Génesis 38
38
Judamanta Tamar sutiyoq warmimantawan
1Chay tiempopin Judá sutiyoq runaqa wawqenkunamanta t'aqakuran. Hinaspan Adulam nisqa llaqtamanta Hira sutiyoq runapa wasinman tiyaq riran. 2Chaypin Judaqa Canaán *nacionmanta Súa sutiyoq runapa ususinta reqsiran. Hinaspan paywan casarakuspa puñuran. 3Hinaqtinmi chay warmiqa onqoq rikhuriran. Hinaspan huk qari wawata onqokuran. Chay wawamanmi sutinta churaran Er sutiwan. 4Chaymantan Judapa warminqa yapamanta onqoq rikhuriran. Hinaspan huk qari wawata onqokuran. Chay wawamanmi sutinta churaran Onán sutiwan. 5Chaymanta huk tiempo pasaruqtinmi, Judapa warminqa yapamanta onqoq rikhuriran. Hinaspan huk qari wawata onqokuran. Chay wawamanmi sutinta churaran Sela sutiwan. Quezib sutiyoq lugarpi tiyashaqtinkun, chay wawataqa onqokuran.
6Chaymantan Judaqa kurak kaq Er sutiyoq wawanpaq warmita mashkapuran. Hinaspan Tamar sutiyoq warmiwan casarachiran. 7Ichaqa Judapa kurak kaq wawan Er runaqa, mana allinkunata ruwaspan kawsaran. Sayna ruwasqanmi Señor Diospa ñawpaqninpiqa mana allinchu karan. Chaymi Ertaqa Señor Dios wañuchipuran. 8Hinaqtinmi Judaqa wawan Onanta niran:
—Wawqeykipa viudanwan casarakuy. Hinaspa cuñadon kasqayki deberniykita cumpliy, saynapi wawqeykipa miraynin kananpaq, nispa.
9Ichaqa Onanqa yacharanmi miraynin kaqtinqa, mana paypa kananta. Chaymi wawqenpa viudanwan sapa kutin puñuspaqa, chay warmi onqoq rikhurinanta mana munaspa, mukhuntaqa pampallaman sut'uchiran. Saynataqa wawqenpa miraynin mana kananta munaspanmi ruwaran. 10Onanpa chay ruwasqanmi, Señor Diospa ñawpaqninpiqa mana allinchu karan. Chaymi paytapas Señor Diosqa wañuchipuran. 11Chaymi Judaqa qachunnin Tamarta niran:
—Papaykipa wasinman rispa, hina viudalla qepakuy, waway Sela wiñanankama, nispa.
Judaqa saynataqa niran khaynata piensaspanmi: “Kay warmiwan casarachiqtiyqa, waway Selapas wawqenkuna hinan wañurunman”, nispa.
Hinaqtinmi Tamarqa papanpa wasinman ripuspa, chaypi tiyaran.
12Unay tiempo pasaruqtinñan Judapa warmin wañukapuran. Chay warmiqa Súa sutiyoq runapa ususinmi karan. Hinaqtinmi Judaqa warminmanta lutokusqan tiempo cumplirukuqtin, Timnat sutiyoq llaqtata ovejankunapa millmanta rutuq riran. Hinaspan paytaqa Hira sutiyoq amigon compañaran. Hiraqa Adulam llaqtayoq runan karan. 13Hinaqtinmi wakin runakunaqa qachunnin Tamarman khaynata willaranku:
—Suegroykin ovejankunapa millmanta rutuq rishan, Timnat llaqtata, nispa.
14Chaymi Tamarqa viuda p'achanta ch'utikuran. Hinaspan huk velowan umanman churakuspa, uyanta tapakuran, saynapi pipas payta mana reqsinanpaq. Hinaspan Enaim llaqtaman haykunapi tiyaykuran; chay tiyasqanqa karan Timnat llaqtaman rinapaq ñan patapin. Tamarqa yacharanmi, cuñadon Selaqa ña casarakunan tiempopiña kasqanta hinallataq suegronqa prometekusqanman hina wawanta casarakunanpaq mana entregasqantawan ima.
15Judaqa chay warmita uyan tapasqata rikuspan, piensaran qenlli vidapi puriq warmi kananpaq. 16Hinaspan Judaqa chay warmipa uyan tapasqa kasqanrayku, mana reqsiranchu qachunnin kasqanta. Chaymi chay warmipa tiyasqanman ashuyuspa khaynata niran:
—Qanwanmi puñuyta munani, nispa.
Hinaqtinmi chay warmiqa khaynata contestaran:
—¿Imatataq qowanki noqawan puñunaykipaqrí? nispa.
