লূক 22
22
প্রভু যীশুরে মারে ফেলেবার্ কুজুরোমি
(মথি ২৬:১-৫,১৪-১৬; মার্ক ১৪:১,২,১০,১১; যোহন ১১:৪৫-৫৩)
1সে অক্তত্ যিহূদীগুনোর্ সদানেইয়্যে রুটির পরব্ কায়কুরে লুম্মেগি। ইবেরে উদ্ধোর্ পরব্অ কুয়ো অয়। 2আঝল্ ধর্মগুরুগুনে আর ধর্ম-মাষ্টরুনে মানুচ্চুনোরে দোরেদাক্, আর তারা যীশুরে ভিদিরে ভিদিরে মারে ফেলেবাত্যে পধ্ তগাদন্।
3এ অক্তত্ যিহূদা, যিবেরে ইষ্কারিয়োৎ নাঙে ডাগা অদঅ, পরেদি তা ভিদিরে শদানে সুমিলো। এ যিহূদা এলঅ যীশুর বারজন শিচ্চ্যত্তুন্ একজন। 4কিবাবোত্যেগুরি যীশুরে আঝল্ ধর্মগুরুগুনো ইধু আর উবোসনা-ঘরর্ কাম্ গুরিয়্যেগুনো আঢত্ ধুরি দিবো সে পৌইদ্যেনে তে যেইনে তারা সমারে তেম্মাং গুরিলো। 5তারা ভারী হুজী ওইনে যিহূদারে টাকা দিবাত্তে স্বীগের্ গুরিলাক্। 6সেক্কে যিহূদা রাজী ওইনে যগাজ্যেগুরি সুযোগ তগা ধুরিলো যাতে মানুচ্চুনোর্ হবর্ ন-পেইয়্যে অবস্থায় যীশুরে ধুরি দি পারে।
শেজ্ উদ্ধোর্-পরবর্ হানা
(মথি ২৬:১৭-২৬; মার্ক ১৪:১২-২১; যোহন ১৩:২১-৩০)
7-8দিন্নো অলদে সদানেইয়্যে রুটির পরবর্ সময়োত্ উদ্ধোর-পরবর্ হানাত্যে ভেড়াছঅ কাবা অদঅ। সে দিন্নো এলে পরেদি যীশু পিতর আর যোহনরে ইয়েন্ কোইনে দিপাধেল, “তুমি যেইনে আমাত্যে উদ্ধোর্-পরবর্ হানা যুক্কোল্ গরঅ যেন আমি সিয়েনি হেই পারিই।”
9তারা যীশুরে পুযোর্ গুরিলাক্, “তুই কুধু এ হানাবো আমারে যুক্কোল্ গুরিবাত্তে কচ্?”
10-11যীশু কলঅ, চঅ, তুমি যেক্কে শঅরত্ সুমিবা সেক্কে এক্কো মরদ্ পুয়োরে এক্কো কুম্বোই পানি নেযাদে দেগিবা। তা পিজে পিজে যেইনে তে যে ঘরানত্ সুমিবো সে ঘর গিরোচ্চোরে কবা, “মাষ্টরবাবু জানিবাত্তে চার্, তে শিচ্চ্যগুনো সমারে যিয়েনত্ উদ্ধোর্-পরবর্ হানা হেই পারে সেই গর্বা-ঘরান্ কুধু? 12সেক্কে তে তমারে উগুরে তালাত্ এক্কান্ সাজেয়্যে দাঙর্ ঘর্ দেগেই দিবো; সিয়েনত্ বেক্কানি যুক্কোল্ গরঅ।”
