লূক 24
24
মরণ উগুরে জিদেনা
(মথি ২৮:১-৮; মার্ক ১৬:১-৮; যোহন ২০:১-১০)
1সাপ্তার্ পত্তম দিনোর্ বেন্ন্যে মাদান্ সেই মিলেগুনে সে তুম্বাজ্ মজলাগান্দোই গোরান ইধু গেলাক্। 2তারা দেগিলাক্ গোরান মুয়োনত্তুন্ পাত্তর্বো সোরেইনে থুয়ো ওইয়্যে, 3মাত্তর্ গোরান ভিদিরে যেইনে তারা প্রভু যীশুর্ মরা কিয়্যেগান্ ন-দেগিলাক্। 4যেক্কে তারা আমক্ ওইনে সে পৌইদ্যেনে ভাবদন্ সেক্কে দেবা ঝিমিলেনি ধোক্ক্যেন্ জ্বোল্জোল্ল্যে কাবড় উজ্যে দ্বিজন্ মানুচ্ তারা কায় কুরে এইনে থিয়্যেলাক্। 5সেক্কে মিলেগুনে অমকদ দোরেইনে মাঢা নিগিরিলাক্। সে মানুচ্চো তারারে কলঅ, “যিবে জেদা তারে মরাগুনো ভিদিরে কিত্ত্যে তগর্? 6তে দঅ ইয়েনত্ নেই; তে জেদা ওই উঠ্যে। তে যেক্কে গালীলোত্ এলঅ সেক্কে তে তমা ইধু যিয়েনি কোইয়্যে সিয়েনি ইদোত্ তুলি চঅ। 7তে কোইয়্যেদে, মান্জ্য পুয়োবোরে পাপী মানুচ্চুনো আঢত্ ধুরি দিয়্যে অবঅ। সে পরেদি তারে ক্রুশোত্ দিয়্যে অবঅ আর তিন দিনোত্ তাত্তুন্ আরঅ জেদা ওই উদো পুরিবো।”
8সেক্কে তারাত্তুন্ সে কধাগান মনত্ পুরিলো। 9তারা গোরত্তুন্ ফিরি যেইনে সেই এগারজন শিচ্চ্য আর অন্য বেক্কুনোরে এ বেক্ কধাগানি জানেলাক্। 10সেই মিলেগুনো ভিদিরে এলাক্ মগ্দলীনী মরিয়মে, যোহানা আর যাকোবর্ মা মরিয়ম। তারা সমারে আর অন্য যে মিলেগুন এলাক্ তারায়ো এ বেক্ কধানি প্রচারগ্কুনো ইধু কলাক্। 11মাত্তর্ সেই বেক্ কধানি তারা ইধু বাজে কধা ধোক্ক্যেন্ মনে অলঅ। সেনত্তে সেই মিলেগুনো কধা তারা বিশ্বেজ্ ন-গুরিলাক্। 12মাত্তর্ পিতরে উদিনে ধাবা গোর ইধু গেলঅ আর মাঢা নিগিরিনে বানা কাবরানি দেগিলো। যিয়েনি ঘোট্যে সিয়েনি আমক্ ওইনে তে ফিরি এলঅ।
ইম্মায়ূ আদামর পধত্
(মার্ক ১৬:১২,১৩)
13সেদিন্ন্যে দ্বিজন শিচ্চ্য ইম্মায়ূ নাঙে এক্কান্ আদামত যাদন্। আদামান্ যিরূশালেমত্তুন্ পেরায় সাত মেইল্ দূরোত্ এলঅ । 14যিয়েন ঘোট্যে সিয়েন্দোই তারা কধাবাত্তা কদন্। 15সে সময়োত্ যীশু নিজে সিয়েনত্ আঝির্ ওইনে তারা সমারে আঢানা আরাম্ভ গুরিলো। 16তারা চোগ্কুন যেন নাঢা যেইয়োন্, সেনত্তে তারা যীশুরে চিনি ন-পারিলাক্। 17সেক্কে যীশু তারারে কলঅ, “তুমি কি কধা কোই কোই যর্?”
সেই দ্বিজন্ শিচ্চ্য শুগুনো মু গুরি থিয়্যেই রলাক্। 18সেক্কে ক্লিয়পা নাঙে তারাত্তুন্ একজনে যীশুরে পুযোর্ গুরিলো, “তুই কি যিরূশালেমর্ বানা এক্কো গুরি মানুচ্ যিবে কোই ন-পারে এ কয়েকদিনে সিধু কি কি ঘোট্যে?”
