LUKA 1
1
Gár kitaábu kusa gooín
1Amór Teofíló xiríf. Múk yaariír kángw muruudá' yaariír aa tleehharuut direne gwaa iiár gooiro, 2adór kungura atén i alki/iít nee mukduú aáng gwa ar ar ilaaín iimír geeraá wa ale, nee oo axweesantadá' gaa alki/iit. 3Anuú kilá' kaangwí ugwa ló'wa tsee/aariím iimír amoodár iimu/úngw wa ale. Án ngi slaá' sleeme ka hhoo' ngiwa kuúng i gooiim adór umuúqo gaaro ira tleehharút, 4as kahhó' kuúng kawa tsahh adór tar ló' tidá' kuúng tuwa intsaahhatimís.
Xwaylár Yohánedá' Baatimaamiís kawa geerií oó'
5De'emaá waawutmooko yaamaá Yudea ta bay Herode, kaahamusmooko Mungú i deer. Umuuwós a Sakaria, oo bartá múk Abiya. Hareerós ar tlahhoó guruú doó Aroni, umuuwós a Elisabeti. 6Inooín tsaraawo a múk hota ganaá' dír geeraá Munguhe, hara'ayár Aako sleémeero kana óh, nee axweesantós adoodá' ir hariin. 7Ala inooín ta na/oó konká, asma Elisabeti a kampeeri, nee inooín tsaraawo naa diné'.
8Looarka wake Sakaria iwa gadiyér kaahamusi'iimár tleehhi dír geeraá Munguhe, qoomár baalaqaasír múk bartós, 9inós kuna tsawaár, adoodá' /iisí kaahamuusér Mungú i tlehhaahhit, iwa dahi baraá Doó Aako as kahhó' ilahhooár mooyángw tsuú' ngiwa da/i dír Mungú. 10Qoomaadá' mooyángw tsuú' kuwa da/aa/an, boo/oó muu sleémeero i tsee/aá wa firiirín.
11Malaykamoó Aako guri harati'iít, aa sihhiít bihhaá doó /iyáy awa kitangwdá' mooyángw tsuú' kuwa da/a/an. 12Sakaria nguwa ár iri amoqwaár, iri da'ayuút. 13Ala malaykamoodá' guna báy, «Sakaría, ma da'ayumiitaar, asma firoorók kaa axaás, nee hareerók Elisabeti na/oó garma gu xwayluúr. Umuuwós ku beer Yohane. 14Kuúng tay qwalá/ tay bará/, nee múk yaariír xwaylarós gay saqwalalaa/. 15Asma uraay gu sláy dír Aakoowo. Difaái ga baloó wahiiká laqaá umuúqo gár ooniitimisa. Inós ku hatsiis Qeeruú hhoohhoó' oo Munguhe iimír iwa baraá guruú aayoórí kahhi. 16Múk yaariír oo Israeli gu amór Aakoó Munguúíní ki/is. 17Inós in geeraá Aakoó wa hi'iit ar muunuú adór kuduú Eliya nee /uuruuwós, as munér baabi'i ngiwa warqeesi iwa amór na/ií ki/, nee mukdá' iiawaslén nguwa fuqurángw hotaá ganaa'á' i slay, as múk Aako nguwa geerií amohhe'eesi.»
18Sakaria malaykamo guri báy, «Kangwsíng án adór ngur tsaahh? Asma án a aako, nee harer'eé' a aamár aa qaroó diin.»
19Malaykamo iri oó', «Án a Gabrieli, kudá' geeraá Mungú i dirií'. Nee aníng tina ya/aáw nee kuúng niwa axweesaan, nee ya/abtoorí hho' ngiwa dirógií oo'. 20Hám ga/aaweegáy, a afawasli tleehhít, axweesani a harslaaqát, ay bál deeloodá' kaangwí i boo/i. Asma axweesante'eé' aga ya/aandiiká. Ala iqo bó/ qoomaarós bira xeér.»
21Mukdá' Sakaríá daamaaraám iri waa/oó/ as niwa baraá Doó Mungú wa tliík. 22Niwa ti'iít, naxés amor'ín i axweesani ngiwa aslayká, kari tsaáhh adór iigu'utu ngura sláy baraá Doó Munguhe. Iri amor'ín i dabár axweés, iri sangw axweesántí ki/iiká.
