Matiye 13

Dan mə gəgan wa bə ge zep kwa

(Mak 4.1-9; Luk 8.4-8)

1Kə fəta rum sar, Zezu pâ mbə so ɓay 'ya ta suk wə vun ya mbi. 2Sôwâ raw dle tu si ɓa mbə hay' rumu. Zə rum, mum ur ta rawti da, ɓay mum suk wə hana. Raw sôwâ gay' wə vun dapa. 3Mum ta' kwa juk ne nday kə dan mə gəgana. Mum in ne ndaya:

«Bə ge zep kwa pâ kədan mum də ge zep kwa. 4Kəri məni mum wə ge zep kwa wə sine um, zep məsin rum njay ta vari, ɓay rugwa mbə da' ndaya. 5Zep məsin rum njay ta ri mə kə pra məni nya cu han ɓayrum mi. Zep rum ci ga'ri zə nya cu han ɓayrum mi. 6Kəri məni fəta mbə ɗuk, kwa rum rawɗa ɓay co' zə mum cu za' ri pe tlor mi. 7Zep məsin rum njay ta du ŋâya. Ŋây' rum jeŋ ɓay tak kwa rumu. 8Ama zep məsin rum njay ta nya mə ɓay, ɓay zewa: i rum məsin ke kis, məsin ke gu kanki', ɓay məsin ke gu hinji'i.» 9Zezu faŋ ini: «Swə məni kə hum, say bə rum nə munu!»

Zə mi Zezu ta' kwa kə dan mə gəgan su?

(Mak 4.10-12; Luk 8.9-10)

10Kəki rum, sum ta zə Zezu mbə hay' rum ɓay ci vun rumu: «Zə mi ha nday in dan ne kə dan mə gəgan su?» 11Mum ɗam vun ndaya: «Ifray ne vari ne ni kədan i we kwa məni ke pe' ɓa' si wa dan vari məni Ifray wə də suk jwə wa ri, ama Ifray cu ne vari ne nday mi. 12Zə swə məni kə kwa, bə rum də fe məsin də han, ɓay mum də ke kə ndi juk, ama swə məni cu kə kwa mi, sôwâ də ve mə kî məni wə ɓa rum nə si#Mak 4.25; Luk 8.18. 13Zə rum, na wə ta' kwa nday ne kə dan mə gəgana: Zə handay wə kar ri, ama handay cu wə weri mi, ɓay handay wə pe hum, ama handay cu wə mun hum ko mun zu dan rumu mi. 14Ndəna', dan məni bə ka' dan mə ɗe kə Esaya wây' nə nyen mbi wə zə ndaya. Mum ka'a:

Hi də pe hum kə ɓayrum, ama hi cu də mun zu dan rum mi.

Hi də kar ri kə ɓayrum, ama hi cu də weri mi.

15Zə vunduk sôwâ məni kuni cu ɗik dan mi,

handay nduɓ hum nday si,

ɓay handay dəŋâr i nday ta'a.

La' cu ndəna' mi si, i nday gak weri,

hum nday gak mun dan,

ɓay vunduk nday gak keɓ mun zu dan rum,

ɓay handay gak də faŋ mbə hay' Ifraya.

Ɓay mum də nday cara.

16Ama mə hi, i tuk kəɗam zə i ri wə weri, ɓay hum ri wə mun dana! 17Na in mi ne, kəzini: Sum ka' dan juk kə sôwâ mə njeŋ juk, handay wa' we kwa məni hi wə we, ama handay cu we mi, ɓay handay wa' mun dan məni hi wə mun, ama handay cu mun mi.»

Zezu pay zu dan mə gəgan wa bə ge zep kwa

(Mak 4.13-20; Luk 8.11-15)

