ڢَارَوَ 7
7
1سَيْ يَهْوٜىٰهْ يَثٜىٰ وَ نُوحُ «كَشِغَ ثِكِنْ جِضْغٍ دَكَيْ دَ دُكَنْ عِيَلِنْكَ، غَمَا نَا غَ ثٜىٰوَ أَغَرٜىٰنِ كَيْ كَطَيْ نٜىٰ مَيْ أَدَلْثِے أَ زَامَانِنَّنْ؞ 2دَغَ كُواْوَنٜىٰ إِرِنْ دَبُّواْبِے مَرَسَ ڧَظَنْتَا، كَطَوْكَ تَرٜىٰدَكَيْ بِيُ بِيُنْسُ سَوْ بَݣَويْ، نَمِجِ دَ تَمَثٜىٰ؞ دَغَ كُواْوَنٜىٰ إِرِنْ دَبُّواْبِے مَاسُ ڧَظَنْتَا، كَطَوْكَ تَرٜىٰدَكَيْ نَمِجِ دَ تَمَثٜىٰ؞ 3دَغَ ڟُنْڟَيٜىٰنْ سَرَرِنْ سَمَ كُمَ كَطَوْكِ بِيُ بِيُنْسُ سَوْ بَݣَويْ، نَمِجِ دَ تَمَثٜىٰ، دُواْمِنْ عَتَبَّتَا إِرِنْسُ سُنْ رَايُ أَ ڢُسْكَرْ دُونِيَا دُكَ؞ 4غَمَا دَ سَوْرَنْ ݣُونَ بَݣَويْ ذَنْعَيْكَ دَ ضُوً سَمَ عَدُونِيَا وَنْدَ ذَيْ يِتَيِ حَرْ يِنِ أَرْبَعِنْ دَ دَرٜىٰ أَرْبَعِنْ؞ ذَنْ كُمَ كَوَرْ دَغَ ڢُسْكَرْ دُونِيَا كُواْوَنٜىٰ أَبُ مَيْ رَيْ وَنْدَ نَيِ؞» 5نُوحُ كُوَ يَيِ كُواْمٜىٰ دَيْدَيْ يَدَّ يَهْوٜىٰهْ يَعُمَرْثٜىٰشِ؞
6نُوحُ يَنَدَ شٜىٰكَرَا طَرِے شِدَ سَعَدَّ بَبَّرْ أَمْبَلِيَرْ ضُوَ تَڢَاطُواْ عَدُونِيَا؞ 7سَيْ نُوحُ دَ یَیَنْسَ مَظَا دَ مَاتَرْسَ دَ مَاتَانْ یَیَنْسَ مَظَا سُكَ شِغَ جِضْغٍ دُواْمِنْ سُكُٻُتَ دَغَ ضُوَيٜىٰنْ بَبَّرْ أَمْبَلِيَرْ؞#مَتْ 24.38-39؛ لُكْ 17.27 8دَغَ دَبُّواْبِے مَرَسَ ڧَظَنْتَادَغَ كُمَ مَاسُ ڧَظَنْتَادَغَ ڟُنْڟَيٜىٰ دَ دُكَنْ حَلِتُّو مَاسُ رَرَّڢٜىٰ عَڧَسَا، 9بِيُ بِيُ نَمِجِ دَ تَمَثٜىٰ، دُكَ سُكَ شِغَ جِضْغٍ تَرٜىٰدَ نُوحُ كَمَرْ يَدَّ اللَّهْ يَعُمَرْثِ نُوحُ يَيِ؞ 10بَايَنْ ݣُونَ بَݣَويْ سَيْ ضُوَيٜىٰنْ بَبَّرْ أَمْبَلِيَ سُكَذُواْ سُكَ رُڢٜىٰ دُونِيَا؞
بَبَّرْ أَمْبَلِيَرْ ضُوَ
11أَ رَانَ تَغُواْمَشَا بَݣَويْ، غَ وَتَ نَبِيُ أَ شٜىٰكَرَا تَطَرِے شِدَ بَايَنْ حَيْڢُوَرْ نُوحُ، أَ رَانَرْ نَنْ سَيْ مَٻُٻُّغَنْ ظُرْڢَڢَّنْ تٜىٰكُنَ سُكَ ٻَرْكٜىٰ دَ ضُوَيٜىٰ، كُمَ تَغُواْغِنْ سَمَ سُكَ بُوطٜىٰ، ضُوَ يَيِ تَسَوْكَ كَمَرْ دَ بَاكِنْ ڨُورْيَ؞#2 بِتْ 3.6 12ضُوً سَمَنْ يَيِ تَظُبُواْوَ دَرٜىٰ دَ رَانَ حَرْ ݣُونَكِے أَرْبَعِنْ؞ 13أَوَنَّنْ رَانَرْ كُوَ نُوحُ دَ مَاتَرْسَ، تَرٜىٰدَ یَیَنْسَ مَظَا، وَتُواْ شٜىٰمْ دَ هَمْ دَ يَڢٜىٰتْ دَ مَاتَا عُكُ نَیَیَنْسَ مَظَا سُكَ شِغَ جِضْغٍ؞ 14تَرٜىٰدَسُو كُوَ أَݣَويْ كُواْوَنٜىٰ إِرِنْ دَبَّرْ دَاجِ بِسَغَ إِرِنْسَ دَ كُواْوَنٜىٰ إِرِنْ دَبَّرْ غِدَا بِسَغَ إِرِنْسَ دَ كُواْوَنٜىٰ إِرِنْ أَبُ مَيْ رَرَّڢٜىٰ عَڧَسَا بِسَغَ إِرِنْسَ دَ كُواْوَنٜىٰ إِرِنْ ڟُنْڟُ بِسَغَ إِرِنْسَ دَ كُواْوَنٜىٰ إِرِنْ دَبَّ مَيْ ڢِكَڢِكَيْ؞ 15دُكَنْسُ سُكَ شِغَ جِضْغٍ تَرٜىٰدَ نُوحُ، كُواْوَثٜىٰ حَلِتَّ مَيْ رَيْ، بِيُ بِيُ؞ 16وَطَنْدَ سُكَ شِغَ كُوَ، نَمِجِ دَ تَمَثٜىٰ نَكُواْوَثٜىٰ حَلِتَّ مَيْرَيْ نٜىٰ، سُكَ شِغَ بِسَغَ عُمَرْنِنْ دَ اللَّهْ يَبَا نُوحُ؞ سَعَنً يَهْوٜىٰهْ يَرُڢٜىٰ ڧُواْڢَرْ؞
17ݣُونَ أَرْبَعِنْ بَبَّرْ أَمْبَلِيَرْ ضُوً يَيِ تَڧَارُوَ عَدُونِيَا؞ ضُوً كُوَ يَيِ تَڧَارُوَ حَرْ يَا طَغَ جِضْغٍ دَغَ ڧَسَا، ضُوَ يَيِ تَتَادَ جِضْغٍ نٜىٰسَ دَ ڧَسَا؞ 18ضُوً يَيِ تَڧَارُوَ يَنَ هَوْرُواْوَ سَمَ سَمَ دَغَ ڧَسَا، جِضْغٍ كُمَ يَيِ تَيَٰوُاْ عَكَنْ ڢُسْكَرْ ضُوً؞ 19ضُوً يَيِ تَڧَارُوَ سُواْسَيْ عَبِسَ دُونِيَا، حَرْ سَيْ دَ يَرُڢٜىٰ دُكَنْ كَوُنَنْ مَنْيَنْ تُدَّيْ عَڧَرْڧَشِنْ سَمَ؞ 20ضُوً يَيِ تَڧَارُوَ حَرْ يَرُڢٜىٰ كَوُنَنْ مَنْيَنْ تُدَّيْ دَ ظُرْڢِنْ دَ يَڢِ ڧَڢَا عَشِرِنْ؞ 21كُواْوَثٜىٰ حَلِتَّ مَيْرَيْ عَدُونِيَا تَا مُتُ، سُو دَبُّواْبِنْ غِدَا دَ دَبُّواْبِنْ دَاجِ دَ تُلِنْ حَلِتُّو مَاسُرَيْ عَدُونِيَا دَ دُكَنْ یَنْ أَدَمْ، 22دَ كُواْوَنٜىٰ أَبُ مَيْ نُمْڢَشِنْ رَيْ عَكَنْ بُوسَشِّيَرْ ڧَسَا يَا مُتُ؞ 23كُواْوَنٜىٰ أَبُ مَيْرَيْ أَ ڢُسْكَرْ ڧَسَا أَنْكَوَرْ دَشِ، وَتُواْ یَنْ أَدَمْ دَ دَبُّواْبِے دَ دُكَنْ حَلِتُّو مَاسُ رَرَّڢٜىٰ عَڧَسَا دَ ڟُنْڟَيٜىٰنْ سَرَرِنْ سَمَ، دُكَنْسُ أَنْكَوَرْ دَسُو دَغَ دُونِيَا؞ نُوحُ نٜىٰ كَطَيْ تَرٜىٰدَ وَطَنْدَ سُكٜىٰ تَرٜىٰ دَشِ أَجِضْغٍ عَكَبَرِ دَرَيْ؞ 24أَمْبَلِيَرْ ضُوً كُوَ تَرُڢٜىٰ ڢُسْكَرْ دُونِيَا حَرْ ݣُونَكِے طَرِے دَ حَمْسِنْ؞
Currently Selected:
ڢَارَوَ 7: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