19যীশু তারারে কলঅ, “কি কি ঘোট্যে?”
তারা কলাক্, “নাসরত্ আদামর্ যীশুরে নিইনে যিয়েনি যিয়েনি ঘোট্যে। তে ভাববাদী এলঅ। তে কামে আর কধায় গোজেনর্ আর বেক্ মানুচ্চুনো চোগোত্ খেমতাবলা এলঅ। 20আমা আঝল্ ধর্মগুরুগুনে আর ধর্ম-নেতাগুনে তারে রোমীয়গুনো আঢত্ ধুরি দুয়োন্ যাতে তারা তা বিচের্ গুরিনে তারে মরণর্ সাজা দুয়োন্। পরেদি সে যিহূদী নেতাগুনে তারে ক্রুশোত্ দুয়োন্। 21আমি আজা গোজ্যেই তেয়ই ইস্রায়েল জাদরে উদ্ধোর্ গুরিবো। বানা সিয়েন নয়, এচ্চ্যে তিন দিন অলঅ ইয়েনি ঘোট্যে। 22আরঅ আমা দলর্ কয়েক্কো মিলে আমারে আমক্ বানেয়োন। তারা বেন্যেপোত্যে যীশুর্ কবরত্ গেলাক্, 23মাত্তর্ সিয়েনত্ তা কিয়্যেগান্ ন-দেগিলাক্। তারা ফিরি এইনে কলাক্, তারা স্বর্গদূত্তুনোর্ দেগা পেয়োন্ আর সেই স্বর্গদূত্তুনে তারারে কোইয়োন, যীশু বাঁজি আঘে। 24সেক্কে আমা সমারে যিগুনে এলাক্ তারাত্তুন্ কয়েকজনে কবরত্ যেইনে মিলেগুনে যেবাবোত্যেগুরি কোইয়োন ঠিগ্ সেবাবোত্যেগুরি দেগিলাক্, মাত্তর্ যীশুরে ন-দেগিলাক্।”
25সেক্কে যীশু তারারে কলঅ, “তুমি কিচ্চু ন-বুঝো। তমা মনানি এমন্ বাজে যে, ভাববাদীগুনে যিয়েন কোইয়োন সিয়েন তুমি বিশ্বেজ্ ন-গরঅ। 26এ দুঘ্ ভুগ্ গুরিনে কি মশীহর্ মহিমা লাভ গুরিবার্ কধা ন-এলঅ?” 27ইয়েন পরেদি তে মোশির আর বেক্ ভাববাদীগুনোর্ লেগাত্তুন্ আরাম্ব গুরিনে গোদা পবিত্র বোইবো ভিদিরে তা নিজো পৌইদ্যেনে যিয়েনি যিয়েনি লেগা আঘে সিয়েনি বেক্কানি তারারে বুঝেই কলঅ।
28তারা যে আদমত্ যাদন্ সেই আদাম কায় লুমিলে পরেদি যীশু আরঅ দূরোত্ যেবার্ ভাব্ দেগেল। 29সেক্কে তারা ভারী কোজোলী গুরিনে তারে কলাক্, “ইক্কে বেলান্ যেইয়্যে, সাজোন্যে ওইয়্যে। তুই আমা সমারে থাগ্।”
ইয়েন্দোই তে তারা সমারে থেবাত্তে ঘরত্ সোমেল। 30যেক্কে তে তারা সমারে হেবাত্যে বুজিলো সেক্কে রুটি লোইনে গোজেনরে ভালেদি জানেল আর সিয়েন্ কট্টা গুরিনে তারারে দিলো। 31সেক্কে তারার্ চোগ্কুন খুলি গেলাক্; তারা যীশুরে চিনিলাক্, মাত্তর্ সিয়েনর্ লগে লগে তারে আর দেগা ন-গেলঅ। 32সেক্কে তারা একজন আরেক জনরে কলাক্, “পধত্ যেক্কে তে আমা সমারে কধা কর্ আর পবিত্র বোইবো বুঝেই দের্ সেক্কে আমা মনান্ কি জুলি জুলি ন-উদের্?”
