ڢَارَوَ 34
34
أَنْ تِلَسْتَ دِنَتُ أَنْ ݣُونَ دَ عِتَ
1وَتَرَانَ سَيْ دِنَتُ، یَرْ مَثٜىٰنْ دَ لَيْعَتُ تَحَيْڢَ وَ يَعْڧُوبَ، تَڢِتَ دُواْمِنْ تَظِيَارْثِ وَطَنْسُ یَنْ مَاتَانْ ڧَسَرْ؞ 2أَݣَويْ وَنِ مُتُمْ مَيْ سُونَ هَمُوارْ، مُتُمِنْ هِوِ، شُوغَبَنْ وُرِنْ، يَنَدَ طَا مَيْ سُونَ شٜىٰكٜىٰمْ؞ سَعَدَّ شٜىٰكٜىٰمْ يَغَ دِنَتُ، سَيْ يَثَڢْكٜىٰتَ، يَتِلَسْتَاتَ يَݣُونَ دَ عِتَ؞ 3سَيْ رَنْسَ يَكُواْمَ غَ دِنَتُ یَرْ يَعْڧُوبَ؞ يَڧَوْنَثٜىٰتَ، يَيِ مَتَ مَغَنَ مَيْ دَاطِے؞ 4سَيْ شٜىٰكٜىٰمْ يَيِ مَغَنَ دَ بَابَنْسَ هَمُوارْ يَثٜىٰ «أَ طَوْكُواْ مِنِ يَارِنْيَرْ نَنْ تَذَمَ مَاتَتَ؞»
5يَعْڧُوبَ كُوَ يَا جِ يَدَّ شٜىٰكٜىٰمْ يَا ڧَظَنْتَرْدَ دِنَتُ، عَمَّا بَيْثٜىٰ كُواْمٜىٰبَ؞ يَا جِرَا سَيْ دَ یَیَنْسَ وَطَنْدَ سُكَ تَڢِے كِيوُانْ شَانُنْسَ أَدَاجِ سُكَ دَاوُاْ؞ 6سَعَدَّ هَمُوارْ بَابَنْ شٜىٰكٜىٰمْ يَتَڢِے وُرِنْ يَعْڧُوبَ دُواْمِنْ يَيِ مَغَنَ دَشِ، 7یَیَ مَظَا نَ يَعْڧُوبَ سُنْ دَاوُاْ دَغَ دَاجِ؞ سَعَدَّ سُكَجِ لَابَرِنْ، أَبِنْ يَا ظَڢٜىٰسُ كُمَ سُكَيِ ڢُشِے سُواْسَيْ، غَمَا شٜىٰكٜىٰمْ يَيِ أَبِنْ رٜىٰنِ غَ جَمَعَرْ إِسْرَٰٓءِيلَ تَوُرِنْ ݣُونَ دَ یَرْ يَعْڧُوبَ، غَمَا بَيْ كَمَاتَ عَيِ وَنَّنْ أَبُبَ؞ 8عَمَّا هَمُوارْ يَيِ مَغَنَ دَسُو يَنَ ثٜىٰوَ «طَانَ شٜىٰكٜىٰمْ يَنَ مَرْمَرِنْ یَرْكُ دَ ذُوثِيَارْسَ؞ إِنَ ضُواْڧُوانْكُ كُبَاشِ عِتَ تَذَمَ مَاتَرْسَ؞ 9تَهَكَ سَيْ مُكَڢَ زُمُنْثِنْ عَوْرٜىٰ تَرٜىٰدَكُو، كُو ذَاكُ عَوْرِ یَنْ مَاتَنْمُ، مُو مَا سَيْ مُعَوْرِ یَنْ مَاتَنْكُ؞ 10ذَاكُ ذَوْنَ أَڟَكَانِنْمُ، ڧَسَرْمُ كُوَ تأَنَانً دُواْمِنْ أَمْڢَانِنْكُ، كُذَوْنَ عَثِكِ، كُيِ كَاسُوَنْثِ دَمُو، كُسَيِ ڢِيلَيٜىٰ كُيِ غِدَاجٜىٰ عَثِكِ؞»