18«La' ndəna' si, i mun zu dan mə gəgan wa bə ge zep kwa nə ye! 19Sôwâ məni mun dan wa dan vari məni Ifray wə də suk jwə wa sôwâ um, ama cu mun zu dan rum mi, handay ra' nji kə vari məni zep kwa njay wə hana. Satan mbə par dan Ifray məni wə vunduk ndaya. 20Ri mə kə pra məni nya cu han ɓayrum mi wə ta' sôwâ məsin məni mun dan Ifraya, kəri rum sar, handay ve dan rum kə tuk kəɗam, 21ama handay cu ar dan rum pe tlor wə vunduk nday mi, handay ta kə dan rum kî, ama kəri məni cik ko boni la' mbə wa nday zə dan Ifray si, handay ar dan məni handay ve nə kəri rum sara. 22Ŋây' wə ta' sôwâ məsin məni mun dan Ifray, handay ve dan rum, ama ɗik dan kwa nya kə səna' ndak tak dan rum, ɓay dan rum cu par i mi. 23Nya mə ɓay wə ta' sôwâ məsin məni mun dan Ifraya. Handay mun zu dan rum, ɓay handay dlər də kofo: məsin ke kis, məsin ke gu kanki', ɓay məsin ke gu hinji'i.»

Dan mə gəgan wa mbele

24Zezu in dan mə gəgan məsin ne ndaya: «Vari məni Ifray wə də suk jwə wa sôwâ um nə ra' nji kə dan mə ni na: Swə ɗaw jo' zep kwa mə ɓay wə sine umu. 25Kə dukri, kə ri məni sôwâ daŋ' nde sen si, bə sî swə nə mbə jo' mbele wə du u swə nə ɓay 'ya dle. 26Kəri məni u mbuɗ ɓay zewa, mbele zewa ta'a. 27Sum sin um mbə in ne numu: Bârî, ha jo' zep kwa mə ɓay wə sine wû, mbele mə ni nə car mbə ka su? 28Mum ɗam vun ndaya: Bə sî rin kə məni gi kwa rumu. Sum sin um faŋ ci vun rumu: Ha wa' i mə də par mbele də rəka su? 29Mum ɗam vun ndaya: Cu mi! Zə kəri məni hi wə par mbele, hi gak par u ta'a. 30I ar nday mbuɗ hoɓ jak hâ day wakaya, ɓay kəri rum, na də in ne kə sum gi u: I tum mbele cop, ɓay i baŋ num kədan hi ge ku wa rumu. Kəki rum, i ra' u də zəna mana.»

Dan mə gəgan wa i mafo'o

(Mak 4.30-32; Luk 13.18-19)

31Zezu in dan mə gəgan məsin ne ndaya: «Vari məni Ifray wə də suk jwə wa sôwâ um nə ra' nji kə i mafo' məni swə tle jo' du sine umu. 32I rum kî pâ i zep kwa məsin daŋ', ama kəri məni mum ci, mum wə jeŋ toŋ pâ gu məni ci kuni daŋ'ŋ: Mum wə faŋ ya gu mə toŋ, ɓay rugwa mə fray wə mbə ɗam so nday wa ɓa sa.»

Dan mə gəgan wa dlumu

(Luk 13.20-21)

33Zezu in dan mə gəgan məsin ne ndaya: «Vari məni Ifray wə də suk jwə wa sôwâ um nə ra' nji kə dlum məni ma tle tlum fut məni ta kənji' kə kwa kənji' kwa hinji' hâ fut rum daŋ' hulumu.»

Vari məni Zezu gi sin kə dan mə gəgana

(Mak 4.33-34)

34Zezu in dan rum daŋ' ne kə raw sôwâ kə vari dan mə gəgana. Mum cu ge dan nday ne dan dan mə gəgan mi, 35mum gi ndəna' kədan nyen mbi dan məni bə ka' dan ini:

«Na də ge dan nday ne kə vari dan mə gəgana.

Na də ta' kwa məni pe' daka təŋ zu nya nday ne#Nye 78.2.»

Zezu pay zu dan mə gəgan wa mbele

36Kəri rum, Zezu 'ya ar raw sôwâ ɓay ze ta rawti so. Sum ta zə rum mbə hay' rum ɓay la' ne numu: «A pay zu dan mə gəgan wa mbele du sine nə ne mba ri'i!» 37Zezu ɗam vun ndaya: «Swə məni jo' zep kwa mə ɓay wə ta' Vay sumra'a. 38Sine wə ta' nya. Zep kwa mə ɓay wə ta' sôwâ məni Ifray suk jwə wa ndaya. Mbele wə ta' sôwâ məni Satan suk jwə wa ndaya. 39Bə sî məni jo' mbele wə ta' Satan. Wakaya wə ta' ndo' nya. Ɓay sum gi u wə ta' sum sin Ifray mə wafraya. 40Ce' ndə sôwâ tum mbele njay ta ku ɓay ye' ku, kwa rum də gi ndəna' kə ndo' nya ta'a. 41Vay sumra' də sin sum sin um mə wafray, handay də da' sôwâ daŋ' məni wə ɓu sôwâ məsin njay du kwa mə bro' kə sôwâ məni wə gi sin mə bro' wə ri məni Ifray wə suk jwə wa sôwâ um kuni pik də rəka, 42ɓay handay də nday njay də ri ku, handay də ci' ɓay cwə se' wə hana. 43Ama kəri rum, sôwâ mə njeŋ də wəɗi ce' ndə fəta wə ri məni Ba nday wə də suk jwə wa ndaya. Swə məni kə hum, say bə rum nə munu!»

