ڢِتُواْوَ 13
13
كٜىٰٻٜىٰوَرْ یَیَنْ ڢَارِ
1سَيْ يَهْوٜىٰهْ يَثٜىٰ وَ مُوسَٰى، 2«كَكٜىٰٻٜىٰ مِنِ دُكَنْ یَیَنْ ڢَارِ مَظَا دَ ڟَرْكِے؞ كُواْوَنٜىٰ طَنْ ڢَارِ وَنْدَ يَبُوطٜىٰ مَحَيْڢَ ثِكِنْ مُتَنٜىٰنْ إِسْرَٰٓءِيلَ نَوَنٜىٰ، كُواْ نَمُتُمْ كُواْ نَدَبَّ؞»#لِـ ڧِدْ 3.13؛ لُكْ 2.23
بِكٍ غُرَاسَرْ مَرَرْ يِسْتِ
3سَيْ مُوسَٰى يَثٜىٰ وَجَمَعَ «كُدِنْغَ تُنَاوَ دَ وَنَّنْ رَانَ، رَانَرْ دَ كُكَ ڢِتُواْ دَغَ ڧَسَرْ مَصَرْ دَغَ غِدَنْ بَوْتَا؞ غَمَا يَهْوٜىٰهْ يَا ڢِتَرْ دَكُو دَغَ وُرِنْ دَ إِيكُوانْ حَنُّنْسَ؞ دُواْمِنْ تُنَاوَا دَ وَنَّنْ رَانَ، بَذَاكُثِ غُرَاسَرْ دَ عَكَيِ دَ يِسْتِبَ؞ 4يَوْ طِنَّنْ عَثِكِنْ وَتَنْ أَبِبْ كُنَ ڢِتُواْوَ دَغَ مَصَرْ؞
5«سَعَدَّ يَهْوٜىٰهْ يَكَيْكَ ثِكِنْ ڧَسَرْ كَنْعَنِيَاوَا دَ هِتِّيَاوَا دَ أَمُواْرِيَاوَا دَ هِوِيَاوَا دَ يٜىٰبُسِيَاوَا، وَدَّ يَهْوٜىٰهْ يَرَنْڟٜىٰوَ كَاكَنِّنْكَ ذَيْبَاكَ، ڧَسَاثٜىٰ مَيْ أَمْڢَانِ، سَيْ كَكِيَايٜىٰ وَنَّنْ ڧَٰعِدَرْ سُجَّدَ أَوَتَنَّنْ؞ 6ذَاكَ دِنْغَ ثِنْ غُرَاسَرْ مَرَرْ يِسْتِ حَرْ ݣُونَكِے بَݣَويْ، عَمَّا أَ رَانَ تَبَݣَويْ ذَاكَيِ بِكٍ سُجَّدَ غَ يَهْوٜىٰهْ؞ 7ذَاعَ دِنْغَ ثِنْ غُرَاسَرْ مَرَرْ يِسْتِ حَرْ ݣُونَكِے بَݣَويْ؞ عَثِكِنْ ݣُونَكِنَّنْ، كَدَ أَ سَامِ غُرَاسَ مَيْيِسْتِ أَغِدَنْكَ، كُمَ كَدَ أَ سَامِ يِسْتِ أَوُرِنْكَ؞ 8أَ رَانَرْ نَنْ ذَاكَ بَيَّنَ وَ طَنْكَ مَنُڢَرْ وَنَّنْ بِكٍ كَثٜىٰ، ‹وَنَّنْ بِكِ نَايِنٜىٰ دُواْمِنْ تُنَاوَا دَ أَبِنْدَ يَهْوٜىٰهْ يَيِ مِنِ، سَعَدَّ يَڢِتَرْ دَنِے دَغَ مَصَرْ؞› 9وَنَّنْ بِكِ ذَيْ ذَمَ مَكَ كَمَرْ عَلَمَ عَكَنْ حَنُّنْكَ دَ كُمَ أَبِنْ تُنَاوَا أَغُواْشِنْكَ، دُواْمِنْ كُواْيَرْوَرْ يَهْوٜىٰهْ تَكَسَنْثٜىٰ عَبَاكِنْكَ، غَمَا يَهْوٜىٰهْ نٜىٰ يَڢِتَرْ دَكَيْ دَغَ مَصَرْ دَ إِيكُوانْ حَنُّنْسَ؞ 10سَبُواْدَ حَكَ، ذَاكَ كِيَايٜىٰ وَنَّنْ ڧَٰعِدَرْ بِكِ كُواْوَثٜىٰ شٜىٰكَرَا أَدَيْدَيْ لُواْكَثِنْتَ؞»