13যীশু তারারে যেবাবোত্যে গুরি কোইয়্যে, তারা যেইনে বেক্কানি সেবাবোত্যে দেগিলাক্ আর উদ্ধোর্-পরবর্ হানাগান্ যুক্কোল্ গুরিলাক্। 14সে পরেদি সময়মজিম যীশু প্রচারগ্কুনো সমারে হেবাত্তে বুজিলো। 15যীশু তারারে কলঅ, “মুই কষ্ট ভুগিবার্ আগেদি তমা সমারে উদ্ধোর্-পরবর্ এই হানাগান্ হেবার্ মর্ অমকদ আয়োচ্ এলঅ। 16মুই তমারে কঙর্, গোজেন রেজ্যত্ ইয়েনর্ উদ্দেচ্য পূরোণ্ ন-অনা সং মুই আর কনদিন্অ এই হানাগান্ ন-হেম্।”
17ইয়েন পরেদি যীশু গলজ্সো নিলো আর গোজেনরে ভালেদি জানেইনে কলঅ, “তমা ভিদিরে ইয়েন ভাগ্ গুরি নেযঅ, 18কিয়া মুই তমারে কঙর্, ইক্কেত্তুন্ ধুরি গোজেনর্ রেজ্যগান ন-এজানা সং মুই আর কনদিন্অ আংগুর-ফলর্ রস্ ন-হেম্।”
19সে পরেদি তে রুটি লোইনে গোজেনরে ভালেদি জানেল। যেরেদি সেই রুটিগান্ কট্টা কট্টা গুরিনে শিচ্চ্যগুনোরে দিইনে কলঅ, “ইয়েন মর্ কিয়্যে যিয়েন্ তমাত্যে দিয়্যে অবঅ। মরে ইদোত্ তুলিবাত্যে এবাবোত্যে গোজ্য।”
20হানার্ পরেদি সেবাবোত্যেগুরি তে গলচ্চো তারারে দিইনে কলঅ, “মঅ লো-গান্দোই গোজেনর্ যে নুয়ো সুদোমান্ অদে অদে গরা অবঅ সে সুদোমানর্ চিহ্নোগান্ অলঅ এ গলজ্সো। মর্ এ লো-গান তমাত্যে দিয়্যে অবঅ। 21চঅ, যে মরে ধুরি দিবো তা আঢ্তান্ মঅ আঢ্তানি সমারে এ টেবিলো উগুরে আঘে। 22গোজেনে যেধোক্ক্যেন গুরি ঠিগ্ গুরি থোইয়্যে সেধোক্ক্যেন গুরি মান্জ্য পুয়োবো মুরি যেবঅ ঠিগ্; মাত্তর্ কি দর্গরেপারা সেই মানুচ্চো, যে তাল্লোই বেঈমানী গোজ্যে!”
23শিচ্চ্যগুনে একজনে আরেকজনরে পুযোর্ গরা ধুরিলাক্, তারাত্তুন্ কন্না এবাবোত্যে কাম্ গুরিবো।
শিচ্চ্যগুনো সমারে প্রভু যীশুর কধাবাত্তা
(মথি ২৬:৩১-৩৫; মার্ক ১৪:২৭-৩১; যোহন ১৩:৩৬-৩৮)
24কারে বেগত্তুন্ দাঙর্ কুয়ো অবঅ ইয়েন্দোই শিচ্চ্যগুনো ভিদিরে তর্কাতর্কি অলঅ। 25যীশু তারারে কলঅ, অযিহূদীগুনো ভিদিরে রাজাগুনে রাজাগিরি গরন্ আর তারার্ শাসনগুরিয়্যেগুনোরে উপকারি নেতা কুয়ো অয়, 26মাত্তর্ তমা ভিদিরে এবাবোত্যে অনা উচিত নয়। তমাত্তুন্ যে বেগত্তুন্ দাঙর্, তে বরং বেগত্তুন্ যে চিগোন্ তা ধোক্ক্যেন্ ওক্, আর যে নেতা, তে সেবাগুরিয়্যে ধোক্ক্যেন্ ওক্। 27কন্না দাঙর্, যে হেবাত্যে বজে, না যে চাগর্বো পরিবেশন্ গরে? যে হেবাত্যে বজে, তে নয় কি? মাত্তর্ মুই তমা ইধু সেবাগুরিয়্যে ধোক্ক্যেন্ ওইয়োং।
