युहन्ना 2
2
काना डेच सहराङ छान्च ब्याहा
1आपर्हीन लेखो गालीलुङ काना डेच सहराङ काट ब्याहा लेया। येशूओ मोइ होला लेया। 2येशू र मेकुङ चेलाकोलाक र होसे ब्याहाङ आर्घामन्या।
3ब्याहाङ याछ अङ्गुरौ मड्य भ्याचबाटै येशूओ मोये होसकोकी डेया, “होखुरीक खाटा अङ्गुरौ मड्य भ्यालेसा!” 4येशूये डेया, “मोइ, ङै ही जाट्की पर्ले नाकै ङाकी डेकी मापर्ले। ङौ समय अझसम्म मार्हामने।” 5येशूओ मोये नोकरकोलाक डेया, “होसकै डेच लेखा जाट्नी।”
6होला ल्हुङ्की खोप्डीयार खास्च छ वटा सय-सय लीटर डी सीन्छ ल्हुङौ घ्याम्पाको लेया। होसे यहूदीकुङ चोखडीस्च चलनौ लागी क्योट्की डामन्या। 7येशूये नोकरकोलाक डेया, “इसे घ्याम्पाको डीये न्हेपाक्नी।” होखुरीकै होसे घ्याम्पौ मेङेरसम्म न डीये न्हेपाक्ङ याहा।
8होटै न्हुइङ येशूये होखुरीककी डेया, “इसे चेक्जा वाकार भोजुङ मुखीयाकी म्याङ्की आल्न्ह यान्ही।” अनी होखुरीकै आल्हार याहा। 9भोजुङ मुखीये म्याङ्नाङ च होसे डी अङ्गुरौ मड्य छान्न भ्यामन्या। टर होसे अङ्गुरौ मड्य ही लकीङ छानन्या, होसे कुरा चहीँ होसकी थाहा मालेया। होसे मड्य राक्च नोकरकोलाक मट्टै थाहा लेया। भोजुङ मुखीया ब्याहुला लेठाङ राहा 10अनी डेया, “अरु भर्मीकै च पहीला महङ्गो खालुङ मढ्य गाकी याल्हे अनी पाहुनाकै वास्टै मढ्य गाम भ्यारखीङ मट्टै सस्टो खालुङ याल्हे, टर नाकै च चाहाँसम्म र पट्ट डेनाङ सेछ चहीँ टी जोगडीम डामेसा।”
11येशूये जाट्च अचम्मौ चीन्हको मढ्याङ इसे पहीलो चीन्ह होसकै गालीलुङ काना सहराङ जाट्च हो। इटजाट्न होसकै लहो महीमा टान्हाका, र होसकुङ चेलाकै होसको मीटाक विश्वास जाटा। 12होटै न्हुइङ येशू, लोहो मोइ, भाइको र चेलाकोखाटा म्हाका कफर्नहुम सहराङ नुङा र कायाक नीस याक होला न ङुवा।
येशूये परमेश्वरौ मन्दिर शुद्ध खास्च
(मत्ती २१:१२-१३; मर्कूस ११:१५-१७; लुका १९:४५-४६)
13यहूदीकुङ छुटकारौ चाड खेरेप राम्हन्या। अनी येशू यरूशलेमाङ नुङा। 14होसकै भर्मीकोलाक परमेश्वरौ मन्दिरौ चोकाङ ठोर, भेडा र ढुकुर आर्लाम ङुच र पैसा योस्न ङुच डुपा। 15टब येशूये काट कोर्रा खासा, अनी होसे पट्ट न भेडा र ठोरकोलाक परमेश्वरौ मन्दिर लकीङ बाहीर लगारीया, पैसा योस्चकुङ टेबुलको पल्टडीम याहा र सीक्काको भेरेट्न याहा। 16अनी होसकै ढुकुरको आर्लाच भर्मीकोलाक डेया, “इसे पट्ट ठोक इला माडानी! ङौ बोयो इमकी ब्यापार जाट्च ठाउँ माखास्नी!”#भजनसंग्रह ६९:९
17टब होडीक बेला होसकुङ चेलाकै धर्मशास्त्राङ रीक्च इसे कुरा आर्मीटा, “ए परमेश्वर नाकुङ इमौ जोसै ङाकी भीत्री म्हेयै लेखा न सीकाक्ले।”
18यहूदी अगुवाकै येशूकी डेया, “होचे चहीँ नाकोकी इसे काम जाट्च अधिकार ले डेम टान्हाक्ले, ही नाको कानकी होसे काट अचम्मौ चीन्ह टान्हाक्की य्होक्ले?” 19येशूये होखुरीककी डेया, “इसे परमेश्वरौ मन्दिरकी भट्कडीनी, अनी ङा इसकी फेरी सोम याकाङ खास्न याल्हे।” 20यहूदी अगुवाकै डेया, “इसे परमेश्वरौ मन्दिर खास्की छयालीस वर्ष लक्डीस्नन्या, ही नाको इसकी फेरी सोम याकाङ न खास्की य्होक्ले?”
21टर येशूये डेच परमेश्वरौ मन्दिर चहीँ होसकुङ मेखोलौ न शरीरौ बारेयाङ लेया। 22जब येशू सीच लकीङ जीवाम सोवा, टब होसकै डेच इसे कुरा चेलाकै आर्मीटा, र होखुरीकै धर्मशास्त्र मीटाक र येशूये ङाक्च बचन मीटाक विश्वास जाटा।
23छुटकारौ चाडौ बेला येशू यरूशलेमाङ लेनाङ होला होसकै अचम्मौ चीन्हको जाटा, याङ्च डाङार वास्टै भर्मीकै होसको मीटाक विश्वास जाटा। 24टर येशू होखुरीकुङ भरोसाङ मापर्या, हीजैडेनाङ होसकै पट्ट न भर्मीकुङ मीमन सेम्हजा वार्न्हन्या। 25होसकोकी भर्मीयो बारेयाङ सुयेर पाहाक्की मापर्नन्या, हीजैडेनाङ होसकोकी भर्मीयो भीत्री मीमन थाहा लेया।
Currently Selected:
युहन्ना 2: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