Dan mə gəgan wa doknay məni pe' wə sine

44«Vari məni Ifray wə də suk jwə wa sôwâ um nə ra' nji kə doknay məni pe' wə sine. Swə ɗaw mbə za' doknay rum, ɓay mum faŋ tle pe'e. Mum tuk kəɗam dle tu si, hâ mum gi coɓ kwa daŋ' məni mum kə ndi, ɓay mum faŋ coɓ sine rumu.»

Dan mə gəgan wa ri məni coɓ kə ciki

45«Kərem, vari məni Ifray wə də suk jwə wa sôwâ um nə ra' nji kə bə gaŋ gi par məni wə keɓ ri mə ɓay mə ɗe kə "perlə". 46Kəri məni mum ta za' ri ɗaw məni coɓ rum kəcik ɓayrum, mum gi coɓ kwa daŋ' məni mum kə ndi, ɓay mum coɓ ri rumu.»

Dan mə gəgan wa ziwi

47«Vari məni Ifray wə də suk jwə wa sôwâ um nə ra' nji kə ziw məni swə wə ɗâ də mbi, ɓay ziw rum ra' keve cem ceme. 48Kəri məni keve nyen ziw rum, sum lam mbi dlam ziw rum də vun dapa. Handay faŋ gay' kədan handay da' keve. Handay cok keve mə ɓay də kukuk, ɓay handay pik keve mə bro' də rəka. 49Kwa rum də gi ndəna' kə ndo' nya ta'a: Daw sin Ifray mə wafray də mbə ɓul du sôwâ mə bro' kə sôwâ mə njeŋ, 50kədan handay nday njay də ku, handay də ci' ɓay cwə se' wə hana.»

Ndak mə mbrew kə mə kəmbara

51Zezu ci vun ndaya: «Hi mun zu dan mə ni kuni daŋ' si su?» Handay ɗam vun rumu: «Awo.» 52Zə rum, mum la' ne ndaya: «Ndəna' bə pay zu dan dlay daŋ' məni faŋ bə ta zə Ifray wə ri məni mum wə suk jwə wa sôwâ um, bə rum ra' nji kə bə so məni wur kə ndak mə mbrew ɓay ndak mə kəmbar mbə so umu.»

Sôwâ so Nazaret cu ve Zezu mi

(Mak 6.1-6; Luk 4.16-30)

53Kəri məni Zezu ndo' vun in dan mə gəgan məni kuni si, mum 'ya ar ri rum, 54ɓay mum 'ya ta so məni mum jeŋ wə hana. Mum təŋ kə ta' kwa ne kə sôwâ wə rawti so Ifray sôwâ Zuwif, ɓay dan rum jin' wa ne kə sôwâ daŋ' məni gay' wə hana. Handay ini: «Mum za' gwet mə ni nə wə ka su? Sa nə ne num gbəgboŋ gi yew mə ndəna' nə su? 55Mum cu vay bə gay' gu nə mə su? Mari cu ya um mə su? Zakə, Zozef, Simoŋ kə Zudə cu njər rum kuni mə su? 56Ɓay njar rum kuni daŋ' cu ni du mba mə su? La' ndəna' si, mum za' gbəgboŋ mə ni nə wə ka su?» 57Ɓay dan rum tak nday dan um ve. Zə rum, Zezu la' ne ndaya: «Bə ka' dan gak za' mbra' wə ri daŋ', say wə so vra' um kə sôwâ umu.» 58Zezu cu gak gi yew wə han ɓayrum mi, zə handay cu ve num mi.

Currently Selected:

Matiye 13: KMN

Highlight

Copy