28মর্ দুঘো অক্তত্ তুমি মরে ফেলেই ন-যঅ। 29মঅ বাপ্পো যেবাবোত্যেগুরি মরে শাসন-খেমতা দান্ গোজ্যে সেবাবোত্যেগুরি মুইয়ো তমারে খেমতা দান গরঙর্। 30সেক্কে মঅ রেজ্যত্ তুমি মঅ সমারে হানা-দানা গুরিবা আর সিংহাসনত্ বৈইনে ইস্রায়েলর্ বারবো গুট্টির বিচের্ গুরিবা।
31“শিমোন, শিমোন, চাহ্, শদানে তমারে গম ধোক্ক্যেন্ গুরি চালোন্দোই ঝারি চেবাত্যে অনুমতি চেইয়্যে। 32মাত্তর্ মুই তত্যে তবনা গোজ্যং যেন তঅ বিশ্বেজত্ ভাঙন্ ন-ধরে। তুই যেক্কে মইধু ফিরি এবে সেক্কে তর্ এই ভেইয়ুনোরে খেমতাবলা গুরি তুল্।”
33পিতর যীশুরে কলঅ, “প্রভু, তঅ সমারে মুই জেলোত্ যাদে আর মুরিবাত্তেয়ো যুক্কোল্ আঘং।”
34জোবত্ যীশু কলঅ, “পিতর, মুই তরে কঙর্, এচ্চ্যে রাদা কুরো ডাগ্ কারিবার্ আগেদি তুই তিনবার্ মরে অস্বীগের্ গুরিনে কবে, তুই মরে ন-চিনোস্।”
35সে পরেদি যীশু তা শিচ্চ্যগুনোরে কলঅ, “মুই যেক্কে তমারে টেঙার্ থোইল্ল্যা, ঝলা আর জদা ছাড়া দিপাধেয়োং সেক্কে কি তমার্ কনঅ অভাব ওইয়্যে?”
শিচ্চ্যগুনে কলাক্, “না, ন-অয়।”
36যীশু কলঅ, “মাত্তর্ ইক্কিনে মুই কঙর্, যিবের্ টেঙা থোইল্ল্যা বা ঝলা আঘে তে সিগুন্ নেযোক্। যিবের্ ছুরি নেই তে তা কাবড়ান্ বিজিনে এক্কান্ ছুরি কিনোক্। 37পবিত্র বোইবোত্ লেগা আঘে, ‘তারে পাপীগুনো সমারে গুণো অলঅ।’ মুই তমারে কঙর্, এ কধাগান্ মঅ মাধ্যমে পূরোণ্ ওয়া পুরিবো, কিয়া মঅ পৌইদ্যেনে যিয়েন্ লেগা আঘে সিয়েন্ পূরোণ্ অবাত্তে যার্।”
38সেক্কে শিচ্চ্যগুনে কলাক্, “প্রভু, চাহ্, ইয়োত্ দ্বিয়েন্ ছুরি আঘে।”
যীশু জোব্ দিলো, “থোক্, আর নয়।”
তবনার্ সময়োত্ প্রভু যীশুর দুঘ্ ফগদাং
(মথি ২৬:৩৬-৪৬; মার্ক ১৪:৩২-৪২)
39যীশু সেই জাগায়ান্ ফেলেইনে নিজো সুদোম্ মজিম্ জৈতুন মুড়োবোত্ গেলঅ। তা শিচ্চ্যগুনেয়ো তা পিজে পিজে গেলাক্। 40ঠিগ সেই জাগানত্ লুমোনার্ পরেদি যীশু তারারে কলঅ, তবনা গরঅ যেন পোরোক্ষ্যেত্ ন-পড়অ।
