Maakö 2

Zezwii yɛ kpälɛkpälɛnyɔ yɛmanɩ

(Matie 9.1-8; Lwiikö 5.17-26)

1'Ylɩya 'plɩɛ, 'n Zezwii yiɛ ‑mä Kapɛnaɔmö nimï mö. 'N wa yiɛ 'nʋ nɩɩ, ɔ ‑wʋ ‑mä 'ligbë 'mö. 2'N nɩkpa 'kɔkɔmlɛ yiɛ ‑lɛ 'wlu 'titanɩ. ‑Lɛ ‑buduu a ngloluë 'wʋ, kple a sɛsibhëadɛ 'nɩɛ ‑lɛ ‑wʋ. 'N ɔ 'cʋʋä Lagɔwɛlɩ. 3'N wa yoo kpälɛkpälɛnyɔ ‑bhlʋ ‑lɛ. Nɩkpa ‑mʋäna ‑soo. 4‑Maa nɩkpaa a zunɔɔ a za, wa'aa bhɛnɩ wa 'kä Zezwii yɔwʋ ghlɛ. Zaa, 'n wa yiɛ ‑mä ‑budu ‑gömö ‑gbälɛ, 'n wa yiɛ ‑mä ‑fële ‑dɩ. Kpälɛkpälɛnyɔɔ pö ‑sɛpʋ 'mö, ‑lɛ Zezwii dlɩ 'mö 'n wa yoo ‑lɛ 'kwïlanɩ. 5Zezwii 'yɩɛ 'wa dlɩ'wʋkänʋʋ 'ylɩmöö, 'n ɔ yiɛ kpälɛkpälɛnyɔɔ 'dɩ 'nyɛ nɩɩ: «Na 'yu, ‑na'a 'nyinylolii a gbʋʋ yɛ bhɩɛ.» 6Gböö a 'cɩawa ‑mumuë ‑wa ‑wʋ a‑a ‑lɛ, 'n wa yiɛ 'mlɩ bhïlanɩ. 7Wa lɛ: «'Saa bhä 'n nɩkpɛ mɔ nɩ bhïla ɔ sa'a? Lagɔ a 'nglɩ ɔ nyimaa. ‑Ɔ kä bhä ɔ 'kä 'nyinyloli a gbʋ bhɩa 'n ɛ 'nɩ ‑bhö Lagɔ a 'yize mɔɔ?» 8Wa 'pää sa'a dlɩ cuu, 'n Zezwii 'yɩɛ wa dlɩpäsaa yɩbhlɩnɩ 'n ɔ yuëë nimï 'yɩbhä nɩɩ: «'Saa bhä 'n a pä bhä sa'a dlɩ? 9N 'kä kpälɛkpälɛnyɔ nɩ 'dɩ 'nyɛ nɩɩ, ‑na'a nyinylolii a gbʋʋ yɛ bhɩɛ, yɩ ‑nyɛ n 'kɔ'ɛ 'dɩ 'nyɛ nɩɩ, ‑sɔ 'wʋ, 'libhï ‑na'a ‑sɛpʋ 'wʋ, nɛmö! Yɩ 'sɔɔ a dɔ'wʋ, ‑mii 'tɛɛ bhä 'mö? 10A nɩ ‑yi sɛ nɩɩ, Nɩkpɛ a 'Yu, mɔɔ kää ɔ 'kä mä'ä dʋdʋ 'wʋ nɩkpɛ 'nyinyloli a gbʋ ‑gömö ‑sɛ.» Zaa, 'n ɔ yiɛ kpälɛkpälɛnyɔɔ 'dɩ 'nyɛ nɩɩ: 11«‑Sɔ 'wʋ, 'libhï ‑na'a ‑sɛpʋ 'wʋ ‑n 'kä 'ligbë 'mö mö!» 12Zezwii gbää sa'a cuu, 'n kpälɛkpälɛnyɔɔ yiɛ 'wʋ ‑sɔ, 'n ɔ yiɛ 'ɔ ‑sɛpʋʋ 'wʋ 'libhï, nɩkpa 'wuë a 'yila 'klʋ, 'n ɔ yiɛ ‑mä 'wlʋ. Wa 'wuë 'n zuzu yuëë ‑gömö 'bhöö, 'n wa 'ghlimanɩɛ Lagɔ a 'nglɩ, n wa nʋä: «‑Aaa ‑bhlɛ tɛkäsɛ sɛ'ɛ 'ylɩmö!»

