लुका 22
22
यहूदासै येशूकी घोवाक्च
(मत्ती २६:१-५,१४-१६; मर्कूस १४:१-२,१०-११; युहन्ना ११:४५-५३)
1अखमीरी रोटोओ चाड खेरेप राम्हन्या। इसकी छुटकारौ चाड र डेले। 2येशूकी कुटजाट्न साटीङ डेम मुख्य पुजाहारीको र धर्मगुरुकै डाउ पामन लेया। टर भर्मीको खाटा होखुरीक बीर्हीम्या।
3होडीक बेला न बार्ह जना चेलाको मढ्याङ यहूदास इस्करीयोट डेचौ मीमन भीत्री शैतान पर्या। 4होसे मुख्य पुजाहारी र कप्टानको लेठाङ नुङार येशूकी कुटजाट्न घोवाक्ङ याखी य्होक्ले डेयार सल्लाह जाटा। 5इसे सेयार होखुरीक मार्हाङा र होसकी पैसा याल्हे डेया। 6होटै यहूदास इस्करीयोट मन्डीया र भर्मीकै थाहा माडीन्न येशूकी घोवाक्ङ याखी डाउ पाकी ठाला।
येशूये चेलाकोखाटा ज्याच अन्टीम भोज
(मत्ती २६:१७-३०; मर्कूस १४:१२-२६; युहन्ना १३:२१-३०; १ कोरिन्थी ११:२३-२५)
7अखमीरी रोटो ज्याच चाड राहा। होसे छुटकारौ-चाडाङ ठुमा बली याखी पर्न्या। 8येशूये पत्रुस र युहन्नाकी इट डेयार बीर्न्हका, “नुङार काल्हौ लागी छुटकारौ चाडौ भोज टयार जाट्नी।” 9होखुरीकै होसकोकी गीना, “कानै इसे भोज कुला टयार जाट्की?” 10होसकै डेया, “नाखुरीक सहराङ टान्हाङ कुडाङ डी बुवार व्हाचै जाट्च काट भर्मी डुप्ले र नाखुरीक होच्यौ न्हुङ-न्हुङ नुङ्नी, होसे कुसे इमाङ पर्ले। 11होसे इमौ मीमुरुङ्की डेनी, ‘कानुङ गुरुये नाकोकी डेम कामने, ङै लहो चेलाको खाटा ङुवार छुटकारौ चाडौ भोज ज्याच पाहुना कोठा कुला ले?’ 12होटै नाखुरीककी होचे ढेम्च टलाङ सीङारीच बाड्को कोठा टान्हाक्ले। होला न टयार जाट्नी।” 13होखुरीक नुङा र होसकै डेच लेखा न डुपा, होटै होखुरीकै छुटकारौ चाडौ भोज होला न टयार जाटा।
14होटै भेला छान्रखीङ येशू प्रेरितको खाटा भोज ज्याकी ङुवा। 15होसकै होखुरीककी डेया, “डुख भोग्डीकी डेनाङ अघी ङै नाखुरीक खाटा ङुवार छुटकारौ चाडौ इसे भोज ज्याकी बाड्को मीमन जाट्न्या। 16हीजैडेनाङ ङा नाखुरीककी डेले, परमेश्वरौ राज्य पुरा माछान्ठर ङा फेरी इसे भोज माज्याले।” 17होटै येशूये कचौरा लाम परमेश्वरकी धन्यवाद याहार डेया, “इसे लानी र नाखुरीक पुङ्नी। 18हीजैडेनाङ ङा नाखुरीककी डेले, परमेश्वरौ राज्य मार्हाठर अब ङा अङ्गुरौ मीडी सेन्र मागाले।” 19होटै होसकै रोटो लाम धन्यवाद याम्ह भ्याच न्हुइङ ग्याकार होखुरीककी इट डेचै याहा, नाखुरीकुङ लागी याछ इसे ङौ जीउ हो। ङौ सम्झनाङ जाट्च जाट्नी। 20होटै ज्याम भ्याच न्हुइङ होसकै कचौरा लार डेया, “इसे कचौरा नाखुरीकुङ लागी जोकाक्च ङौ हीउवाङ छ्याक्च नयाँ प्रतिज्ञा हो।
