Johan 11
11
Lasarakʼ gujukʼ
1 #
Luk 10.38,39 Lasar ńutuman Bethaniạren mitʼṭen hoṛ do ruạteye kạhil akan tahẽkana. Mạriạm ar uniren boeha kuṛi Martha hõ ona atoregekin tahenkan tahẽkana. 2#Jhn 12.3 Nui doe uni Mạriạm kana one okoe do Probhu Isorakʼ jaṅgare mahkaokʼ sunume ojokʼade tahẽkante acʼakʼ upʼte jaṅgakine jotʼletʼtae. Ar ruạte okoeye kạhil akan tahẽkan nui Lasar do Mạriạmren boehae tahẽkana. 3Onate unkin boeha kuṛi do Jisu ṭhen noa kathakin roṛgotʼkada, “E Probhu Isor, okoeyem dulạṛedekan uni do ruạteye kạhil akana.”
4Noa katha ańjomkate Jisui menkeda, “Noa ruạ do gujukʼ lạgitʼ do baṅkana bickom Isorakʼ ṭhonok sodorokʼ lạgitʼge hoyakana, jemon noa hotete Isorren Hoponakʼ ṭhonok sodorokʼtae.”
5Jisu do Martha ar uniren bokot kuṛi ar Lasare dulạṛetʼko tahẽkana. 6Ado tinre Lasarakʼ ruạkʼ reakʼ kathae ańjomkeda unre uni do okareye tahẽkan onḍege arhõ bar dine tahẽyena. 7Ona tayom Jisu do celakoe metatʼkoa, “Dela bon, arhõ Jihudạte bon calakʼa.”
8Celakoko metadea, “E Guru, thoṛa din lahare mukhiyạko dhirite tińmeko menetʼ tahẽkana, am do cetʼ arhõ onḍe calakʼem menjoṅ kana?”
9Jisui roṛ ruạṛatʼkoa, “Din reakʼ do cetʼ gelbar ghonṭa bạnukʼa? Jãhãege sińreye dãṛãn khan uni do bae tohodokʼa, ente uni do noa dhạrti reakʼ marsale ńeleda. 10Menkhan jãhãege ńindại dãṛãn uni doe tohodokʼgea ente unire marsal do bạnukʼa.”
11Noako katha roṛ tayom celakoe metatʼkoa, “Aboren gate Lasar doe jạpitʼ akada, menkhan uni berede lạgitʼ iń calakʼkana.”
12Noa iạte celakoko metadea, “E Probhu Isor, jạpitʼ akatʼ khane bańcaokʼa.”
13Jisu do Lasare gocʼ akan reakʼ kathae roṛkeda, menkhan uniren celako doko bujhạukeda jạpitʼ hataṛ reakʼ kathageye metatʼkoa. 14Unre Jisu do pusṭạuteye metatʼkoa, “Lasar doe gocʼ akana, 15menkhan apeakʼ katha hudiskate rạskạń bujhạueda, iń do onḍe bạń tahẽkana jemonpe pạtiạukʼ. Ado dela, Lasar ṭhen bon calakʼa.”
16Unre Thoma, okoe do jawako metae, uni do sãotenkoe metatʼkoa, “Dela bon, abo hõbon calakʼa, jemon uni sãotebo gujukʼ.”
Jisuge jiwetʼ ruạṛokʼ ar jion do
17Ado Jisu onḍe seṭeren khane baḍaekeda, Lasar do pon din lahareko topa akadea. 18Ar Jerusalem khon Bethaniạ do bar mail gan sạṅgińre tahẽkana. 19Jihudiko modren ḍher hoṛge Martha ar Mạriạmren boehae gocʼakan iạte jiwi raṛecʼ tạkin lạgitʼko hecʼakan tahẽkana. 20Ado Jisui hijukʼkane ańjomketʼ khan Martha do uni sãote ńapamokʼ lạgitʼe oḍok calaoena, menkhan Mạriạm do oṛakʼregeye duṛupʼ tahẽyena.