23Deelór baalaqaasirós iwa fák, iri do'ós i waátl. 24Deeloodá' iwa waaráhh, hareerós Elisabeti iri tsít, iri dó'wá iwiiwít slahheeraá kooane, i kat, 25«Adoorí an tidá' Aako naa aníngií tleéhh qoomár iwa gurií baá/, nee mureekesay'eé' kudá' nira hotaatiím tla/ángw muk'eene gwa hingeés.»
Xwaylár Yesu kawa geerií oó'
26Qoomár tsiihoó Elisabeti tawa slehheeri lahhoó', malaykamo Gabrieli kuna ya/aáw nee Mungú ay gixsár Galilaya, ar ta babay Nasareti, 27amór dasír /amaatliito'o tooka ta lehhiiti nee heeko ta bay Yosefu oo tlahhoó Daudi. Umuú /amaatliito'oodá' a Maria. 28Malaykamo iri baraá do'ós i dáh iri oó', «Laawaay, kír tsuuqa iga sleer. Aako nee kiíng a dinkwa.»
29Inós iri ló'wa amooqwát asma /aymi'iidá', iri baraá muunaáwós i ó', «Laawaaywí a laawoó adoomá?» 30Malaykamo gari báy, «Maria ma da'ayuutaar, asma tsuuqaá Mungú iga sleér. 31Ga/aaweegáy, a tsít, na/oó garma kway xwayluúr. Umuuwós kway beer Yesu. 32Kwí uraay gu sláy, ku bay Garmoó Kuduú Gawa. Nee Aakoó Mungú gu waawuti'iimár Daudi i haniis, gídaabá waawuti'iimár baabuúwós. 33Hhay Yakobo gan sawaawuti'ín kureerisleém, nee alhhe'eesoó waawuti'iimarós i kaahh.»
34Maria malaykamo guri beér, «Adoosí ta kat adór ir tleehharut, asma án taa duuxiiká.»
35Malaykamo gari báy, «Qeeruú hhoohhoó' oo Mungú ni dirók i hardah, nee /uuruú Kudá' Gáwtí dirií' kiíng i tuuntuuk. Gawaá adoorihe na/oó ta laqwaali ku hhoohhoó', kuri bay Garmoó Mungú. 36Slám malé ale mar'afto'oorók Elisabeti na/oó garmaawo a tsiiháy baraá diimaywose. Slahhaangwí oo lahhoó', inósaadá' geeraawo tawa kaahi a kampeeri. 37Asma dír Munguhe gár ya/aamaaká i káhh.»
38Maria iri ó', «Án a lawaalo'ór Aako. Adoodá' taa ó' daanduueene i tleehharut.» Malaykamo iri quútl dirose.
Maria Elisabeti ngiwa taaqweesár eér
39Maria deeloodae iri tleér ar gaanslaay ay baraá yaamaá tlom'i ay dír gixsarka wák ar yaamaá Yudea. 40Iri dát baraá doó Sakaria, Elisabeti gari taaqwés. 41Elisabeti laawoó Maria nguwa axás, na/oó niiná iri neét baraá guruuwós wa ale, Elisabeti kari hatsiís Qeeruú hhoohhoó' oo Munguhe. 42Iri afór qwal/amaayér ar tsé', iri ó', «Kiíng taa tsuúq baraá /ameenaaro, nee na/oó ta xwayluúr kwaa tsuúq sleeme. 43Adoorí adór ira tleehharút laarí tam aayír Aakooeé' niwa amor'eé' keér? 44Asma siiwadár kilá' án afór laawaaywók ngiwa axaás, na/oó niiná iri baraá guruueé' wa neét ar qwala/. 45Amohhoouso'o a tidá' aa haratlinti', asma tidá' Aako ngaa báy i bó/.»
Daa'ángw Maria
46Maria iri ó',
«Muunaáeé' adór Aako kur úr gaa tsaáhh,
47nee qeeruueé' in Munguú saqwalalaa/, Ba/amusmooeé',
48asma lawaalo'oorós ar liitlaakw gaa gurtláy.
Ga/aaweek, iimír hamihe qari sleémeero án i beer tidá' tsuuqa gaa sleer,
49asma Kudá' /Uuruú koóm án iga muruú urén i tleéhh.
Nee umuuwós ku Hhoohhoó'.
50Nee gurtleemuuwós i kumaamiit umuúqo qarto
dír kudá' inós ngu ilaiwawa/a'a.
51Kángw úr gwa tleéhh ar /uuruú dakós,
Kudá' daara/aamá' baraá inslawoó muner'ine gaa diyaá/.
52Waawitá gwa hingeés baraá waawuti'iimar'ine.
Kudá' liitlakwen gaa uráy haniís.
53Awa qwariitá' gaa aaxiís ar muruú hhó',
nee daqaare gaa tawó ki/ís.
54Lawaalmoowós Israeli ngwa alee/iisár áy.
Gurtleemuuwós gwa insláy,
55kudá' aa al'axweés dír baabi'iirén,
dír Abrahamu nee xwaylarós ay alhhe'eesay wasle.»
56Maria nee Elisabeti tari alhoót afi qoomár slahheeri tám, aluuwo iri wátl amór do'ós.
Yohanedá' Baatimaamiís kuwa laqwaál
57Deelór xwaylár Elisabeti iwa xeér, na/oó garma gway xwayluúr. 58Inslaawaywós nee mar'eefoowós kari axaás adór Aako ngira ló'wa gurtláy, sleémeero nee inose tari alqwalalaá/.
59Bál dakaate na/aay kuri hheehhe'eesár áy. Umuú geera kway tsattá wa slai a umuú baabuúwós Sakaria. 60Ala aayoorós iri ó', «Á'a, uma a kwisingeeká, umuuwós a Yohane.»
61Kari báy, «Heé umuusíng i kaahh baraá mar'eefowoge.» 62Tari dabár ilawaáts amór baabuúwós, áx inós umuú i slai a heemá.
63Peehhi gari firín, iri gawaadií gooín iri oó', «Umuuwós a Yohane.» Sleémeero adoodá' kari waa/oó/. 64Hamtidár kilae tsifraangós iri wanana'aát afkós axweesani gari ya/án iri axweés, Mungú gway xirfayeemiís. 65Múk yaamaá iisaapaydá' sleémeero tari da'ayuut, nee kaangwí aa tleehharuut sleémeero iri hardáh ay baraá yaamaá tlom'aá Yudea sleémeero. 66Muu sleémeero oo kaangwí gwa axaas, kuri baraá muner'ín i qaás, ta kaahi, «Na/aywí aluuwo a heé adoomá?» Asma /uuruú Aako i baraawós.
Aaru'uumár Sakaria
67Sakaria, baabuú Yohane kuri hatsiís Qeeruú hhoohhoó' oo Munguhe, iri aarín i kaahi,
68«Aakoó Munguú Israeli i xirfuuti,
asma aa dír mukósií hardáh nguwa gweeri.
69Ba/amusmoorén oo /uuruú koóm ngwa sláy
baraá tlahhoó lawaalmoowós Daudi wa ale,
70adoodaádá' ngira qaroó oó'
ar afér aaruuseerós ar hhohho',
71tiwa ba/amisi dír wakuuseerene
nee baraá dabaá kudá' sleémeero atén ti ahhiita'a.
72Baabi'iirén gina gurtleemuú wa ár,
alqadoorós tidá' hhoohhoo' gari insláy,
73tidá' aa qaroó lo'ór wa /aáy dír baabuúrén Abrahamu tiwa tsuuqi,
74nee tiwa gweeri baraá dabaá wakuuseerene,
nee kuwa sagadiyuusaan ar dae wasle,
75nee ar hhohhoaari
nee ar hotaá ganaa'á'
deelór slafingwrén sleémeerowo.
76Nee ná/aay, kuúng sleeme tu bay
aarusmoó Kudá' Gáwtí dirií',
asma geeraá Aako in hát,
as luhuuwós kiwa amohhe'es,
77nee kángw ba/ama kuwa dír mukós i xu'utis
ar tlakweemaaín kiwa gurtlay
78ar gurtleemuú Munguúrén.
Kwí gwa/aateemaá dooraá dahhá'
ngi dirén i hardahaas,
79as kudá' baraá giwtír i diriiá'
nee kudá' baraá mahhtír gwa'ara
ngiwa i gwa/aatiya',
nee as atén tiwa gan'aasi
baraá loohír amór waydií hardah.»
80Na/aydá' iri uráy, /uuruuwós iri doogín oo qeeru. Iri baraá darmuú wa hoót ay baalaadá' iwa amór múk Israelírí ti'iít.