41সে পরেদি যীশু শিচ্চ্যগুনোত্তুন্ এক্কেনা দূরোত্ যেইনে আদু পারিনে তবনা গরা ধল্ল, 42“বাবা, তুই যুনি চাজ্ সালে এ দুঘোর্ গলচ্চো মত্তুন্ সোরেই নেযা। তো মঅ মনেমন্জক্কা নয়, তঅ আওজ্ মজিম ওক্।”
43সেক্কে স্বর্গত্তুন্ এক্কো দূত এইনে যীশুরে খেমতা দান গুরিলো। 44মনত্ দুঘে যীশু আরঅ এগামনে তবনা গল্ল। তা কিয়্যের্ ঘাম্ লো ফুদো ধোক্ক্যেন্ ওইনে মাদিত্ পরা ধল্ল।
45-46তবনা গরানার্ পরেদি তে উদিনে তা শিচ্চ্যগুনো ইধু এলঅ। মনত্ দুঘে অরান্ ওইনে শিচ্চ্যগুনে ঘুমোত্ পোজ্জ্যন্ দেগিনে যীশু তারারে কলঅ, কিত্তে ঘুম্ যর্? উদিনে তবনা গরঅ যেন পোরোক্ষ্যেত্ ন-পড়অ।
47যীশু সেক্কেয়ো কধা কর্ এমন্ সময়োত্ বোউত্ মানুচ্ সিয়েনত্ লুমিলাক্। যিহূদা নাঙে তার্ বারজন শিচ্চ্য ভিদিরে একজন সে মানুচ্চুনো আগে আগে এজের্। যিহূদা যীশুরে চুমিবাত্তে তা কায়কুরে এলঅ। 48সেক্কে যীশু তারে কলঅ, “যিহূদা, তুই চুমিনে কি মান্জ্য পুয়োবোই বেঈমানী গুরিলে?”
শত্রুগুনো আঢত্ প্রভু যীশু
(মথি ২৬:৪৭-৫৬; মার্ক ১৪:৪৩-৫০; যোহন ১৮:৩-১১)
49যিগুনে যীশুর্ চেরোকিত্ত্যেদি এলাক্ সিগুনে বুঝিলাক্ কি অবাত্তে যার্। ইয়েনত্তে তারা যীশুরে কলাক্, “প্রভু, আমি কি ছুরিলোই আঘাত্ গুরিবোং?”
50শিচ্চ্যগুনোত্তুন্ একজনর্ ছুরিলোই দাঙর্ ধর্মগুরুবোর্ চাগর ডেন্ কানান্ কাবি ফেলেল। 51যীশু কলঅ, “থোক্, আর নয়।” ইয়েন কোইনে তে মানুচ্চোর্ কানান্ ধুরিনে তারে গম্ গুরিলো।
52পরেদি আঝল্ ধর্মগুরুগুনে আর উবোসনা-ঘরর্ চুগিদার নেতাগুনে আর বুড়ো নেতাগুনে যীশুরে ধুরিবাত্যে এচ্চ্যন্। যীশু তারারে কলঅ, “মুই কি ডাগেত্, তুমি ছুরি আর মুগোর্লোই মরে ধুরিবাত্তে এচ্চো? 53মুই পত্তিদিন তমা লগে উবোসনা-ঘরত্ এলুং, মাত্তর্ সেক্কে দঅ তুমি মরে ধুরিবাত্যে চেষ্টা ন-গরঅ। মাত্তর্ ইক্কিনে দঅ তমার ধুরিবার সময়; আন্ধারর্ খেমতা ইক্কিনে দেগা যার্।”
পিতরর্ অস্বীগের্
(মথি ২৬:৫৭-৫৮,৬৯-৭৫; মার্ক ১৪:৫৩-৫৪,৬৬-৭২; যোহন ১৮:১২-১৮,২৫-২৭)
54সেক্কে তারা যীশুরে ধুরিনে আঝল্ ধর্মগুরুবো ঘরত্ নেযেলাক্। পিতরে দূরোত্তুন্ পিজে পিজে যার্। 55উদোনান সংমধ্যে যিগুনে চেরোকিত্যে গুল্ গুরি বজিনে আগুন পুয়োদন্ পিতরে এইনে তারা লগে বজিলো। 56এক্কো চাগরাণি সে আগুনো পহ্রত্ পিতররে দেগিলো আর গমেডালে রিনি চেইনে কলঅ, “এ মানুচ্চোয়ো উতা সমারে এলঅ।”