21“टर ङाकी घोवाक्च भर्मी ङा खाटा न ज्याकी ङुमने। 22हीजैडेनाङ भर्मीयो मीजा च नीस्चीट जाट्च अनुसार नुङ्की न पर्ले। टर ढीक्कार ले होसे भर्मीकी, सुये भर्मीयो मीजाकी घोवाक्ङ याल्हे।” 23होटै इसे कुरा सेयार होखुरीकै, “याङ्च काम जाट्च सु आले डेम मेखुरीक-मेखुरीक गीन्की ठाला।”
बाड्को सु हो डेम चेलाकुङ छलफल
(मत्ती २०:२५-२८; १९:२८; मर्कूस १०:४२-४५)
24होटै होखुरीक मढ्याङ पट्ट डेनाङ बाड्को सु हो डेम चेलाकुङ मीघ्याङ छलफल छान्की ठाला। 25येशूये होखुरीककी डेया, “संसारुङ राजाकै चहीँ लहो पर्जा मीटाक राज्य जाट्ले र अधिकार क्योट्चकै लाहाकी उपकारी डेकी लैडीले। 26टर नाखुरीक चहीँ होङ्च छान्की माछान्ले। नाखुरीक मढ्याङ सु बाड्को ले, होसे मार्जा अट छानै। होटै अगुवा छान्चकै चहीँ सेवा अट जाटै। 27हीजैडेनाङ बाड्को सु हो? ज्याकी ङुच की ज्याकी याछ? ही ज्याकी ङुच होइन र? टर ङोस्नी, ङा च नाखुरीकुङ मीघ्याङ काट जना सेवा जाट्च ल्याक्च न ले।
28“नाखुरीक चहीँ ङौ पट्ट न परीक्षाङ ङाकी साठ याछको छान्नी। 29कुटजाट्न ङौ बोये ङाकी काट राज्य याम्हने, ङा र नाखुरीककी याल्हे। 30होटै ङौ राज्याङ नाखुरीक ङाखाटा काट ठावाङ ङुवार ज्याले र गाले। होटै सीहासनाङ ङुवार इस्राएलुङ बार्ह कुलौ न्याय जाट्ले।”
येशूये पत्रुसकी सम्झडीच
(मत्ती २६:३१-३५; मर्कूस १४:२७-३१; युहन्ना १३:३६-३८)
31होटै येशूये डेया, “सीमोन, ए सीमोन ङोस्नी, शैतानै नाकोकी गहुँकी लेखा न टाप्की अनुमटी ङेम्हने। 32टर नाकुङ विश्वास माम्हाट्ख्यौ डेयार ङै नाकुङ लागी प्रार्थना जाट्न याम्हे। फेरी विश्वासाङ बलीयो छानार नाकै लहो डाजे भाइकोलाक र बलीयो खास्नी।” 33होटै पत्रुसै होसकोकी डेया, “प्रभु, ङा नाकोखाटा झ्यालखानाङ नुङ्की अनी सीकी समेट टयार ले।” 34टर होसकै डेया, “पत्रुस, ङा नाकोकी डेले, नाकै छीनी नाबीक भाल्या राक्की डेनाङ अगाडी सोम खेप माचीन्डीले डेम ङाकी इन्कार जाट्ले होटै भाल्या राक्ले।”
येशूये चेलाकोलाक टयार छान्की डेच
35येशूये होखुरीककी डेया, “ङै नाखुरीककी पैसा, जुत्ता र नाम्जा बीना न बीर्न्हकामन्या, ही नाखुरीककी हीर कुरौ खाँचो छानार?” होखुरीकै डेया, “माछाना।”