Currently Selected:
LUKA 1: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
LUKA 1
1
Gár kitaábu kusa gooín
1Amór Teofíló xiríf. Múk yaariír kángw muruudá' yaariír aa tleehharuut direne gwaa iiár gooiro, 2adór kungura atén i alki/iít nee mukduú aáng gwa ar ar ilaaín iimír geeraá wa ale, nee oo axweesantadá' gaa alki/iit. 3Anuú kilá' kaangwí ugwa ló'wa tsee/aariím iimír amoodár iimu/úngw wa ale. Án ngi slaá' sleeme ka hhoo' ngiwa kuúng i gooiim adór umuúqo gaaro ira tleehharút, 4as kahhó' kuúng kawa tsahh adór tar ló' tidá' kuúng tuwa intsaahhatimís.
Xwaylár Yohánedá' Baatimaamiís kawa geerií oó'
5De'emaá waawutmooko yaamaá Yudea ta bay Herode, kaahamusmooko Mungú i deer. Umuuwós a Sakaria, oo bartá múk Abiya. Hareerós ar tlahhoó guruú doó Aroni, umuuwós a Elisabeti. 6Inooín tsaraawo a múk hota ganaá' dír geeraá Munguhe, hara'ayár Aako sleémeero kana óh, nee axweesantós adoodá' ir hariin. 7Ala inooín ta na/oó konká, asma Elisabeti a kampeeri, nee inooín tsaraawo naa diné'.
8Looarka wake Sakaria iwa gadiyér kaahamusi'iimár tleehhi dír geeraá Munguhe, qoomár baalaqaasír múk bartós, 9inós kuna tsawaár, adoodá' /iisí kaahamuusér Mungú i tlehhaahhit, iwa dahi baraá Doó Aako as kahhó' ilahhooár mooyángw tsuú' ngiwa da/i dír Mungú. 10Qoomaadá' mooyángw tsuú' kuwa da/aa/an, boo/oó muu sleémeero i tsee/aá wa firiirín.
11Malaykamoó Aako guri harati'iít, aa sihhiít bihhaá doó /iyáy awa kitangwdá' mooyángw tsuú' kuwa da/a/an. 12Sakaria nguwa ár iri amoqwaár, iri da'ayuút. 13Ala malaykamoodá' guna báy, «Sakaría, ma da'ayumiitaar, asma firoorók kaa axaás, nee hareerók Elisabeti na/oó garma gu xwayluúr. Umuuwós ku beer Yohane. 14Kuúng tay qwalá/ tay bará/, nee múk yaariír xwaylarós gay saqwalalaa/. 15Asma uraay gu sláy dír Aakoowo. Difaái ga baloó wahiiká laqaá umuúqo gár ooniitimisa. Inós ku hatsiis Qeeruú hhoohhoó' oo Munguhe iimír iwa baraá guruú aayoórí kahhi. 16Múk yaariír oo Israeli gu amór Aakoó Munguúíní ki/is. 17Inós in geeraá Aakoó wa hi'iit ar muunuú adór kuduú Eliya nee /uuruuwós, as munér baabi'i ngiwa warqeesi iwa amór na/ií ki/, nee mukdá' iiawaslén nguwa fuqurángw hotaá ganaa'á' i slay, as múk Aako nguwa geerií amohhe'eesi.»
18Sakaria malaykamo guri báy, «Kangwsíng án adór ngur tsaahh? Asma án a aako, nee harer'eé' a aamár aa qaroó diin.»
19Malaykamo iri oó', «Án a Gabrieli, kudá' geeraá Mungú i dirií'. Nee aníng tina ya/aáw nee kuúng niwa axweesaan, nee ya/abtoorí hho' ngiwa dirógií oo'. 20Hám ga/aaweegáy, a afawasli tleehhít, axweesani a harslaaqát, ay bál deeloodá' kaangwí i boo/i. Asma axweesante'eé' aga ya/aandiiká. Ala iqo bó/ qoomaarós bira xeér.»
21Mukdá' Sakaríá daamaaraám iri waa/oó/ as niwa baraá Doó Mungú wa tliík. 22Niwa ti'iít, naxés amor'ín i axweesani ngiwa aslayká, kari tsaáhh adór iigu'utu ngura sláy baraá Doó Munguhe. Iri amor'ín i dabár axweés, iri sangw axweesántí ki/iiká.
