Johan 3
3
Nãwã janamokʼ
1Phạrusiko modre Nikodemus ńutuman Jihudikoren mitʼṭen mukhiyạ hoṛe tahẽkana. 2Uni do mitʼ din ńindạ jokhecʼ Jisu ṭhen hecʼkateye menkeda, “E Guru, alele baḍaea am do mitʼṭen cecetʼicʼ leka Isor ṭhen khonem hecʼakana, ente okako hahaṛawakʼ kom kạmikan, ona do Isor soṅgete bae tahẽlen khan okoe hõ ohoe kạmi daṛelea.”
3Jisu do Nikodemuse metadea, “Sạrigeń metamkana, jãhãe hoṛ dosar karte bae janamlen khan Isorakʼ raj do ohoe ńel daṛelea.”
4Unre Nikodemus do uniye metadea, “Manwa do haṛamkate cekate arhõe janam daṛekokʼa? Dosar dhao eṅgatakʼ kukhire bolo ruạṛkate uni do cetʼ arhõe janam daṛeakʼa?”
5Jisui menkeda, “Sạrigeń metamkana, dakʼ ar sonot Jiu khon bae janamlen khan okoe hõ Isorakʼ rajte ohoe bolo daṛelena. 6Manwa khon janam akanicʼ do manwage ar Jiu khon janam akanicʼ do Jiuge. 7Dosar karte janamokʼ hoyokʼtapea menteń metatʼmete alom hahaṛakʼa. 8Hoe do oka secʼ sanaye ontegeye hoeyeda ar ona reakʼ saḍetetʼem ańjoma, menkhan oka khon hijukʼ kana ar okate calakʼa ona do bam baḍaea. Sonot Jiu khon okoeyakʼ janam hoyakan onko do ṭhik onkageko hoyokʼa.”
9Nikodemus do Jisui kulikedea, “Noa do cekate hoydaṛekokʼa?”
10Unre Jisu do uniye metadea, “Israelkoren guru hoykatere hõ cetʼ noako bam bujhạueda?” 11Sạrigeń metamkana, ale okale baḍae akatʼ onagele roṛeda ar okale ńelakatʼ ona reaṅge gohale emeda, menkhan ape do aleakʼ goha bape luturakʼ kana. 12Dhạrti reakʼakʼkoń lạiyapere bape pạtiạukʼkan khan serma reakʼakʼkoń lạiyapere cekatepe pạtiạukʼa?
13Sermare okoeye tahenkan ar serma khon okoeye hecʼakan uni Manwa Hopon chaḍa ar okoe hõ sermate do bako rakapʼ akana. 14#Num 21.9 Cetʼleka Mose do hahaṅkarre bińe rakapʼlede onkage Manwa Hopon hõe rakapʼ ocokʼa, 15jemon jãhãege unireye pạtiạukʼ uni do jaejug jion tahentae.
16“Isor do dhạrtirenko nonkae dulạṛketʼkoa acʼren eskar janam Hopongeye emkedea, jemon unire pạtiạukʼ mitʼke mitʼ hoṛ aloko nosṭokʼ bickom jaejug jion tahentako. 17Uni do manwa dusire paṛaoko lạgitʼ acʼren Hopon bae kolakadea bickom Hopon hotete jemon kại khon bańcaoko ńam ona lạgitʼgeye kolakadea. 18Okoe uni Hoponreye pạtiạukʼ uniyakʼ do jãhãn bicạr baṅ hoyokʼtaea, menkhan okoe bae pạtiạukʼ uni do dusi kanae mente laharegeye lekha ocoakana, ente uni do Isorren eskar janam Hoponre bae pạtiạu akana. 19Uni do dusi menteye lekha ocoakana ente dhạrtire marsal hecʼakana, menkhan manwakoakʼ kạmiko bạṛicʼgete manwa do marsal khon ńutge bạ̃ṛtiko dulạṛetʼkana. 20Okoe bạṛicʼakʼe kạmikan uni do marsale hirkhạwakʼ kana. Ar bạṛicʼ kạmiko sodorokʼtae iạte marsal ṭhen do bae hijukʼkana. 21Menkhan okoe sạri horteye calakʼkan uni do marsal ṭhene hijukʼkana jemon uniyakʼ kạmiko Isorakʼ sanaleka hoyakana mente sodorokʼtae.”
Johanakʼ goha
22Noa tayom Jisu ar uniren celako do Jihudạ disạmteko calaoena. Ar onḍe uni do acʼren celako sãote thoṛa dine tahẽyena ar hoṛko bạptiskoe ehopʼena. 23Unre Salem ńutumanakʼ mitʼṭecʼ ato sor ṭhen Aenonko metakʼ mitʼṭecʼ jaegare Johan hõe bạptisetʼko tahẽkana, ente ona jaegare do ḍher dakʼ tahẽkana ar hoṛko hõ hecʼkateko bạptis ocokʼkan tahẽkana. 24#Mat 14.3; Mrk 6.17; Luk 3.19,20 Ar unhạbicʼ Johan do hajotre bae bhorao ocoakan tahẽkana.
25Ar unre dhorom reakʼ niạm lekate saphakʼ babotre Johanren celako do mitʼṭen Jihudi sãoteko reṭepeṭekʼ kan tahẽkana. 26Onko do Johan ṭhen hecʼenteko metadea, “E Guru, okoe do Jordan hanasare am sãoteye tahẽkan ar okoeṭakʼ reakʼ goham emletʼ, ńelme, uni doe bạptisetʼkoa ar sanam hoṛ uni ṭhengeko calakʼkana.”
27Unre Johane roṛ ruạṛatʼkoa, “Serma khon baṅ emlen khan okoe hõ cetʼge ohoe ńam daṛelea. 28#Jhn 1.20 Apege roroṛpe ańjomakadiń je, Mạsi doń baṅkana, menkhan iń do uni lahateń kol ocoakana. 29Okoe ṭhen bạhu kuṛiye jimạ ocoakan uni kangeae jãwãe beṭa do. Ar lomta koṛa do jãwãe beṭawakʼ kathae ańjoma ar uniyakʼ aṛaṅ ańjomteye rạskạkʼa. Onkage ińakʼ rạskạ hõ teheń do purạu akantińạ. 30Uni do maraṅ idikʼtege hoyokʼtaea ar iń do ocogokʼ hoyokʼtińạ.”
Coṭ khon hijukʼkạnicʼ
31Coṭ khon hijukʼkạnicʼ do sanamko cetanren kanae. Okoe dhạrti khone hijukʼkan uni do dhạrtiren kanae, ar uni do dhạrti reakʼ kathageye roṛa. Menkhan okoe serma khone hijukʼkan uni do sanamko cetanren kanae. 32Uni do okae ńelakatʼ ar okae ańjomakatʼ ona reakʼ gohageye ema, menkhan okoe hõ uniyakʼ goha do bako aṅgoctaea. 33Okoe uniyakʼ gohae aṅgoc akatʼ uni do ona hotetegeye sodoreda je, Isor okae men ona do sạrikana mente. 34Isor okoeye kolakade uni do Isorakʼ kathageye roṛa, ente Isor do sonot Jiu soṅkate bae emekana. 35#Mat 11.27; Luk 10.22 Baba do Hopone dulạṛede kana ar uniyakʼ tirege jotowakʼe emakada. 36Hoponre pạtiạukʼicʼ do jaejug jion menakʼtaea, menkhan Hopon reakʼ bebataoicʼ do jion ohoe ńamlea, bickom Isorakʼ edre uni cetanre paṛaokʼa.
Currently Selected:
Johan 3: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