57পিতর অস্বীগের্ গুরিনে কলঅ, “মুই তারে ন-চিনোং।”
58কানক্কন্ পরেদি আর এক্কো মানুচ্ তারে দেগিনে কলঅ, “তুইয়ো দঅ তারাত্তুন্ একজন।”
পিতরে কলঅ, “না, মুই নয়।”
59এক ঘন্টা পরেদি আর একজন জোরেই কলঅ, “এ মানুচ্চো ঘেচ্চেক্গুরি উতা সমারে এলঅ, কিয়া ইবে দঅ গালীল রেজ্যর্ মানুচ্।”
60পিতরে কলঅ, “চাহ্, তুই কি কর্ মুই বুঝি ন-পারঙর্।”
পিতর কধা থুম্ অদে ন-অদে এক্কো রাদাকুরো ডাগ্কারি উদিলো। 61সেক্কে প্রভুর্ মুয়োন্ চেরোকিত্তেদি ঘুরেইনে সোজা পিতর ইন্দি রিনি চেলঅ। আর প্রভু তারে কি কোইয়্যে সে কধাগান্ পিতরর্ মনত্ পড়িলো, “এচ্চ্যে রেদোত্ রাধাকুড়োই ডাগ্ কারিবার্ আগেদি তুই তিন পল্লা কবে, তুই মরে ন-চিনোস্।” 62সেক্কে পিতরে বারেদি যেইনে জদবদে কানা ধুরিলো।
দাঙর্ সভা মুজুঙোত্ প্রভু যীশুর বিচের্
(মথি ২৬:৫৯-৬৮; মার্ক ১৪:৫৫-৬৫; যোহন ১৮:১৯-২৪)
63যিগুনে যীশুরে চুগি দেদন্ সিগুনে তারে ঠাট্টা গরানা আর পিদে ধুরিলাক্। 64তারা যীশু চোগ্কুন্ বানিনে কলাক্, “কঅ দে চেই, কন্না তরে মারিলো?” 65এবাবোত্যেগুরি তারা আরঅ বোউত্ কধা কোইনে তারে অগমান্ গল্লাক্।
66বেন্ন্যে পহর্ অলে পরেদি যিহূদীগুনোর্ বুড়ো নেতাগুনে, আঝল্ ধর্মগুরুগুনে আর ধর্ম-মাষ্টরুনে এক সমারে মিলিলাক্ আর যীশুরে তারার্ দাঙর্ সভা মুজুঙোত্ আনিনে কলাক্, 67-68“তারা কলাক্, সালে আমারে কঅ, তুই কি মশীহ।”
যীশু কলঅ, “মুই যুনি তমারে কং, তুমি মরে বিশ্বেজ্ ন-গুরিবা। 69মাত্তর্ মান্জ্যপুয়োবো ইক্কেত্তুন্ ধুরি বেগত্তুন্ খেমতাবলা গোজেনর্ ডেনেদি বৈই থেবঅ।”
70সেক্কে বেক্কুনে পুযোর্ গুরিলাক্, “সালে তুই কি গোজেনর্ পুয়ো?”
তে তারারে জোব্ দিলো, “তুমি ঠিগই কোইয়ো যে, মুয়ই সিবে।”
71আর তারা কলাক্, “আমাত্তুন্ আরঅ বেশ্ সাক্ষির্ দরকার্ নেই? আমি নিজে দঅ তা মুয়োত্তুন্ শুনিলোং।”
Currently Selected:
লূক 22: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