23Deelór baalaqaasirós iwa fák, iri do'ós i waátl. 24Deeloodá' iwa waaráhh, hareerós Elisabeti iri tsít, iri dó'wá iwiiwít slahheeraá kooane, i kat, 25«Adoorí an tidá' Aako naa aníngií tleéhh qoomár iwa gurií baá/, nee mureekesay'eé' kudá' nira hotaatiím tla/ángw muk'eene gwa hingeés.»
Xwaylár Yesu kawa geerií oó'
26Qoomár tsiihoó Elisabeti tawa slehheeri lahhoó', malaykamo Gabrieli kuna ya/aáw nee Mungú ay gixsár Galilaya, ar ta babay Nasareti, 27amór dasír /amaatliito'o tooka ta lehhiiti nee heeko ta bay Yosefu oo tlahhoó Daudi. Umuú /amaatliito'oodá' a Maria. 28Malaykamo iri baraá do'ós i dáh iri oó', «Laawaay, kír tsuuqa iga sleer. Aako nee kiíng a dinkwa.»
29Inós iri ló'wa amooqwát asma /aymi'iidá', iri baraá muunaáwós i ó', «Laawaaywí a laawoó adoomá?» 30Malaykamo gari báy, «Maria ma da'ayuutaar, asma tsuuqaá Mungú iga sleér. 31Ga/aaweegáy, a tsít, na/oó garma kway xwayluúr. Umuuwós kway beer Yesu. 32Kwí uraay gu sláy, ku bay Garmoó Kuduú Gawa. Nee Aakoó Mungú gu waawuti'iimár Daudi i haniis, gídaabá waawuti'iimár baabuúwós. 33Hhay Yakobo gan sawaawuti'ín kureerisleém, nee alhhe'eesoó waawuti'iimarós i kaahh.»
34Maria malaykamo guri beér, «Adoosí ta kat adór ir tleehharut, asma án taa duuxiiká.»
35Malaykamo gari báy, «Qeeruú hhoohhoó' oo Mungú ni dirók i hardah, nee /uuruú Kudá' Gáwtí dirií' kiíng i tuuntuuk. Gawaá adoorihe na/oó ta laqwaali ku hhoohhoó', kuri bay Garmoó Mungú. 36Slám malé ale mar'afto'oorók Elisabeti na/oó garmaawo a tsiiháy baraá diimaywose. Slahhaangwí oo lahhoó', inósaadá' geeraawo tawa kaahi a kampeeri. 37Asma dír Munguhe gár ya/aamaaká i káhh.»
38Maria iri ó', «Án a lawaalo'ór Aako. Adoodá' taa ó' daanduueene i tleehharut.» Malaykamo iri quútl dirose.
Maria Elisabeti ngiwa taaqweesár eér
39Maria deeloodae iri tleér ar gaanslaay ay baraá yaamaá tlom'i ay dír gixsarka wák ar yaamaá Yudea. 40Iri dát baraá doó Sakaria, Elisabeti gari taaqwés. 41Elisabeti laawoó Maria nguwa axás, na/oó niiná iri neét baraá guruuwós wa ale, Elisabeti kari hatsiís Qeeruú hhoohhoó' oo Munguhe. 42Iri afór qwal/amaayér ar tsé', iri ó', «Kiíng taa tsuúq baraá /ameenaaro, nee na/oó ta xwayluúr kwaa tsuúq sleeme. 43Adoorí adór ira tleehharút laarí tam aayír Aakooeé' niwa amor'eé' keér? 44Asma siiwadár kilá' án afór laawaaywók ngiwa axaás, na/oó niiná iri baraá guruueé' wa neét ar qwala/. 45Amohhoouso'o a tidá' aa haratlinti', asma tidá' Aako ngaa báy i bó/.»
Daa'ángw Maria
46Maria iri ó',
«Muunaáeé' adór Aako kur úr gaa tsaáhh,
47nee qeeruueé' in Munguú saqwalalaa/, Ba/amusmooeé',
48asma lawaalo'oorós ar liitlaakw gaa gurtláy.
Ga/aaweek, iimír hamihe qari sleémeero án i beer tidá' tsuuqa gaa sleer,
49asma Kudá' /Uuruú koóm án iga muruú urén i tleéhh.
Nee umuuwós ku Hhoohhoó'.
50Nee gurtleemuuwós i kumaamiit umuúqo qarto
dír kudá' inós ngu ilaiwawa/a'a.