مِيڧَاوَرْ یَیَنْ ڢَارِ
11«سَعَدَّ يَهْوٜىٰهْ يَكَيْكَ ثِكِنْ ڧَسَرْ كَنْعَنِيَاوَا، كَمَرْ يَدَّ يَرَنْڟٜىٰ مَكَ، كَيْ دَ كَاكَنِّنْكَ، يَكُمَ بَاكَ، 12سَيْ كَمِيڧَ غَ يَهْوٜىٰهْ دُكَنْ یَیَنْ ڢَارِ مَظَا؞ دُكَنْ یَیَنْ ڢَارِ مَظَا نَدَبُّواْبِنْكَ ذَاكَ مِيڧَسُ غَ يَهْوٜىٰهْ؞ 13عَمَّا ذَاكَ ڢَنْشِ كُواْوَنٜىٰ طَنْ ڢَارِ نَجَاكُنَ دَغَ وُرِنْ يَهْوٜىٰهْ تَوُرِنْ بَادَ طَنْ ضَغُواْ أَمَدَدِنْسَ؞ عَمَّا عِدَنْ بَذَاكَ ڢَنْشٜىٰشِ بَ، سَيْ كَكَرْيٜىٰ وُيَنْسَ؞ كُواْوَنٜىٰ طَنْ ڢَضٍ یَیَنْكَ، ذَاكَ ڢَنْشٜىٰشِ؞ 14نَنْ غَبَ عِدَنْ طَنْكَ يَا تَمْبَيٜىٰكَ ثٜىٰوَ ‹مٜىٰنٜىٰنٜىٰ مَنُڢَرْ وَنَّنْ؟› سَيْ كَثٜىٰ مَسَ، ‹دَ إِيكُوانْ حَنُّنْسَ يَهْوٜىٰهْ يَڢِتَرْ دَمُو دَغَ مَصَرْ دَغَ غِدَنْ بَوْتَا؞ 15سَعَدَّ ڢِرْعَوْنَ يَيِ كُنّٜىٰنْ ڧَشِ يَڧِ يَبَرْمُ مُتَڢِے، سَيْ يَهْوٜىٰهْ يَكَكَّشٜىٰ دُكَنْ یَیَنْ ڢَارِ مَظَا عَثِكِنْ ڧَسَرْ مَصَرْ دَغَ طَنْ ڢَارِ نَمُتُمْ ذُوَا طَنْ ڢَارِ نَدَبَّ؞ شِے يَسَا كُواْوَنٜىٰ طَنْ ڢَارِ نَدَبُّواْبِے، نَكَنْ مِيڧَشِ هَدَايَ غَ يَهْوٜىٰهْ؞ عَمَّا كُواْوَنٜىٰ طَنْ ڢَارِ نَیَیَنَ، نَكَنْ ڢَنْشٜىٰشِ؞› 16وَنَّنْ ڧَٰعِدَ ذَاتَ ذَمَ كَمَرْ عَلَمَ عَكَنْ حَنُّنْكَ دَ أَبِنْ تُنَاوَا أَغُواْشِنْكَ ثٜىٰوَ يَهْوٜىٰهْ نٜىٰ يَڢِتَرْ دَمُو دَغَ مَصَرْ تَوُرِنْ إِيكُوانْ حَنُّنْسَ؞»
ڧُنْشِنْ غِرْغِجٜىٰ دَ ڧُنْشِنْ وُتَا