21Martha do Jisui metadea, “E Probhu, nonḍe baṛem tahẽlen khan bareń do ohogeye gocʼlena. 22Menkhan ińiń baḍaea, am do ńit hõ Isor jãhãnakʼgem koeye Isor do onageye emama.”
23Jisu do uniye metadea, “Amren boeha do arhõe jiwetʼ beredokʼa”
24Unre Marthae menkeda, “Baḍaegeạń, mucạtʼ dinre gocʼko tinreko jiwetʼ beredokʼa unre uni hõe beredokʼa.”
25Jisu do uniye metadea, “Ińge beretʼ ruạṛokʼtetʼ ar jion do. Okoe ińreye pạtiạukʼ uni doe gocʼlenre hõ jiwetʼe tahena. 26Ar okoe jiwetʼ menae ar ińreye pạtiạukʼkan uni do tis hõ ohoe gocʼlena. Am do cetʼ noam pạtiạukʼ kangea?”
27Marthae menkeda, “Hẽ Probhu, iń doń pạtiạukʼ kangea, amge Isorren Hopon dhạrtite hijukʼicʼ do.”
Jisu do mẽtʼdakʼe joroketʼtaea
28Noa katha menkate Martha doe calaoena ar bokot kuṛi Mạriạm danaṅre hohowadeteye metadea, “Gurui hecʼ akana are hohowam kana.”
29Mạriạm do noa katha ańjomtora usạra beretʼkate Jisu ṭhene senena. Jisu do unhạbicʼ hõ atote bae boloakan tahẽkana; 30Martha okareye ńapamlede uni do onḍegeye tahẽkana. 31Ar okoe Jihudiko Mạriạm tulucʼ oṛakʼreko tahẽkan ar jiwiko raṛecʼetʼtae tahẽkan onko do Mạriạm hako pako bahrete calakʼkanko ńelkede khan uniko pańjakedea. Onko doko hudiskeda, Mạriạm do topa ṭhen rakʼjoṅ lạgitʼe calakʼkana.
32Ado Jisu okareye tahẽkan onḍe Mạriạme hecʼena ar uniye ńelkede khan jaṅgare giḍiyenteye menkeda, “E Probhu, nonḍe baṛem tahẽlen khan bareń do ohoe gocʼlena.”
33Jisu do Mạriạm ar uni soṅgeteko hecʼakan Jihudiko rarakʼkane ńelketʼko khan jiwireye kạulạ kạuliyena. 34Uni do onkoe metatʼkoa, “Okare Lasarpe bae akadea?”
Metadeako, “E Probhu, dela hecʼkate ńelme.”
35Unre Jisui rakʼkeda. 36Onate Jihudikoko menkeda, “Ma ńelepe, uni do Lasar tinạkʼe dulạṛede tahẽkana.”
37Menkhan Jihudiko modren adomko doko menkeda, “Okoe kãṛã hoṛakʼ mẽtʼẽ beṅgetʼ ocoketʼ uni do cetʼ nonkanakʼ bae kạmi daṛekea jemon Lasar aloe gocʼkokʼ?”
Lasare jiwetʼ beretʼkede
38Noate Jisuakʼ mon do arhõ kạulạ kạuliyentaea ar topa ṭhene calaoena. Topa do mitʼṭecʼ dander tahẽkana. Ar ona dander duạrre mitʼṭecʼ dhiri doho akan tahẽkana. 39Jisui metatʼkoa, “Dhiri ocogpe.”
Ado gocʼakanicʼren misera Martha do Jisui metadea, “E Probhu Isor, ńitokʼ doe soyena, ente teheń pon dine hoyokʼ kana.”
40Jisu do Marthae metadea, “Am do cetʼ bạń metatʼmea pạtiạulen khanem Isorakʼ ṭhonokem ńela?”