33সেক্কে সে দ্বিজনে উদিনে যিরূশালেমত্ গেলাক্ আর সেই এগারজন শিচ্চ্য আহ্ তারা সমারে অন্যগুনোরেয়ো এক জাগাত্ দেগিলাক্। 34প্রভু যে ঘেচ্চ্যেক্গুরি জেদা ওই উঠ্যে আর শিমোনরে দেগা দিয়্যে সিয়েনিলোই তারা কধাবাত্তা কোইয়োন। 35সে দ্বিজন্ শিচ্চ্য পধত্ যিয়েনি ওইয়্যে সিয়েনি তারারে জানেলাক্। তারা আরঅ জানেলাক্, তে যেক্কে রুটি কট্টা কট্টা গরের্ সেক্কে কিবাবোত্যেগুরি তারা তারে চিনি পাজ্জ্যন্।
প্রভু যীশু শিচ্চ্যগুনোরে দেগা দিলো
(মথি ২৮:১৬-২০; মার্ক ১৬:১৪; যোহন ২০:১৯,২০; প্রেরিত্ ১:৬-৮)
36সেই শিচ্চ্যগুনে যেক্কে এ কধাগান্ কদন্ সেক্কে যীশু নিজে তারা ইধু এইনে থিয়্যেইনে তারারে বেক্কুনোরে কলঅ, “তমার্ শান্তি ওক্।”
37তারা ভূত দেক্ক্যন্ ভাবিনে অমকদ দোরেলাক্। 38যীশু তারারে কলঅ, “কিত্ত্যে তুমি থির্ নেইয়্যে অর্ আর কিত্ত্যে বা তমা মনত্ সন্দেহ জাগের্? 39মঅ আঢ্তানি আর ঠেঙানি চঅ। চঅ, ইবে মুই । মরে ধুরি চঅ, কিয়া ভুদোর্ দঅ মঅ ধোক্ক্যেন্ আড়্-য়েরা নেই।”
40এ কধাগান্ কোইনে যীশু তা আঢ্তানি আর ঠেঙানি তারারে দেগেল। 41মাত্তর্ তারা এদক্ আমক্ আর হুজী ওইয়োন্ যে, বিশ্বেজ্ গুরি ন-পাত্তন্। সেক্কে যীশু তারারে কলঅ, “তমা ইধু কি কনঅ হেবার্ জিনিস আঘে?”
42তারা যীশুরে এক কট্টা ভাজা মাছ দিলাক্। 43তে সিবে লোইনে তারা মুজুঙোত্ হেলঅ। 44সিয়েন পরেদি তে তারারে কলঅ, “মুই যেক্কে তমা সমারে এলুং সেক্কে কোইয়োং, মোশির আইন-কানুনোত্, ভাববাদীগুনোর লেগাত্ আর গীতসংহিতা ভিদিরে মঅ পৌইদ্যেনে যে যে কধানি লেগা আঘে সিয়েনি বেক্কানি পূরোণ্ উয়ো পুরিবো।”
45-46পবিত্র বোইবো বুঝিবাত্যে তে শিচ্চ্যগুনোরে বুদ্ধি খুলি দিলো আর তারারে কলঅ, “লেগা আঘে, মশীহত্তুন্ দুঘ্ পাহ্ পুরিবো আর তিন দিনোর্ দিন্নোত্ মরণত্তুন্ জেদা ওই উদো পুরিবো। 47আরঅ লেগা আঘে, যিরূশালেমত্তুন্ ধুরি আরাম্ভ গুরিনে বেক্ জাদ্তুনো ইধু মশীহ নাঙে এ হবরান্ প্রচার গরা অবঅ, পাপত্তুন্ মন ফিরেলে পাপর্ ক্ষেমা পাহ্ যায়। 48তুমিই এ বেক্ বেপারানির্ সাক্ষী। 49চঅ, মঅ বাপ্পো যিয়েনি দিবার্ এগেম্ গোজ্যে সিয়েনি মুই তমা ইধু পাধেই দিম্। স্বর্গত্তুন্ খেমতা ন-পানা সং তুমি এই শঅরত্ থাক্ক্য।”
প্রভু যীশু স্বর্গত্ গেলঅ
(মার্ক ১৬:১৯,২০; প্রেরিত্ ১:৯-১১)
50পরেদি যীশু তা শিচ্চ্যগুনোরে লোইনে বৈথনিয়া সং গেলঅ। সিয়েনত্ তে আঢ্ তুলিনে তারারে বর্ দিলো। 51বর্ দেদে দেদে তে তারারে ফেলেই গেলঅ আর তারে স্বর্গত্ তুলি নেযা অলঅ। 52সেক্কে তারা মাঢা নিগিরি সালাম্ গুরিনে তারে গোজেনর্ সর্মান দিলাক্ আর ভারী হুজী ওইনে যিরূশালেমত্ ফিরি গেলাক্। 53তারা নিত্য উবোসনা-ঘরত্ আঝির্ থেইনে গোজেনরে বাঈনী গরা ধুরিলাক্।
Currently Selected:
লূক 24: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
