Johan 12

Jisu Bethesaeda pukhri ṭhen mitʼṭen rugiye bogeyede

(Mathae 26.6-13; Mark 14.3-9)

1Ado bańcaokʼ porob turui din lahare Jisu do Bethaniạ atoteye senena. Ar gocʼko khon okoeye jiwetʼ beretʼlede uni Lasar hõ Bethaniạ atoregeye girobasokʼkan tahẽkana. 2Onḍe onko do Jisu lạgitʼ jomakʼko tearkeda. Ar Martha doe sapʼsorako kan tahẽkana. Ar okoeko Jisu tulucʼ jojomko duṛupʼ akan tahẽkan onko modre Lasar hõe tahẽkana.

3 # Luk 7.37,38 Unre Mạriạm do adha liṭar ạḍi damanakʼ mahkaokʼ sunume ạgukeda ar Jisuakʼ jaṅgareye dulkeda ar acʼakʼ upʼteye jotʼketʼtaea. Ar ona mahkaokʼ sunum reakʼ mohokte goṭa oṛakʼ do perecʼena. 4Jisuren celako modren mitʼ hoṛ, okoe do bạirikoakʼ tire Jisui soprot ocoye uni Jihudạ Iskariot doe menkeda, 5“Noa mahkaokʼ sunum do cedakʼ pe sae Dinarte baṅ ạkhrińlena, ar reṅgecʼ orecʼko baṅ ematʼkoa?”

6Jihudạ do reṅgecʼko lạgitʼ dạndikate noa kathae menleda ona do baṅ. Uni do kombṛoe tahẽkana. Ar uni jimạre ṭaka reakʼ baksa tahẽkante dohoakʼko khone kombṛoyetʼkan tahẽkana.

7Jisui menkeda, “Alope duk ocoyea. Ente topayiń jokhecʼ sajaoiń lạgitʼge uni do noae doholeda. 8#Bib 15.11 Reṅgecʼko ma jaoge ape tulucʼ menakʼko, menkhan iń do jao okte bape ńameńạ.”

Lasar upạrte soṛojontro

9Ado Jisu Bethaniạre menaea menteko baḍaeketʼ khan Jihudiko mod khon ạḍi utạr hoṛ do onḍeko hecʼena. Onko do eken Jisu lạgitʼ do baṅ, menkhan Jisu gocʼko khone jiwetʼ beretʼ akade uni Lasar ńele lạgitʼ hõko hecʼlena. 10Unre maraṅ naekeko do Lasar hõ goje lạgitʼko goṭakeda, 11ente Lasar iạte Jihudiko modren ḍher hoṛge mukhiyạkoko bạgiyatʼkote Jisureko pạtiạuena.

Jerusalemteye bolokʼkan

(Mathae 21.1-11; Mark 11.1-11; Luk 19.28-40)

12Ado porobre okoeko hoṛko hecʼakan tahẽkan onko do dosar hilokʼko ańjomkeda Jisu do Jerusalemteye hijukʼ kana. 13#Ser 118.25 Unre onko do khijur ḍạr sapʼkate daram ạguiye lạgitʼko oḍok calaoena ar ãṭ aṛaṅte hohowate memenko ehopʼena,

“Hosanna, bhorangeae

Probhu Isor ńutumte daraekạnicʼ,

Israelkoren raj do.”

14Sonot sostor reakʼ katha leka Jisu do mitʼṭen gadha hopone ńamkedete unireye decʼena. Sostorre olakan leka, 15#Sak 9.9 “E Sionren kuṛi, alom botorokʼa. Ńelme, amren raj do gadha hoponre decʼkateye hijukʼkana.”

16Jisuren celako do pạhilre noako bako bujhạu daṛeada. Ado tinre Jisuakʼ ṭhonok sodorena unre onko doko disạkeda sonot sostor reakʼ ona katha do Jisu reaṅge olakan tahẽkana mente. Onko do arhõ disạ hecʼatʼkoa hoṛko do Jisu lạgitʼgeko onkaleda.