41Unre dhiriko ocokʼkeda. Ar Jisu do coṭ secʼ beṅgetʼ rakapʼkateye menkeda, “E Baba, ińakʼ katham ańjomketʼte iń do amiń gun manao joharam kana. 42Ińiń baḍaea am do jaoge ińakʼ katham ańjometʼtińa. Menkhan okoeko hoṛ beṛhaeteko teṅgo akan onko jemonko pạtiạukʼ amem kol akadińạ mente, ar onatege noa katha doń menkeda.
43Noa kathae menketʼ khan Jisu do ãṭ aṛaṅteye hohokeda, “E Lasar, oḍok hijukʼme.”
44Khange gocʼlenicʼ do topa khone oḍokʼ hecʼena. Uniyakʼ ti-jaṅga do topa reakʼ kicricʼte bedhao akan ar mẽtʼãhã do gamchate tol poṭomge tahẽkantaea. Jisu do hoṛkoe metatʼkoa, “Raṛayepe ar sen ocoaepe.
Jisu goje reaṅ soṛojontro
(Mathae 26.1-5; Mark 14.1,2; Luk 22.1,2)
45Mạriạm ṭhen okoe Jihudikoko hecʼakan tahẽkan onko modren ạḍi utạr hoṛ do Jisuakʼ noa kạmi ńelte unireko pạtiạuena. 46Menkhan onko modren adomko do Phạrusiko ṭhen senkate Jisu okae kạmiletʼ onako lạiyatʼkoa. 47Unre maraṅ naekeko ar Phạrusiko do maraṅ bạisiren hoṛkoko jarwaketʼkoteko metatʼkoa, “Ńitokʼ do cetʼ bo cekaea? Nui hoṛ do ạḍi utạr hahaṛa kạmikoe kạmikana. 48Ar nonkage bon aṛakʼ idiyae khan sanamkoge unireko pạtiạukʼa ar Romiko do hecʼkate aboakʼ mundil ar jạtko marao tabona.”
49Onko modren Kaeapha ńutuman mitʼ hoṛ do ona bochorren maraṅ naekeye tahẽkana. 50Uni doe metatʼkoa, “Ape do cetʼge bape baḍaea, ar hudis hõ bape hudisetʼ kana, goṭa jạtren nosṭokʼ khon bickom sanam hoṛko bodolte mitʼ hoṛe gujukʼge bhagea.”
51Kaeapha do noa katha apnar khone roṛleda ona do baṅ menkhan uni do ona bochorren maraṅ naekeye tahẽkana. Onate uni doe nạbileda, Jihudi jạtrenko lạgitʼ Jisugeye gujukʼa mente. 52Ar eken Jihudi jạtrenko lạgitʼ do baṅa, menkhan Isorren chirchạtur akan gidrạko samṭaoko lạgitʼ hõ uni doe gujukʼa.
53Ado enhilokʼ khon Jihudi mukhiyạko do Jisu goje lạgitʼ soṛojontroko ehopʼena. 54Onate Jisu do Jihudiko talare sodorte dãṛãne bạgikeda, ar ona jaega bạgikate hahaṅkar sor reakʼ Ephrạimko metakʼ mitʼṭecʼ atoteye calaoena. Ar acʼren celako sãote onḍeye tahẽyena.
55Unre Jihudikoakʼ bańcaokʼ porob do sor akan tahẽkana. Ar porob lahare saphakʼ lạgitʼ ạḍi utạr hoṛ do atoko khon Jerusalemteko calao akan tahẽkana. 56Ar onko hoṛ do Jisu ńam baṛayeko ehopʼena. Onko do mundilre teṅgokate kupulikʼko ehopʼena, “Noa porobre uni do cetʼ bae hijukʼa? Ape do cetʼpe hudiseda?”
57Maraṅ naekeko ar Phạrusiko doko hukumletʼ tahẽkana je, Jisu okare menaea mente jãhãegeye baḍaele khan uni do onkoe baḍae ocoko jemon onko do Jisuko sapʼ daṛeae.
Currently Selected:
Johan 11: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