51Kángw úr gwa tleéhh ar /uuruú dakós,
Kudá' daara/aamá' baraá inslawoó muner'ine gaa diyaá/.
52Waawitá gwa hingeés baraá waawuti'iimar'ine.
Kudá' liitlakwen gaa uráy haniís.
53Awa qwariitá' gaa aaxiís ar muruú hhó',
nee daqaare gaa tawó ki/ís.
54Lawaalmoowós Israeli ngwa alee/iisár áy.
Gurtleemuuwós gwa insláy,
55kudá' aa al'axweés dír baabi'iirén,
dír Abrahamu nee xwaylarós ay alhhe'eesay wasle.»
56Maria nee Elisabeti tari alhoót afi qoomár slahheeri tám, aluuwo iri wátl amór do'ós.
Yohanedá' Baatimaamiís kuwa laqwaál
57Deelór xwaylár Elisabeti iwa xeér, na/oó garma gway xwayluúr. 58Inslaawaywós nee mar'eefoowós kari axaás adór Aako ngira ló'wa gurtláy, sleémeero nee inose tari alqwalalaá/.
59Bál dakaate na/aay kuri hheehhe'eesár áy. Umuú geera kway tsattá wa slai a umuú baabuúwós Sakaria. 60Ala aayoorós iri ó', «Á'a, uma a kwisingeeká, umuuwós a Yohane.»
61Kari báy, «Heé umuusíng i kaahh baraá mar'eefowoge.» 62Tari dabár ilawaáts amór baabuúwós, áx inós umuú i slai a heemá.
63Peehhi gari firín, iri gawaadií gooín iri oó', «Umuuwós a Yohane.» Sleémeero adoodá' kari waa/oó/. 64Hamtidár kilae tsifraangós iri wanana'aát afkós axweesani gari ya/án iri axweés, Mungú gway xirfayeemiís. 65Múk yaamaá iisaapaydá' sleémeero tari da'ayuut, nee kaangwí aa tleehharuut sleémeero iri hardáh ay baraá yaamaá tlom'aá Yudea sleémeero. 66Muu sleémeero oo kaangwí gwa axaas, kuri baraá muner'ín i qaás, ta kaahi, «Na/aywí aluuwo a heé adoomá?» Asma /uuruú Aako i baraawós.
Aaru'uumár Sakaria
67Sakaria, baabuú Yohane kuri hatsiís Qeeruú hhoohhoó' oo Munguhe, iri aarín i kaahi,
68«Aakoó Munguú Israeli i xirfuuti,
asma aa dír mukósií hardáh nguwa gweeri.
69Ba/amusmoorén oo /uuruú koóm ngwa sláy
baraá tlahhoó lawaalmoowós Daudi wa ale,
70adoodaádá' ngira qaroó oó'
ar afér aaruuseerós ar hhohho',
71tiwa ba/amisi dír wakuuseerene
nee baraá dabaá kudá' sleémeero atén ti ahhiita'a.
72Baabi'iirén gina gurtleemuú wa ár,
alqadoorós tidá' hhoohhoo' gari insláy,
73tidá' aa qaroó lo'ór wa /aáy dír baabuúrén Abrahamu tiwa tsuuqi,
74nee tiwa gweeri baraá dabaá wakuuseerene,
nee kuwa sagadiyuusaan ar dae wasle,
75nee ar hhohhoaari
nee ar hotaá ganaa'á'
deelór slafingwrén sleémeerowo.
76Nee ná/aay, kuúng sleeme tu bay
aarusmoó Kudá' Gáwtí dirií',
asma geeraá Aako in hát,
as luhuuwós kiwa amohhe'es,
77nee kángw ba/ama kuwa dír mukós i xu'utis
ar tlakweemaaín kiwa gurtlay
78ar gurtleemuú Munguúrén.
Kwí gwa/aateemaá dooraá dahhá'
ngi dirén i hardahaas,
79as kudá' baraá giwtír i diriiá'
nee kudá' baraá mahhtír gwa'ara
ngiwa i gwa/aatiya',
nee as atén tiwa gan'aasi
baraá loohír amór waydií hardah.»
80Na/aydá' iri uráy, /uuruuwós iri doogín oo qeeru. Iri baraá darmuú wa hoót ay baalaadá' iwa amór múk Israelírí ti'iít.
Currently Selected:
:
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.