ylɛ. 39N nyanyɩ 'dɩ nɩɩ, a 'naa ‑kaaa'a 'ylɩmö ‑këë, 'n a 'kää 'ylɩ ‑bhlʋ 'mö nɩɩ: ‑Ɔ yiɛ dɛ'ɛ ‑Alowli Lagɔ a 'nglɩ 'möö, Lagɔ nɩ 'pɔ 'nyu.»

Currently Selected:

Matie 23: bet

Highlight

Copy