11سَيْ شٜىٰكٜىٰمْ شِے مَا يَثٜىٰ وَبَابَنْ دِنَتُ دَ یَنْعُوَنْتَ «إِنَ نٜىٰمَنْ ڢَضٍ جِنِ أَعِدَنُونْكُ، دُكْ أَبِنْدَ كُكَثٜىٰ إِنْبَايَرْ، ذَنْ بَايَرْ؞ 12دُكْ إِرِنْ كُطِنْ عَوْرٜىٰ كُواْ كَايَنْ عَوْرٜىٰنْ دَ كُكَ ڟَارَا مِنِ، ذَنْبَاكُ؞ نِے دَيْ، كُبَانِ يَارِنْيَرْ إِنْعَوْرَ؞»
13یَیَنْ يَعْڧُوبَ مَظَا سُكَ أَمْسَ وَ شٜىٰكٜىٰمْ دَ بَابَنْسَ هَمُوارْ ثِكِنْ مُنَاڢُنْثِ، غَمَا يَا ڧَظَنْتَرْدَ یَرْعُوَرْسُ دِنَتُ؞ 14سُكَثٜىٰ «بَذَامُ عِيَ بَادَ یَرْعُوَرْمُ غَ وَنْدَ بَعَيِ مَسَ كَاثِيَ بَ، غَمَا أَبِنْ كُنْيَا نٜىٰ أَغَرٜىٰمُ؞ 15تَ وَنَّنْ أَبُ نٜىٰ كَطَيْ ذَامُ يَرْدَ مُكُ، وَتُواْ كُواْوَنٜىٰ نَمِجِ أَغَرِنْكُ يَيِ كَاثِيَ، دُواْمِنْ كُذَمَ كَمَرْمُ؞ 16سَعَنً ذَامُ بَاكُ یَنْ مَاتَنْمُ كُعَوْرَ، سَيْ مُو مَا مُعَوْرِ یَنْ مَاتَنْكُ؞ ذَامُ كُوَ ذَوْنَ دَكُو مُذَمَ طَيَ دَكُو؞ 17عَمَّا عِدَنْ بَكُ سَوْرَرٜىٰمُ كُنْيَرْدَ أَنْيِ مُكُ كَاثِيَبَ، تُواْ، ذَامُ طَوْكِ یَرْمُ، مُتَڢِے؞»
18مَغَنَرْسُ كُوَ تَايِ وَ هَمُوارْ دَ طَنْسَ شٜىٰكٜىٰمْ دَاطِے؞ 19سَوْرَيِنَّنْ كُوَ بَيْيِ وَتَ وَتَ بَ، غَمَا ذُوثِيَارْسَ تَنَ مَرْمَرِنْ یَرْ يَعْڧُوبَ سُواْسَيْ؞ شِينٜىٰ كُوَ عَكَڢِے غِرْمَمَاوَا أَغِدَنْ هَمُوارْ؞ 20سَيْ هَمُوارْ دَ طَنْسَ شٜىٰكٜىٰمْ سُكَذُواْ أَوُرِنْ تَارُوَ نَڧُواْڢَرْ غَرِ؞ سُكَيِ مَغَنَ دَ مُتَنٜىٰنْ غَرِنْسُ سُكَثٜىٰ، 21«وَطَنَّنْ مُتَنٜىٰ بَاسُ دَ دَامُوَ دَمُو؞ بَرِ سُيِ ذَمَ أَغَرِنْ سُيِ كَاسُوَنْثِنْسُ، غَمَا ڧَسَرْ تَنَدَ ڢَاطِ دُواْمِنْمُ دُكَ؞ بَرِ مُعَوْرِ یَیَنْسُ مَاتَا، سَعَنً مُو مَا مُبَاسُ یَیَنْمُ مَاتَا سُعَوْرَ؞ 22مُتَنٜىٰنَّنْ ذَاسُ يَرْدَ سُذَوْنَ دَمُو، سُكُمَ ذَمَ طَيَ دَمُو تَوَنَّنْ أَبُ نٜىٰ كَطَيْ، وَتُواْ سَيْ كُواْوَنٜىٰ نَمِجِ أَغَرِنْمُ يَيِ كَاثِيَ كَمَرْسُ؞ 23إِنْ حَكَنٜىٰ، بَشَانُونْسُ دَ كَايَنْسُ دَ دُكَنْ دَبُّواْبِنْسُ ذَاسُ ذَمَ نَامُبَ؟ عِدَنْ دَيْ مُكَ يَرْدَ، أَيْ، ذَاسُ ذَوْنَ تَرٜىٰدَمُو؞»