Zezwii yɛ Levii wäzɩ

(Matie 9.9-13; Lwiikö 5.27-32)

13‑Mi'la 'plɩɛ 'wëë, 'n Zezwii yi'ɛɛ ‑mä Galilee a 'nyu 'kɔdʋʋ yɔwʋ mö. Nɩkpaa 'bhöönɩ saa 'wuë 'n wa yoo yɔwʋ, 'n ɔ nyʋä Lagɔ 'a wɛlɩɩ. 14Ɔ 'bhööä ‑lɛ, ɔ ‑wʋ mö dɔ'wʋ, 'n ɔ yiɛ Alɩfee yowli Levii 'ylɩmö. Ɔ glɩ ‑mä lapoopɛnɩbuduu 'mö. 'N Zezwii yoo wäzɩ. Ɔ lɛ: «Levii, yi ‑n ‑kaa ‑gänɩ!» Ɔ gbää sa'aa, 'n Levii yiɛ 'wʋ ‑sɔ 'n ɔ yoo 'bɩwʋ bhlinɩ. 15'Ylɩ ‑bhlʋ 'mö, Zezwii ‑nyɛ 'ɔ ‑gänɩwaa 'sɔ, 'n wa yiɛ ‑mä Levii a 'ligbë 'mö lie mö. Lapoomoni a 'wʋbhliwa wa ‑nyɛ 'nyinylolinʋwa 'sɔ, mʋa ‑gänɩ a‑a Zezwii. Wa 'wuë, 'n ɔ ‑nyʋä yiɛ 'wʋ linɩ. 16Gböö a 'cɩawaa ‑wa glɩnɩmöä Falizɩɛwaa, wa 'yiɛ 'ylɩmöö, 'n wa yiɛ Zezwii 'a ‑gänɩwaa nimï 'yɩbhä. Wa lɛ: «Sɛ yɩ ‑wʋ ɔ 'mö, 'nyinylolinʋwa 'la 'n a 'bhidɩba ‑nyʋä linɩ ɔ 'wʋ 'nɩ?» 17Zezwii 'nwiɛ 'n ɔ yuëë 'dɩ 'nyɛ nɩɩ: «‑Ɔ ‑yɛɛ, ɔ'ɔ tɛlɩ ‑dʋtaa sɛ, ‑maa ‑ɔɔɔ ‑yɛ mɔɔ tɛlɩɛ ‑dʋtaa sɛɛ. Miɛ nɩɩ, nɩkpa ‑wa zlɔnɩɛ 'möö, wa za n'n‑ä mä'ä dʋdʋ 'wʋ yi, ‑maa ‑wa glɩnɩɛ 'nyinylolinʋwaa, wa za n yiɛ, n 'kʋä wäzɩ.»

Sɛ'ɛ Zezwii gbää suplɛplʋ a dɛ

(Matie 9.14-17; Lwiikö 5.33-39)

