Genesis 16

Agar walmictam wawintinta alupacun

1Abrampa walmin Saraimi mana waćhacü cala. Ñatac Egipto lädupïtam uyway nunan Agar śhutiyu walmi cala. 2Chaymi Sarai wayapan Abramta nin: “Tayta Dios wawicta mana uyämaptinꞌa, uywayninchic walmićhuꞌari chulicüluy; icha chaynüpa wawiyu licalïlümanpis” nil.

Niptinmi walmin nishanta Abram awnïla. 3Chaymi Sarai chay Egipto uywaynin Agar walmicta Abramman uycüla walminnu cananpä. Cay pasala ćhunca wataña Canaan malcaćhu yaćhayalcaptinmari. 4Chaymi Abram Agarwan cuscäluptin patayu licalïla. Chaynu patayu caśhanta tantiacülulmi patrünan Saraita mana allinpäña licayta allacuycula. 5Chaymi wayapanta Sarai nin: “Anmi juchayu canqui, caynu jamuyämänanpä. Cay uyway walmiwan cunsintishaccämi canan patayu licalilcul mana allinpaña licacayäman. ¡Quiquin Tayta Dios mayanninchic juchayu caśhanchictapis cäraycamäśhun!” nil.

6Niptinmi Abram: “Cay uyway walmi maquiquićhümi cayan; munaśhayquitanümi imactapis lulanquiman” nin.

Chaymi Agarta ñacachiyta Sarai allacuycula; jinaptinmi Agar ayiculläla.

7Chaypïtam chunyä pampap pucyunćhu Agar cayaptin Tayta Diospa anjilnin talïlun. Chay pucyu cayan Shur nishanman linaćhümi. 8Chayćhümi anjilca nin: “Saraipa uywaynin am Agar, ¿maypïmi śhayämunqui? ¿Maytatacmi liyanquipis?” nil.

Niptinmi Agar: “Patrüná Saraipïmi ayiyá” nin.

9Anjilcäñatacmi: “Patrünayqui Saraiman cutil, mana nunatucullal manchacuywan maquinman ćhulacuy” nin.

10Nilcuśhanpïmi:

“Mana fintaytapis atipanactam

milayniquita milaycachishä.

11Patayümi cayanquipis;

walaśhtatacmi ishyacunquipis.

Paypa śhutinta Ismaeltam ćhulanqui,

Tayta Dios llaquicuyniquita uyaliycuśhuśhayquipïta.#16.11 Ismael ninanꞌa hebreo limayćhu “Tayta Dios uyalin” ninanmi.

12Cay Ismaelmi munti aśhnunu cacunꞌa.

Pay lluywanmi maꞌanacunꞌa,

lluy nunapis paywantacmi tacanacuculcanꞌa.

Lluy wawꞌi-caśhancunapis mana allinpam licapäcunꞌa” nin.

13 Tayta Diospa limaśhan-laycum Agar śhutichäla: “Tayta Diosmi licamäní niywan. Licamänïta licaśhäpi manam ishcayäná canchu” nil. 14Chaymi chay Bered malcawan Cades malcap ćhawpinćhu püsuctapis: “Licamäní cawsä Tayta Diospa püsun” nil śhutichäla.

15Ñatac Agar,#Gal 4.22. walaśhta ishyacüluptinmi Abram śhutichäla Ismaelwan. 16Abram pusä ćhunca sütayu (86) watanta liyaptinmi chulin Ismaelta Agar ishyacüla.

Currently Selected:

Genesis 16: QVW

Highlight

Copy