24دُكَنْ وَطَنْدَ سُكَذُواْ وُرِنْ تَارُوَ نَڧُواْڢَرْ غَرِ، سُكَ يَرْدَ دَ مَغَنَرْ هَمُوارْ دَ طَنْسَ شٜىٰكٜىٰمْ؞ عَكَ كُوَيِ وَكُواْوَنٜىٰ نَمِجِ نَغَرِنْ كَاثِيَ؞
یَیَنْ يَعْڧُوبَ سُنْثِ أَمَانَرْ غَرِنْ شٜىٰكٜىٰمْ
25أَ رَانَ تَ عُكُ، سَعَدَّ سُكٜىٰ ثِكِنْ ذَاڢِنْ ثِيوُاْ، سَيْ یَیَ مَظَا بِيُ نَ يَعْڧُوبَ، وَتُواْ سِمٜىٰيُوانْ دَ لَوِ، یَنْعُوَنْ دِنَتُ، سُكَ طَوْكِ تَكُبَنْسُ، سُكَ ڢَاطَوَ غَرِنْ بَاڟَمَّنِ؞ سُكَ كَكَّشٜىٰ دُكَنْ مَذَنْ؞ 26سُكَ كَشٜىٰ هَمُوارْ دَ طَنْسَ شٜىٰكٜىٰمْ، سُكَ طَوْكِ دِنَتُ دَغَ غِدَنْ شٜىٰكٜىٰمْ سُكَ تَڢِے دَ عِتَ؞ 27سَعَنً سَوْرَنْ یَیَ مَظَا نَ يَعْڧُوبَ، سُكَبِے كَنْ غَوَوَّكِنْ، سُكَ ڨُوثٜىٰ أَرْزِڧِنْ غَرِنْ، سَبُواْدَ أَنْ ڧَظَنْتَرْدَ یَرْعُوَرْسُ؞ 28سُكَ ݣُوشِ شَانُنْسُ دَ أَوَكِنْسُ دَ جَاكُنَنْسُ دَ دُكَنْ أَبِنْدَ يَكٜىٰ أَغَرِنْدَ نَكٜىٰوَيٜىٰنْسَ؞ 29دُكَنْ أَرْزِڧِنْسُ دَ يَارَنْسُ ڧَنَانَا دَ مَاتَنْسُ دَ دُكَنْ أَبِنْدَ سُكٜىٰ ثِكِنْ غِدَاجٜىٰنْسُ، دُكَ سُكَ ݣُوشٜىٰ؞
30سَيْ يَعْڧُوبَ يَثٜىٰ وَ سِمٜىٰيُوانْ دَ لَوِ «كُنْجَٰوُاْ وَهَلَ عَكَيْنَ، كُنْسَا نَذَمَ أَبِنْ ڨَمَ أَعِدَانُنْ مَذَوْنَنْ ڧَسَرْ، وَتُواْ كَنْعَنِيَاوَا دَ ڢٜىٰرِظِّيَاوَا؞ مُو بَامُ دَيَوَ، عِدَنْ سُكَ تَارُ مَنَ دُواْمِنْ سُڢَاطَ مَنَ دَ يَاڧِ، أَيْ، ذَاسُ هَلَكَانِ دَ غِدَانَ؞»
31عَمَّا یَیَنْسَ سُكَثٜىٰ «تُواْ، دُوانْمٜىٰ ذَامُ بَرْسُ سُيِ دَ یَرْعُوَرْمُ كَمَرْ عِتَ كَارُوَثٜىٰ؟»
Currently Selected:
ڢَارَوَ 34: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