17عَڧَرْشٜىٰ سَعَدَّ سَرْكِے ڢِرْعَوْنَ يَبَرْ مُتَنٜىٰنْ سُتَڢِے، اللَّهْ بَيْ بِيدَسُو أَ حَنْيَرْدَ تَبِے تَڧَسَرْ ڢِلِسْتِيَاوَا بَ، كُواْدَيَكٜىٰ عِتَثٜىٰ غَجٜىٰرِيَرْ حَنْيَ دَغَ مَصَرْ ذُوَا ڧَسَرْدَ يَرَنْڟٜىٰ ذَيْبَاسُ؞ غَمَا اللَّهْ يَاثٜىٰ «كَدَ إِنْ جَمَعَرْ سُنْ غَا ذَاسُيِ يَاڧِ سُثَنْجَ تُنَانِنْسُ سُكُواْمَ مَصَرْ؞» 18مَيْمَكُوانْ حَكَ، اللَّهْ يَبِيدَسُو تَهَنْيَرْ دَ تَكٜىٰوَيٜىٰ تَثِكِنْ دَاجِ وَجٜىٰنْ تٜىٰكُنْ ثِيَوَرْ إِوَ؞#13.18 تٜىٰكُنْ ثِيَوَرْ إِوَ: وُرِنْ دَ عَكٜىٰ كِرَا تٜىٰكُنْ ثِيَوَرْ إِوَ يَا ڧُنْشِ جٜىٰرٜىٰنْ تَڢْكُنَ دَ ڢَدَمَ وَنْدَ عَكٜىٰ سَامُ ڟَكَانِنْ بَاكِنْ تٜىٰكُنْ سُظْ دَ نَ تٜىٰكُنْ مٜىٰدِتٜىٰرٜىٰنِيَ؞ وَنَّنْ وُرِنْ نٜىٰ عَكٜىٰ ڟَمَّنِ إِسْرَٰٓءِيلَاوَا سُكَبِے كَمَرْ يَدَّ عَكَ بَيَّنَ أَ ڢِتُواْوَ سُورَ 13؞ جَمَعَرْ إِسْرَٰٓءِيلَ كُوَ سُكَ ڢِتَ دَغَ ثِكِنْ ڧَسَرْ مَصَرْ كَمَرْ سُواْجُواْجِنْ دَسُكٜىٰ أَشِرْيٜىٰ دُواْمِنْ يَاڧِ؞
19مُوسَٰى كُوَ يَا طَوْكِ ڧَسُسُوَنْ يُوسُڢَ؞ غَمَا يُوسُڢَ دَا يَا رِغَا يَا سَا یَیَنْ إِسْرَٰٓءِيلَ سُكَ ضَنْڟٜىٰ ثٜىٰوَ «حَڧِيڧَ يَهْوٜىٰهْ ذَيْ ظِيَرْثٜىٰكُ دُواْمِنْ يَڢِتَرْ دَكُو دَغَ نَنْ؞ أَ لُواْكَثِنْ، سَيْ كُطَوْكِ ڧَسُسُوَنَ تَرٜىٰدَكُو؞»#ڢَارْ 50.25؛ يُواشْ 24.32
20جَمَعَرْ إِسْرَٰٓءِيلَ سُكَتَاشِ دَغَ سُكُّواتْ، سُكَيِ ذَنْغُواْ أَ عٜىٰتَمْ عَكَنْ إِيَاكَرْ دَاجِنْ؞ 21دَ رَانَ يَهْوٜىٰهْ يَا وُثٜىٰ غَبَنْسُ دَ ڧُنْشِنْ غِرْغِجٜىٰ دُواْمِنْ يَنُونَ مُسُ حَنْيَ دَ دَرٜىٰ كُمَ دَ ڧُنْشِنْ وُتَا دُواْمِنْ يَبَاسُ حَصْكٜىٰ، دُواْمِنْ سُيِ تَڢِيَ كُواْ دَدَرٜىٰ كُواْ دَرَانَ؞ 22ڧُنْشِنَّنْ نَغِرْغِجٜىٰ دَرَانَ كُواْ نَوُتَ دَدَرٜىٰ بَسُ رَبُ دَمُتَنٜىٰنْبَ؞
Currently Selected:
ڢِتُواْوَ 13: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