18'Ylɩ ‑bhlʋ 'mö Zaa Batisɩ 'a ‑gänɩwaa ‑nyɛ Falizɩɛwaa 'sɔ, wa ‑wʋ 'su 'mö, 'n nɩkpaa yiɛ ‑mä Zezwii ghlɩ, 'n wa yoo nimï 'yɩbhä nɩɩ: «Zaa Batisɩ 'a ‑gänɩwaa plɛ su. Falizɩɛwaa plɛ su. 'Saa ɔ 'n ‑na'a ‑gänɩwaa 'nɩ plɛ su?» 19'N Zezwii yuëë 'dɩ 'nyɛ nɩɩ: «Nɩkpɛ ‑kä 'nglɔ kwä, 'n ɔ 'tuawa ‑kɔɔ 'wʋ 'bhli dɔ'wʋ ‑wʋʋ, 'n nglʋkwänyɔɔ ‑kä ‑bhlɛ ‑lɛ ‑wʋʋ, wa yi bhä su plɛ ‑a? N'nn! Wa 'naa 'kä su plɛ. 20‑Maa 'tɛnyɩ ‑bhlʋ yi ghlɛ dɛ wa 'kʋä nglʋkwänyɔɔ jijo 'wʋ ‑sɛɛ. ‑Lɛ a 'tɛnyɩ 'la 'mö, wa yi su plɛ.» 21'N ɔ yuë'ɛɛ 'dɩ 'nyɛ nɩɩ: «Wa'a 'kplɛnɩ ‑bänagɔgɔ a ‑fële 'mö ‑yʋkʋpɩɔlulu, wa ‑kä ‑sɩbhä zʋʋ, ‑lɛ ghɔlɔ a ghɔlɔɔ tenyii, 'n ‑fëlea 'ghlimanɩɛ 'mö. 22'N wa'a pälɩ'ɛ nʋyɔlʋ 'kplabhëgɔgɔ 'mö, wa ‑kä ‑sɩbhä zʋʋ, 'kplabhëa ghɔlɔ a ghlɔɔ 'n nʋʋ 'suloo sɛ, yɩ 'sɔɔ 'n yɩ nyimonɩɛ 'gämö. Nza wa pälɩɛ nʋyɔlʋ 'kplabhëlele 'mö.»

Sɛ'ɛ Zezwii gbää Zwiiföwaa 'a ‑gwlɛnɩzlɩɩ a dɛ

(Matie 12.1-8; Lwiikö 6.1-5)

23 ‑Gwlɛnɩzlɩ ‑bhlʋ 'mö, Zezwii ‑nyɛ 'ɔ ‑gänɩwaa 'sɔ mʋa ghlɛnɩɛ 'lagbïle 'mö. ‑Nyɔɔ a sɛ a lilee ‑glʋä ‑mä. 'N 'ɔ ‑gänɩwaa ‑dɩnɩɛ lilea ghäyɩ, 'n wa leaa. 24Falizɩɛwaa 'yuëë 'ylɩmöö, 'n wa yiɛ Zezwii nimï 'yɩbhä nɩɩ: «Yɩɛ ‑mä sɛɛ ‑na'a ‑gänɩwaa zʋä, 'saa ɔ, 'n sɛɛ wa'a 'zʋä ‑gwlɛnɩzlɩɩ, 'n wa zʋ ɔ ‑sɩbhä?» 25Zezwii lɛ naa: «Lagɔbɔgʋʋ 'mö 'a wɛlɩɩ ‑yɩ cɛlɩɛ ‑mä, ‑yɩ bhïlaa Daviidɩ ‑nyɛ 'ɔ nɩkpaa 'sɔ a dɛ, ngɔmʋ 'lɩbhʋä 'ylɩ ‑bhlʋ 'mö a sɛ wa 'zʋä, a 'ni ɔ ‑zɩ 'mö zɛlɩ ‑a? 26Lagɔbʋbɔnyɔ 'kɔdɔɔ wa laa Abiataa a 'tɛnyɩ 'mö, sɛɛ Daviidɩ plɛ a‑a ‑mä Lagɔbudu 'mö, Lagɔbʋbɔnɩfɔlɔ, ‑wʋ ‑wʋ a‑a ‑mä, ngɔmʋ a za, 'n ɔ yuä li n ɔ yi'ɛɛ 'ɔ nɩkpaa 'nyɛ 'n wa yiɛ limö, a 'ni ɔ yi ‑a? ‑A'a Gböö a dɔ'wʋ, 'fɔlɔ 'la, Lagɔbʋbɔwaa a 'yize mʋa kä a‑a wa 'kʋ li.» 27«Nza n gbää nɩɩ, nɩkpɛ a za, ‑gwlɛnɩzlɩ ‑wʋä ‑lɛ, ‑maa ‑gwlɛnɩzlɩ a za nɩkpɛ 'nɩɛ ‑lɛ ‑wʋ. 28Zaa, Nɩkpɛ a 'Yu, ɔ'bhë mɔɔ 'kämanɩɛ ‑gwlɛnɩzlɩɩ ‑gömö.»

Currently Selected:

Maakö 2: bet

Highlight

Copy

Want to have your highlights saved across all your devices? Sign up or sign in

Learn More About BdG2