Neto'te 21
21
Mba bo na' mbwe Isak là
1Tshùaben kwimte ju z'a na' mbù Sara là, ngù yen nka'ni là bumte. 2Sara #Héb. 11.11jùm, mbwe mén mandum Abraham ntùm ywèn i, be kua' mum ntswe'njù mi Nsi na' ntshob là. 3Abraham tswi lén nshum i ndù Isak, nshum i ze bo bwe i, nshum i ze Sara bwe yi là. 4Abraham #Net. 17.12; Mfa' Gha. 7.8si ket nshum i ndùs'a kum lé'njù fome, ndaṅndaṅ mba Nsi na' ntshob yi là. 5Bo lo be bwe Isak ndù Abraham ghù ngu'njù nkù. 6Sara tshob ndù: Nsi fà tunu zwi me, mba we lo z'a nsi ju' là nsi zwi tse num àm.
7Sara bèn ntshob ndù: We z'a na' nku'ni netshob ndù me nsi nyô mén mandum à? Mba ndùlala me bwe mén mandum yi ntùm ywèn i.
8Mén ku', ntsho' bùn. Abraham ghù mo' jùa ndùb lé'njù ze Isak tsho' bùn nà. 9Sara yen nshum Abraham ze Agar ngon Egipto bwe là nke ngù sa bo Isak. 10Sara tshob Abraham ndù: Ta' yen nkuan ze mènnzwi li bo nshum i, nummbe nshum i ke nsi jù ndà bo nshum àm Isak. 11Men #Gal. 4.29-30ntshob li bag Abraham neshu, nummbe mba Ismaél na' mb'a be mén i. 12Là #Rom. 9.7; Héb. 11.18Nsi tshob Abraham ndù: Kà lab wul o num nu nshum o Ismaél bo nkuan o ze mènnzwi Agar. Bam mba ke lo ze Sara nsi bètte wù là. Nummbe ko' yu nzwit nsi tum à num Isak. 13Me nsi lo' mba nshum nkuan o ze mènnzwi ghù ta' ngô yi, nummb'a b'a nzwil o. 14Abraham lo nsi mà nkebnjù ndo' bàn bo ntu' ntse mfà Agar, njab nshum i num nkembe' i, nta' i. A nèn mfàn manze nke ntsha num kônkwa Ber-Shéba. 15Ngelaṅ ntse mi a be ntu' mi là, Agar yab mén tun mo' metswe' tù, 16nèn ntswe se i ndaṅndaṅ, num nguan ma' loṅ; nummb'a lo ke ntshob ntù i ndù: Be me ke ke njen mén àm k'a nke nkwù. A tswe se mén ndaṅndaṅ, mén tshag nz'é tù, nkua'a, nke ndàne. 17Nsi ju' nze mén; Angél Nsi tsin mfe kamànyam ntsiaṅ Agar, ntshob yi ndù: A ke Agar? Kà bwôg nummbe Nsi ju' nze mén mum dù' z'a be bwe là. 18Lo nsi, bù' mén nsi ntshùb bu i bu o, nummbe me nsi lo' i ghù ngô ndùb yi. 19Nsi ké' miag Agar, a yen mo' tôntse. Agar nèn bwe, ntu' ntse ntùm ntu', ndo' nèn mfà mén. 20Nsi nke mbe bo mén, a nke nku'u, nke ntswe num kônkwa, mbe ngama' két. 21A nke ntswe kônkwa Paran; màab diag nzwi i mum ngô Egipto.
Abraham wat kàn bo Abimélék
22Num #Net. 26.26yen ngelaṅ nà Abimélék bo tàndà ntsho i Pikol tshob Abraham ndù: Bin Nsi be mbe num njoṅ tshu fa ts'o be ngù là. 23Ndùlala kàn mfe me num lén Nsi ndù o ke nsi zi tatt'àm, ke me, ke bon tshàm, ke nzwil àm no; bam me ndù mebwô ze me be ngù wù là, o nsi ghù a be yi me mba ngô z'o tshwèt ntswe mum bwe là. 24Abraham bùnte ndù: Ṅ, me kàn mfe! 25Abraham tswit nkùn num nu tôntse se ghafa' Abimélék lo' yi tùntùn nà. 26Abimélék tshob ndù: Me lo ke lèn sàm ju num yen nu là. Tu wul o lo ke soṅ àm sàm ju bwe, me ke bèn nju' sàm nu bwe k'a ke nda' sènni. 27Abraham ghom njùmbwe boa nyàmna' mfà Abimélék. Njoṅ yub ntu bàa fa wat kàn.
28Abraham lo' bon njùmbwe sammbàa njab njam, 29Abimélék bètt'é ndù: Tshen bon njùmbwe sammbàa ts'o sô njam njam nà tswit'a ndùke?
30A bùnte ndù: A bwô ndù o bam tshen njùmbwe sammbàa li ts'a tum bu àm nà, ndù a be kwénta ndù me na' ntswe' sen tôntse li.
31A num ndùlala ze bo be ntsiaṅ yen dù' là ndù Ber-Shéba là; nummb'a b'a dù' ze bo kàn mfe bwe bo bo là.
32Ndùlala bo wat kàn Ber-Shéba. Yen nà be tshùa Abimélék lo nsi bo Pikol ze tàndà ntsho, mbèn njam mum ngô ba Filistia.
33Abraham bwe ntù tamaris Ber-Shéba, ntsiaṅ lén Tshùaben, Nsi matmat bwe. 34Abraham lo tswe ntùm ngô ba Filistia yàme.
Currently Selected:
Neto'te 21: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