17Ado topa dander khon Lasare hoho oḍokkede ar gocʼko khone beretʼkede jokhecʼ okoeko hoṛ Jisu ṭhenko tahẽkan onkoge Lasarakʼ jiwetʼ beredokʼ reaṅ gohako emkeda. 18Onate gadel hoṛko do Jisu daram ạguiye lạgitʼko oḍok calaolena, enteko ańjomakatʼ tahẽkana Jisuge ona hahaṛawakʼ kạmi doe kạmi akada. 19Noa ńelte Phạrusiko do ako akoreko men joṅana, “Aboakʼ do cetʼ labge baṅ hoyokʼkana. Ente ńelpe, goṭa dhạrtirenko do uniyakʼ dolteko calaoena.”

Jisu ar Junạniko

20Ona porobre okoeko sewa lạgitʼko hecʼakan tahẽkan onko modre adomko do Junạni hoṛko tahẽkana. 21Onko do Philip ṭhen hecʼkate nehõradeteko metadea, “E baba ale do Jisule ńelea.” Philip do Gạlil reakʼ Bethsaeda atoren hoṛe tahẽkana. 22Ar Philip do senkate Andrease lạiyadea Ar Andreas ar Philip do senkate Jisukin metadea.

23Unre Jisu do Andreas ar Philipe metatʼkinạ, “Manwa Hopon do ṭhonok sodorokʼ reakʼ okte seṭer akantaea. 24Sạrigeń metaben kana, guhum jaṅ hasare ńurkate baṅ gocʼlen khan ona do eskarge tahena, menkhan gocʼlen khan do ạḍi utạr gele belekʼa. 25#Mat 10.39; 16.25; Mrk 8.35; Luk 9.24; 17.33 Okoe acʼakʼ jiwiye dulạṛ uni do acʼakʼ sạriyakʼ reakʼ jione khuạutaea, menkhan okoe noa dhạrtire acʼakʼ jiwi bae dulạṛ uni do jaejug jion lạgitʼ acʼakʼ sạriyakʼ reakʼ jione rukhiyạitaea. 26Jãhãege ińakʼe kạmikan khan uni do ińe pańjańma. Iń okareń tahena ińren kạmiyạko hõ onḍegeko tahena. Jãhãege ińakʼe kạmikan khan Baba do uniye manotea.

Jisu acʼakʼ gujukʼ reakʼe lại lahayetʼ

27Ińakʼ jiwi do ńitokʼ khad badaokʼkan tińạ. Iń do cetʼ niạ kathageń mena, ‘E Baba, noa ghuṛi khon de bańcaoiń me?’ Menkhan niạ lạgitʼge coṅ noa okte hạbicʼ mań hecʼakana. 28E Baba, amakʼ ṭhonok sodorme baṛe.”

Unre serma khon noa katha ańjomena, “Iń do ińakʼ ṭhonokiń sodor akada ar ona do arhõń sodora.”

29Ar okoeko hoṛ onḍeko teṅgo akan tahẽkan onko do ona ańjomkateko menkeda, “Rimil saḍeyena.”

Adomko doko menkeda, “Okoe serma goḍet coṅ uni tulucʼ kathae roṛkeda.”

30Noa iạte Jisui menkeda, “Noa katha iń lạgitʼ do baṅ roṛakana, menkhan ape lạgitʼge roṛakana. 31Noa dhạrtiren hoṛkoakʼ bicạr reakʼ okte do seṭer akana, ar dhạrtiren rajakʼ ti khon ńitokʼ do recʼ ocokʼa. 32Iń do ot khon coṭteń rakapʼ ocokʼre sanamko iń ṭheniń or sorkoa.” 33Uni do cetʼlekan gujukʼ hoyokʼtaea ona bujhạu ocoko lạgitʼge noa katha doe roṛkeda.