17Hinaqtinmi Judaqa khaynata niran:
—Noqaqa huk kapichatan apachimusqayki, nispa.
Chaymi chay warmiqa khaynata contestaran:
—Allinmi. Saynaqa huk prendatayá saqeway, kapichata apachimuwanaykikama, nispa.
18Chaymi Judaqa niran:
—¿Ima prendatataq saqenaytari munankí? nispa.
Hinaqtinmi chay warmiqa niran:
—Watuyoq selloykita hinallataq makiykipi hap'isqayki bastonniykitawan qoway, nispa.
Chaymi Judaqa chay warmipa mañakusqanta qoran. Hinaspan chay warmiwan puñuran. Hinaqtinmi chay warmiqa onqoq rikhuriran. 19Chaymantan Tamarqa hatarispa ripuran. Hinaspan uyan tapakusqan velota orqokuspa, kaqmanta viuda p'achanwan churakuran.
20Chaymantan Judaqa huk kapichata chay warmiman apachimuran, Adulam llaqtayoq amigon runawan, saynapi Judapa saqemusqan prendankunata chay warmimanta chashkimunanpaq. Ichaqa Judapa chay amigonqa manan chay warmitaqa tariranñachu. 21Chaymi payqa chay lugarpi tiyaq runakunata tapukuran:
—¿Maypitaq kashan Enaim ñan patapi tiyaq qenlli vidapi puriq warmirí? nispa.
Hinaqtinmi chay tapukusqan runakunaqa khaynata contestaranku:
—Manan kaypiqa ni pipas qenlli vidapi puriq warmiqa kanchu, nispanku.
22Chaymi chay Adulam llaqtayoq runaqa, Judapa kasqanman kutipuspa, khaynata niran:
—Manan chay warmitaqa tarimunichu. Hinaspapas chaypi tiyaq runakunata tapukuqtiymi, khaynata nimuwanku: “Manan kaypiqa ni pipas qenlli vidapi puriq warmiqa kanchu”, nispanku.
23Hinaqtinmi Judaqa niran:
—Saynaqa chay prendakuna saqemusqaywanyá qepakuchun, saynapi burlakuspa pipas ama asipayawananchispaq. Noqaqa chay ofrecekusqay kapichataqa apachiraykin; ichaqa chay warmitaqa manan tarimurankichu, nispa.
24Chaymantan yaqa kinsa killa hina pasaruqtin, Judamanqa khaynata willaranku:
—Qachunniyki Tamarmi qarikunawan huchallikuspa purin. Chayraykun wiksayakuspa onqoq kashan, nispa.
Chayta uyarispan Judaqa altota qaparispa khaynata niran:
—Orqomuychis; hinaspa k'anaychis, nispa.
25Ichaqa Tamarta orqomushaqtinkun, payqa suegronman khaynata willachimuran:
—Kay prendakunapa dueñonmi wiksayachiwaran. Qawariy kay watuyoq sellota hinallataq kay bastontapas, pipa kasqanta reqsinaykipaq, nispa.
26Hinaqtinmi Judaqa, chay prendakuna paypa kasqanta reqsikapuspa, khaynata niran:
—Paymi noqamantaqa aswan más allin justiciata ruwaq warmiqa, Sela sutiyoq wawaywan mana casarachisqayrayku, nispa.
Hinaspan Judaqa manaña ni hayk'aqpas Tamarwanqa puñuranñachu.
27Tamarpa onqokunan tiempo chayaramuqtinmi, wiksanpiqa mellizokuna karan. 28Tamar onqokushaqtinmi, huknin kaq wawaqa makinta orqomuran. Hinaqtinmi parteraqa chay wawapa makinta hap'ispa, puka watuwan wataran. Hinaspan khaynata niran:
—Kay kaqmi primerta nacemuq wawaqa, nispa.
29Ichaqa chay wawaqa chay ratollapin makinta ukhuman kutiyachiran. Hinaqtinmi huknin kaq wawa primerta nacemuran. Chaymi parteraqa khaynata niran:
—¿Imaynatataq qanri primerta lloqsimunaykipaqri, campota kicharakamunkí? nispa.
Chaymi parteraqa chay primer naceq wawata Fares sutiwan suticharan. [Nota: Hebreo rimaypiqa “Fares” sutiqa “kichay” ninantan nin.] 30Chay primer kaq wawapa nacemusqan qepantañan, huknin kaq wawaqa nacemuran puka watuwan makinpi watayusqa. Chaymi chay qari wawamanqa Zara sutiwan sutinta churaranku. [Nota: Hebreo rimaypiqa “Zara” sutiqa “puka” otaq “k'anchariq” ninantan nin.]
Currently Selected:
Génesis 38: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
