Lukas 15

Tànkùt njùmbwe z'a na' mbi là mba tànkùt nkàb z'a na' mbi là

(Mat. 18.12-14)

1Njoṅ #Luk. 5.29-30ghakwéfé' fa mba ben kebwô fa kù'te nse' mbaṅ Yésu num neju' i. 2Ba Férésia mba ghalèn ṅwa'ni Nsi nke ntshobte tun tô ntshob ndù: A num ndo' ben kebwô nke njù jujù bo à bo. 3A tshob yen tànkùt li bo ntshob ndù: 4A zit mèn netèt bin z'a ghù njùmbwe nkù, ta' i ze ntshù' bi, mb'a ke faṅ tse ntshob bwe'e ṅam bwe'e num kônga, nèn ndiag z'a bi là tà nkum ngelaṅ z'a fon i l'à? 5Ngelaṅ a fon i là, a kel i ntùm tsiaṅte, njab num nkembe' i; 6mbèn njam la' i, ntsiaṅ shun tse mba ba ndùla', ntshob bo ndù: Bag à bin tsiaṅte me, nummbe me bèn mfon njùmbwe àm z'a na' mbi là. 7Me tshob bin ndù: Be ndaṅndaṅ, tsiaṅte nsi be mfe kamànyam num ta' mèn kebwô z'a kaṅ ntù i là, ntshùa mb'a be tsiaṅte be num benntùn ntshob bwe'e ṅam bwe'e tse netsine, tse nekaṅ ntù ke' ywimte yub là.

8Zit mènnzwi z'a ghù nkàb gham, ta' i ze ntshù' bi, mb'a ke nànte nte mbwôg num lambo, mbé'te nsindà, ndiag kua' mebwô tà nkum ngelaṅ z'a fon i l'à? 9Ngelaṅ a fon i là, a tsiaṅ shun tse mba ba ndùla' ntshob ndù: Bag à bin tsiaṅte me, nummbe me bèn mfon nkàb ze me na' ngua' là. 10Be ndaṅndaṅ, me tshob bin ndù tsiaṅte nsi be netèt ba Angél Nsi num ta' mèn kebwô z'a kaṅ ntù i là.

Nu mén z'a na' mbi là

11A bèn ntshob ndù: Mo' mèn lo ghù bon tse bàa. 12Ntù'njam tshob yi ndù: Tà, fà yàm bag tshu ts'a nsi ghù be yàm nà. A ghabte tshu tse bo. 13Tsemo' bon lé'njù be tshùa, ntù'njam tse'te njoṅ tse tshu fa, ndo nèn ntùm mo' ngô ba tum tà ngùanesà, ntsho bwe, nke njôg yôg kebwô, mbagte tshu tse. 14Ngelaṅ z'a bagte njoṅ i fa là, mo' nziku' ndùb vù ntùm ngô là, a to' neke mbwoṅe. 15A nèn njèn wul i la' mo' mèn ntùm ngô. Yen mèn nà tum i mà tshwèt ndù a ke mbéb ngùnyàm tse. 16A nke ndiag nejù mba jujù ze ngùnyàm num njù là, là sàm mèn ke fà yi.

17A lo' ntù i nèn tsham yi, ntshob ndù: Ghafa' be la' tà à si' tse bo ghù jujù yàme! Là tu wul àm me tshwèt nkwù nziku' nsen ni! 18M'a' lo tù, nèn ntèt tàa, ntshob yi ndù: Tà, me lo ghù nukebwô num miag Nsi mfe kamànyam mba num miag mu. 19Me ke' ku'ni mb'a b'o bèn ntsiaṅ àm mén o là, tù' lo' àm mba mo' mèn netèt ghafa' tsho là. 20A lo, nèn ntèt tàab, mb'a ke nse' tà ngùanesà là, tàab yen i, ndèn mi ko i. A kù nde, ngwù num tô i, ntat'é, nyô nge' mi. 21Mén tshob yi ndù: Tà, me lo ghù nukebwô num miag Nsi mfe kamànyam mba num miag mu. Me ke' ku'ni mb'a b'o bèn ntsiaṅ àm mén o là. 22Là tàab tshob kuan tse ndù: Bin lo' kum s'a be kua' se mebwô là, nse' ma' num i ndende, bin so kwa bu i, mba nketo' nku mi; 23bin lo' mén mfô z'a ghù nzit là nse' yi, bin zwi, be fèle, mbèn ntsiaṅte. 24Nummbe yen mén ni lo kwù, a bèn njôge; a lo bi, a bèn mbèn njam. Bo to' neke ntsiaṅte.

25Ntshùambwe na' mb'a mà tshwèt. A be fe, mbe kum mbaṅ la', nju' bo nke njob kwi, mbèn nke nyiaṅe. 26A tsiaṅ mo' ngafa' mbètt'é ndù: A nu ke mfe la' à? 27Ngafa' tshob yi ndù: Mfèl o bèn nse' kà tàan nzwi mén mfô z'a ghù nzit là, nummbe a bèn mbe yen i ndù a be ntùn. 28Ntshùambwe to' neya ntù, ke kô netsho ndà. Tàab tum mbu' mbu yi. 29Là, a bùnte ntshob tàab ndù: Tshù, a ndonni ngu'njù yàm mba me tshwèt nke mfa' wù, ke to' fàn ntshù' mu mba nda' yoṅ ntshù' là, o ke' to' fà mén mbwe me ndù me tsiaṅte yi bag à shun tshàm. 30Là ngelaṅ ze yen mén o li z'a bagte tshu tsho boa kattù bènnzwi se' là, o zwi mén mfô z'a ghù nzit là yi. 31Tàab tshob yi ndù: Bag wù bèn nke mbe njoṅ ngelaṅ fa, njoṅ tshu fa tse me ghù là b'a tsho. 32Là, a bwô neṅwate, mbèn ntsiaṅte, nummbe yen mfèl o li lo kwù, a bèn njôge, a lo bi, a bèn mbèn njam.

Currently Selected:

Lukas 15: BMa

Highlight

Copy