34 # Ser 110.4; Jes 9.7; Jeh 37.25; Dan 7.14 Unre hoṛko do Jisuko metadea, “Sonot sostor khonle baḍae akada Mạsi do jaejug hạbicʼe tahena. Enḍekhan am do cekatem meneda, Manwa Hopon do coṭte rakapʼ ocokʼ hoyokʼtaea? Enḍekhan nui Manwa Hopon doe okoe kana?”

35Jisui metatʼkoa, ar thoṛa dinge ape talare marsaltetʼ menakʼa. Ape ṭhen marsal menakʼrege dãṛãnpe, jemon apere ńut do aloe jitạu daṛeakʼ. 36Marsal ape ṭhen tahenrege marsalre pạtiạukʼpe jemon ona marsalren hoṛpe hoydaṛeakʼ.”

Jihudikoakʼ bepạtiạu

Noako kathae lạiyatʼko khan Jisu do onko khon acʼe danaṅenteye calaoena. 37Menkhan onko samaṅre cinhạ lekate unạkʼ hahaṛawakʼkoe kạmiketʼre hõ hoṛko do unire bako pạtiạulena. 38#Jes 53.1 (LXX) Noa do hoyena Jesaea nạbi hotete roṛlenakʼ katha jemon purạukʼ:

E Probhu Isor, alele porcar akatʼakʼ do okoe baṅe pạtiạuatʼ?

Ar Probhu Isorakʼ daṛeanakʼ ti do okoe ṭhen sodor akana?

39Onko hoṛ do noa iạtege bako pạtiạu daṛeada, ente Jesaea cetʼ lekae roṛletʼ onkage, 40#Jes 6.10 (LXX) “Isor do onkoakʼ mẽtʼe kãṛã akatʼtakoa ar ontor doe goṛdho akatʼtakoa, jemon onko do mẽtʼte aloko ńeńel ar ontorte aloko bujhạu, ar bogekʼ lạgitʼ uni ṭhen aloko ruạṛ hijukʼ.” 41Jesaea do Jisuakʼ ṭhonoke ńelletʼte uni reaṅ noa kathae roṛleda. 42Enre hõ mukhiyạko modren ḍher hoṛge unireko pạtiạuena, menkhan Phạrusiko ṭhen biṭlạha ocokʼ botorte bako aṅgocleda. 43Onko do Isor ṭhenakʼ man khon hoṛko ṭhenakʼ mange bạ̃ṛtiko kusiyakʼkan tahẽkana.

44Jisu do ãṭ aṛaṅteye menkeda, “Okoe ińreye pạtiạukʼkan uni do eken ińre do baṅ bickom okoeye kol akadiń unire hõe pạtiạukʼkana. 45Ar okoe ińe ńeleńkan, uni do kol akadinicʼgeye ńelekana. 46Iń do noa dhạrtire marsal lekań hecʼakana, jemon ińre okoeye pạtiạukʼ uni do ńutre aloe tahen. 47Jãhãege ińakʼ kathae ańjom ar onaleka bae senokʼ enḍekhan uni do bạń bicạrea, ente manwa dusiko lạgitʼ do baṅ, bickom kại khon bańcaoko lạgitʼgeń hecʼ akana. 48Okoe iń bae bạsutạń ar ińakʼ katha bae ańjom uni lạgitʼ do bicạricʼ menaea. Oka kathań roṛakatʼ ona kathage mucạtʼ dinre uni do dusi menteye sạbudea; 49ente iń do apnarte cetʼge bạń roṛakada, menkhan okoeye kol akadiń uni Babageye hukum akawạdińạ cetʼko roroṛ hoyokʼ tińạ mente. 50Ińiń baḍaea uniyakʼ hukum do jaejug jion kana. Onate okako kathań roṛetʼkan ona do Babawakʼ hukum lekageń roṛeda.”

Currently Selected:

Johan 12: SBT

Highlight

Copy