Met 15
15
Ngaka'a e be Abraham a e mvoñe bôte jé
(Rm 4; Ga 3:6-9; Né 9:6-7; Mm 7:2-7)
1Mvuse mam mete, ajô Nti e nga toteban e be Abram e ñyenan éziñ été na: Te ko woñ a Abram! Mamiene me ne ébene jôé, a ma'ane môé ma ye bo étua anen. 2Abram a nga yalane na: A Nti nyô a ne Nti, wo ye ve ma jé? Me nga ke teke *bon, a miene y'Eli'i jam a ne Eliézer ya Damas. 3A nga beta jô na: Ô nji ve ma mvoñe bôt, a nyô a nga bialé e *nda jam a ye bo miene y'Eli'i jam. 4Ve Nti a nga kobô nye a jô na: Saake nye a ye bo miene y'éli'i jôé. 5A nga kee ma atan a jô na: Fombô'ô ñhe yôp a lañek ateté nge ô ne lañe de. A nga beta jô na: E nne mvoñe bôte jôé ja ye bo nalé. 6Abram a nga buni Nti, nye ki ve lañe nye de ane zôsôôô.
7A nga beta jô nye na: Me ne Nti, nyô a nga bo na ô kôlô Ur Bekaldééñ, asu ya ve wo *si nyô na ô bi je. 8Abram a nga yalane na: A Nti, nyô a ne Nti, ma ye yem a jé na ma ye nyoñe je' 9A nga jô nye na: Nyoñe ngal éjakas a ntoo mimbu milaa, ngal ékela a ntoo mimbu milaa, nnôme ntômba a ntoo mimbu milaa, ôdu wua a étoñe zum asu ya ve ma bie. 10A nga nyoñe betite bete bese a tyi'i be zañ a kele a bôôé étun ése é tôba'ane ji évok, ve a nji tyi'i anone zañ. 11Ane anon e ne beze yôbe e nga ku mimbime yôp; Abram a nga titane de. 12Eyoñe jôbe da dim, ôyo ô nga bi Abram, nalé fe woñ afibe dibi été.
13Nti a nga jô Abram na: Yeme na mvoñe bôte jôé ja ye bo mintabe e si é nji bo énjap; ba ye bo alo été a ba ye tibili be tañe mimbu mintete minyin. 14Ve ma ye tyi'i ayoñ ba ye boban alo ajô, wôna ba ye kôlô be bili abui akum. 15Wo wo ye wu *mvo'é, wo ye jambane soñ mvuse meva'a éto nnôm. 16Eyoñe miaé nyini wo ye bo, ba ye beta so va; amu éyoñe te étam e nje mbia mboone Beamorééñ a ye tulan ôkup.
17Eyoñe jôp é nga dim, dibi e nga bo afip; mbe'e nduan ô kuik ôtita a minkaba'a mi nduan mi nga lôt e zañe betit be mbe ntyi'ane zañ. 18Môs ôte, Nti a nga bo élat a Abram a jô'ô na: Ma ve *si nyô e be mvoñe bôte jôé; ataté ôsôé y'Ejipte a kui beta ôsôé Efrat, 19si Bekénieñ, Bekénizieñ, Bekadmônééñ, 20Behittite, Beférézieñ, Berefayim, 21Beamorééñ, Bekanééñ, Begirgazieñ, Beyébuzieñ.
Currently Selected:
Met 15: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