36होटै होसकै डेया, “अब चहीँ नाम्जा लेचकै नाम्जा बुख्यौ। पैसा लेचकै पैसा बुख्यौ र सु खाटा टरवार माले, होचे लहो बढीन आर्लाम र काट टरवार अट लोए। 37ङा नाखुरीककी डेले, ‘होसकोकी अपराधीको खाटा न हीला’ डेयार रीक्च कुरा ङौ जीवनाङ ओल्खी न पर्ले। हो ङौ बारेयाङ रीक्च कुरा ओल्न्ह न ले।”#यशैया ५३:१२ 38होटै चेलाकै डेया, “ङोस्नी ट प्रभु, इला नीस टरवार ले।” येशूये डेया, “इडीक लेनाङ ओल्ल्हे।”
जैटुन डाँडाङ येशूओ प्रार्थना
(मत्ती २६:३६-४६; मर्कूस १४:३२-४२)
39येशू सढैँ लेखा न जैटुन डाँडाङ नुङा। चेलाको र होसको खाटा न नुङा। 40होला टारखीङ होसकै चेलाकोलाक डेया, “नाखुरीक परीक्षाङ पर्की मापर्ख्यौ डेयार प्रार्थना जाट्नी।” 41होटै येशू होखुरीक लेठीङ चेक पारी नुङार घुँडा टुसार प्रार्थना जाटा। 42“ए बोइ, नाकुङ इच्छा लेनाङ इसे डुखौ कचौरा ङा लेठीङ हटडीम यान्ही। टर ङौ इच्छाङ होइन, नाकुङ न इच्छा पुरा अट छानै।” 43होटै स्वर्गीङ काट स्वर्गदूत राहार होसकोकी बल याहा। 44होसकुङ मीमन सार्है कष्टआङ पर्नन्या। होसकै जोड खाटा बिन्ती जाट्चै प्रार्थना जाटा। होसकुङ नाम्चास हीओ ठोपा ल्याक्च न छानार झाङ जुर्न्ह न लेया। 45होटै येशू प्रार्थना जाट्न भ्यार चेलाको लेठाङ ल्हेसार रान्हाङ होखुरीक सुर्टै जाट्नाङ म्हुङार मीमीक झ्युकार लट्ठै छान्न ङुच डुपा। 46होसकै होखुरीककी डेया, “नाखुरीक हीजै मीस्न ङुच? सोनी, राछ परीक्षाङ मापर्ख्यौ डेयार प्रार्थना जाट्नी।”
येशूकी घोच
(मत्ती २६:४७-५६; मर्कूस १४:४३-५०; युहन्ना १८:३-११)
47येशूये इसे कुरा ङाक्नाङ-ङाक्नाङ न भर्मीकुङ हुड्डा होला टार्हा। बार्ह जना चेलाको मढ्याङ काट जना यहूदास डेच चहीँ होसे भर्मीकुङ अगुवा छानार येशूकी चुम्खी डेम होसकुङ खेरेप टार्हा। 48टर येशूये होसकी डेया, “यहूदास, ही नाको भर्मीयो मीजाकी चुम्हार ढोका याखी पाच?” 49होटै याङ्च डाङार येशूखाटा लेच चेलाकै डेया, “प्रभु, कान टरवार क्योटीङ?” 50होखुरीक मढ्याङ काट जना चेलै चहीँ मुख्य पुजाहारीयो नोकरकी टरवारै ङापा, र होच्यौ डोर मेन्केप न च्वाट्टै चेम याहा। 51टर येशूये होखुरीककी डेया, “छाना, डास्न यान्ही।” होटै होसे भर्मीयो मेन्केप छुवार होसकै गेपाक्ङ याहा।
52येशूकी घोकी राछ मुख्य पुजाहारीको, परमेश्वरौ मन्दिरुङ कप्टानको, र धर्मगुरुकोलाक होसकै डेया, “ही नाखुरीक डाकाकी घोकी रान्हाङ लेखा टरवार र डाङ्गा लार राछ? 53ङा परमेश्वरौ मन्दिराङ डीनहुँ नाखुरीक खाटा लेया। होडीक बेला च नाखुरीकै ङाकी माघोवा। टर अब छुम्छौ शक्तिये शासन जाट्नाङ नाखुरीकुङ काम जाट्च समय हो।”
पत्रुसै येशूकी इन्कार जाट्च
(मत्ती २६:५७-५८,६९-७५; मर्कूस १४:५३-५४,६६-७२; युहन्ना १८:१२-१८,२५-२७)
54होसे भर्मीकै येशूकी घोवार होसकोकी प्रधान पुजाहारीयो इमाङ आल्हा। पत्रुस चहीँ चेक पारी-पारीङ होसकुङ न्हुङ-न्हुङ नुङा। 55होला आर्भाङ म्हे ढाकार गुप्चै भर्मीको भेला छानार ङुम-ङुमन्या। होटै पत्रुस र राहार होखुरीक खाटा न ङुवा। 56काट नोकरनीये म्हेओ ट्याङ्ठाङ पत्रुसकी ङुम ङुच डाङा र सेम्हजा ङोस्चै डेया, “इसे भर्मी र येशू खाटा न लेया।” 57टर पत्रुसै इट डेयार इन्कार जाटा, “ए बहीनी, ङा होसकोकी माचीन्डीले।”
58फेरी काट छीनाङ अर्कोये होसकी डाङार डेया, “नाको र होखुरीकुङ लाफा न हो।” पत्रुसै डेया, “हजुर, ङा च होइन!”
59होटै काट घन्टाटर छान्नाङ अर्को काट जनै जोड याहार डेया, “इसे भर्मी र येशू खाटा न लेया, हीजैडेनाङ इसे र गालीलुङ न हो।” 60टर पत्रुसै डेया, “हजुर, नाकै ही डेमन ले, ङा च हीर माव्हार्ले।” होटै पत्रुस ङाक्नाङ-ङाक्नाङ न भाल्यै राका। 61होटै प्रभुये ल्हेसार पत्रुसकी ङोसा, “छीनी भाल्यै राक्की डेनाङ अघी नाकै ङाकी सोम खेप माचीन्डीले डेम डेले” डेम प्रभुये डेच कुरा पत्रुसै आर्मीटा। 62होटै होसे बाहीर खेव्हार ढुरु-ढुरु रापा।
येशू महासभौ म्यहासाङ
(मत्ती २६:५९-६८; मर्कूस १४:५५-६५; युहन्ना १८:१९-२४)
63येशूकी घोच भर्मीकै होसकोकी गील्ला जाटा र डुङा। 64होसकुङ मीमीक हुप्म याहार गीना, “नाङ्की डुङ्च भर्मी सु हो? लु, अगमवाणी जाटो!” 65होखुरीकै होसकुङ बेइजट जाट्चै येशूओ बारेयाङ मासेछ कुराको ङाका।
66ट्याङ्छ बीट्टीकै अगुवाको, मुख्य पुजाहारीको र धर्मगुरुको जम्मा छाना। होटै होखुरीकै येशूकी महासभाङ आल्हार डेया, 67“कानकी डेउ, नाङ न मुक्ति याछ ख्रीष्ट हो?” होसकै होखुरीककी डेया, “ङै डेनाङ र नाखुरीकै मापट्डीले। 68ङै गीना डेनाङ र नाखुरीकै जबाफ मायाल्हे। 69टर अब भर्मीयो मीजा परमेश्वरौ शक्तियो डोर पट्टी ङुले।” 70होटै होखुरीक पट्टै गीना, “होट डेनाङ ही नाङ परमेश्वरौ मीजा होट?” होसकै जबाफ याहा, “नाखुरीक न डेमन ले, ङा होसे न हो।” 71होटै होखुरीकै डेया, “अब कानकी अरु साक्षी चहडीस्ले र? हीजैडेनाङ कानै इच्यो मेङेरीङ न सेकी क्योटा।”
Currently Selected:
लुका 22: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
